Bibele Yacincanga Bupilo Bwa Batu

Ki lika mañi zenetusize mutu yanasalati hahulu kueza silikani ni batu kuituta kulata batu ni kubatusa? Ki lika mañi zenetusize muuna wa kwa Mexico kutuhela muzamao omaswe? Ki kabakalañi mubapali yomutuna wa kucoba linjinga wa kwa Japan hanaatuhezi papali yeo ni kukala kusebeleza Mulimu? Hamunyakisise zebabulela batu ba.

“Nenili mutu yamaswe, yasina taba ni batu, ni yabuhali.”—BO DENNIS O’BEIRNE

SILIMO SENE BAPEPILWE: 1958

NAHA KONE BAPEPEZWI: ENGLAND

KWAMULAHO: NENISA LATI KUEZA SILIKANI NI BATU

BUPILO BWAKA BWA KWAMULAHO: Kwa lineku la bo ndate, lubasi lwaluna ki Mairishi, mi ni huliselizwe sina Muairishi wa Katolika. Hañata neniyanga kwa keleke ninosi nihaike kuli nenisa tabeli hahulu kueza cwalo. Kono nenilapile kwa moya. Nenilapelanga Tapelo ya Mulena kamita, mi nahupula nako yeñwi neninahananga zeitalusa tapelo yeo inze nilobezi fa mumbeta busihu. Neniezanga cwalo ka kuiaba fahali ni kunahanisisa zeitalusa kalulo ni kalulo yayona.

Hane ninze ninonoboka, nakala kuswalisana ni sikwata sa baana babautanga milili yemitelele bona ma-Rastafarian. Hape neninahanisisanga zetahisa tutengo twa lipolitiki inge cwalo ka ba Anti-Nazi League. Neniikenyize hahulu mwa sikwata sa batu bane baeza lika zemaswe luli senesisa tabeli kuswalisana ni batu. Neniitusisanga hahulu milyani yekola, sihulu matokwani, ili ene nizubanga ibato ba zazi ni zazi. Bakeñisa kuli nenikalile kuba ni mubonelo wa kuli “Hanina taba ni mutu,” neninwanga hahulu bucwala, nenibeyanga bupilo bwaka mwa lubeta, mi nenisina hahulu taba ni batu. Nenisa swalisanangi hahulu ni batu, nenisa ambolangi feela ni mutu konji luli haiba litaba zeluambola ki za butokwa hahulu. Nenisalatangi kuniinga siswaniso. Haniiheta, nibona kuli nenili mutu yamaswe, yasina taba ni batu, ni yabuhali. Nenibonisanga feela sishemo ni bufani kwa batu bane bali balikani baka babatuna.

Hane nituha nikwanisa lilimo ze 20, nakala kulata Bibele. Mulikanaa ka yene nilekisanga ni yena milyani yekola naakalile kubalanga Bibele inzaali mwa tolongo mi neluikambotanga hahulu za bulapeli, za likeleke, ni zaeza Satani mwa lifasi. Neniitekezi Bibele mi nakala kuibalanga ninosi. Na ni mulikanaa ka nelubalanga likalulo za Bibele, nelubuisananga zeluitutile, mi nelulikanga kuliutwisisa. Neluezize cwalo ka likweli zeñata.

Zeñwi za litaba zene luitutile ki ze: neluitutile kuli lupila mwa mazazi a mafelelezo; Bakreste baswanela kukutaza taba yende ya Mubuso wa Mulimu; habaswaneli kuba ba lifasi le, ili kukopanyeleza cwalo ni kusaikenya mwa litaba za bupolitiki; mi ni kuli mwa Bibele kunani likuka zende za muzamao zekona kulutusa. Neluiponezi luli kuli zeibulela Bibele ki za niti mi kuswanela kuba ni bulapeli bwa niti. Kono neluka buziba cwañi? Nelunahanisisize ka za bulapeli bobuatile hahulu ni lizo ni mikiti yebuezanga mane kukopanyeleza cwalo ni kuikenya mwa litaba za lipolitiki, mi nelulemuhile kuli Jesu naasi cwalo. Neluziba kuli haki Mulimu yanaaitusisa bona, kacwalo lwaikatulela kunyakisisa ka za bulapeli bobusa zibahali hahulu kuli lubone zebuluta batu.

Nelukopananga ni babahulu ba bulapeli bo ni kuba buza lipuzo zeshutana-shutana. Neluziba zeibulela Bibele ka za puzo ni puzo yene lubuzanga, kacwalo nekuli bunolo kuziba nji zebabulela zalumelelana ni zelibulela Linzwi la Mulimu. Hamulaho wa kuikambota ni batu bao, nenilapelanga ku Mulimu kuli, ‘Haiba batu bale ki balapeli ba niti, nikupa kuli unituse niyo kopana ni bona hape.’ Kono likwelinyana hamulaho wa kukopana ni bona, nenisika fumana sikwata sene sialabanga lipuzo zaluna za mwa Bibele; mi nenisina takazo ya kukopana ni bona hape.

Hamulaho wa nako, na ni mulikanaa ka lwakopana ni Lipaki za Jehova. Lwababuza lipuzo zeswana zeo, kono nebalialabile ka kuitusisa Bibele. Zene babulezi nelilumelelana luli ni zene lubalile mwa Bibele. Kacwalo, lwababuza lipuzo zeñwi zene lusika fumana likalabo mwa Bibele, inge cwalo za mubonelo wa Mulimu ka za kuzuba kwai ni kuitusisa milyani yekola. Ni fo hape nebaalabile lipuzo zeo ka kuitusisa Linzwi la Mulimu. Nelulumezi kuya kwa mukopano kwa Ndu ya Mubuso.

Nekunibezi taata kufumaneha kwa mikopano. Nenisa tabeli hahulu kuambola ni batu nihaiba batu babande bao babanani silikani, ili bane baapezi hande. Neninani mubonelo omaswe ku babañwi ba kubona, mi nenisa tabeli kuya kwa mikopano yabona hape. Kono sina kamita, nenilapezi ku Mulimu kuli anituse kuba ni takazo ya kukopana ni batu ba hape haiba luli ki balapeli ba niti, mi naba ni takazo yetuna ya kuituta Bibele ni Lipaki za Jehova.

BIBELE MONE ICINCELIZE BUPILO BWAKA: Neniziba kuli neniswanela kutuhela kuitusisa milyani yekola, mi nenikonile kueza cwalo luli. Nto yene nibezi taata ki kutuhela kuzuba kwai. Nenilikile kutuhela kuzuba kwai hañata-ñata kono nenipalezwi. Hane niutwile ka za batu babañwi bane bayumbile misanga ya kwai mi nebasika zuba kwai hape, nalapela ku Jehova ka za taba yeo. Hasamulaho, ka tuso ya Jehova, nenikonile kutuhela kuzuba kwai. Neniitutile kuli halulapela, ki kwa butokwa hahulu kutalusezanga Jehova ze mwa pilu yaluna kaufela.

Cinceho yeñwi yetuna yene niezize neli kucinca mutinelo ni muikabisezo waka. Hane niile kwa Ndu ya Mubuso lwapili, nenishakuzi milili yaka ka nzila yesaswaneli, mi neinani mubala wa ndilu. Hamulaho nacinca mubala wa milili yaka ka mubala wa olonji. Nenitinanga malukwe a jean ni libaki ni liapalo zetuna mwahali inze lilepelela kwatasi. Lipaki niha neba nitusize ka musa, neniikutwa kuli haniswaneli kucinca muapalelo waka. Hamulaho wa nako, nanahanisisa zelibulela liñolo la 1 Joani 2:15-17: “Musike mwalata lifasi kamba lika ze mwa lifasi. Haiba mutu alata lifasi, lilato la Ndate haliyo ku yena.” Nalemuha kuli ponahalo yaka neibonisa kuli nalata lifasi, kacwalo, kuli nibonise kuli nalata Mulimu, nenitokwa kucinca. Mi nenicincize luli.

Nako hane inze iya, nalemuha kuli nesi feela Lipaki bane babata kuli niyange kwa mikopano ya Sikreste. Liñolo la Maheberu10:24, 25 neli nitusize kulemuha kuli Mulimu ki yena yanaabata kuli niyange kwa mikopano. Hase nikalile kuyanga kwa mikopano kaufela ni kuzibana ni batu, naineela bupilo bwaka ku Jehova ka kukolobezwa.

MONITUSELIZWE: Nitiisizwe hahulu kubona mo Jehova alutuseza kuba ni silikani sesinde ni yena. Sishemo ni lilato lahae linisusuelize kumulikanyisa ni kuhata mwanaahatile Mwanaa hae, yena Jesu Kreste, mwa bupilo bwaka. (1 Pitrosi 2:21) Niitutile kuli haninze nilika kupila mobaswanela kupilela Bakreste, nisakona kuba ni libizo lelinde. Nisweli kueza monikonela kaufela kulata ni kuisa pilu babañwi. Nilikanyisa Kreste ka monipilisanela ni musalaa ka ni mwanaa ka. Mi niiyakatwa hahulu mizwale ni likaizeli babali mwa niti. Kulikanyisa Kreste kunitusize kuba ni libizo lelinde, kuishuwa, ni kulata babañwi.

“Neba nibonisize likute.”—BO GUADALUPE VILLARREAL

SILIMO SENE BAPEPILWE: 1964

NAHA KONE BAPEPEZWI: MEXICO

KWAMULAHO: MUZAMAO OMASWE

BUPILO BWAKA BWA KWAMULAHO: Nenili wa bu 7 mwa mba yaluna, mi nenihuliselizwe mwa tolopo ya Hermosillo, mwa Sonora, kwa Mexico, ili sibaka mokunani hahulu bubotana. Bo ndate nebashwile inze nisali mwanana, kacwalo bo ma nebasebezanga kuli bakone kulubabalela hande. Nenizamayanga mahutu-hutu kakuli nelusina masheleñi a kuleka makatulo. Hane nisali yomunca, nakala kusebeza kuli nituse lubasi kwa kulifela lisinyehelo zeñwi. Sina mokubelanga mwa mabasi amañata, nelupila babañata fa lapa.

Hañata bo ma nebasa fumanehangi fa ndu kuli balusileleze ka kuba banana. Hane ninani lilimo ze 6, mushimani yomuñwi wa lilimo ze 15 akala kuninyandisa hahulu ka kuezanga ni na somano ya kunihapeleza. Naaninyandisize hahulu ka nako yetelele. Taba yeo neitahisize kuli nibe ni mubonelo omaswe ka za somano. Neninahana kuli hakusika fosahala kuba ni takazo ya kueza somano ni baana sina na. Hane nikupile tuso kwa madokota ni babahulu ba bulapeli, neba nitaluselize kuli hanina butata ni bobukana, hakusika fosahala kuikutwa moniikutwela.

Hane ninani lilimo ze 14, naikatulela kuba wa kalombe. Nenizwezipili kuba wa kalombe ka lilimo ze 11, mi mane nenipilanga ni baana babashutana-shutana. Hamulaho wa nako, naituta mwa kukamunela ni kukuta milili. Nihakulicwalo, nenisina tabo. Neninyandile hahulu mi nenikutwa kubetekwa mwa bupilo. Nalemuha kuli zene nieza nesi zende. Nakala kuipuza kuli, ‘Kuli kunani batu babande luli babanani lipilu zende?’

Nahupula bo kaizelaa ka. Nebakalile kuituta Bibele ni Lipaki za Jehova, mi hamulaho bakolobezwa. Neba nibulelelanga zene baituta, kono nenisa liisangi pilu. Kono neniikumbutanga mupilelo wabona ni linyalo labona. Neniiponelanga kuli bona ni bo muunaa bona luli balatana mi bakutekana. Nebabonisananga musa. Hamulaho wa nako, yomuñwi wa Lipaki za Jehova, akala kuituta Bibele ni na. Sapili, neniezezanga feela mulao, nenisa isangi pilu ku zene niituta. Kono lika zacinca.

BIBELE MONE ICINCELIZE BUPILO BWAKA: Lipaki neba nimemile ku yemiñwi ya mikopano yabona, mi neniile kwateñi. Neli lwapili kuya kwa mikopano yeo. Batu babañata neba nisehanga, kono Lipaki bona nebasa ezangi cwalo. Neba nilumelisize ka lilato, mi neba nibonisize likute. Neba nitiisize hahulu.

Nenisusuelizwe hahulu ki Lipaki sihulu hane niile kwa mukopano wa mupotoloho. Niha nenili mwahalaa batu babañata, nebaniisa pilu luli mane inge wa lubasi lwabona. Naipuza ka za haiba ba luli ki bona batu babande babaisa pilu babañwi bene nibatanga hahulu kuziba. Nenikomokisizwe hahulu ki lilato ni swalisano yabona, ni mone baitusiselize Bibele kualaba lipuzo zaka. Nalemuha kuli zene baituta mwa Bibele ki zona zenee batusa kuba ni mupilelo omunde cwalo. Mi hape nalemuha kuli nenitokwa kueza licinceho zeñata kuli nibe sina bona.

Kubulela feela niti, nenitokwa kueza licinceho mwa miinelo yemiñata. Ka mutala nenitokwa kucinca lipulelo zaka, likezo zaka, mutinelo waka, muikamunelo waka wa milili, ni mufuta wa balikani baka. Balikani baka bane niswalisanga ni bona sapili bakala kunisheununa bali: “Uipulaisezañi? Neueza hande ni kale. Usike waituta Bibele. Unani lika kaufela.” Kono nto yeneli hahulu taata kucinca, neli muzamao waka wa buhule.

Kono neniziba kuli nakona kucinca, kakuli manzwi a mwa Bibele kwa liñolo la 1 Makorinte 6:9-11 naanifitile hahulu kwa pilu: “Kana hamuzibi kuli batu babasika luka habana kuyola saanda sa Mubuso wa Mulimu? Musike mwaipuma. Batu babapila ka muzamao wa buhule, babalapela milimu ya maswaniso, babuki, baana babalumela kuezwa basali, baana babalobala ni baana ka bona. . . Habana kuyola saanda sa Mubuso wa Mulimu. Mi niteñi ki mona mone bainezi babañwi ku mina cwalo. Kono mutapisizwe mi mukenile.” Kwakale, Jehova naatusize batu kueza licinceho, ni na naanitusize. Nekufitile lilimo zeñata kuli nikone kucinca mupilelo waka, kono bakeñisa pabalelo ni lilato lene banibonisize Lipaki, nenikonile kucinca mupilelo waka.

MONITUSELIZWE: Cwale senipila bupilo bobunde. Ninyezi, mi na ni musalaa ka, luluta mwanaa luna kupila ka kulatelela likuka za Bibele. Hanisa pila sina mone nipilelanga sapili, cwale seniikola matohonolo amañata a kwa moya. Nisebeza sina muuna-muhulu mwa puteho, mi nikonile kutusa babañwi kuituta niti ya mwa Linzwi la Mulimu. Kucinca mupilelo waka nekutabisize hahulu bo ma kuli mane nebalumezi kuituta Bibele, mi cwale sebali Bakreste babakolobelizwe. Kaizelaa ka yanaapila ka muzamao wa buhule ni yena cwale seli yomuñwi wa Lipaki za Jehova.

Mane nihaiba batu bane baziba mupilelo waka wakale balemuhile kuli cwale seninani muzamao omunde luli. Mi naziba zenitusize kucinca mupilelo waka. Kale nenibatanga kutusiwa ki licaziba kono neba nifanga feela likelezo zemaswe. Nihakulicwalo, Jehova unitusize luli. Nihaike kuli neniikutwanga kusaba wa butokwa, naaniisize pilu, anibonisa lilato ni pilu-telele. Kuziba kuli Mulimu yabutali, yalilato cwalo waniisa pilu ni kuli ubata kuli nipile bupilo bobunde, kunitusize kucinca mupilelo waka.

“Neniikutwanga kuli nipalezwi kukondisa, neniikutwanga buinosi ni kusaba wa butokwa.”—BO KAZUHIRO KUNIMOCHI

SILIMO SENE BAPEPILWE: 1951

NAHA KONE BAPEPEZWI: JAPAN

KWAMULAHO: NENILATA HAHULU PAPALI YA KULAKANA KA LINJINGA

BUPILO BWAKA BWA KWAMULAHO: Nenipepezwi mwa toloponyana yebizwa Shizuoka Prefecture, mwa Japan, ili mo lubasi lwaluna ba 8 nebapila mwa kandu kakanyinyani. Bo ndate nebalekisanga linjinga. Kuzwa feela kwa bwanana bwaka, bo ndate neba niisanga kwa papali ya kucoba linjinga, mi natabela papali yeo. Bo ndate baeza mobakonela kaufela kuli baniise kwa sikolo sa kulakana ka linjinga. Nebakalile kuniluta papali yeo inge nisika feza kale sikolo. Hane nili kwa sekondari, neniwinile lipapali zetaalu za naha ili zene bapalwanga ka silimo. Nafiwa tohonolo ya kuya kwa yunivesiti, kono naketa kuya kwa sikolo sa kulakana ka linjinga. Hanito kwanisa lilimo ze 19, naba yacuukile mwa papali ya kulakana ka linjinga.

Ka nako yeo, neniitomezi sikonkwani sa kuli nibe na mubapali yomutuna wa papali ya kucoba linjinga mwa naha ya Japan. Nenibata kufumananga masheleñi amañata ilikuli nituse lubasi lwaka ni kuli niikole bupilo. Neniisize pilu kwa tuto yene nifiwa ka za papali yeo. Hane nizwafiswanga ki batu babañwi kamba kukatala, neniipulelisanga kuli nenipepezwi papali ye mi niswanela kuzwelapili kuitiisa kuli niwine! Mi neniezize cwalo luli. Nenifumani mupuzo kabakala kusebeza ka taata. Mwa silimo saka sapili, nenifumani mupuzo kabakala kuli neli na yanaabile wapili mwa kangisano yeo. Mwa silimo sabubeli, nakwanisa zetokwahala kuli nibe na mubapali yomutuna wa papali ye, mwa naha kaufela ya Japan. Nenibile wabubeli mwa likangisano ze 6 za papali yeo.

Hane ninze nili mubapali yomutuna cwalo, nazibahala kuli ni zwa kwa Tokai, ili sibaka sesiñwi sa mwa Japan. Nenilata hahulu kukangisana. Nako hainze iya, batu bakala kunisaba hahulu kakuli nenili mubapali yomutuna, mi nenisa shwelangi mutu makeke mwa papali ye. Naba ni masheleñi amañata, nenikona kuleka nto ifi kamba ifi yene nitabela. Naleka ndu yetuna mone kunani muzuzu wa kuezeza lipapali za kutiisa mubili ni mishini yeminde luli. Naleka mota yetuna kwa naha yeñwi ili yene leka masheleñi anaakona kuleka ndu. Kuli nibuluke masheleñi aka hande, nakala kuasebelisa mwa likampani zetuna ni misika yeeza lipisinisi zetuna.

Nihakulicwalo, neniikutwanga kuli hakuna zenikondisa mwa bupilo, neniikutwanga buinosi ni kusaba wa butokwa. Ka nako yeo neninyezi, mi neninani bana, kono nenili wa kacima-cima. Nenihalifelanga musalaa ka ni bana baka fa tuka feela totunyinyani. Bakala kulemuhanga lisupo zene nibonisanga fa meeto kuli bazibe haiba hanisika zuha hande.

Hamulaho wa nako, bakuluna bakala kuituta Bibele ni Lipaki za Jehova. Taba yeo neitahisize kuli lueze licinceho zeñata. Banitaluseza kuli nebabata kuyanga kwa mikopano ya Lipaki za Jehova, kacwalo, naatula kuli lukayanga kwateñi sina lubasi. Nisahupula busihu bobuñwi hane nipotezwi ki muuna-muhulu yomuñwi mwa puteho ili yanaatilo ituta ni na Bibele. Zene niitutile neli nisusuelize hahulu luli.

BIBELE MONE ICINCELIZE BUPILO BWAKA: Hanina kulibala mo kubala liñolo la Maefese 5:5 neku nituselize. Libulela kuli: “Hakuna mutu wa muzamao wa buhule kamba mutu ya masila kamba wa mukwañuli, ili nto yetalusa kuba mulapeli wa milimu ya maswaniso, yakayola saanda mwa Mubuso wa Kreste ni wa Mulimu.” Neniikutwa kuli kulakana ka kucoba linjinga nekuswana feela inge kueza papali ya likwinano, mi papali yeo neitahisa kuli mutu abe ni moya wa mukwañuli. Nasisitwa ki lizwalo laka. Nenibata kutabisa Jehova Mulimu, kacwalo nenitokwa kutuhela kueza papali ye. Kono kueza katulo yeo nesi nto yebunolo.

Kihona hane nisazo feza papali ya ka silimo ili yene nitabela hahulu, mi nenibata kueza yeñwi. Kono nenilemuhile kuli kuituta Bibele neku nitusanga kuba ni kozo ya mwa munahano mane ni kuwa pilu, ili nto yene nisaezangi hane niezanga papali ya kulakana ka linjinga! Neniezize feela papali yeo halaalu kuzwa fonikalela kuituta Bibele, kono mwa pilu nenisa tabela kuzwelapili kuieza. Hape neniikalelwanga ka za mone nikababalelela lubasi lwaka. Nenisa zibi za kueza, nenisa lati kutuhela kamba kuzwelapili, mi ba lubasi lwaka neba nilwanisa kabakala kuli neniituta Bibele. Bo ndate nebaikutwa kuli neni baswabisize hahulu. Neniikutwa kuziyeleha, mi neninahananga hahulu, kacwalo, nakala kukula litombo za mwa mba.

Kuzwelapili kuituta Bibele ni kuyanga kwa mikopano ya Lipaki za Jehova kona nto yene nitusize hahulu ka nako yeo. Nako hainze iya, tumelo yaka yatiya. Nakupa Jehova kuli autwe litapelo zaka mi anituse kubona mwalialabela. Bo musalaa ka neba nitusize kusa nahana hahulu hane banibulelezi kuli habatokwi kupila mwa ndu yetuna kuli babe ni tabo. Hamulaho wa nako, naba hande.

MONITUSELIZWE: Neniitutile kuli manzwi a Jesu a kwa Mateu 6:33 ki ya niti. Teñi koo Jesu naaize: “Cwale muzwelepili kubata pili Mubuso ni kuluka kwahae, mi lika zeñwi zeo kaufela muka liekelezwa kwateñi.” Halusika tokwa “lika zeñwi” zanaabulezi Jesu, ili lika zelutokwa kuli lupile. Nihaike kuli cwale seninani masheleñi amanyinyani hani abapanya ni ene nifumananga hane nili mubapali wa kulakana ka linjinga, na ni lubasi lwaka halusika tokwa nto ni yekana mwa lilimo ze 20 zefelile.

Mi nto yende ni kufita kikuli hanilapela ni mizwale ni likaizeli baka, nibanga ni tabo sakata ili yene nisina sapili. Hanibonangi ni moimatela nako. Senipila hande ni lubasi lwaka. Bana baka babalaalu ni basali babona, ki batanga ba Jehova babasepahala.