ຂ້ອຍ​ເປັນ​ຄົນ​ຮັກ​ທຳມະຊາດ​ມາ​ຕັ້ງ​ແຕ່​ຍັງ​ນ້ອຍ. ຄອບຄົວ​ຂອງ​ຂ້ອຍ​ມັກ​ໄປ​ທ່ຽວ​ໃນ​ປ່າ​ໃນ​ດົງ​ເພື່ອ​ເບິ່ງ​ຄວາມ​ງາມ​ຂອງ​ປ່າ​ໄມ້​ແລະ​ທະເລ​ສາບ​ຮອບ​ເມືອງ​ຢູແວດສ໌ກຶລະ ເຊິ່ງ​ເປັນ​ບ້ານ​ເກີດ​ຂອງ​ເຮົາ​ທີ່​ຢູ່​ຕອນ​ກາງ​ຂອງ​ແຟງລັງ. ຂ້ອຍ​ຍັງ​ເປັນ​ຄົນ​ທີ່​ຮັກ​ສັດ​ນຳ. ຕອນ​ເປັນ​ເດັກ​ນ້ອຍ ຂ້ອຍ​ຢາກ​ກອດ​ແມວ​ກັບ​ໝາ​ທຸກ​ໂຕ​ທີ່​ຂ້ອຍ​ເຫັນ! ເມື່ອ​ໃຫຍ່​ຂຶ້ນ ຂ້ອຍ​ບໍ່​ມັກ​ເມື່ອ​ເຫັນ​ຜູ້​ຄົນ​ທຳ​ຮ້າຍ​ສັດ. ຕໍ່​ມາ ຂ້ອຍ​ໄດ້​ເຂົ້າ​ຮ່ວມ​ກັບ​ອົງກອນ​ປົກ​ປ້ອງ​ສັດ​ແຫ່ງ​ໜຶ່ງ ເຊິ່ງ​ຂ້ອຍ​ໄດ້​ພົບ​ຫຼາຍ​ຄົນ​ທີ່​ມີ​ແນວ​ຄິດ​ແບບ​ດຽວ​ກັນ.

ເຮົາ​ລົນ​ນະ​ລົງ​ຮຽກ​ຮ້ອງ​ເພື່ອ​ສິດທິ​ຂອງ​ສັດ​ຢ່າງ​ຈິງ​ຈັງ. ເຮົາ​ແຈກ​ຢາຍ​ຂໍ້​ມູນ​ແລະ​ຍ່າງ​ຂະບວນ​ປະ​ທ້ວງ​ເພື່ອ​ຕໍ່​ຕ້ານ​ຮ້ານ​ຂາຍ​ເຄື່ອງ​ນຸ່ງ​ທີ່​ເຮັດ​ມາ​ຈາກ​ຂົນ​ສັດ​ແລະ​ຫ້ອງ​ທົດລອງ​ຫຼາຍ​ບ່ອນ​ທີ່​ເອົາ​ສັດ​ມາ​ທົດລອງ. ເຮົາ​ເຖິງ​ຂັ້ນ​ຕັ້ງ​ອົງກອນ​ປົກ​ປ້ອງ​ສັດ​ຂອງ​ເຮົາ​ເອງ. ຍ້ອນ​ເຮົາ​ໃຊ້​ວິທີ​ທີ່​ຂ້ອນ​ຂ້າງ​ຮຸນແຮງ​ໃນ​ການ​ປະ​ທ້ວງ ເຮົາ​ຈຶ່ງ​ມີ​ບັນຫາ​ກັບ​ພວກ​ເຈົ້າ​ໜ້າ​ທີ່​ຢູ່​ຕະຫຼອດ. ຂ້ອຍ​ເອງ​ກໍ​ເຄີຍ​ຖືກ​ຈັບ​ແລະ​ຂຶ້ນ​ສານ​ມາ​ຫຼາຍ​ເທື່ອ​ແລ້ວ.

ນອກ​ຈາກ​ເປັນ​ຫ່ວງ​ສັດ​ແລ້ວ ຂ້ອຍ​ຍັງ​ທຸກ​ໃຈ​ເມື່ອ​ເຫັນ​ບັນຫາ​ຕ່າງໆທີ່​ເກີດ​ຂຶ້ນ​ຢູ່​ທົ່ວ​ໂລກ. ໃນ​ທີ່​ສຸດ ຂ້ອຍ​ກໍ​ເຂົ້າ​ໄປ​ເປັນ​ສະມາຊິກ​ຂອງ​ອົງກອນ​ຕ່າງໆລວມ​ທັງ​ອົງການ​ນິລະໂທດກຳ​ສາກົນ​ແລະ​ອົງການ​ກຣີນພີດຊ໌. ຂ້ອຍ​ທຸ່ມເທ​ແຮງ​ກາຍ​ແຮງ​ໃຈ​ທຸກ​ຢ່າງ​ເພື່ອ​ສະໜັບສະໜູນ​ກິດຈະກຳ​ຂອງ​ອົງກອນ​ເຫຼົ່າ​ນີ້. ຂ້ອຍ​ຮຽກ​ຮ້ອງ​ສິດທິ​ເພື່ອ​ຄົນ​ທຸກ​ຍາກ ຄົນ​ອຶດຢາກ​ຫິວ​ໂຫຍ ແລະ​ຄົນ​ດ້ອຍ​ໂອກາດ.

ແຕ່​ໃນ​ທີ່​ສຸດ ຂ້ອຍ​ກໍ​ຕ້ອງ​ຍອມ​ຮັບ​ວ່າ ຂ້ອຍ​ບໍ່​ສາມາດ​ປ່ຽນ​ແປງ​ໂລກ​ນີ້. ເຖິງ​ວ່າ​ອົງກອນ​ເຫຼົ່າ​ນັ້ນ​ຈະ​ຊ່ວຍ​ແກ້ໄຂ​ບັນຫາ​ເລັກໆນ້ອຍໆໄດ້ ແຕ່​ບັນຫາ​ໃຫຍ່ໆພັດ​ຮ້າຍແຮງ​ຂຶ້ນ​ກວ່າ​ເກົ່າ. ເບິ່ງ​ຄື​ວ່າ​ພະລັງ​ອຳນາດ​ທີ່​ຊົ່ວ​ຮ້າຍ​ໄດ້​ຄອບງຳ​ໄປ​ທົ່ວ​ໂລກ​ແລະ​ບໍ່​ມີ​ໃຜ​ສົນ​ໃຈ​ວ່າ​ໂລກ​ນີ້​ຈະ​ເປັນ​ແນວ​ໃດ. ຂ້ອຍ​ຮູ້ສຶກ​ວ່າ​ໂຕ​ເອງ​ບໍ່​ສາມາດ​ຊ່ວຍ​ຫຍັງ​ໄດ້​ເລີຍ.

ຂ້ອຍ​ເສົ້າໃຈ​ທີ່​ຂ້ອຍ​ເຮັດ​ຫຍັງ​ບໍ່​ໄດ້ ຂ້ອຍ​ຈຶ່ງ​ເລີ່ມ​ຄິດ​ເລື່ອງ​ພະເຈົ້າ​ແລະ​ຄຳພີ​ໄບເບິນ. ກ່ອນ​ໜ້າ​ນັ້ນ​ຂ້ອຍ​ເຄີຍ​ສຶກສາ​ຄຳພີ​ໄບເບິນ​ກັບ​ພະຍານ​ພະ​ເຢໂຫວາ. ເຖິງ​ວ່າ​ຂ້ອຍ​ຮູ້​ວ່າ​ພະຍານ​ເປັນ​ຄົນ​ມີ​ນ້ຳໃຈ​ແລະ​ຫ່ວງໃຍ​ຂ້ອຍ​ແທ້ໆ ແຕ່​ຕອນ​ນັ້ນ​ຂ້ອຍ​ຍັງ​ບໍ່​ພ້ອມ​ທີ່​ຈະ​ປ່ຽນ​ແປງ​ໂຕ​ເອງ. ແຕ່​ຕອນ​ນີ້ ຫຼາຍ​ຢ່າງ​ປ່ຽນ​ໄປ​ແລ້ວ.

ຂ້ອຍ​ຈັບ​ຄຳພີ​ໄບເບິນ​ອອກ​ມາ​ແລ້ວ​ເລີ່ມ​ອ່ານ. ຂ້ອຍ​ຮູ້ສຶກ​ວ່າ​ຄຳພີ​ໄບເບິນ​ເປັນ​ຄື​ຢາ​ປົວ​ໃຈ. ຂ້ອຍ​ສັງເກດ​ວ່າ​ຂໍ້​ຄຳພີ​ຫຼາຍ​ຂໍ້​ສອນ​ໃຫ້​ເຮົາ​ປະຕິບັດ​ຕໍ່​ສັດ​ດ້ວຍ​ຄວາມ​ກະລຸນາ. ຕົວຢ່າງ​ເຊັ່ນ ສຸພາສິດ 12:10, ລ.ມ. ບອກ​ວ່າ “ຄົນ​ດີ​ເບິ່ງ​ແຍງ​ເອົາໃຈໃສ່​ສັດ​ລ້ຽງ​ຂອງ​ຕົນ.” ຂ້ອຍ​ຍັງ​ໄດ້​ເຂົ້າ​ໃຈ​ອີກ​ວ່າ​ພະເຈົ້າ​ບໍ່​ແມ່ນ​ຕົ້ນ​ເຫດ​ຂອງ​ບັນຫາ​ທີ່​ເກີດ​ຂຶ້ນ​ໃນ​ໂລກ ແຕ່​ບັນຫາ​ຂອງ​ມະນຸດ​ຮ້າຍແຮງ​ຂຶ້ນ​ເພາະ​ຜູ້​ຄົນ​ສ່ວນ​ຫຼາຍ​ບໍ່​ຍອມ​ເຮັດ​ຕາມ​ຄຳ​ແນະນຳ​ຂອງ​ເພິ່ນ. ຂ້ອຍ​ປະທັບ​ໃຈ​ຫຼາຍ​ເມື່ອ​ໄດ້​ຮຽນ​ຮູ້​ວ່າ​ພະ​ເຢໂຫວາ​ມີ​ຄວາມ​ຮັກ​ແລະ​ຄວາມ​ອົດ​ທົນ.—ຄຳເພງ 103:8-14

ໃນ​ໄລຍະ​ນັ້ນ ຂ້ອຍ​ພົບ​ຄູ​ປອງ​ຂໍ​ປຶ້ມ​ຄຳພີ​ໄບເບິນ​ສອນ​ແນວ​ໃດ​ແທ້ໆ? ຂ້ອຍ​ຈຶ່ງ​ຂຽນ​ສົ່ງ​ໄປ​ຂໍ. ບໍ່​ດົນ​ກໍ​ມີ​ພະຍານ​ສອງ​ຜົວ​ເມຍ​ມາ​ຫາ​ຂ້ອຍ​ຢູ່​ເຮືອນ​ແລະ​ຊວນ​ຂ້ອຍ​ຮຽນ​ຄຳພີ​ໄບເບິນ ແລ້ວ​ຂ້ອຍ​ກໍ​ຕອບ​ຕົກ​ລົງ. ຂ້ອຍ​ຍັງ​ເລີ່ມ​ເຂົ້າ​ຮ່ວມ​ການ​ປະຊຸມ​ຄລິດສະຕຽນ​ຢູ່​ຫໍ​ປະຊຸມ​ລາຊະອານາຈັກ​ນຳ. ຜົນ​ກໍ​ຄື ຂ້ອຍ​ເລີ່ມ​ຮັກ​ສິ່ງ​ທີ່​ໄດ້​ຮຽນ​ຈາກ​ຄຳພີ​ໄບເບິນ.

ຄຳພີ​ໄບເບິນ​ຊ່ວຍ​ຂ້ອຍ​ປ່ຽນ​ແປງ​ຫຼາຍ​ສິ່ງ​ຫຼາຍ​ຢ່າງ​ໃນ​ຊີວິດ. ຂ້ອຍ​ເຊົາ​ສູບ​ຢາ​ແລະ​ເຊົາ​ກິນ​ເຫຼົ້າ​ຫຼາຍ​ເກີນ​ໄປ. ຂ້ອຍ​ປ່ຽນ​ຮູບ​ແບບ​ການ​ແຕ່ງ​ໂຕ ຕັດ​ຜົມ​ໃໝ່ ແລະ​ເວົ້າ​ສຸພາບ​ຂຶ້ນ. ແລະ​ຂ້ອຍ​ໄດ້​ປ່ຽນ​ຄວາມ​ຄິດ​ທີ່​ມີ​ຕໍ່​ເຈົ້າ​ໜ້າ​ທີ່​ບ້ານ​ເມືອງ. (ໂຣມ 13:1) ຂ້ອຍ​ຍັງ​ເຊົາ​ໃຊ້​ຊີວິດ​ແບບ​ຜິດສິນລະທຳ ເພາະ​ທີ່​ຜ່ານ​ມາ​ຂ້ອຍ​ໃຊ້​ຊີວິດ​ແບບ​ບໍ່​ມີ​ການ​ຄວບຄຸມ​ໂຕ​ເອງ​ເລີຍ.

ການ​ປ່ຽນ​ແປງ​ທີ່​ຍາກ​ທີ່​ສຸດ​ສຳລັບ​ຂ້ອຍ​ແມ່ນ ການ​ເບິ່ງ​ອົງກອນ​ທີ່​ຮຽກ​ຮ້ອງ​ສິດທິ​ຕ່າງໆຢ່າງ​ຖືກຕ້ອງ. ນີ້​ເປັນ​ເລື່ອງ​ທີ່​ຕ້ອງ​ໃຊ້​ເວລາ. ຕອນ​ທຳອິດ ຂ້ອຍ​ຮູ້ສຶກ​ວ່າ​ຖ້າ​ຂ້ອຍ​ລາ​ອອກ​ກໍ​ເທົ່າ​ກັບ​ຂ້ອຍ​ທໍລະຍົດ​ອົງກອນ​ເຫຼົ່າ​ນີ້. ແຕ່​ຂ້ອຍ​ໄດ້​ມາ​ເຂົ້າ​ໃຈ​ວ່າ​ການ​ປົກຄອງ​ຂອງ​ພະເຈົ້າ​ເປັນ​ພຽງ​ຄວາມ​ຫວັງ​ດຽວ​ສຳລັບ​ໂລກ​ຂອງ​ເຮົາ. ຂ້ອຍ​ຈຶ່ງ​ຕັດສິນ​ໃຈ​ທຸ່ມເທ​ກຳລັງ​ເຫື່ອ​ແຮງ​ທັງ​ໝົດ​ເພື່ອ​ສະໜັບສະໜູນ​ການ​ປົກຄອງ​ຂອງ​ພະເຈົ້າ​ແລະ​ຊ່ວຍ​ຄົນ​ອື່ນໆໃຫ້​ຮຽນ​ຮູ້​ເລື່ອງ​ນີ້.—ມັດທາຍ 6:33

ຕອນ​ທີ່​ຂ້ອຍ​ເປັນ​ນັກ​ຕໍ່​ສູ້​ເພື່ອ​ສັງຄົມ ຂ້ອຍ​ເຄີຍ​ຄິດ​ວ່າ​ຄົນ​ເຮົາ​ມີ​ສອງ​ປະເພດ​ເທົ່າ​ນັ້ນ ຄື​ບໍ່​ດີ​ກໍ​ຊົ່ວ ແລະ​ຖ້າ​ຂ້ອຍ​ເບິ່ງ​ວ່າ​ໃຜ​ຊົ່ວ​ຂ້ອຍ​ກໍ​ພ້ອມ​ຈະ​ຈັດການ​ລາວ. ແຕ່​ເມື່ອ​ໄດ້​ຮຽນ​ຄຳພີ​ໄບເບິນ ຂ້ອຍ​ຈຶ່ງ​ບໍ່​ຊັງ​ຜູ້​ອື່ນ​ອີກ​ຕໍ່​ໄປ ແລະ​ພະຍາຍາມ​ປູກ​ຝັງ​ຄວາມ​ຮັກ​ແບບ​ຄລິດສະຕຽນ​ຕໍ່​ທຸກ​ຄົນ. (ມັດທາຍ 5:​44) ວິທີ​ໜຶ່ງ​ທີ່​ຂ້ອຍ​ສະແດງ​ຄວາມ​ຮັກ​ກໍ​ຄື ບອກ​ຂ່າວ​ດີ​ເລື່ອງ​ການ​ປົກຄອງ​ຂອງ​ພະເຈົ້າ​ໃຫ້​ຄົນ​ອື່ນໆ. ຂ້ອຍ​ດີ​ໃຈ​ທີ່​ຮູ້​ວ່າ​ວຽກ​ທີ່​ເຮັດ​ໂດຍ​ບໍ່​ຫວັງ​ຜົນ​ຕອບ​ແທນ​ນີ້​ຊ່ວຍ​ໃຫ້​ຄົນ​ອື່ນ​ມີ​ສັນຕິສຸກ ມີ​ຄວາມ​ສຸກ ແລະ​ມີ​ຄວາມ​ຫວັງ​ແທ້.

ເມື່ອ​ຝາກ​ບັນຫາ​ແລະ​ຄວາມ​ກັງວົນ​ທຸກ​ຢ່າງ​ໄວ້​ໃຫ້​ພະ​ເຢໂຫວາ​ຈັດການ ຂ້ອຍ​ກໍ​ສະບາຍ​ໃຈ​ຂຶ້ນ. ຂ້ອຍ​ໝັ້ນ​ໃຈ​ວ່າ​ພະເຈົ້າ ຜູ້​ສ້າງ​ຂອງ​ເຮົາ ຈະ​ບໍ່​ປ່ອຍ​ໃຫ້​ສັດ​ແລະ​ມະນຸດ​ຖືກ​ທຳ​ຮ້າຍ​ຕະຫຼອດ​ໄປ ແລະ​ບໍ່​ປ່ອຍ​ໃຫ້​ໂລກ​ທີ່​ສວຍ​ງາມ​ນີ້​ຖືກ​ທຳລາຍ. ແຕ່​ອີກ​ບໍ່​ດົນ ພະເຈົ້າ​ຈະ​ຟື້ນຟູ​ທຸກ​ສິ່ງ​ໃຫ້​ກັບ​ມາ​ມີ​ສະພາບ​ດີ​ຄື​ເກົ່າ​ໂດຍ​ທາງ​ການ​ປົກຄອງ​ຂອງ​ເພິ່ນ. (ເອຊາອີ 11:​1-9) ຂ້ອຍ​ດີ​ໃຈ​ຫຼາຍ​ທີ່​ໄດ້​ຮຽນ​ຮູ້​ຄວາມ​ຈິງ​ເຫຼົ່າ​ນີ້​ແລະ​ໄດ້​ຊ່ວຍ​ຄົນ​ອື່ນໆໃຫ້​ມີ​ຄວາມ​ເຊື່ອ​ຄື​ກັນ​ກັບ​ຂ້ອຍ. ຂ້ອຍ​ເຊົາ​ຄິດ​ທີ່​ຈະ​ປ່ຽນ​ໂລກ​ດ້ວຍ​ມື​ຂອງ​ຂ້ອຍ​ເອງ.