Ba Banca—Bupilo Bwa Mina mu ka bu Sebelisa Kwañi?

M USIZANA yo muñwi u bulela kuli: “Ni bata ku pila bupilo bo bunde ka ku fitisisa.” Ku si na ku kakanya, ni mina mu bata ku pila bupilo bo bu cwalo. Kono mu kona ku fumana cwañi bupilo bo bunde “ka ku fitisisa?” Mitai ya makande ni balikani ba mina, mwendi mane ni baluti ba mina, ba kana ba mi bulelela kuli bupilo bo bu cwalo bu kona ku fumanwa ka ku hola masheleñi a mañata kamba ka ku ba ni musebezi o pahami, ili lika ze ngiwa kuli ki ku kondisa mwa bupilo!

Nihakulicwalo, Bibele i lemusa ba banca kuli ku ndongwama sifumu ku swana feela inge “ku ndaamanisa moya.” (Muekelesia 4:4) Libaka kikuli, haki ba banca kaufela ba ba fumananga sifumu kamba libubo. Mi ba ba konanga ku eza cwalo hañata ba ipumananga mwa masitapilu. Mukulwani yo muñwi wa kwa Britain ya naa itutile hahulu za musebezi o muñwi o pahami, u li: “Ku ikubukanyeza sifumu ku swana inge ku ba ni mbokisi ye li mukungulu. Ha u nangela mwahali, u fumana kuli ha ku na se si li teñi mwateñi.” Ki niti kuli musebezi fokuñwi u kona ku tahisa kuli mutu a be ni sifumu kamba kuli a zibahale. Kono ha u koni ku mu tusa ku ba ni silikani se sinde ni “Mulimu.” (Mateu 5:3) Ku tuha fo, 1 Joani 2:17 i lemusa kuli “lifasi la fela.” Niha mu ka kondisa lika mwa lifasi le, tabo ye mu ka fumana ki ya ka nakonyana feela.

Ki lona libaka liñolo la Muekelesia 12:1 ha li susueza ba banca kuli: “U hupule Mubupi wa hao mwa mazazi a bucaha bwa hao.” Kaniti ku sebeleza Jehova Mulimu ki yona nto ye nde ka ku fitisisa ye mu kona ku eza mwa bupilo. Kono pili mu tokwa ku kwanisa ze tokwahala kuli mu sebeleze Mulimu. Mu kona ku eza cwalo ka nzila ifi? Mi ku sebeleza Mulimu ku ama lika mañi?

Ku Kwanisa ze Tokwahala Kuli Mutu A be Paki ya Jehova

Sa pili mu tokwa ku ba ni takazo ya ku sebeleza Mulimu, kono takazo yeo ha itahelangi feela niha neikaba kuli bashemi ba mina ki Bakreste. Kacwalo, mu lukela ku ikezeza silikani ni Jehova. Musizana yo muñwi u li: “Ku lapela ku tusa mutu ku ba ni silikani ni Jehova.”—Samu 62:8; Jakobo 4:8.

Maroma 12:2 i bonisa nto ye ñwi ye mu lukela ku eza. I bulela kuli: “Mu lemuhe tato ya Mulimu ye nde ni ye amuheleha ni ye petehile.” Kana se mu kile mwa kakanya lika ze ñwi ze ne mu lutilwe? Haiba ku cwalo, mu latelele kelezo ya Bibele mi ‘mu itemuhele’ kuli lika zeo ki za niti! Mu ikezeze lipatisiso. Mu bale Bibele ni lihatiso ze tomile fa Bibele. Ku ituta za Mulimu ha ku ami feela ku itusisa booko ku nyakisisa litaba. Kacwalo, mu fumanange nako ya ku nahanisisa ze mu bala kuli li kene mwa pilu ya mina ni kuli mu si ke mwa li libala. Ku eza cwalo ku ka tahisa kuli lilato la mina ku Mulimu li hule.—Samu 1:2, 3.

Ku tuha fo, mu like ku taluseza ba bañwi litaba ze mu sweli ku ituta, mi mwendi mwa kona ku eza cwalo ka nako ye mu ikambota litaba ze ñwi ni batu be mu kena ni bona sikolo. Ku kutaza fa ndu ni ndu ki ona muhato o tatama. Fokuñwi ha mu nze mu kutaza, mu kana mwa katana mutu ye mu kena ni yena sikolo, mi nto yeo i kona ku tahisa kuli mu ikutwe maswabi haiba ki lwa pili. Kono Bibele i lu susueza kuli lu si ke lwa ‘swabela taba ye nde.’ (Maroma 1:16) Mu taluseza batu lushango lo lu tahisa sepo ni bupilo! Ki lona libaka ha mu sa swaneli ku ikutwa maswabi.

Haiba bashemi ba mina ki Bakreste, mwendi mwa yanga ni bona mwa sebelezo ya mwa simu. Kwandaa ku yema feela kwa munyako inze mu kuzize kamba ku fa feela batu limagazini ni matrakiti, mwa kona ku eza ze ñwi hape. Mwa kona ku ambolisana ni muñaa ndu, ili ku mu luta ka ku itusisa Bibele. Haiba ha mu koni ku eza cwalo, mu kupe tuso kwa bashemi ba mina kamba ku mutu yo muñwi mwa puteho ya na ni yeloseli mwa bukombwa. Mu itomele sikonkwani sa ku ba muhasanyi ya si ka kolobezwa wa taba ye nde.

Nako ha i nze i ya, mu ka itakaleza ku ineela ku Mulimu, ili ku itama ku yena kuli mu ka mu sebeleza mwa bupilo bwa mina kaufela. (Maroma 12:1) Ku itama ku sebeleza Mulimu ha ku ami feela ku eza buineelo kwa mukunda. Mulimu u tokwa kuli batu kaufela ba ‘bulele fapilaa nyangela kuli ba piliswe.’ (Maroma 10:10) Ka nako ya kolobezo, mu kala pili ku zibahaza tumelo ya mina fapilaa nyangela. Kihona mu kolobezwa mwa mezi. (Mateu 28:19, 20) Niti kikuli kolobezo ki muhato wa butokwa hahulu. Kono mu si ke mwa palelwa ku kolobezwa ka ku saba kuli mwendi ha mu na ku kona ku taleleza buitamo bwa mina. Haiba mu itinga ku Mulimu, u ka mi fa “maata a fita a butu” kuli mu kone ku tiyela miliko.—2 Makorinte 4:7; 1 Pitrosi 5:10.

Hamulaho wa ku kolobezwa, mu ba yo muñwi wa Lipaki za Jehova. (Isaya 43:10) Nto yeo i swanela ku ama hahulu-hulu mo mu ka sebeliseza bupilo bwa mina. Buineelo bu ama ‘ku itoboha.’ (Mateu 16:24) Mu kana mwa itoboha ku eza lika ze mu tabela ku eza mwa bupilo kuli mu ‘bate pili Mubuso wa Mulimu.’ (Mateu 6:33) Kacwalo, buineelo ni kolobezo li mi kwalulela linzila ze ñata ze kona ku mi tusa ku peta misebezi ya Mulimu. Ha lu nyakisiseñi ze ñwi za linzila zeo.

Linzila za ku Sebeleza Mulimu ka Nako Kaufela

● Bupaina ki ye ñwi ya linzila zeo. Muhasanyi ya li paina ki Mukreste ya kolobelizwe ya li mutala o munde, ya ezize litukiso za kuli a kutazange taba ye nde ka lihora ze 70 kamba ze fitelela fo, ka kweli ni kweli. Ku sebezanga nako ye ñata mwa simu ku ka mi tusa ku bolosola mukutalezo ni mulutelo wa mina. Mapaina ba bañata ba bile ni tabo bakeñisa ku tusa baituti ba bona ba Bibele ku ba Lipaki ba ba kolobelizwe. Mwa lifasi ha ku na musebezi o kona ku tahiseza mutu tabo ye cwalo.

Mapaina ba bañata ba ezanga misebezi ya swalelele kuli ba kone ku ipilisa. Ba bañata ba itukisezanga bupaina ka ku ituta misebezi ya mazoho ha ba li kwa sikolo kamba ka ku ituta misebezi yeo kwa bashemi ba bona. Haiba mina ni bashemi ba mina mu ikutwa kuli neikaba hande ku eza kosi ya musebezi wa mazoho hamulaho wa ku feza sikolo sa sekondari, mu bone teñi kuli mulelo wa mina haki wa ku fumana masheleñi a mañata, kono ibe o ka mi tusa ku peta hande bukombwa bwa mina, mi mwendi mwa kona ku eza ni bukombwa bwa ka nako kaufela.

Niteñi, paina u iyakatwa hahulu bukombwa bwa hae ku fita musebezi wa kwa mubili, mi u eza cwalo ka mulelo wa kuli a tuse batu ba bañwi ku fumana bupilo. Ni mina mwa kona ku itomela sikonkwani sa ku eza bupaina. Ku eza bupaina hañata ku tahisanga matohonolo a mañwi. Ka mutala, mapaina ba bañwi ba tutelanga kwa libaka ko ku tokwahala hahulu bahasanyi ba Mubuso. Ba bañwi bona ba itutanga lipuo li sili mi ba sebelezanga mwa liputeho za mwa naha ya bona ze itusisa lipuo zeo kamba mane ku yo sebeleza mwa naha i sili. Kaniti, bupaina ki musebezi o tahisa tabo mwa bupilo.

● Sikolo sa Bibele sa Bakreste ba ba Nyalani ki linzila ye ñwi ya ku sebeleza ka yona Mulimu. Sikolo seo si lukiselizwe ku luta Bakreste ba ba nyalani kuli ba kone ku itusiswa ka ku tala ki Jehova ni kopano ya hae. Buñata bwa batu  ba ba fezanga sikolo seo, ba kupiwanga ku yo sebeleza ko ku tokwahala hahulu bahasanyi ba taba ye nde mwa linaha za bona. Ba bañwi bona ba kupiwanga ku yo sebeleza mwa linaha li sili miinelo ya bona ha i ba lumeleza ku eza cwalo. Batu ba ba fezanga sikolo seo ba kona ku kupiwa ku eza bupaina bo bu ipitezi bwa swalelele kuli ba kalise kamba ku zwisezapili musebezi wa ku kutaza mwa libaka za matakanyani.

● Sikolo sa Bibele sa Mizwale ba Makwasha ne si tomezwi ku luta baana-bahulu ni likombwa za puteho ba ba li makwasha ili ba ba kwanisize ze tokwahala. Lituto ze tungile ze ba amuhelanga baituti ka lisunda ze 8, li amanga buikalabelo bwa baana-bahulu ni likombwa za puteho, litaba za kopano, ni za ku bulela fapilaa nyangela. Ba bañwi kwa mizwale bao, ba kupiwanga ku sebeleza mwa linaha ze ba zwa ku zona. Ba bañwi ba kupiwanga ku yo sebeleza mwa linaha li sili.

● Sebelezo ya fa Betele i ama ku belekela ku o muñwi wa mitai ya Lipaki za Jehova ka ku itatela. Batu ba bañwi mwa lubasi lwa Betele ba eza misebezi ye ama ku hatisa lihatiso ze tomile fa Bibele. Ba bañwi ba fiwanga misebezi ye tusa mwa ku peta musebezi wa ku hatisa lihatiso, ye cwale ka ku babalela miyaho, libelekiso, kamba ku babalela lubasi lwa Betele. Misebezi kaufela ye eziwa fa Betele ki sebelezo ye kenile ku Jehova. Hape ba ba sebeleza fa Betele ba na ni tabo bakeñisa ku ziba kuli ze ba eza kaufela li tusa mizwale ba bona ba bañata-ñata mwa lifasi kaufela.

Fokuñwi mizwale ba bañwi ba ba na ni yeloseli ya ku peta misebezi ye miñwi ba memiwanga ku yo sebeleza fa Betele. Kono buñata bwa bona ba yo lutiwanga misebezi ye cwalo fa Betele. Ba ba belekela fa Betele ha ba holi, kono ba fiwanga lika ze cwale ka lico, malobalo, ni kapenenyana ka ku leka lika za ka butu. Mukulwani yo muñwi ya belekela fa Betele u talusa sebelezo ya hae cwana, kuli: “Ki sebelezo ye nde hahulu! Misebezi ye lu ezanga haki ye bunolo, kono ni bile ni limbuyoti ze ñata bakeñisa ku belekela kwanu.”

● Sebelezo ya Buyahi Mwa Linaha li Sili i ama ku yaha mitai ni Mandu a Mubuso. Mizwale ni likaizeli ba ba mwa sebelezo yeo, ba yanga mwa linaha li sili ku yo tusa mwa misebezi ya buyahi. Sebelezo ye kenile ye cwalo, ya swana ni ye ne ba petile batu ba ne ba yahile tempele ya Salumoni. (1 Malena 8:13-18) Mizwale ni likaizeli ba ba mwa sebelezo yeo, ba fiwa pabalelo ye swana ni ye ba fiwa ba ba belekela fa Betele. Ba ba mwa sebelezo yeo, ba na ni tohonolo ye tuna luli ya ku sebeleza Jehova ka nzila ye tahisa tumbo ku yena!

Mu Sebeleze Jehova ka Moyo-Kaufela

Ku sebeleza Jehova ki yona nto ye nde ka ku fitisisa ye mu kona ku eza mwa bupilo. Mu ka eza hande ha mu ka itomela sikonkwani sa ku sebeleza Mulimu ka nako kaufela. Mu buisane za sebelezo ya nako kaufela ni bashemi ba mina, baana-bahulu ba mwa puteho ya mina, ni muokameli wa mina wa mupotoloho. Haiba mwa tabela ku belekela fa Betele, kamba ku kena Sikolo sa Bibele sa Mizwale ba Makwasha, kamba Sikolo sa Bibele sa Bakreste ba ba Nyalani, mu fumanehe kwa mukopano o banga teñi kwa mikopano ya mupotoloho ni ya sikiliti ya ba ba tabela ku belekela fa Betele kamba ku kena likolo zeo.

Ki niti kuli haki batu kaufela ba ba kona ku kwanisa ze tokwahala kamba ba ba kona ku eza sebelezo ya nako kaufela. Fokuñwi, lika ze cwale ka makulanu, kutokwa hande masheleñi, ni buikalabelo bwa ku babalela mabasi li kona ku palelwisa mutu ku eza ze ñata mwa sebelezo ya Mulimu. Nihakulicwalo, Bakreste kaufela ba ba ineezi ba lukela ku utwa taelo ya Bibele ye li: “U lukela ku lata Jehova Mulimu wa hao ka pilu ya hao kaufela ni ka moyo wa hao kaufela ni ka munahano wa hao kaufela.” (Mateu 22:37) Jehova u tokwa kuli mu eze ka mo mu konela kaufela ku mu belekela ku likana ni miinelo ya mina. Kacwalo, ku si na taba ni muinelo o mu li ku ona, mu bone teñi kuli ku sebeleza Jehova ki yona nto ya butokwa hahulu mwa bupilo bwa mina. Mu itomele likonkwani ze mu kona ku kwanisa mwa sebelezo ya mina ku Mulimu. Kaniti, mu tokwa ku ‘hupula Mubupi wa mina mwa mazazi a bucaha bwa mina’—mi ha mu ka eza cwalo, mu ka fuyaulwa ku ya ku ile.

Konji haiba ku bonisizwe, mañolo kaufela a zwa mwa Bibele ye Kenile hatiso ya 1951, ni Bibele ya Toloko ya Lifasi le Linca ya Mañolo A Sigerike A Sikreste [bi7].