ເອຊາຢາ 13:1-22
13 ຕໍ່ໄປນີ້ແມ່ນນິມິດທີ່ພະເຈົ້າໃຫ້ເອຊາຢາ+ລູກຊາຍຂອງອາມອດເຫັນກ່ຽວກັບຄຳຕັດສິນຕໍ່ບາບີໂລນ.+
2 “ໃຫ້ປັກທຸງ*+ຢູ່ເທິງພູທີ່ມີແຕ່ກ້ອນຫີນ.
ໃຫ້ແກວ່ງມືໄປມາແລະເອີ້ນເຂົາເຈົ້າແລ້ວໃຫ້ເຂົາເຈົ້າເຂົ້າມາທາງປະຕູເມືອງຂອງພວກເຈົ້ານາຍ.
3 ເຮົາໄດ້ສັ່ງຜູ້ທີ່ເຮົາແຕ່ງຕັ້ງ.*+
ເຮົາໄດ້ເອີ້ນພວກທະຫານຂອງເຮົາມາເພື່ອລົງໂທດຜູ້ທີ່ເຮັດໃຫ້ເຮົາໃຈຮ້າຍ.ພວກທະຫານເຫຼົ່ານີ້ຈະດີໃຈແລະພູມໃຈຫຼາຍ.
4 ໃຫ້ຟັງສຽງຟົດສຽງນັນທີ່ຢູ່ເທິງພູແມ້.ສຽງນັ້ນເປັນຄືກັບສຽງຂອງຫຼາຍໆຄົນທີ່ຢູ່ນຳກັນ!
ໃຫ້ຟັງສຽງອຶກກະທຶກຂອງປະເທດຕ່າງໆແລະສຽງຂອງຊາດຕ່າງໆທີ່ຖືກລວບລວມເຂົ້າມາແມ້!+
ພະເຢໂຫວາຜູ້ບັນຊາການກອງທັບກຳລັງລວບລວມຄົນເພື່ອຈະໄປເຮັດສົງຄາມ.+
5 ຄົນເຫຼົ່ານີ້ຈະເປັນຄືກັບອາວຸດທີ່ສະແດງເຖິງຄວາມໃຈຮ້າຍຂອງເພິ່ນ.ເຂົາເຈົ້າຈະມາຈາກບ່ອນທີ່ຢູ່ໄກໆ+ແລະມາຈາກທຸກທິດທຸກທາງຂອງໂລກ.ພະເຢໂຫວາຈະໃຊ້ເຂົາເຈົ້າທຳລາຍທຸກສິ່ງໃນໂລກນີ້.+
6 ພວກເຈົ້າຮ້ອງໄຫ້ໄວ້ຖ້າໂລດ! ວັນຂອງພະເຢໂຫວາໃກ້ຈະມາຮອດແລ້ວ.
ໃນມື້ນັ້ນ ຜູ້ທີ່ມີລິດເດດສູງສຸດຈະທຳລາຍທຸກສິ່ງທຸກຢ່າງໃນແຜ່ນດິນຂອງພວກເຈົ້າ.+
7 ຍ້ອນແນວນີ້ ພວກເຈົ້າທຸກຄົນຈະຢ້ານຫຼາຍແລະມືຂອງພວກເຈົ້າຈະລ່ອຍ.+
8 ພວກເຈົ້າຈະຕົກໃຈຫຼາຍ.+
ພວກເຈົ້າຈະເຈັບແຮງຈົນຂົດຢູ່ຄືກັບຜູ້ຍິງທີ່ກຳລັງຈະເກີດລູກ.
ພວກເຈົ້າຈະແນມເບິ່ງໜ້າກັນດ້ວຍຄວາມຢ້ານແລະໜ້າຂອງພວກເຈົ້າກໍຈະຈືດແທ້ຈືດວ່າຍ້ອນເຈັບຫຼາຍ.
9 ວັນຂອງພະເຢໂຫວາກຳລັງຈະມາຮອດແລ້ວ.ມື້ນັ້ນຈະມີແຕ່ຄວາມໃຈຮ້າຍແລະຈະບໍ່ມີໃຜໄດ້ຮັບຄວາມເມດຕາ.ແຜ່ນດິນຈະຖືກທຳລາຍໃຫ້ຮ້າງເປົ່າ+ແລະຄົນເຮັດຜິດທີ່ຢູ່ຫັ້ນກໍຈະຖືກກວາດລ້າງຈົນໝົດ.
10 ດວງດາວແລະກຸ່ມດາວຕ່າງໆ*+ຈະບໍ່ມີແສງ.ເຖິງວ່າຕາເວັນຂຶ້ນ ແຕ່ກໍຈະມີແຕ່ຄວາມມືດແລະເດືອນກໍຈະບໍ່ສ່ອງແສງຄືກັນ.
11 ເຮົາຈະແກ້ແຄ້ນຄົນຊົ່ວ+ຍ້ອນເຂົາເຈົ້າເຮັດຜິດ.
ເຮົາຈະກຳຈັດຄົນຈອງຫອງແລະຈະເຮັດໃຫ້ຄົນຍິ່ງຖ່ອມໂຕລົງ.+
12 ເຮົາຈະເຮັດໃຫ້ຄົນຫາຍາກກວ່າຄຳແທ້+ແລະຫາຍາກກວ່າຄຳຢູ່ໂອຟີອີກ.+
13 ຍ້ອນໃນມື້ນັ້ນ ເຮົາເຢໂຫວາຜູ້ບັນຊາການກອງທັບຈະໃຈຮ້າຍຫຼາຍ.ເຮົາຈະເຮັດໃຫ້ທ້ອງຟ້າສັ່ນສະເທືອນ+ແລະເຮັດໃຫ້ໜ່ວຍໂລກຫຼຸດອອກຈາກບ່ອນທີ່ມັນຢູ່.
14 ຄືກັບກວາງທີ່ຖືກໄລ່ລ່າແລະຄືກັບຝູງສັດທີ່ບໍ່ມີຜູ້ລ້ຽງແຕ່ລະຄົນຈະກັບໄປຫາຄົນຂອງໂຕເອງແລະໜີໄປຢູ່ແຜ່ນດິນຂອງໂຕເອງ.+
15 ຜູ້ທີ່ຖືກຈັບຈະຖືກແທງດ້ວຍຫອກແລະຈະຖືກຂ້າດ້ວຍດາບ.+
16 ລູກຂອງເຂົາເຈົ້າຈະຖືກຈີກເປັນຕ່ອນໆຕໍ່ໜ້າເຂົາເຈົ້າ.+ເຮືອນຂອງເຂົາເຈົ້າຈະຖືກປຸ້ນແລະເມຍຂອງເຂົາເຈົ້າກໍຈະຖືກຂົ່ມຂືນ.
17 ເຮົາຈະໃຫ້ພວກເມເດຍມາຕໍ່ສູ້ພວກເຈົ້າ.+ພວກນີ້ບໍ່ສົນໃຈເງິນແລະບໍ່ສົນໃຈຄຳ.
18 ເຂົາເຈົ້າຈະຍິງທະນູເພື່ອຂ້າພວກຊາຍໜຸ່ມ.+ເຂົາເຈົ້າຈະບໍ່ອີ່ຕົນແອນ້ອຍແລະຈະບໍ່ອີ່ຕົນເດັກນ້ອຍ.
19 ເມືອງບາບີໂລນທີ່ງົດງາມແລະຫຼູຫຼາທີ່ສຸດ+ເມືອງທີ່ງາມໆທີ່ພວກການເດອາ*ພູມໃຈຫຼາຍ+ຈະເປັນຄືກັບເມືອງໂຊໂດມແລະເມືອງໂກໂມຣາທີ່ພະເຈົ້າໄດ້ທຳລາຍ.+
20 ເມືອງນັ້ນຈະບໍ່ມີຄົນໄປຢູ່ແລະຈະບໍ່ມີໃຜອາໄສຢູ່ຫັ້ນອີກຕໍ່ໄປ.+
ຄົນອາຣັບຈະບໍ່ໄປຕັ້ງເຕັ້ນຢູ່ຫັ້ນແລະຄົນລ້ຽງແກະຈະບໍ່ເອົາແກະໄປນອນຢູ່ຫັ້ນ.
21 ສັດທີ່ຢູ່ທະເລຊາຍຈະໄປນອນຢູ່ຫັ້ນແລະນົກເຄົ້າຈະເຮັດຮັງຢູ່ເຮືອນຂອງເຂົາເຈົ້າ.
ນົກກະຈອກເທດຈະໄປຢູ່ແຜ່ນດິນນັ້ນ+ແລະແບ້ປ່າ*ຈະຍ່າງເລາະໄປເລາະມາຢູ່ຫັ້ນ.
22 ສັດປ່າຈະຮ້ອງຢູ່ໃນປ້ອມຂອງເມືອງນັ້ນແລະໝາໄນຈະເຂົ້າໄປຢູ່ໃນວັງທີ່ຫຼູຫຼາ.
ເວລາທີ່ເມືອງນີ້ຈະຖືກທຳລາຍໃກ້ຈະມາຮອດແລ້ວ ແລະຈະບໍ່ຖືກເລື່ອນອອກໄປ.”+
ຂໍ ຄວາມ ໄຂ ເງື່ອນ
^ ຫຼື “ເສົາໃຫ້ສັນຍານ”
^ ແປຕາມໂຕວ່າ “ຜູ້ທີ່ເຮົາເຮັດໃຫ້ບໍລິສຸດ.” ໝາຍເຖິງຜູ້ທີ່ພະເຈົ້າແຍກໄວ້ຕ່າງຫາກເພື່ອຈຸດປະສົງທີ່ພິເສດ.
^ ແປຕາມໂຕວ່າ “ກຸ່ມດາວເຄຊິນ.” ອາດໝາຍເຖິງກຸ່ມດາວນາຍພານກັບກຸ່ມດາວທີ່ຢູ່ອ້ອມແອ້ມ.
^ ໝາຍເຖິງຄົນບາບີໂລນ
^ ຫຼືອາດແປວ່າ “ພະເຈົ້າທີ່ມີຮູບຮ່າງຄ້າຍຄືກັບໂຕແບ້”