Kimpovi 10:1-20
10 Wauna e mbwanzi zafwa zifwasilanga o mazi mansunga yo tesesa mo e nsudi, i wauna o uzowa wandwelo uzitilanga lutila ngangu yo nkembo.+
2 O ntim’a nkwa ngangu ukumfilanga muna nzila yambote,* kansi o ntim’a zowa ukumfilanga muna nzila yambi.*+
3 Muna konso nzila kekangalela o zowa, kekalanga ye ngindu zasikila ko,*+ osonganga kwa wantu awonso vo oyandi zowa.+
4 Avo makasi ma nyadi mafusukidi omu ngeye, kukatuka vana fulu kiaku ko,+ kadi o lulembamu masumu manene lulembekanga.+
5 Vena ye diambu diampasi mbwene oku nsi a ntangwa, e mpil’a vilwa uvangwanga kwa awana beyalanga:+
6 Amazowa besiwanga mu fulu yayingi yatunda, kansi ana bafwene* bakinu muna fulu yasakalala.
7 Mbwene e ntaudi zikangalelanga muna mvalu, kansi e mfumu bekangalanga kiamalu nga ntaudi.+
8 Ndiona otimunanga e wulu olenda mo bwa;+ ndiona owulanga yaka kia matadi olenda tatikwa kwa nioka.
9 Ndiona otimunanga matadi olenda lwala muna matadi momo, ndiona o pasulanga mavindi ma nti mu vonza kekuyisianga.*
10 Avo e sadilwa kia sengwa ke kina meno ko ye ke kilengelo ko, divava vo muntu kavanga ngolo zayingi. Kansi e ngangu zisadisa mu vua nluta.
11 Avo nioka itatikidi vitila yalemvolwa, ndiona ozeye toma nlemvola e nioka* kena diaka mfunu ko.
12 E mvovo mivaikanga muna nua wa nkwa ngangu dienga mitwasanga,+ kansi e befo ya zowa i lufwasu lwandi.+
13 E mvovo miantete mia nu’andi i uzowa,+ e mvovo miandi miansuka i ulau wasaka.
14 Kansi, o zowa okwamanene vova.+
O muntu kazeye ko dina divangama, nani olenda kunzayisa dina divangama vava kefwa?+
15 E salu kiangolo kia zowa yoyesa kikunyoyesanga, kadi kana nkutu e nzil’a kwendela kuna mbanza kazeye una ke sololwela yo ko.
16 Diavonza kwa nsi avo ntinu andi nleke,+ e mfumu zandi beyantikanga e nkinzi miau muna mene-mene!
17 Diakiese kwa nsi avo ntinu andi mwan’a nkwa zitu, e mfumu zandi bedianga muna ntangwa ifwene muna vutulwisa o nkuma, ke mu kolwa malavu ko!+
18 Mu kuma kia kimolo kiasaka, e miangu mia* nludi misotokele. Mu kuma kia moko mazebalala, e nzo inokene.+
19 E mbolo* ivangwanga mu vana e kiese, e vinyu ikitulanga e zingu se kiakiese;+ kansi e nzimbu zilungisanga e nsatu zawonso.+
20 Kusibi ntinu ko kana nkutu muna ngindu zaku,*+ kusibi mvuama ko muna suku diaku; kadi e nuni* ilenda nata e mvovo miaku,* e ma kina ye nsala kilenda samuna dina ovovele.
Mvovo vana yand'a lukaya
^ Mvovo wa sina: “una kuna koko kwandi kwalunene.”
^ Mvovo wa sina: “una kuna koko kwandi kwalumonso.”
^ Mvovo wa sina: “okondwa ntima.”
^ Yovo “amvuama.”
^ Nanga, “kafwete kuyikeba mu kuma kia mavindi momo.”
^ Mvovo wa sina: “o nkwa umbangu wa lubini.”
^ Yovo “o maleka ma.”
^ Yovo “madia.”
^ Nanga, “vana mfulu aku.”
^ Mvovo wa sina: “ma kitilumukanga kuna zulu.”
^ Yovo “e nsangu zaku.”
