ບົດຄວາມສຶກສາທີ 23
“ລະວັງໃຫ້ດີ ຢ່າໃຫ້ໃຜມາຊັກຊວນໃຫ້ຫຼົງ”!
“ລະວັງໃຫ້ດີ ຢ່າໃຫ້ໃຜມາຊັກຊວນໃຫ້ຫຼົງດ້ວຍປັດຊະຍາແລະຄຳຫຼອກລວງທີ່ບໍ່ມີປະໂຫຍດຕາມທີ່ມະນຸດສອນຕໍ່ໆກັນມາ.”—ໂກໂລ. 2:8, ລ.ມ.
ເພງ 96 ຄຳພີໄບເບິນປຽບເໝືອນຊັບສົມບັດ
ໃຈຄວາມສຳຄັນ *
1. ຕາມທີ່ບອກໃນໂກໂລດ 2:4, 8 ຊາຕານພະຍາຍາມຄວບຄຸມຄວາມຄິດຂອງເຮົາແນວໃດ?
ເປົ້າໝາຍຂອງຊາຕານຄືຢາກໃຫ້ເຮົາເຊົາຮັກພະເຢໂຫວາ ມັນຈຶ່ງພະຍາຍາມມີອິດທິພົນຕໍ່ຄວາມຄິດຂອງເຮົາ ເພື່ອຊັກຊວນເຮົາໃຫ້ຫຼົງທາງແລະຄິດແບບທີ່ມັນຄິດ. ມັນຍັງພະຍາຍາມໂນ້ມນ້າວຫຼືຫຼອກລວງເຮົາໃຫ້ເຮັດຕາມມັນໂດຍໃຊ້ສິ່ງທີ່ດຶງດູດຄວາມຕ້ອງການຂອງເຮົາ.—ອ່ານໂກໂລດ 2:4, 8 *
2-3. (ກ) ເປັນຫຍັງເຮົາຄວນສົນໃຈຄຳເຕືອນທີ່ຂຽນໄວ້ໃນໂກໂລດ 2:8? (ຂ) ເຮົາຈະພິຈາລະນາຫຍັງໃນບົດຄວາມນີ້?
2 ເຮົາມີຄວາມສ່ຽງສູງທີ່ຈະຖືກຊາຕານຫຼອກລວງແທ້ໆບໍ? ແທ້. ຈື່ໄວ້ວ່າໂປໂລບໍ່ໄດ້ຂຽນຄຳເຕືອນໃນໂກໂລດ 2:8 ໃຫ້ຜູ້ທີ່ບໍ່ມີຄວາມເຊື່ອ ແຕ່ລາວຂຽນໃຫ້ຄລິດສະຕຽນທີ່ຖືກເຈີມດ້ວຍພະລັງບໍລິສຸດ. (ໂກໂລ. 1:2, 5) ຖ້າຄລິດສະຕຽນໃນສະໄໝນັ້ນມີຄວາມສ່ຽງທີ່ຈະຖືກຫຼອກລວງ ເຮົາໃນສະໄໝນີ້ແຮ່ງມີຄວາມສ່ຽງສູງທີ່ຈະຖືກຫຼອກລວງ. (1 ໂກ. 10:12) ຍ້ອນຫຍັງ? ກໍຍ້ອນຊາຕານຖືກຖິ້ມລົງມາໃນໂລກ ແລະມັນພະຍາຍາມຢ່າງໜັກທີ່ຈະຫຼອກລວງຜູ້ຮັບໃຊ້ທີ່ສັດຊື່ຂອງພະເຈົ້າ. (ຄຳປ. 12:9, 12, 17) ນອກຈາກນັ້ນ ສະໄໝນີ້ເປັນສະໄໝທີ່ຄົນຊົ່ວແລະນັກຕົ້ມຕຸນ ‘ຈະທຳຊົ່ວຮ້າຍມາກຂຶ້ນ.’—2 ຕີໂມ. 3:1, 13
3 ໃນບົດຄວາມນີ້ ເຮົາຈະພິຈາລະນາວິທີທີ່ຊາຕານໃຊ້ “ຄຳຫຼອກລວງ” ເພື່ອປ່ຽນຄວາມຄິດຂອງເຮົາ ແລະເຮົາຍັງຈະມາເບິ່ງ “ການອຸບາຍ” 3 ຢ່າງຂອງມັນ. (ເອເຟ. 6:11) ໃນບົດຄວາມຕໍ່ໄປ ເຮົາຈະພິຈາລະນາວິທີແກ້ໄຂຄວາມຄິດທີ່ໄດ້ຮັບອິດທິພົນຈາກກົນອຸບາຍຂອງຊາຕານ. ແຕ່ກ່ອນອື່ນ ໃຫ້ເຮົາມາເບິ່ງວ່າມັນຫຼອກລວງຊາວອິດສະລາແອນແນວໃດຕອນທີ່ເຂົາເຈົ້າເຂົ້າໄປໃນແຜ່ນດິນທີ່ພະເຈົ້າສັນຍາ.
ຖືກຫຼອກລວງໃຫ້ນະມັດສະການຮູບເຄົາລົບ
4-6. ຕາມທີ່ຂຽນໄວ້ໃນພະບັນຍັດ 11:10-15 ຊາວອິດສະລາແອນຕ້ອງປ່ຽນແປງວິທີປູກຝັງແນວໃດເມື່ອເຂົ້າໄປໃນແຜ່ນດິນທີ່ພະເຈົ້າສັນຍາ?
4 ຊາຕານສະຫຼາດຫຼາຍ ມັນສາມາດລໍ້ໃຈຊາວອິດສະລາແອນໃຫ້ໄຫວ້ຮູບເຄົາລົບໄດ້. ມັນເຮັດແນວໃດ? ມັນສວຍໂອກາດຕອນທີ່ເຂົາເຈົ້າຈຳເປັນຕ້ອງມີອາຫານ. ເມື່ອຊາວອິດສະລາແອນເຂົ້າໄປໃນແຜ່ນດິນທີ່ພະເຈົ້າສັນຍາ ເຂົາເຈົ້າຕ້ອງປ່ຽນວິທີປູກຝັງແບບໃໝ່. ໃນສະໄໝທີ່ຢູ່ເອຢິບ ເຂົາເຈົ້າໃຊ້ນ້ຳຈາກແມ່ນ້ຳນິນໃນການປູກຝັງ ແຕ່ໃນແຜ່ນດິນທີ່ພະເຈົ້າສັນຍາບໍ່ມີແມ່ນ້ຳໃຫຍ່ຈຶ່ງຕ້ອງໃຊ້ແຕ່ນ້ຳຝົນແລະນ້ຳໝອກ. (ອ່ານພະບັນຍັດ 11:10-15; ເອຊາ. 18:4, 5) ດັ່ງນັ້ນ ຊາວອິດສະລາແອນຕ້ອງຮຽນຮູ້ການປູກຝັງແບບໃໝ່. ນີ້ບໍ່ແມ່ນເລື່ອງງ່າຍ ເພາະຜູ້ທີ່ຮູ້ການປູກຝັງສ່ວນຫຼາຍໄດ້ຕາຍໄປໝົດແລ້ວໃນຖິ່ນທຸລະກັນດານ.
ຊາຕານເຮັດໃຫ້ຊາວກະສິກອນອິດສະລາແອນປ່ຽນຄວາມຄິດແນວໃດ? (ເບິ່ງຂໍ້ 4-6) *
5 ພະເຢໂຫວາໄດ້ອະທິບາຍກັບປະຊາຊົນຂອງພະອົງວ່າສະພາບການຂອງເຂົາເຈົ້າປ່ຽນໄປແລ້ວ. ຈາກນັ້ນ ພະອົງໄດ້ເຕືອນໃນເລື່ອງທີ່ເບິ່ງຄືວ່າບໍ່ກ່ຽວຂ້ອງກັບການປູກຝັງ ໂດຍບອກວ່າ: “ຈົ່ງລະວັງຕົວໃຫ້ດີ ຢ້ານໃຈຂອງທ່ານຈະຖືກລໍ້ລວງຈຶ່ງເວັ້ນໜີແລະບົວລະບັດຂາບໄຫວ້ຮູບພະຕ່າງໆ.” (ບັນຍັດ. 11:16, 17) ຕອນທີ່ພະເຢໂຫວາບອກວິທີການປູກຝັງແບບໃໝ່ ເປັນຫຍັງພະອົງຈຶ່ງເຕືອນເລື່ອງການນະມັດສະການພະປອມນຳ?
6 ພະເຢໂຫວາຮູ້ວ່າຊາວອິດສະລາແອນອາດຖືກລໍ້ໃຈໃຫ້ໄປຮຽນການປູກຝັງຈາກປະເທດອ້ອມຂ້າງທີ່ບໍ່ໄດ້ນະມັດສະການພະເຢໂຫວາ. ແນ່ນອນ ຜູ້ຄົນໃນປະເທດເຫຼົ່ານັ້ນມີປະສົບການຫຼາຍກວ່າຊາວອິດສະລາແອນ ແລະຊາວອິດສະລາແອນກໍສາມາດຮຽນຮູ້ເຕັກນິກທີ່ເປັນປະໂຫຍດຈາກຄົນເຫຼົ່ານັ້ນໄດ້ ແຕ່ມີຄວາມສ່ຽງ. ຊາວກະສິກອນການາອານນະມັດສະການພະບາອານ ແລະຄວາມຄິດຂອງເຂົາເຈົ້າໄດ້ຮັບອິດທິພົນໄປນຳ ເພາະເຂົາເຈົ້າເຊື່ອວ່າພະບາອານເປັນພະເຈົ້າຂອງຟ້າແລະເປັນຜູ້ໃຫ້ນ້ຳຝົນ. ພະເຢໂຫວາບໍ່ຢາກໃຫ້ປະຊາຊົນຂອງພະອົງຖືກຫຼອກລວງຈາກຄວາມເຊື່ອທີ່ຜິດ. ແຕ່ຊາວອິດສະລາແອນກໍຍັງເລືອກທີ່ຈະນະມັດສະການພະບາອານຊ້ຳແລ້ວຊ້ຳອີກ. (ຈົດເຊັນ. 25:3, 5; ຕັດສິນ. 2:13; 1 ກະ. 18:18) ຕອນນີ້ໃຫ້ເຮົາມາສັງເກດວິທີທີ່ຊາຕານໄດ້ຫຼອກລວງຊາວອິດສະລາແອນ.
ສາມວິທີທີ່ຊາຕານໃຊ້ເພື່ອຫຼອກລວງຊາວອິດສະລາແອນ
7. ຄວາມເຊື່ອຂອງຊາວອິດສະລາແອນຖືກທົດສອບແນວໃດເມື່ອເຂົ້າໄປໃນແຜ່ນດິນທີ່ພະເຈົ້າສັນຍາ?
7 ວິທີທຳອິດທີ່ຊາຕານໃຊ້ກໍຄືຄວາມຕ້ອງການໃນເລື່ອງທຳມະດາ ເພາະຊາຕານຮູ້ວ່າຊາວອິດສະລາແອນຢາກໃຫ້ຝົນຕົກ. ໃນດິນແດນທີ່ພະເຈົ້າສັນຍາ ຝົນມັກຈະຕົກໜ້ອຍທຸກປີໃນທ້າຍເດືອນເມສາຫາເດືອນກັນຍາ. ແຕ່ເພື່ອຈະມີນ້ຳໃຊ້ແລະດິນຈະເກີດດອກອອກຜົນແມ່ນຂຶ້ນຢູ່ກັບນ້ຳຝົນທີ່ມັກຈະຕົກຕັ້ງແຕ່ເດືອນຕຸລາ. ຊາຕານຫຼອກລວງຊາວອິດສະລາແອນໃຫ້ເຊື່ອວ່າ ເຂົາເຈົ້າຕ້ອງເຮັດຕາມວິທີການຂອງພວກນອກຮີດໃນປະເທດອ້ອມຂ້າງ. ຊາດເຫຼົ່ານັ້ນເຊື່ອວ່າ ຕ້ອງເຮັດພິທີກຳບາງຢ່າງເພື່ອຝົນຈະຕົກ. ຊາວອິດສະລາແອນທີ່ຂາດຄວາມເຊື່ອໃນພະເຢໂຫວາຄິດວ່າ ນີ້ເປັນວິທີດຽວທີ່ຈະບໍ່ໃຫ້ເກີດໄພແຫ້ງແລ້ງຍາວນານ ດັ່ງນັ້ນ ເຂົາເຈົ້າຈຶ່ງເຮັດພິທີກຳຕ່າງໆເພື່ອນະມັດສະການພະບາອານທີ່ເປັນພະປອມ.
8. ວິທີທີ 2 ທີ່ຊາຕານໃຊ້ແມ່ນຫຍັງ? ຂໍໃຫ້ອະທິບາຍ.
8 ວິທີທີ 2 ທີ່ຊາຕານໃຊ້ຄືຄວາມຕ້ອງການທີ່ຜິດສິນລະທຳ. ຊາດນອກຮີດໃຊ້ການເຮັດຜິດສິນລະທຳທີ່ຮ້າຍແຮງເພື່ອນະມັດສະການພະຂອງເຂົາເຈົ້າ. ການນະມັດສະການທີ່ຜິດສິນລະທຳນີ້ລວມເຖິງການມີໂສເພນີປະຈຳວິຫານທັງຊາຍແລະຍິງ. ຊາດເຫຼົ່ານັ້ນບໍ່ພຽງແຕ່ຍອມໃຫ້ມີການຮັກຮ່ວມເພດແລະການຜິດສິນລະທຳທາງເພດຮູບແບບອື່ນໆ ແຕ່ຍັງຖືວ່າສິ່ງເຫຼົ່ານັ້ນເປັນເລື່ອງປົກກະຕິ! (ບັນຍັດ. 23:17, 18; 1 ກະ. 14:24) ເຂົາເຈົ້າເຊື່ອວ່າການເຮັດພິທີກຳເຫຼົ່ານີ້ຈະເຮັດໃຫ້ພະຂອງເຂົາເຈົ້າອວຍພອນແຜ່ນດິນໃຫ້ເກີດດອກອອກຜົນຫຼາຍ. ຊາວອິດສະລາແອນຫຼາຍຄົນຖືກດຶງດູດໃຫ້ເຮັດພິທີກຳທີ່ຜິດສິນລະທຳເຫຼົ່ານີ້ ແລະເຮັດໃຫ້ເຂົາເຈົ້າໄປນະມັດສະການພະປອມ. ແຕ່ທີ່ຈິງແລ້ວ ເຂົາເຈົ້າຖືກຊາຕານຫຼອກລວງ.
9. ໃນໂອເຊ 2:16, 17 ຊາຕານໄດ້ເຮັດຫຍັງເພື່ອໃຫ້ຊາວອິດສະລາແອນເບິ່ງບໍ່ອອກວ່າພະເຢໂຫວາແມ່ນໃຜ?
9 ວິທີທີ 3 ທີ່ຊາຕານໃຊ້ຄືມັນເຮັດໃຫ້ຊາວອິດສະລາແອນເບິ່ງບໍ່ອອກວ່າພະເຢໂຫວາແມ່ນໃຜ. ໃນສະໄໝຂອງຜູ້ພະຍາກອນເຢເຣມີ ພະເຢໂຫວາບອກວ່າຜູ້ພະຍາກອນປອມເຮັດໃຫ້ປະຊາຊົນລືມຊື່ຂອງພະອົງ “ເພາະພະບາອານ.” (ຢເຣ. 23:27, ລ.ມ.) ເບິ່ງຄືວ່າປະຊາຊົນຂອງພະເຢໂຫວາເຊົາໃຊ້ຊື່ຂອງພະອົງ ແລະປ່ຽນແທນດ້ວຍຊື່ຂອງພະບາອານເຊິ່ງແປວ່າ “ເຈົ້າຂອງ” ຫຼື “ນາຍ.” ການເຮັດແບບນີ້ ເຮັດໃຫ້ຊາວອິດສະລາແອນແຍກບໍ່ອອກວ່າພະເຢໂຫວາແມ່ນໃຜແລະພະບາອານແມ່ນໃຜ ນີ້ໄດ້ເຮັດໃຫ້ເຂົາເຈົ້າເອົາພິທີກຳໃນການນະມັດສະການພະບາອານມາປົນກັບການນະມັດສະການພະເຢໂຫວາ.—ອ່ານໂອເຊ 2:16, 17
ວິທີທີ່ຊາຕານໃຊ້ໃນປັດຈຸບັນ
10. ໃນທຸກມື້ນີ້ຊາຕານໃຊ້ວິທີຫຍັງແດ່?
10 ໃນທຸກມື້ນີ້ຊາຕານກໍຍັງໃຊ້ວິທີການແບບດຽວກັນ. ມັນຫຼອກລວງຜູ້ຄົນໂດຍໃຊ້ຄວາມຕ້ອງການໃນເລື່ອງທຳມະດາ ມັນສົ່ງເສີມການເຮັດຜິດສິນລະທຳ ແລະມັນເຮັດໃຫ້ຜູ້ຄົນເບິ່ງບໍ່ອອກວ່າພະເຢໂຫວາແມ່ນໃຜ. ໃຫ້ເຮົາມາພິຈາລະນາວິທີການສຸດທ້າຍກ່ອນ.
11. ຊາຕານເຮັດແນວໃດເພື່ອໃຫ້ຜູ້ຄົນເບິ່ງບໍ່ອອກວ່າພະເຢໂຫວາແມ່ນໃຜ?
11 ຊາຕານເຮັດໃຫ້ຜູ້ຄົນເບິ່ງບໍ່ອອກວ່າພະເຢໂຫວາແມ່ນໃຜ. ຫຼັງຈາກອັກຄະສາວົກຂອງພະເຍຊູຕາຍໝົດແລ້ວ ຜູ້ທີ່ອ້າງວ່າເປັນຄລິດສະຕຽນໄດ້ເລີ່ມເຜີຍແຜ່ຄຳສອນທີ່ຜິດ. (ກິດ. 20:29, 30; 2 ເທ. 2:3) ຜູ້ທີ່ທໍລະຍົດເຫຼົ່ານີ້ເລີ່ມເຮັດໃຫ້ຜູ້ຄົນເບິ່ງບໍ່ອອກວ່າພະເຈົ້າອົງທ່ຽງແທ້ແມ່ນໃຜ. ຕົວຢ່າງ: ເຂົາເຈົ້າເຊົາໃສ່ຊື່ພະເຈົ້າໃນຄຳພີໄບເບິນທີ່ເຂົາເຈົ້າຈັດພິມ ແລະປ່ຽນແທນໂດຍໃຊ້ຄຳວ່າ “ອົງພະຜູ້ເປັນເຈົ້າ.” ເມື່ອເຂົາເຈົ້າລຶບຊື່ຂອງພະເຈົ້າອອກແລະແທນດ້ວຍຄຳວ່າ “ອົງພະຜູ້ເປັນເຈົ້າ” ນີ້ເຮັດໃຫ້ຜູ້ອ່ານເບິ່ງບໍ່ອອກວ່າພະເຢໂຫວາຕ່າງຈາກພະອື່ນໆແນວໃດ. (1 ໂກ. 8:5) ເຂົາເຈົ້າໃຊ້ຄຳວ່າ “ອົງພະຜູ້ເປັນເຈົ້າ” ທັງສຳລັບຊື່ພະເຢໂຫວາແລະພະເຍຊູ ເຊິ່ງເຮັດໃຫ້ຍາກທີ່ຈະເຂົ້າໃຈວ່າພະເຢໂຫວາແລະພະເຍຊູບໍ່ແມ່ນອົງດຽວກັນ ແລະມີຕຳແໜ່ງຕ່າງກັນ. (ໂຢ. 17:3) ຄວາມສັບສົນແບບນີ້ເຮັດໃຫ້ເກີດມີຄຳສອນໃນເລື່ອງຕີເອການຸພາບ ເຊິ່ງເປັນຄຳສອນທີ່ບໍ່ມີໃນຄຳພີໄບເບິນ. ຜົນກໍຄື ຫຼາຍຄົນຄິດວ່າເລື່ອງຂອງພະເຈົ້າເປັນເລື່ອງເລິກລັບ ແລະເຊື່ອວ່າເຮົາບໍ່ສາມາດຮູ້ຈັກພະອົງໄດ້. ນີ້ເປັນຄຳຕົວະທີ່ຊົ່ວຮ້າຍແທ້ໆ!—ກິດ. 17:27
ຊາຕານໃຊ້ສາສະໜາປອມແນວໃດເພື່ອໃຫ້ຍອມຮັບຄວາມຕ້ອງການທີ່ຜິດສິນລະທຳ? (ເບິ່ງຂໍ້ 12) *
12. ຕາມທີ່ອະທິບາຍໃນໂລມ 1:28-31 ສາສະໜາປອມໄດ້ສົ່ງເສີມຫຍັງ ແລະຜົນເປັນແນວໃດ?
12 ຊາຕານໃຊ້ຄວາມຕ້ອງການທີ່ຈະເຮັດຜິດສິນລະທຳ. ໃນສະໄໝອິດສະລາແອນບູຮານ ຊາຕານໃຊ້ສາສະໜາປອມເພື່ອສົ່ງເສີມການເຮັດຜິດສິນລະທຳ. ທຸກມື້ນີ້ ມັນເຮັດແບບດຽວກັນ. ສາສະໜາປອມຍອມຮັບການເຮັດຜິດສິນລະທຳ ແລະຍັງສົ່ງເສີມການເຮັດຜິດສິນລະທຳນຳອີກ. ຜົນກໍຄື ຫຼາຍຄົນທີ່ບອກວ່າຮັບໃຊ້ພະເຈົ້າໄດ້ປະຖິ້ມມາດຕະຖານອັນຈະແຈ້ງດ້ານສິນລະທຳຂອງພະອົງ. ອັກຄະສາວົກໂປໂລເວົ້າເຖິງເລື່ອງນີ້ໃນຈົດໝາຍທີ່ລາວຂຽນໄປຫາພີ່ນ້ອງໃນໂລມ. (ອ່ານໂລມ 1:28-31) ໂປໂລບອກວ່າໃນບັນດາ ‘ການກະທຳທີ່ບໍ່ສົມຄວນ’ ມີການເຮັດຜິດສິນລະທຳທາງເພດທຸກຮູບແບບເຊິ່ງລວມເອົາການຮັກຮ່ວມເພດນຳ. (ໂລມ 1:24-27, 32; ຄຳປ. 2:20) ເປັນເລື່ອງສຳຄັນແທ້ໆທີ່ເຮົາຈະບໍ່ປະຖິ້ມຄຳສອນອັນຈະແຈ້ງຂອງຄຳພີໄບເບິນ!
13. ຊາຕານໃຊ້ວິທີການຫຍັງອີກ?
13 ຊາຕານໃຊ້ຄວາມຕ້ອງການໃນເລື່ອງທຳມະດາ. ເປັນເລື່ອງທຳມະດາທີ່ຄົນເຮົາຢາກມີຄວາມສາມາດເພື່ອຈະຫາລ້ຽງຕົວເອງແລະຄອບຄົວ. (1 ຕີໂມ. 5:8) ສ່ວນຫຼາຍເຮົາໄດ້ຄວາມສາມາດນີ້ຈາກການເຂົ້າໂຮງຮຽນ ແລະຕັ້ງໃຈຮຽນ. ແຕ່ເຮົາຕ້ອງລະວັງ. ລະບົບການສຶກສາໃນຫຼາຍໆປະເທດບໍ່ພຽງແຕ່ສອນຄວາມສາມາດທີ່ໃຊ້ໃນຊີວິດ ແຕ່ຍັງສອນປັດຊະຍາຂອງມະນຸດ. ໂຮງຮຽນສ່ວນຫຼາຍສອນໃຫ້ນັກຮຽນສົງໄສວ່າພະເຈົ້າມີຢູ່ແທ້ບໍ ແລະບໍ່ສົນໃຈຄຳພີໄບເບິນ. ເຂົາເຈົ້າສອນວ່າມີແຕ່ຄົນສະຫຼາດທີ່ເຊື່ອວ່າຊີວິດເກີດມາຈາກວິວັດທະນາການ. (ໂລມ 1:21-23) ຄຳສອນເຫຼົ່ານີ້ຂັດກັບ “ຄວາມປັນຍາຂອງພະເຈົ້າ.”—1 ໂກ. 1:19-21; 3:18-20
14. ປັດຊະຍາມະນຸດສົ່ງເສີມເຮົາໃຫ້ເປັນຄົນແບບໃດ?
14 ປັດຊະຍາມະນຸດບໍ່ກ່ຽວຂ້ອງກັບມາດຕະຖານຂອງພະເຈົ້າ ແລະບາງເທື່ອກໍກົງກັນຂ້າມ. ປັດຊະຍານີ້ບໍ່ໄດ້ສົ່ງເສີມຜົນທີ່ເກີດຈາກພະລັງຂອງພະເຈົ້າ ແຕ່ພັດສົ່ງເສີມ “ການກະທຳທີ່ເກີດຈາກຄວາມຕ້ອງການຂອງຮ່າງກາຍທີ່ມີບາບ.” (ຄລາ. 5:19-23, ລ.ມ.) ປັດຊະຍາຂອງມະນຸດຫຼໍ່ຫຼອມຜູ້ຄົນໃຫ້ເປັນຄົນຖືໂຕແລະຍິ່ງຈອງຫອງ ເຊິ່ງໃນທີ່ສຸດກໍກາຍເປັນຄົນທີ່ “ຮັກແຕ່ຕົວເອງ.” (2 ຕີໂມ. 3:2-4) ຄຸນລັກສະນະນີ້ກົງກັນຂ້າມກັບຄວາມຈຽມຕົວແລະຄວາມຖ່ອມຕົວ ເຊິ່ງເປັນຄຸນລັກສະນະທີ່ຜູ້ຮັບໃຊ້ຂອງພະເຈົ້າຄວນຈະມີ. (2 ຊາມ. 22:28) ຄລິດສະຕຽນບາງຄົນທີ່ໄດ້ສຶກສາຢູ່ມະຫາວິທະຍາໄລຖືກຫຼໍ່ຫຼອມໃຫ້ຄິດແບບມະນຸດແທນທີ່ຈະຄິດແບບພະເຈົ້າ. ໃຫ້ເຮົາມາເບິ່ງວ່າຖ້າເຮົາເຮັດສິ່ງດັ່ງກ່າວອາດຈະເກີດຫຍັງຂຶ້ນ.
ປັດຊະຍາຂອງມະນຸດມີຜົນຕໍ່ຄວາມຄິດຂອງເຮົາແນວໃດ? (ເບິ່ງຂໍ້ 14-16) *
15-16. ເຈົ້າໄດ້ບົດຮຽນຫຍັງຈາກປະສົບການຂອງພີ່ນ້ອງຍິງຄົນໜຶ່ງ?
15 ພີ່ນ້ອງຍິງທີ່ຮັບໃຊ້ເຕັມເວລາຫຼາຍກວ່າ 15 ປີບອກວ່າ: “ໃນຖານະເປັນພະຍານພະເຢໂຫວາທີ່ຮັບບັບເຕມາແລ້ວ ຂ້ອຍເຄີຍໄດ້ຍິນແລະໄດ້ອ່ານເລື່ອງອັນຕະລາຍຂອງການຮຽນຢູ່ໃນມະຫາວິທະຍາໄລ ແຕ່ຂ້ອຍກໍບໍ່ສົນໃຈກັບຄຳເຕືອນນັ້ນ. ຂ້ອຍຄິດວ່າຄຳແນະນຳນັ້ນໃຊ້ບໍ່ໄດ້ກັບຂ້ອຍ.” ລາວປະສົບກັບບັນຫາຫຍັງແດ່? ລາວບອກວ່າ: “ການຮຽນແຕ່ລະວິຊາໃຊ້ເຫື່ອແຮງແລະເວລາຫຼາຍຈົນບໍ່ມີເວລາອະທິດຖານເຖິງພະເຢໂຫວາໃນແບບທີ່ຂ້ອຍເຄີຍເຮັດຜ່ານມາ ບໍ່ມີເຫື່ອແຮງທີ່ຈະລົມເລື່ອງຄຳພີໄບເບິນກັບຄົນອື່ນ ແລະບໍ່ມີແຮງກຽມດີໆສຳລັບການປະຊຸມ. ແຕ່ຂ້ອຍຮູ້ສຶກດີໃຈທີ່ຍັງສຳນຶກໄດ້ວ່າການຮຽນສູງທຳລາຍສາຍສຳພັນຂອງຂ້ອຍກັບພະເຢໂຫວາ ຂ້ອຍຮູ້ວ່າຂ້ອຍຕ້ອງປ່ຽນ ແລະໃນທີ່ສຸດຂ້ອຍກໍເຊົາຮຽນ.”
16 ການຮຽນຢູ່ມະຫາວິທະຍາໄລສົ່ງຜົນຕໍ່ຄວາມຄິດຂອງລາວແນວໃດ? ລາວຕອບວ່າ: “ຂ້ອຍຮູ້ສຶກອາຍທີ່ຈະບອກວ່າການຮຽນສູງໆສອນຂ້ອຍໃຫ້ມັກຈັບຜິດຄົນອື່ນໂດຍສະເພາະພີ່ນ້ອງຮ່ວມຄວາມເຊື່ອ ຂ້ອຍຄາດໝາຍຈາກເຂົາເຈົ້າສູງເກີນໄປ ແລະແຍກຕົວເອງອອກຈາກເຂົາເຈົ້າ. ຂ້ອຍຕ້ອງໃຊ້ເວລາດົນເພື່ອຈະແກ້ໄຂຄວາມຄິດແບບນັ້ນ. ປະສົບການນີ້ເຮັດໃຫ້ຂ້ອຍເຫັນວ່າ ມັນອັນຕະລາຍແທ້ໆທີ່ບໍ່ໃສ່ໃຈຄຳເຕືອນທີ່ພະເຢໂຫວາພໍ່ຂອງເຮົາໃນສະຫວັນໃຫ້ຜ່ານທາງອົງການຂອງພະອົງ. ພະເຢໂຫວາຮູ້ຈັກຂ້ອຍດີກວ່າທີ່ຂ້ອຍຮູ້ຈັກຕົວເອງ. ຂ້ອຍໜ້າຈະຟັງພະອົງຕັ້ງແຕ່ທຳອິດ!”
17. (ກ) ເຮົາຄວນຕັ້ງໃຈແນ່ວແນ່ທີ່ຈະເຮັດຫຍັງ? (ຂ) ເຮົາຈະພິຈາລະນາຫຍັງໃນບົດຄວາມຕໍ່ໄປ?
17 ຂໍໃຫ້ຕັ້ງໃຈແນ່ວແນ່ທີ່ຈະບໍ່ຖືກຫຼອກລວງດ້ວຍ “ປັດຊະຍາແລະຄຳຫຼອກລວງ” ຂອງໂລກຊາຕານ. ໃຫ້ປົກປ້ອງຕົວເອງຈາກກົນອຸບາຍຂອງຊາຕານຕໍ່ໆໄປ. (1 ໂກ. 3:18; 2 ໂກ. 2:11) ຢ່າໃຫ້ຊາຕານເຮັດໃຫ້ເຈົ້າເບິ່ງບໍ່ອອກວ່າພະເຢໂຫວາແມ່ນໃຜ. ໃຫ້ເຮັດຕາມມາດຕະຖານອັນສູງສົ່ງດ້ານສິນລະທຳຂອງພະເຢໂຫວາ ແລະຢ່າໃຫ້ຊາຕານຫຼອກລວງເຈົ້າບໍ່ໃຫ້ສົນໃຈຄຳແນະນຳຂອງພະເຢໂຫວາ. ແຕ່ເຈົ້າຈະເຮັດແນວໃດຖ້າຮູ້ສຶກວ່າໄດ້ຮັບອິດທິພົນຈາກຄວາມຄິດຂອງໂລກນີ້ແລ້ວ? ບົດຄວາມຕໍ່ໄປຈະສະແດງໃຫ້ເຫັນວ່າ ຄຳພີໄບເບິນຈະຊ່ວຍເຮົາແນວໃດໃຫ້ລົບລ້າງຄວາມຄິດແລະນິດໄສທີ່ “ຝັງຮາກເລິກ.”—2 ໂກ. 10:4, 5, ລ.ມ.
ເພງ 49 ເຮັດໃຫ້ພະເຢໂຫວາພໍໃຈ
^ ຂໍ້ 5 ຊາຕານຊຳນານໃນການຫຼອກລວງຜູ້ຄົນ. ມັນຫຼອກລວງຫຼາຍຄົນໃຫ້ເຊື່ອວ່າສິ່ງທີ່ເຂົາເຈົ້າຄິດຈະເຮັດໃຫ້ເຂົາເຈົ້າເປັນອິດສະຫຼະ. ໃນບົດຄວາມນີ້ເຮົາຈະມາເບິ່ງວ່າຊາຕານໃຊ້ວິທີໃດແດ່ເພື່ອຫຼອກລວງຜູ້ຄົນ.
^ ຂໍ້ 1 ໂກໂລດ 2:4, 8 (ລ.ມ.): “ຂ້ອຍເວົ້າເລື່ອງນີ້ກໍເພື່ອບໍ່ໃຫ້ໃຜມາຫຼອກລວງພວກເຈົ້າໄດ້ ເຖິງວ່າເຂົາຈະໃຊ້ຄຳເວົ້າຈູງໃຈໜ້າຟັງ. ລະວັງໃຫ້ດີ ຢ່າໃຫ້ໃຜມາຊັກຊວນໃຫ້ຫຼົງດ້ວຍປັດຊະຍາແລະຄຳຫຼອກລວງທີ່ບໍ່ມີປະໂຫຍດຕາມທີ່ມະນຸດສອນຕໍ່ໆກັນມາແລະຕາມແນວຄິດຕ່າງໆຂອງໂລກ ເຊິ່ງບໍ່ໄດ້ມາຈາກພະຄລິດ.”
^ ຂໍ້ 49 ຄຳອະທິບາຍຮູບພາບ: ຊາວອິດສະລາແອນທີ່ຄົບຫາກັບຊາວການາອານໄດ້ຖືກລໍ້ໃຈໃຫ້ນະມັດສະການພະບາອານແລະເຮັດຜິດສິນລະທຳ.
^ ຂໍ້ 52 ຄຳອະທິບາຍຮູບພາບ: ປ້າຍໂຄສະນາຂອງໂບດທີ່ຍອມຮັບການຮັກຮ່ວມເພດ.
^ ຂໍ້ 54 ຄຳອະທິບາຍຮູບພາບ: ພີ່ນ້ອງຍິງຄົນໜຶ່ງຮຽນຢູ່ມະຫາວິທະຍາໄລ. ລາວກັບໝູ່ໃນຫ້ອງຮຽນຫຼົງເຊື່ອຄຳເວົ້າຂອງອາຈານທີ່ວ່າ ວິທະຍາສາດແລະເຕັກໂນໂລຊີສາມາດແກ້ໄຂບັນຫາທັງໝົດຂອງມະນຸດ. ເມື່ອກຳລັງປະຊຸມລາວກໍບໍ່ສົນໃຈ ແລະຍັງຄິດຈັບຜິດພີ່ນ້ອງນຳອີກ.
