Көптөр өлгөндөн кийин асманга кеткиси келет. Иса Машаяк ишенимдүү элчилеринин асманда жашай турганын айткан. Ал өлөрүнө жакын калганда аларга асмандагы Атасынын жанынан орун даярдаарын убада кылган. (Окугула: Жакан 14:2.)

Эмне үчүн адамдар тирилип, асманга кетишет жана ал жакта эмне кылышат? Иса Машаяк алардын падыша болуп, жер үстүнөн бийлик кыларын айткан. (Окугула: Лука 22:28—30; Аян 5:10.)

Адатта, өлкөнү аз эле адам башкарат. Иса Машаяк адамдарды асманга жер үстүнөн бийлик жүргүзүшү үчүн тирилткендиктен алардын да саны чектелүү болот (Лука 12:32). Ыйык Китепте Иса Машаяк менен чогуу канча киши бийлик жүргүзөрү так жазылган. (Окугула: Аян 14:1.)

Асманга кете тургандарга эле сыйлык берилбейт. Кудайга берилген, Иса Машаяктын бийлиги алдында жашагысы келгендер, жер бейишке айланганда, түбөлүк өмүр сүрүшөт (Жакан 3:16). Кудайга баш ийбеген адамдар жок кылынганда, аман калгандар бейишке айланган жерде түбөлүк жашашат. Ал эми ага чейин көз жумгандар тирилип, алар да Бейиште жашашат. (Окугула: Забур 37:29; Жакан 5:28, 29.)