Bibele Yacincanga Bupilo Bwa Batu

KI LIKA mañi zenetusize musizana yanaanyandisizwe hahulu kwa bwanana kuikola bupilo? Ki lika mañi zenetusize muuna wa mifilifili wa lipolitiki kuba mukutazi yomunde wa taba yende? Mubale litaba zelatelela kuli mufumane likalabo kwa lipuzo zeo.

“Nenibata hahulu kuboniswa lilato ni kuiswa pilu ki babañwi.”—BO INNA LEZHNINA

SILIMO SENE BAPEPILWE: 1981

NAHA KONE BAPEPEZWI: RUSSIA

LITABA ZEEZAHEZI: KUNYANDISWA KWA BWANANA

BUPILO BWAKA BWA KWAMULAHO: Nenipepilwe inze nili susu sina bashemi baka. Lilimo ze 6 kuzwa fonipepelwa, bupilo nebu nizamaela hande. Kono hamulaho wa nako, bashemi baka bafelisa linyalo labona. Nihaike kuli nenili mwanana, neniutwisisa sekutalusa kufelisa linyalo, mi nto yeo nei niutwisanga hahulu butuku kwa pilu. Bashemi baka hase bafelisize linyalo labona, bo ndate ni muhulwanaa ka basiyala mwa Troitsk, mi na ni bo ma lwatutela kwa Chelya­binsk. Hamulaho wa nako, bo ma banyalwa hape. Bo ndate kone banyezwi bo ma nebanwanga hahulu bucwala, mi hañata nebanatanga bo ma.

Ka silimo sa 1993, muhulwanaa ka wamushimani yene nilata hahulu atiba mi atimela. Lifu lahae neli lukomokisize hahulu. Bo ma ni bona bakalisa kunwa hahulu bucwala ka mulelo wa kuli baikutwe hande, mi baswalisana ni bo ndate kuninyandisa. Nakala kubata zekona kunitusa kupila bupilo bobunde. Nenibata kulatiwa ni kuiswa pilu. Nakala kuyanga mwa likeleke zeshutana-shutana, kuli niomba-ombiwe, kono hakuna keleke yene nitusize.

BIBELE MONE ICINCELIZE BUPILO BWAKA: Hane ninani lilimo ze 13, musizana yene nikena ni yena sikolo, ili yanaali Paki ya Jehova, akala kunitalusezanga makande amañwi a mwa Bibele. Neniikolanga kuituta ka za batu babatalusizwe mwa Bibele inge cwalo Nuwe ni Jobo bane basebelelize Mulimu kusina taba ni miinelo yetaata yene bakopana ni yona. Hamulahonyana wa fo, nakala kuituta Bibele ni Lipaki, mi nakala kufumanehanga kwa mikopano yabona.

Kuituta Bibele kunitusize hahulu kuziba litaba zende za niti. Nenitabile hahulu kuziba kuli Mulimu unani libizo. (Samu 83:18) Hape nenitabile hahulu kubona mo Bibele neipolofitezi lika zeneka ezahala mwa “mazazi a mafelelezo.” (2 Timotea 3:1-5) Kuituta ka za sepo ya zuho nekutabisize hahulu ni kufita. Kubona muhulwanaa ka inze apila hape, haa!—Joani 5:28, 29.

Nihakulicwalo, nesi batu kaufela bane batabela zene niituta. Bo ma ni bo ndate kone banyezwi bo ma nebatoile hahulu Lipaki za Jehova. Neba nikukuezanga kutuhela kuituta Bibele. Kono bakeñisa kuli nenilata zene niituta, nesika tuhela kuituta Bibele.

Nekuli taata kutiyela nyandiso yenezwelela kwa lubasi lwaka. Ka bumai, munyanaa ka wamushimani yene niyanga ni yena kwa mikopano ya Lipaki za Jehova ni yena atiba mi atimela. Kono Lipaki kamita neba nitusanga. Neba nitusize kuikutwa kulatiwa ni kuiswa pilu, ili nto yene ninyolelwa hahulu mwa bupilo bwaka. Neniziba kuli bo ki bona bulapeli bwa niti. Ka 1996, nakolobezwa sina yomuñwi wa Lipaki za Jehova.

MONITUSELIZWE: Ninyezwi ki muuna yomunde wa libizo la Dmitry, mi selunyalani ka lilimo ze 6. Na ni bakuluna, lusebeleza kwa ofisi ya mutai ya Lipaki za Jehova mwa St. Petersburg. Hamulaho wa nako, bashemi baka bacinca hanyinyani mubonelo wabona ka za tumelo yaka.

Niitumela hahulu kuli naziba Jehova! Kumusebeleza kunitusize kuba ni tabo mwa bupilo ni kuziba zenipilela.

“Neninani hahulu lipuzo zeñata.”—BO RAUDEL RODRÍGUEZ RODRÍGUEZ

SILIMO SENE BAPEPILWE: 1959

NAHA KONE BAPEPEZWI: CUBA

LITABA ZEEZAHEZI: MUKWENUHELI WA MUUSO

BUPILO BWAKA BWA KWAMULAHO: Nenipepezwi mwa Havana, mwa Cuba, mi nenihuliselizwe mwa sibaka mone kunani hahulu mifilifili. Hane ninze nihula, nakala kulata hahulu papali ya kuposana liñindi, ni lipapali zeñwi za lindwa.

Nenieza hande kwa sikolo, kacwalo, bashemi baka neba nisusuezanga kuli niye kwa yunivesiti. Hane nili kwa yunivesiti, nakala kuikutwa kuli puso ya naha yaluna itokwa kucinciwa. Nakala kuba mulwanisi wa puso yeo. Zazi leliñwi, na ni yene nikena ni yena sikolo, lwataeka mupolisa yomuñwi ka mulelo wa kubata kumuuzweza tobolo yahae. Lwamuholofaza maswe kwa toho. Na ni mulikanaa ka yo, lwaatulelwa lifu la kuli lukakunupiwa ki mapokola babasabisa hahulu. Ka nako yeo, neninani feela lilimo ze 20, mi nenituha nishwa!

Hane nili wa selu yaka mwa tolongo inze niikutwa buinosi, nakala kunahana mone nikaezeza pili nisika kunupiwa kale. Nenisa lati kubonisa kuli niikalezwi. Kono ka nako yeswana, nenikatazwa hahulu ki lipuzo zeñata. Naipuza kuli: ‘Ki kabakalañi kuatula ka kusa luka hakuatile hahulu mwa lifasi? Kana Bupilo bo ki bona feela bobuliteñi?’

BIBELE MONE ICINCELIZE BUPILO BWAKA: Katulo yene luatulezwi ya kuli neluka bulaiwa yacinciwa, mi lwaatulelwa kuli lukapika lilimo ze 30. Neli ka nako yeswana yeo hane nikopani ni Lipaki za Jehova, ili bane batamezwi tumelo yabona. Nenitabisizwe hahulu ki bundume bwa Lipaki ni kupilisana ka kozo kwa bona. Nihaike kuli nebatamilwe kusina zene bafosize, nebasika nyema kamba kubifa.

Lipaki neba nilutile kuli Mulimu ulelezi kuezeza batu lika zende. Neba nibonisize mwa Bibele kuli Mulimu ukacinca lifasi kuba paradaisi ili mokusike kwaba ni mifilifili kamba kusa luka. Neba nilutile kuli mwa lifasi kukapila feela batu babande, mi bakaba ni tohonolo ya kupila kuya kuile inze bali babapetahalile.—Samu 37:29.

Nenitabiswa ki lituto zene niituta ni Lipaki, kono neniikutwa kuli hanikoni kuba ni butu bobunde sina bona. Neniikutwa kuli hanikoni kuikambusa kwa litaba za bupolitiki ni kusa kutisa bumaswe ka bumaswe. Kacwalo, naikatulela kubalanga Bibele ninosi. Hane nifelize kuibala, nenilemuhile kuli Lipaki za Jehova ki bona feela babapila sina Bakreste ba kwa makalelo.

Kuituta Bibele neku nitusize kulemuha kuli nenitokwa kueza licinceho zetuna mwa bupilo bwaka. Ka mutala, nenitokwa kucinca lipulelo zene niitusisanga kakuli kamita nenilata hahulu kuitusisa lipulelo zemaswe. Hape nenitokwa kutuhela kuzuba kwai. Mi nenitokwa kutuhela kuikenya mwa litaba za bupolitiki. Neku nibezi taata kueza licinceho zeo, kono Jehova naanitusize kucinca mupilelo waka.

Yeñwi ya lika zenee nibezi hahulu taata ki kutuhela kuba ni kacima-cima. Nisalapelanga ku Jehova kuli anituse kuba ni buiswalo mwa taba ye. Nitusizwe hahulu ki mañolo a mwa Bibele acwale ka Liproverbia 16:32, lelibulela kuli: “Yasahalifi kapili ufita muuna ya maata, mi yaiswala haahalifile ufita mutu yahapa muleneñi.”

Ka silimo sa 1991, nakolobezwa sina yomuñwi wa Lipaki za Jehova. Nenikolobelelizwe mwa mungomo wa mezi a mwa tolongo. Silimo sene sitatami, babañwi ku luna nelulukuluzwi mwa tolongo, mi lwaiswa kwa Spain kakuli ki kona kone kunani bahabo luna. Hase nifitile mwa Spain, ona fo feela nakalisa kufumanehanga kwa mikopano ya Lipaki za Jehova. Lipaki neba niamuhezi hande luli mane inge kuli neluzibana ni kale, neba nitusize kucinca mupilelo waka.

MONITUSELIZWE: Cwale senili muuna yatabile, mi lusebeleza Mulimu ni musalaa ka hamohocwalo ni bana baluna bababeli babasizana. Ninani tohonolo ya kuitusisa nako yaka yeñata kutusa babañwi kuituta Bibele. Fokuñwi hanihupulanga nako yani yene niatulezwi lifu inze nisali mutangana, niitumelanga hahulu ku Jehova kabakala kunitusa kucinca mupilelo waka. Kwandaa kuli napila, ninani sepo ka za kwapili. Ninyolelwa hahulu kutopila mwa Paradaisi yalusepisize Mulimu, ili mo hakuna kuba ni kuatula ka kusa luka mi “lifu halisana kubateñi.”—Sinulo 21:3, 4.

[Manzwi]

“Nenitabile hahulu kuziba kuli Mulimu unani libizo”

[Manzwi]

Na ni bo muunaa ka luikola kukutaza mwa puo ya bo susu