Wanzole wa Samuele 6:1-23
6 Davidi okutakese diaka makesa mawonso mana masundidi muna Isaele, 30.000.
2 Davidi yo wantu awonso bakala yandi, bele kuna Bale-Yuda batwasa Nkel’a Nzambi aludi,+ ina nkangu bayikilanga e nkumbu a Yave a vu,+ ona ovuende vana kunda kia kimfumu vana ntandu a* akelubi.+
3 Bamantisi Nkel’a Nzambi aludi muna kalu diampa,+ bavaikisi yo muna nzo a Abinadabi+ ina vana kundubulu; Uza yo Akio, wan’a Abinadabi, yau badiatisanga e kalu diampa.
4 Banete Nkel’a Nzambi aludi tuka muna nzo a Abinadabi ina vana kundubulu, Akio okedi kuna ntwal’a Nkela.
5 Davidi ye nzo a Isaele yawonso, bakembele vana vena Yave ye mpila zawonso za masikilu ma sipelese, kokolo, matutu,+ yingoma-ngoma,+ nsasi ye yimbalu.+
6 Kansi, vava balweke vana bundilu dia Nakone, Uza olambwidi koko, osimbidi Nkel’a Nzambi aludi,+ kadi fioti fiasala e ngombe nga zabwisa yo.
7 Muna kuma kiaki, Yave ofungidi kikilu Uza o makasi, Nzambi aludi umvondele vâna+ mu kuma kia kondwa kwandi kwa vumi,+ ofwididi vana ndambu a Nkel’a Nzambi aludi.
8 Kansi Davidi ofwemene* wau vo Yave ofungidi Uza makasi; e fulu kiakina kiyikilwanga vo Perese-uza* yamu unu kiaki.
9 E lumbu kiakina, Davidi omwenene Yave wonga,+ ovovele vo: “Aweyi ndenda natina Nkel’a Yave kuna mbanz’ame?”+
10 Davidi kazolele diaka nata Nkel’a Yave ko kuna kakala, kuna Mbanz’a Davidi.+ Kansi, Davidi onete yo kuna nzo a Obede-edome+ wa Ngati.
11 Nkel’a Yave ngonde tatu yakala muna nzo a Obede-edome wa Ngati, Yave osambwidi Obede-edome ye nzo andi yawonso.+
12 Disamwinu kwa Davidi wa Ntinu vo: “Yave osambwidi nzo a Obede-edome ye yawonso kena yau mu kuma kia Nkel’a Nzambi aludi.” I bosi, Davidi wele bonga Nkel’a Nzambi aludi kuna nzo a Obede-edome, onete yo kuna Mbanz’a Davidi ye kiese kiawonso.+
13 Anati+ a Nkel’a Yave vava badiata ntambi sambanu, Davidi okelele kimenga kia ngombe ye mbizi amazi.
14 Davidi wakinanga vana vena Yave ye ngolo zandi zawonso; Davidi wavuata kidukula kia lino.+
15 Davidi ye nzo a Isaele yawonso banete Nkel’a+ Yave ye kiese kiawonso+ ye zú dia mpungi.+
16 Kansi, vava Nkel’a Yave yalwaka muna Mbanz’a Davidi, Mikale+ wa mwan’a Saulu, otadidi vana zianela, omwene Davidi wa Ntinu otakuziokanga yo kina vana ntadisi a Yave; oyantikidi kumveza muna ntim’andi.+
17 Bakotese Nkel’a Yave muna saba kina Davidi kasumika, basidi yo vana fulu kiandi.+ I bosi, Davidi otambikidi tukau twangioka+ ye yimenga ya ungudi+ vana ntadisi a Yave.+
18 Vava Davidi kamene tambika tukau twangioka ye yimenga ya ungudi, osambwidi nkangu muna nkumbu a Yave a vu.
19 Vana ntandu, ovene kwa nkangu wawonso, i sia vo, ndonga yawonso a Isaele, akala ye akento, mbolo mosi yavindumuka nze nlunga, mbolo mosi yasiwa bundu ya nsanda ye mbolo mosi yasiwa uva zayuma. I bosi, o nkangu wawonso umwangane, konso muntu wele kuna nzo andi.
20 Davidi vava kavutukidi kasambula esi nzo andi, Mikale+ wa mwan’a Saulu wizidi wanana yandi. Ovovele vo: “Ekwe nzitisa kayizitisi o ntinu a Isaele o unu wau kayisenzekele vana meso ma ntaudi zandi z’akento za selo yandi, uyisenzekele nze zowa dia muntu!”+
21 Davidi ovovese Mikale vo: “Nkembelenge vana ndose a Yave, ona wansola ke mu se diaku ko ye nzo andi yawonso, ona wantumbika yakala se ntu a nkangu a Yave, Isaele.+ I dianu nkembelele vana vena Yave,
22 ikuyisakidika yo kuyikulula muna meso mame. Vo i ntaudi zamakento ana oyikidi, zitisa bekunzitisa.”
23 Dianu vo, Mikale+ wa mwan’a Saulu, kasidi wuta wana ko yamuna lumbu kia lufwa lwandi.
Mvovo vana yand'a lukaya
^ Nanga, “vana kati kwa.”
^ Yovo “okendalele.”
^ Ina ye nsasa vo: “Uza Ofusukilu Makasi.”
