•  Amazyu Aghabwandilo 2

•  Amazyu Gha Chala Bukabi 3-5

  •  Inkani 3

  •  Vyo Twamanyila 4

  •  Ukubelenga Ibayibolo 5

•  Vyo Vingatwavwa Mubulumbilili 6-14

  •  Ukwanda Pakunenezannya 7

  •  Ukunyokelako 8

  •  Ukumanyisya Abantu 9

  •  Ukulongosola Vyo Mukusubila 10

  •  Inkani 11

  •  Ukunenezannya 12

  •  Mo Mungabombela 13

  •  Ukubombezya Amavidiyo na Amabuku 14

•  Ubumi Bwitu Ubwachikilisitu 15-16

  •  Ukumanyila Ibayibolo Ukwa pa Chipanga 16

•  Amazyu Aghabumalilo 17

•  Ukupalizya nu Kupeleka Ubulongozi 18

•  Ukusunga Akabalilo 19

•  Nanti Uwakwendela Idela iza pa Chipanga 20

•  Usabata yo Kuli Ulukomano Ulwa Dela Pamo Ulwa Chigawa 21

•  Usabata uwa Kukumbukila Imfwa iya Yesu 22

•  Yo Akwenelezya Ulukomano Ulwa Bumi Bwitu nu Bulumbilili 23

•  Ucheyamani uwa Ulukomano Ulwa Bumi Bwitu nu Bulumbilili 24

•  Uwakwavwilizya Ukupeleka Ubulongozi 25

•  Amakilasi Aghanji 26

•  Amavidiyo 27

1. Ubulongozi ubu inti bwavwe umuntu aliwesi yo ali ni vyakubomba pa Nkomano Izya Ubumi Bwitu Ubwachikilisitu nu Bulumbilili. Abantu bo bali ni vyakubomba aba, babaghiye ukubelenga ubulongozi bo bukukolelana ni nkani yo bali nayo mu Nkomano Izya Ubumi Bwitu Ubwachikilisitu nu Bulumbilili po bakwisengannya. Abalumbilili babaghiye ukulembesya mu sukulu ukuti banenaghe inkani. Abantu abanji bo bakwiza ku nkomano akabalilo kosi sona bali ni nkalo zyo zikukolelana na vyo Ibayibolo likumanyisya, bope bangalembesya mu sukulu ukuti banenaghe inkani. Yo akwenelezya Ulukomano Ulwa Bumi Bwitu nu Bulumbilili abaghiye ukumulongosolela muntu yo achili atoziwe vyo vikulondiwa ukuti ingile mu sukulu sona nukumumanyisya nanti wakwitikiziwa ukuti angingila mu sukulu. Pa kabalilo ko akumulongosolela pakulondiwa ukuti yo akumanyila nawe Ibayibolo (pamo umupapi wache yo we Kaboni wa Yehova) wepe abepo. Ubulongozi bwache bukuyana bulo nu bulongozi bo bukupelekiwa kwa muntu yo akulonda ukuba mulumbilili uwakusita koziwa.—od-TB umutu 8 indime 8.

2. 1 miniti. Usabata aliwesi, pabumalilo uwa lwimbo nu lwiputo ulwabwandilo, Ucheyamani uwa Bumi Bwitu Ubwachikilisitu nu Bulumbilili abaghiye ukulongosola indondomeko iya nkomano mo inti yendele sona nu kulongosola ifundo izikulu zyo inti bamanyile.

 3. Inkani: 10 minisi. Umutu nkani ghukwayiwa mukabuku aka Ubumi Bwitu Ubwachikilisitu gho ghukuwa ni fundo zyache zibili pamo zitatu. Inkani iyi yikuneniwa nu songo uwa chipanga pamo umwavwilizyi uwa chipanga. Nanti musabata uyo tukwanda ukubelenga ibiku ilipya ilya mu Bayibolo, inti mwize mwenelezye tasi ividiyo iyakulongosola vyo vili mwibuku ilyo. Yo akunena inkani angayanisya vyo vikuneniwa mu vidiyo ni nkani yo akunena. Napo vili bunubu, akulondiwa ukwenelezya ukuti anena ifundo zyosi zyo zili mukabuku aka nkomano. Pala akabalilo kalipo, alongosole akiza ivituzi vyo vibikiwe ukuti vyavwe ukwivwisya ifundo. Angongelezyapo sona ifundo zimo zyo alondelezya ichikulu zikukolelana ni fundo zyo zili munkani yache.

 4. Vyo Twamanyila: 10 minisi. Ichigaba ichi cha malalusyo na maansala, patakuba amazyu aghabwandilo pamo aghabumalilo. Inkani iyi yikuneniwa nu songo uwa chipanga pamo umwavwilizyi uwa chipanga. Yo akunena inkani iyi alalusye abantu amalalusyo ghosi. Akulondiwa sona ukusala ukuti amasimbo gho ghabikiwe ghabelengiwe pamo hagha. Bo basaliwa ukuti bamulepo bakulondiwa ukwamulapo kwa 30 sekanzi pamo ukuchepa.

 5. Ukubelenga Ibayibolo: 4 minisi. Umumanyili umwanavuli weyo abaghiye ukubelenga Ibayibolo. Umumanyili uyu atakulondiwa ukwanda nu kunena amazyu aghabwandilo pamo aghabumalilo. Ucheyamani akwiza pakumwavwa umumanyili uyu ukuti abelenge ivyabwanaloli, anenaghe akiza amazyu, alangizyanje mo akwiyivwila po akubelenga, asintaghe amazyu, atuzyanje pamalo gho ghakulondiwa ukutuzya sona abelengaghe umwakwivwika akiza. Ichifukwa chakuti akabalilo kamo amavesi aghakubelenga ghakubanga ghafupi pamo ghatali, umukamu yo akwenelezya Ulukomano Ulwa Ubumi Bwitu nu Bulumbilili, akulondiwa ukwinong’onela uluso lo umubamanyili ali nalo pakabalilo ko akugaba inkani.

6. 15 minisi. Ichigaba ichi chikutwavwa ukuti twisengannye akiza ukuti tubukilile ukongelezya uluso pakunenezannya na bantu nu kulumbilila akiza. Abasongo ba chipanga bope bangabapa ivyakubomba mu sukulu. Umumanyili aliwesi akulondiwa ukubombezya ubulongozi bo bukwaghiwa mu kabuku aka Kumanyisya pamo Ulughano bo bukukolelana ni mbombo yo bamupiye ukuti abombe mu Akabuku aka Nkomano aka Bumi nu Bulumbilili. Akabalilo kamo, ichigaba chimo inti chibanje chakunenezannya. Ichigaba ichakunenezannya ichi chikulondiwa ukuneniwa nu songo wa chipanga pamo umwavwilizyi uwachipanga uwakwenelele.—Ennya  indime  15 ukuti mwennye mo mungabombela ni chigaba ichakunenezannya ichi.

 7. Ukwanda Pakunenezannya: Inkani iyi yinganeniwa nu mukamu pamo umuyemba. Bo bakunena inkani bakulondiwa ukuba bayemba beka-beka pamo abakamu beka-beka pamo bangaba abanyumba yoka. Bangasala ukwimilila pamo ukwikala pasi po bakunena inkani yabo.—Ukuti mumanye mo mungabombela pakunena inkani iyi, ennya  indime  12 nu  13.

 8. Ukunyokelako: Inkani iyi yinganeniwa nu mukamu pamo umuyemba. Umwavwilizyi akulondiwa ukuba mukamu nu mukamu uwamwabo pamo umuyemba nu muyemba uwamwabo. (km 5/97 p. 2) Bo bakunena inkani bangasala ukwikala pasi pamo ukwimilila. Umumanyili yo mwenecho wa nkani akulondiwa ukuyezyelela mo anganenela pabulendo uwakunyokelako.—Ukuti mumanye mo mungabombela pakunena inkani iyi, ennya  indime 12 nu  13.

 9. Ukumanyisya Abantu: Inkani iyi yinganeniwa nu mukamu pamo umuyemba. Umwavwilizyi akulondiwa ukuba mukamu nu mukamu uwamwabo pamo umuyemba nu muyemba uwamwabo. (km 5/97 p. 2) Bo bakunena inkani bangasala ukwikala pasi pamo ukwimilila. Pachigaba ichi mulangizye mo mungabombela pakumanyila nu muntu, mube ngati po mwandite kale pakumanyila. Mutakulondiwa ukwanda nu kunena amazyu aghabwandilo pamo aghabumalilo, peka pala ubulongozi bukuti mubombe bunubu. Te chakulondiwa ukuti mubelengaghe umwakukwezya vyosi vyo mukulondiwa ukumanyila nangabuli te chakukaniziwa ukubelenga.

 10. Ukulongosola Vyo Mukusubila: Nanti yo nkani, yikulondiwa yineniwe nu mumanyili yo umukamu. Nanti chifwanikizyo, chinganeniwa nu mukamu pamo umuyemba. Bo bakunena inkani bakulondiwa ukuba bayemba beka-beka pamo abakamu beka-beka pamo bangaba abanyumba yoka. Umumanyili akulondiwa ukwamula ilalusyo umwaluso pakubombezya ifundo zyo zili mu lifalesi lyo bamupiye. Umumanyili angasala ukutambula pamo ukuleka ukutambula ilifalesi lyo abombezya pa chigaba ichi.

 11. Inkani: Yikuneniwa nu mukamu sona yikuwa ngati nkani iya bantu bosi mu chipanga. Nanti inkani yafuma mu fundo zyo zili ku ivyakubumalilo A mu kabuku aka Ulughano, umumanyili akulondiwa ukulangizya mo angabombezezya ivesi pamo amavesi mu bulumbilili. Umwakufwanikizya, angalongosola akabalilo ko tungalibombezya ivesi ilyo, vyo likung’anamula sona mo tungalibombezya pakunenezannya nu muntu. Nanti inkani yafuma mu kabuku aka Ulughano, umumanyili akulondiwa ukulongosola mo tungabombezezya ifundo iyo mu bulumbilili. Anganena ichifwanikizyo cho chili mu fundo iyabwandilo mu mutu pamo angalongosola ifundo yiliyosi yo yili mu mavesi gho ghali mu chigaba ichi, nanti chakulondiwa.

   12. Ukunenezannya: Indime iyi ni yakukonkapo muli ifundo zyo zingatwavwa pa chigaba ichakuti “Ukwanda Pakunenezannya” nu “Ukunyokelako”. Umumanyili abe ni chakulinga ichakumanyisya umuntu ubwanaloli ubwa mu Bayibolo muzila iyipepe umwakukolelana na mo ivintu vibeleye nu muntu yo bakunenezannya nawe sona bapange ivyakuti bize banenezannye pabulendo uwamwabo. Umumanyili akulondiwa ukusala inkani yo yikukolelana navyo vyachitika mwalunulu yo yingabafika pamoyo bo bakuteghelezya. Angasala ukumulekela ibuku pamo ukumulangizya ividiyo ukufuma pa Vintu Ivyakumanyisizya. Mumalo mwa kusungila bulo ivyakunena, umamanyili angabombezya amaluso aghakunenezannya, gho ghakulangizya ukuti akumwinong’onela umuntu sona nukunena umwakusatuka.

   13. Mo Mungabombela: Umumanyili angabombezya ubulumbilili bo bukukolelana na vyo vikuchitika ku chigaba cho akulumbilila. Umwakufwanikizya:

1.  (1) Kunyumba ni Nyumba: Ubulumbilili ubu bukuchitika kunyumba ni nyumba, pamo pa foni, pamo pamo ukusimba ukalata. Sona ukunyokelako ku muntu yo mukanenezannyapo po mukabuka ku bulumbilili ubwa kunyumba ni nyumba.

2.  (2) Ubulumbilili uwa Mwamwabi: Ubulumbilili ubu bukuchitika nanti umulumbilili alondelezya umupata ukuti amulumbilile umuntu po bakunenezannya inkani zimo. Anganenezannya nu muntu inkani izya mu Masimbo na bo akubomba nabo imbombo, akumanyila nabo isukulu, abapalamani wache, bo ali nabo pabulendo, pamo kulikosi ko angakomana na bantu po akubomba imbombo izyisiku ni siku.

3.  (3) Ukulumbilila Kumalo Gho Kukwayiwa Abantu Abinji: Ubulumbilili ubu bwa pa kashelufu, bukuchitika kumalo gho abantu bakughuzizyako amalonda, ko kukwenda abantu abinji, pamo kumalo gho abantu bakwangalilako, kumalo ko abantu bakusungako ukatundu na magalimoto, pamo kulikosi ko kukwaghiya abantu abinji.

 14. Ukubombezya Amavidiyo na Amabuku: Ukuyana na mo ivintu vibeleye, umumanyili angasala ukuti alangizye ividiyo pamo ukubombezya ibuku. Nanti umumanyili asala ukuti abombezye ividiyo mu nkani yache, atakalangizye loli alongosole bulo ifundo zyo zili mu vidiyo.

15. Pisinda apakuti twimba ulwimbo, amaminisi 15 aghakukonkapo tukuba ni chigaba cho chikuba ni nkani yoka pamo zibili zyo zikulongosola mo tungabombezezya Amazyu gha Chala. Abasongo bachipanga pamo abavwilizyi bobo bakunena inkani izi. Loli pala pali inkani iya ivyakulondiwa pa chipanga, usongo uwachipanga mwene weyo akulondiwa ukunena. Nanti inkani yakunenezannya, yo akunene angalondiwa ukulalusya amalalusyo aghakongelezyapo. Amazyu ghache aghabwandilo ghabe ghafupi ukuti akabalilo akinji alongosole ifundo inkulu sona abantu babe na kabalilo akakukwana akakwamulila. Nanti inkani yinyu yili ni chigaba ichakulalusya umuntu, chingaba chiza ukuti mumulalusye po ali ku pulatifomu ukuchila ukuti mumulalusyanje po ikaye pamalo ghache.

  16. Ukumanyila Ibayibolo Ukwa pa Chipanga: 30 minisi. Usongo uwachipanga yo akumanyisya akiza weyo abaghiye ukupangisya Ukumanyila Ibayibolo Ukwa pa Chipanga. (Kuvipanga ko abasongo baliko banandi bangasala abavwilizyi bo bakumanyisya akiza ukuti bobo bapangisye ukumanyila uku.) Akabukatila akabasongo bachipanga kakulondiwa ukusala yo angamanyisya akiza Ukumanyila Ibayibilo Ukwa pa Chipanga. Bo bitikiziwa ukuti bamanyisyanje, bakulondiwa ukuti bamanyisyanje akiza ukuti abantu bapindulaghe, bamanyaghe ukuti ifundo zyo bamanyila mumasimbo zyakulondiwa, sona ukumanyila uku, kumalaghe pakabalilo kache. Bo basaliwe ukuti bapangisyanje inkani izya malalusyo na maansala bangabombezya ubulongozi bo bukulingannya mo bangabombela nanti bakupangisya inkani izya amalalusyo na maansala. (w23.04 ipeji  24, ibokosi) Pala ifundo zyosi zyo zyalondiwanga ukumanyila mwasabata uyo zyamala, ukumanyila kumalilaghe panapo. Abakamu bo bakupangisya ukumanyila Bayibolo ukwa pa Chipanga sona abakamu bo bakubelenga bakulondiwa ukuti usabata aliwesi basintanaghe. Pala umukamu yo akutangilila inkomano izya Ubumi Bwitu Ubwachikilisitu nu Bulumbilili anena ukuti ukumanyila kube kwakudumula, umukamu yo akupangisya angennya mo angabombela ukuti apangisye umwakudumula. Angasala sona ukuti indime zimo manyi bazibelenge.

17. 3 minisi. Umukamu yo akutangilila inkomano izya Ubumi Bwitu Ubwachikilisitu anene ifundo inkulu zyo twamanyila pa nkomano. Anene sona vyo tukwiza pakumanyila usabata yo akwiza. Pala akabalilo kalipo angatambula amazina gha bamanyili bo bakwiza pakunena inkani usabata yo akwiza. Pala pali ivyakufumusya, umukamu yo we cheyamani pa nkomano abelenge ichimanyisyo pamo ukalata mu mazyu ghache aghabumalilo. Ivimanyisyo ivya bwila na bwila ngati indondomeko iyakwingila mu bulumbilili, ukupyela nu kukolopa pa Nyumba ya Bumwene vitakulondiwa ukufumusyiwa pa pulatifomu loli mumataghe bulo ichimanyisyo pa bolodi. Nanti pali ichakufumusya pamo ukalata uwakuti babelenge mutali, ucheyamani angabalaba abakamu bo bali ni nkani mu chigaba icha Ubumi Bwitu Ubwachikilisitu ukuti bachepesyeko akabalilo ka nkani zyabo. (Ennya  indime  16 nu  19.) Pabumalilo inkomano zimale nu lwimbo sona nu lwiputo.

18. Pala umumanyili amala ukunena inkani yache, umukamu yo akutangilila inkomano izya Bumi Bwitu Ubwachikilisitu nu Bulumbilili amupalizye nu kupeleka ubulongozi kwa mumanyili kwa 1 miniti ukufuma mu bulongozi bo bakamupa ukuti aye abombelepo imbombo. Pala umukamu akumwitizya umumanyili ukuti anene inkani yache, ucheyamani atabaghiye ukenena umutu uwa chimanyilo cho bakamupa umumanyili. Loli pala umumanyili amala pakunena inkani yache, ucheyamani amupalizye. Ucheyamani anganena vyo umumanyili akwanisya ukubomba akiza, sona anganena chilichosi ichiza cho ennya ukuti umumanyili abomba akiza pamo ukunena ichigaba ichakuti umumanyili abombelepo imbombo. Ucheyamani anganenapo vyo ennya mu chifwanikizyo vyo akwennya ukuti abantu bangapindula navyo mu chipanga. Umumanyili angapokela sona ubulongozi ukufuma mukabuku aka Ulughano, na kabuku Akakumanyisya pamo mwibuku ilyakuti Sangani Chandulo pakabalilo ko bali pa nkomano pamo pamwene, pamo pachimanyilo cho bamupiye ukuti abombelepo imbombo pamo pa chimanyilo ichamwabo.—ukuti mwennye imbombo iya cheyamani yo akutangilila inkomano izya Ubumi Bwitu Ubwachikilisitu nu Bulumbilili sona imbombo ya yo akupeleka ubulongozi ubwa padela, ennya  indime 19,  24, nu  25.

19. Inkani yiliyosi yimalaghe pakabalilo kache, sona amazyu agha cheyamani uwa lukomano ulwa Ubumi Bwitu Ubwachikilisitu manyi ghapululilaghe akabalilo kache. Napo Akabubu aka Nkomano aka Ubumi bwitu nu Bulumbilili kali na kabalilo pa chigaba chilichosi, nanti ifundo izya munkani yinyu zyamala mutakulondiwa ukongelezya ifundo zyo mu nkani yinyu zitalimo ukuti bulo mamalizye akabalilo ko bababikiye. Nanti yo akunena inkani alya akabalilo akulondiwa ukupokela ubulongozi palubazu nu cheyamani uwa Lukomano Ulwa Bumi Bwitu nu Bulumbilili pamo nu mwavwilizyi uwa cheyamani. (Ennya  indime 24 nu  25.) Inkomano zyosi zimale pa 1 awala 45 minisi poka nu lwimbo sona ulwiputo.

20. Pala uwakwendela idela iza pa chipanga, inkomano zibombiwanje ukuyana na mo indondomeko yibeleye iya mukabuku aka nkomano izya Ubumi Bwitu Ubwachikilisitu nu Bulumbilili loli ukumanyila Ibayibolo ukwa pa chipanga te kubombiwanje mumalo mwache inti pabanje inkani iya 30 minisi yo inti yineniwanje nu wakwendela idela. Po umukamu uwakwendela idela achili atanenite inkani yache, ucheyamani uwa nkomano anenepo umwakudumula vyo twamanyila, sona vyo tukwiza pakumanyila usabata uwa kunonkapo, pala pali amakalata abelengele zila, pabumalilo amwitizye uwakwendela idela ukuti anene inkani yache. Pala uwakwendela idela amala inkani yache ighalile inkomano nu lwimbo lo asalite. Angasala umukamu uyunji ukuti ize ighalile inkomano nu lwiputo. Pakabalilo ko uwakwendela idela akwendela ichipanga patakuba amakalasi ghabamanyili. Akagulu kachinenelo ichinji kangapanga inkomano zyabo napo ichipanga cho chikwenelezya akagulu kabo chili pa sabata iyapadela. Loli pala uwakwendela idela anda pakunena inkani yache, akagulu aka kangiza nu kwivwisya inkani iya bulumbilili iya wadela.

21. Usabata yo kuli ulukomano ulwa dela pamo ulwa chigaba, inkomano izya mukasi mwasabata zitakubako. Mungakumbusya ichipanga ukuti vyo mwalondiwanga ukumanyila usabata uyo mungamanyila pamwebene pamo ni mbumba.

22. Pala ulukomano ulwa Kukumbukila Imfwa ya Yesu luli mukasi mwasabata, inkomano izya Ubumi Bwitu Ubwachikilisitu nu Bulumbilili zitakabombiwe.

23. Akabukatila aka basongo bachipanga kakusala umukamu yo wepe we songo wa chipanga ukuti enelezyange Inkomano Izya Ubumi Bwitu Ubwachikilisitu. Umukamu uyu akwenelezya ukuti inkomano zikubombiwa ukuyana ni ndondomeko sona nu bulongozi bwache. Akabalilo kosi akulondiwa ukuti anenezannyanje nu mukamu yo akupeleka ubulongozi. Pala Akabuku Aka Nkomano Izya Ubumi Bwitu Ubwachikilisitu nu Bulumbilili kafika pa chipanga umukamu uyu akulondiwa ukugabila zila inkani izyamukasi mwasabata izya myezi yibili. Angagabila zila inkani kubamanyili na bacheyamani aba nkomano izya mukasi mwasabata. (Ennya  indime  3-16 nu  24.) Po akugabila inkani akulondiwa ukwinong’onela imyaka iya mumanyili, uluso lo ali nalo sona waghe umumanyili ali nu bwabuke pa nkani yo mwamupa. Akulondiwa ukwinong’onele sona ifundo yiniyi waghe akugabila inkani zyo te zyabamanyili. Umumanyili aliwesi apokele inkani pala kwasyala amasabata yatatu ukufika po akwiza pakunenela inkani yache. Abombezye imbombo ifomu iyakugabila inkani mu Nkomano Izya Ubumi Bwitu Ubwachikilisitu nu Bulumbilili (S-89). Umukamu yo akwenelezya Ulukomano Ulwa Ubumi Bwitu Nu Bulumbilili enelezye ukuti amatika amazina gha bantu bo bali ni nkani pabolodi. Akabukatila aka basongo bachipanga kangasala usongo pamo umwavwilizyi uwachipanga ukuti bavwanaghe nu mukamu uyu. Loli inkani zyo zikuneniwa na basongo bachipanga, zibaghiye ukugabiliwa ku basongo bene.

24. Usabata aliwesi usongo wachipanga weka akwiza pakuba we cheyamani wa Nkomano Izya Ubumi Bwitu Ubwachikilisitu nu Bulumbilili. (Pala abasongo bachipanga balipo badono, pangasaliwa abavwilizyi bamo ukuti bope bavwilizyanje pa bucheyamani.) Yo akutangilila inkomano akulondiwa ukwisengannya amazyu aghabwandilo na ghabumalilo. Weyo akwiza pakubitizya bosi bo bali ni vyakubomba sona akwiza pakutambula ni mitu yankani zyabo, nanti abakamu badono pa chipanga wepe anganena inkani zimo nkani-nkani zyo zili na mavidiyo sona patakulondiwa ukunenezannya. Akulondiwa ukunenapo umwabupimpa pala amala ukunena inkani yache. Akabukatila kabasongo ko ko kakwiza pakwennya nu kusala abakamu bo bamanyisiwe akiza ukuti bobo babanje ba cheyamani ba nkomano. Abasongo aba bo bo bakusintana akabalilo kosi. Usongo yo akasaliwa ukuti enelezyanje Inkomano Izya Bumi Bwitu Ubwachikilisitu nu Bulumbilili weyo abaghiye ukuti abanje we cheyamani akabalilo akinji ukuchila abasongo abamwabo bo bamanyisiwe. Nanti umukamu wakwitikiziwa ukupangisya ichimanyilo icha Bayibolo pa chipanga kokuti wakwitikiziwa sona ukuba we cheyamani. Manyi muluvye ukuti umukamu yo we cheyamani akulondiwa ukuti apalizyanje nu kupeleka ubulongozi umwalughano kwa mumanyili aliwesi yo anena inkani yache waghe chakulondiwa. Budindo bwa cheyamani ko kwenelezya ukuti inkomano zyamala pakabalilo kache. (Ennya  ndine 17 nu  19.) Pala ucheyamani angaghana angabika imayikofoni ukuti anenelaghepo, ama mayikofoni aghanji angabika ukuti abamanyili babombelaghe pala biza kuntazi pakunena inkani yabo. Angasala ukwikala pampando ku pulatifomu pa chigaba cho umumanyili akubelenga Ibayibolo na pa Vyo Vingatwavwa mu Bulumbilili. Ukubomba bunubu kungavwa ukuti batakalyanje akabalilo.

25. Nanti vingabombiwa chingaba chiza ukuti usongo yo akunena akiza ukuti weyo abe wakwavwilizya ukupeleka ubulongozi. Umukamu yo akupeleka ubulongozi ali nu budindo uwakupeleka ubulongozi kubakamu umwachisisi pala pakulondiwa ukuti apeleke ubulongozi, munkani izya mu Ubumi Bwitu Ubwachikilisitu nu Bulumbilili, inkani yabosi, yo ukubelenga pamo ukupangisya Ichitembe cha Mulindilili pamo ukubelenga Ibayibolo Ukwa pa Chipanga. (Ennya  indime 19.) Pala ku chipanga kuli abasongo ba chipanga bo bakumanyisya akiza, sona bakunena akiza, basintanaghe imbombo iyakupeleka ubulongozi umwaka ghulighosi. Te chiza ukuti umukamu apelekaghe ubulongozi pa nkani yiliyosi.

26. Nanti abamanyili binji pa chipanga, mungapanga amakilasi aghanji. Ikilasi lililyosi libe nu mumanyisi yo abaghiye ukuba we songo uwa chipanga. Umwavwilizyi uwa chipanga yo akumanyisya akiza wepe angatangilila ikilasi. Akabukatila aka basongo kangasala umukamu yo abaghiye ukutangilila ikilasi ilyabamanyili sona pala vingabombiwa bakulondiwa ukuti basintanaghe na wamwabo. Umukamu yo akupeleka ubulongozi akulondiwa ukukonka vyo vili mu  ndime 18. Pala kuli amakalasi aghanji abamanyili bakulondiwa ukubuka ku kalasi lyabo nanti bamala ichigaba icha Vyo Twamanyila cho chili mu Amazyu gha Chala Bukabi. Sona bakulondiwa ukunyokelako pala inkani iyabumalilo iya bamanyili yamala.

27. Pala pa nkomano izya mukasi mwa sabata pakulondiwa amavidiyo, amavidiyo agha ghakwiza ukwaghiwa pa JW Library® sona tungaghagha pakubombezya ifoni, itabuleti pamo ikompyuta.

© 2023 Watch Tower Bible and Tract Society of Pennsylvania

S-38-LMB 11/23