Жахаба Кудай периштелерди адам баласын жарата электе эле жараткан (Аюп 38:4, 7). Периштелер — Кудайга кызмат кылган күчтүү рухтар. Кудай ага кызмат кылган адамдарды жетектеш үчүн же коргош үчүн кээде периштелерди жиберчү (Забур 91:10, 11). Бүгүнкү күндө периштелер адамдарга Иса Машаяктын жолдоочулары жарлап жаткан жакшы кабарды угууга жардам берүүдө. (Окугула: Аян 14:6, 7.)

Биз периштелерден жардам сурап тиленишибиз керекпи? Жок. Анткени тиленүү — сыйынуунун бир бөлүгү. Биз Кудайга гана сыйынышыбыз керек (Аян 19:10). Периштелер Кудайдын кызматчылары болгондуктан, адамдардын эмес, Кудайдын айткандарын аткарышат. Андыктан Кудайдан гана тиленишибиз зарыл жана ага Иса Машаяк аркылуу кайрылышыбыз кажет. (Окугула: Забур 103:20, 21; Матай 26:53.)

Периштелер, адамдар сыяктуу эле, өз алдынча чечим чыгаруу эркиндигине ээ жана жаман же жакшы иш кылууну өздөрү чече алышат. Өкүнүчтүүсү, көптөгөн периштелер Кудайга каршы чыгышкан (2 Петир 2:4). Алгач, Кудайга Шайтан каршы чыккан жана ага башка периштелер да кошулган. Алар асмандан жерге куулуп түшүрүлгөн. (Окугула: Аян 12:7—9.)

1914-жылдан бери жерде жамандыктын, зордук-зомбулуктун күч алганы Кудайдын жакында Шайтанды, анын тарабындагы периштелерди жок кыларын билдирет. Ошондон кийин Кудай жерди калыбына келтирип, бейишке айлантат. (Окугула: Аян 12:12; 21:3, 4.)