1 Malena 19:1-21
19 Cwale Akabe+ abulelela Jezabele+ lika kaufela zanaaezize Elia, ni mwanaabulaezi bapolofita kaufela ka mukwale.+
2 Jezabele hautwa cwalo, aluma numwana ku Elia, ali: “Milimu inife koto mi iniekeleze kwateñi haiba kamuso ka nako ye hanina kukueza sina yomuñwi ni yomuñwi wabona!”
3 Elia kihaa kenelwa ki sabo, mi ananuha, abaleha kuli apilise bupilo bwahae.+ Apunya mwa Beere-sheba+ wa mwa Juda,+ mi asiya sikombwa sahae mwateñi.
4 Aya mwa lihalaupa musipili oeza lizazi lililiñwi, mi ayo ina mwatasaa kota, mi aikupela kuli ashwe. Abulela kuli: “Kulikani! Wena Jehova, uunge bupilo bwaka,+ kakuli hanifiti bo kuku.”
5 Cwale alobala mi aya mwa buloko inzaa li mwatasaa kota. Mi honafo lingeloi lamuswala+ mi lali ku yena: “Zuha uce.”+
6 Hazuha, abona sinkwa sa laundi fa macwe acisa ni nkwana ya mezi kwatuko a toho yahae. Aca ni kunwa mi alobala hape.
7 Hasamulaho, lingeloi la Jehova lakuta lwabubeli mi lamunyunga, lali: “Zuha uce, hakusicwalo hauna kukona kuzamaya musipili.”
8 Kihaa zuha mi aca ni kunwa, mi ka maata anaafumani kwa sico seo, azamaya ka mazazi a 40 ni masihu a 40 kuyo fita kwa Horebe, lona lilundu la Mulimu wa niti.+
9 Hafitile kwateñi akena mwa mukoti+ mi alobala mwateñi busihu; mi hamubone! Linzwi la Jehova lataha ku yena, lali: “Elia, uezañi kwanu?”
10 Aalaba, ali: “Nitukufalezwi hahulu Jehova Mulimu wa limpi;+ kakuli sicaba sa Isilaele sisiile tumelelano yahao,+ basinyize lialetare zahao, mi babulaile bapolofita bahao ka mukwale,+ mi ki na feela yasiyezi. Mi cwale bazuma bupilo bwaka.”+
11 Kono Mulimu ali: “Zwela fande, uyo yema fa lilundu fapilaa Jehova.” Mi hamubone! Jehova naafita,+ mi moya omutuna, omaata neushanauna malundu ni kupazaula macwe fapilaa Jehova,+ kono Jehova naasiyo mwa moya wo. Hamulaho wa moya, kwataha zikinyeho,+ kono Jehova naasiyo mwa zikinyeho yeo.
12 Hamulaho wa zikinyeho, kwataha mulilo,+ kono Jehova naasiyo mwa mulilo wo. Hamulaho wa mulilo, kwautwahala linzwi lene liutwahalela mwatasi, leliombalile.+
13 Elia hautwa linzwi leo, aikwahela kwa pata ka siapalo sahae,+ mi azwela kwande, ayo yema kwa makenelo a mukoti. Cwale linzwi lamubuza kuli: “Elia, uezañi kwanu?”
14 Aalaba, ali: “Nitukufalezwi hahulu za Jehova Mulimu wa limpi; kakuli sicaba sa Isilaele sisiile tumelelano yahao,+ basinyize lialetare zahao, mi babulaile bapolofita bahao ka mukwale, mi ki na feela yasiyezi. Mi cwale bazuma bupilo bwaka.”+
15 Jehova ali ku yena: “Kuta, uye mwa lihalaupa la Damaseka. Hauka fita, uyo toza Hazaele+ kuli abe mulena wa Siria.
16 Mi uswanela kutoza Jehu+ muikulyaa Nimishi kuli abe mulena wa Isilaele, mi uswanela kutoza Elisha* mwanaa Shafati wa kwa Abele-mehola kuli abe mupolofita mwa sibaka sahao.+
17 Mutu kaufela yakabanduka kwa mukwale wa Hazaele,+ ukabulaiwa ki Jehu;+ mi yakabanduka kwa mukwale wa Jehu, ukabulaiwa ki Elisha.+
18 Mi nisasiyalezwi ki batu ba 7,000 mwa Isilaele,+ ili bao kaufela habasika kubamela Baale+ mi habasika mutubeta.”+
19 Kihaa funduka mo, mi afumana Elisha mwanaa Shafati inzaa kekela; kwapilaa hae nekunani licoko ze 12, mi kwa coko ni coko nekunani mapulu* amabeli, mi yena naakekelisa coko yabu 12. Cwale Elia aya ku yena mi amuapesa siapalo sahae.+
20 Elisha asiya mapulu,* amatela Elia mi ali: “Haku nilumeleze niyo tubeta ndate ni me. Kihona nika kulatelela.” Elia amualaba kuli: “Kuta, nika kuhanisezañi?”
21 Kihaa kuta mi ayo nga mapulu* amabeli ni kuaeza sitabelo, mi aitusisa likota za kwa sikekele kwa kuapeha nama ya mapulu* ni kufa batu nama, mi baica. Hamulaho, ananuha mi alatelela Elia ni kukala kumusebeleza.+
Litaluso ze kwatasi
^ Lelitalusa “Mulimu ki Yena Yapilisa.”
^ Linzwi ka linzwi, “lipoho.”
^ Linzwi ka linzwi, “lipoho.”
^ Linzwi ka linzwi, “lipoho.”
^ Linzwi ka linzwi, “lipoho.”