Nki i Vuvu Kina Y’azolwa eto Afwa?

“O muntu ovo ofwidi, ng’okala una?” I kayuvula Yobi kolo kiayingi. (Yobi 14:14) Nanga mpe ngeye wayiyuvula wo kala. Aweyi lenda banza kele vikidi zaya vo dilendakana edi dia wanana y’azolwa aku, vava ntoto, muna zingu kiambote?

Wa, o Nkand’a Nzambi usianga nsilu: “O mafwa maku mekala yo moyo; . . . mefuluka.” Nkand’a Nzambi uvovele diaka vo: “Asongi bevwa nza, Besikila vo yakwele mvu.”—Yesaya 26:19; Nkunga 37:29.

Muna lenda kala ye vuvu kia ludi muna nsilu miami, tufwete teka zaya e mvutu za yak’eyuvu: Ekuma befwilang’o wantu? O mafwa akweyi bena? Aweyi tulenda zayil’eziku vo balenda zinga diaka?

Lufwa, y’edi Dikutulwakilanga ova Tufwanga

O Nkand’a Nzambi otoma dio kiesesanga vo kuna lubantiku Nzambi ka kana ko vo wantu bafwanga. Wavanga yakala yo nkento antete, Adami yo Eva, wabasia muna paradiso va ntoto yayikilwanga vo Edene, ye wabazaisa vo bawuta wana yo yalumuna lumbu lwau lua Paradiso yavana lwadi lungila va ntoto wawonso. Nanga mu kolamena kaka nkanikinu a Nzambi i badi fwila.​—Etuku 1:28; 2:15-17.

Adami yo Eva kebasidi vwa unsongi wa Nzambi mfunu ko bakolama kaka, i kuma diasilwa vo bafwete futa e tumbu kina bakanikinwa. “[Ovutuka] muna ntoto,” i kavova Nzambi kwa Adami, “kadi mûna wabongwa: kadi u ntoto wina, mu ntoto ovutuka.” (Etuku 3:19) Ekolo ka semeno ko, Adami kakala vo ko; okedi se ntoto. Ye, mu kuma kia kolama kwandi, yovo nsumuk’andi, Adami  watambul’etumbu kia vutuka muna ntoto, nze vava kalembi vo kala.

Ozevo o lufwa i kondwa kwa moyo. O Nkand’a Nzambi usonganga vo: “E mfutu esumu fwa, vo i lukau luangovo lua Nzambi, Moyo.” (Roma 6:23) Muna songa vo o lufwa i nkala a lembi zaya diambu, Nkand’a Nzambi uvovanga vo: “Kadi wantu bazeye wo vo fwa befwa, kansi afwa ke bazeye diambu ko.” (Kimpovi 9:5) O Nkand’a Nzambi uvovele vo, vava kefwanga o muntu: “O mwand’andi uvaika, muna ntoto kevutuka; Muna lumbu kiakina o makani mandi mavididi.”​—Nkunga 146:3, 4.

Kansi, wau vo Adami kaka yo Eva bakolama nsiku muna Edeni, w’ekuma yeto awonso se tufwilang’e? Ekuma kadi yeto awonso twawutuka kunima vava kiakala vo Adami okolamene kala, yeto awonso twavingil’efwa di’esumu diandi yo lufwa. Ne i una kesasilanga Nkand’a Nzambi: “Muna muntu mosi [Adami] i mwakotel’esumu muna nza, o lufwa mpe mun’esumu; i ngyandangiana luayandangian’o lufwa muna wantu awonso.”—Roma 5:12; Yobi 14:4.

Kansi, nanga vena y’ona o yuvula: ‘Nga wantu ka bena yo moyo ulembi fwanga ko uzinganga kunima lufwa?’ Engi belonganga ediadi, yo vova mpe vo o lufwa i nzila a kwendela ku moyo akaka. Kansi e ngindu zazi ke zitukanga mu Nkand’a Nzambi ko. Kinga tu, e Diambu dia Nzambi disonganga vo ngeye i moyo, vo o moyo aku i ngeye kibeni, ye ngolo zawonso za yindwila ye ntona zaku. (Etuku 2:7; Yeremiya 2:34; Ngana 2:10) Ye mpe Nkand’a Nzambi uvovele vo: “O moyo una usumuka, fwa ufwa.” (Yezekele  18:4) Ke vena fulu kana kimosi ko mu Nkand’a Nzambi kilonganga vo o muntu una yo moyo ulembi fwanga, kele vo e nitu ifwidi.

Wantu Aweyi Balenda Zingila Diaka

Esumu yo lufwa una luakota mu nza, Nzambi wasengomona ekani diandi vo o mafwa bavutuk’o zinga muna nzila lufuluku. I kuma Nkand’a Nzambi uvovele vo: “Abarayama . . . obadikidi wo vo o Nzambi olenda nkutu o fudila [mwan’andi Isaki] muna mafwa.” (Ayibere 11:17-19) Evuvu kia Abarayama ke kiakala kiankatu ko, kadi Nkand’a Nzambi uvovanga mu kuma kia Mpungu-ngolo vo: “Ke Nzambi a mafwa ko, Nzambi awana ben’e mioyo kaka: okala vo kadi, o wantu awonso muna yandi i bena.”​—Luka 20:37, 38.

Elo, o Nzambi a Mpungu-ngolo kavwidi kaka ngolo ko kansi una mpe yo luzolo lua fula wantu ana kasola. O Yesu Kristu yandi kibeni wavova: “Ke nusalukwa dio ko ediadi: kadi e ntangwa ikwiza, ina ikala vo awonso bena muna nkala bewa nding’andi bavaika.”​—Yoane 5:28, 29; Mavangu 24:15.

Ke vavioka kolo kiayingi ko tuka kavovela omama, o Yesu wa wanana yo mvumbi yanatwanga tuka mu mbanza  Naini a Yisaele. Mwan’etoko wa mwan’amosi kaka wa nkento ansona. Una kamon’e ntantu zandi, Yesu umfwididi e nkenda. Ovovele kuna kwa mvumbi vo: “Etoko, ivovese wo, Zangumuka.” Etoko divumbukidi, o Yesu umvene kwa ngw’andi.​—Luka 7:11-17.

Nze i una wa mpumpa ndiona, kuakala mpe ye nkenda zayingi vava o Yesu kakingula e nzo a Yairo, wa mbut’esambilu dia Ayuda. O mwan’andi ankento wa mvu 12 wafwa. Kansi Yesu vava kaluaka kuna nzo a Yairo, wafinama kuna kwa mwana wafwa ye wavova: “E mwana, zangumuka.” O yandi ozangumukini!​—Luka 8:40-56.

Vioka lumbu, o Lazaro, wa nkundi a Yesu, ofwidi. Vava Yesu kaluaka kuna nzo andi, Lazaro lumbu yà kakala wafwa. Kanele vo wakala kikilu ye ntantu, o nsang’andi Mareta wakala ye vuvu, yandi vo: “Nzeye wo vo kafuluka muna lufuluku muna lumbu kiambaninu.” Kansi, Yesu wele kuna ziami, ovovele vo bakatula etadi, okololokele: “Lazaro, nza vaika!” Yandi wavaika!​—Yoane 11:11-44.

O wau, se yindudi diadi: Aweyi kakala Lazaro mu lumbu ina yau eyà kakala wafwa? Lazaro kavova ko vo ku zulu dia nsambu zambote kakala yovo ku bilungi bia lubangamu, wadi dio vova kele vo kakala mu konso eki mu fulu yoyo. Ve, Lazaro kasidi kala ye ntona ko muna lufwa, wadi kala kaka wuna yamu “lufuluku muna lumbu kiambaninu,” kele vo Yesu kalembi kumvutula o moyo.

Dia ludi vo o masivi ma Yesu ka matwasa nsambu zanzingi ko, ekuma vo awana kafula bafwa diaka. Kansi kadi, 1.900 za mvu ku nima yandi wasonga ziku kia sia vo, muna nkum’a Nzambi, o mafwa balenda vutuka kikilu o zinga! I sia vo, muna masivi mandi, Yesu wasonga oma mevangama va ntoto vava uyalwa kwa Kintinu kia Nzambi.

Kele vo Nzolw’eto Ofwidi

Vav’o ntantu lufwa kekutulwakilanga, e nkenda zaku zilenda kala zayingi, kanele vo nanga okwikilanga muna  lufuluku. Abarayama wakala yo lukwikilu vo nkaz’andi o vutuk’o zinga, kansi tutanganga vo “o Abarayama wizidi didila Sara, kakumbokomokena.” (Etuku 23:2) Ovo i Yesu? Vava kia fwa Lazaro, yandi “ofululukidi muna ntima, o moyo andi utelamene,” i bosi “odididi e kinsanga.” (Yoane 11:33, 35) Ikuma vo, vava kefwanga muntu ona tuzolanga, o dila ke lutovoko lua vuvu ko.

Kele vo mwan’ofwidi, diampasi kikilu kuna kwa ngudi. Elo, Nkand’a Nzambi ozeye ntantu ye nkenda zina kalenda mona ngundi. (2 Ntinu 4:27) Ye, diampasi mpe kuna kw’ese ofwidilu. “Kele vo mono yàfwila,” ikavova Ntinu Davidi vava kiafwa mwan’andi Abesalome.​—2 Samuele 18:33.

Kansi tu, wau vo una ye vuvu kia lufuluku, e nkenda zaku ke zikwendelela ko. Ne i una uvovele Nkand’a Nzambi ngeye ‘kwa mona ntantu, nze akaka, ana bakondelo vuvu.’ (1 Tesalonika 4:13) Kansi tu, ofinama kwa Nzambi muna sambu, o Nkand’a Nzambi usianga nsilu vo “yandi okusikina.”​—Nkunga 55:22.