Nja kʉ ná Wakristo adi njí nji teknolojia dhi no na nja ndima tilo familia nǎ nrŭ na inga nja Yova dzá Dimu na d’e. Ro nyodyu na kʉ ná Wakristo dho ringani ndima no i shauri nga: “Akili na kʉ ná ke nja che lo ró, ke adi runi ru, ro nga kʉ akili na ná ke adi ra lo nǎ ndirigoti ke adi bani kpakpalo na.”​—Mez. 27:12.

Ko nanga adi jini bbo Yova adi ko ronga b’o naridho. Føridho ko nzɨ adi ko tso gba nrŭ kana nga ndo ná kpa ma, watengwa ma inga nga kʉ chø ná mafundisho ddi ná kpa ma na ri. (Ro. 16:17; 1 Ko. 5:11; 2 Yo. 10, 11) Kutaniko nǎ nja kʉ ná kpa nzɨ adi Biblia nǎ kʉ ná yadha ro dyø ri. (2 Ti. 2:20, 21) Kau ko vʉ ná saa na, ko adi fø longa nono. Ro bblo kʉ ná kau nzá le ka le ba teknolojia dhi ritsi chulu le loti naridho dhé ri.

Ri ka ndie kpakpa ni vʉ bblo kʉ ná kau njati nie bí nǎ nrŭ kʉ ná grupe na ró. Nja kʉ ná Wakristo adi tsu bí nǎ nrŭ kʉ ná grupe na ndirigoti føri adi kpakpalo ma bbʉ bbo ddi. Nde Mukristo ká ka ndi nji lo nyodyu na ngbaribbai njati ke kʉ na ná grupe nǎ nrŭ e bí ró? Ri ka ndie kpakpa le chu grupe nǎ nrŭ krʉ dhó lo, ndirigoti le chú kpadhó udha ká kʉ ngba ngatsi ma nari. Zaburi 26:4 ripo: “Ma nzɨ adi di nzɨ chø lo nji ná kpa na ri ndirigoti ma nzɨ adi di ru ndima dhó nyi ru ná kpa na ri.” Føri ridho ri kʉ bblo ko di mesaje cho ko kana ngba ko chu bblo ná nrŭ na.

Njati grupe e sese ma ró, Mukristo dho ringani ndi chu ie na ma ndi loti nari ndirigoti lotidha dho ká ke adi saa ba ngbabø ma nari. Nzɨ ko di riddi ko dho ringani ko ngʉ krʉ kʉ ná mesaje goti inga ko zø krʉ kʉ ná mesaje. Paulo bbʉngʉe shauri Timoteo dho ndi b’o ndi ronga “bbo loti ná nrŭ ró ndirigoti nja nrŭ dhó lo nǎ ndima tsu ná nrŭ ró.” (1 Ti. 5:13) Iddoro maddi ri ka ndie sʉsʉ le nji fø di nalo elektroniki dhi ritsi chulú.

Dhidhi kiroho nǎ ná mukristo nzá ka ndi tsu ndi nja nrŭ djo loti ná nrŭ kana ri inga ndi di nzá nja ndi nalo ti ndi lai Wakristo djo ri. (Zb. 15:3; Mez. 20:19) Ndirigoti kedho nzá ringani ndi rr nga na mana kʉ nalo inga nga kʉ bbʉbbʉ na ripoti ro ri. (Efe. 4:25) Kodhó site jw.org djó bblo kʉ nalo lili ndirigoti krʉ kʉ ná bi ró ko adi ba ná JW Télédiffusion dhi programu adi ko li kpakpa kiroho nǎ.

Nja kʉ ná Yova dzá Dimu adi njí nji mesaje dhi ritsi na nja ndima dzì ritsi nanga, inga ndima dzi ritsi, inga ndima nji ritsi dhi piblisite ndirigoti ndima bbʉ njí nja nrŭ dho d’e. Føri kʉ turusa dhi lo, ro føri nzá ka ndi bbʉ madha Yova dho ri. Nzá ji ndima tsu “bbo le mbø ji nari na” ná Wakristo nzɨ adi rine ndima ba mbø ndima lai Wakristo nǎ ro ri.​—Ebr. 13:5.

Nde kodho ká ringani ko ne mbø fø elektroniki dhi ritsi chulu nja ko kó na njedha na kʉ ná le-djoi ma inga chʉ nga ba nalo na bani ná le djoi ma na tsotso d’e? Ko ji ko djoi ji ndirigoti ko adi kpa tsotso kó kpakpalo kana kpa kʉ ná saa na. (Yak. 2:15, 16) Ro njati ko di rine ko djoi tsotso koni fø chulu ró, ri ka ndie kpakpa Beteli dho ndirigoti kutaniko dho ndi kó kpakpalo na bani na le-djoi ma, le-vei ma na tsotso. (1 Ti. 5:3, 4, 9, 10, 16) Ndirigoti kodho nzá ringani ko liri nrŭ ddiri ko adi ko djoi tsotso kó fø chulú ri.

Ko adi riji ko nji Mungu dho ka ndi bbʉ hwè nalo. (1 Ko. 10:31) Føridho ko di rine ko nji njí elektroniki dhi mesaje dhi ritsi na ró, akoddinga ri ka ndi bbʉ ná hatari djo ndirigoti akonji lo akili na.