Manyando Kaufela A Tuha A Fela!

 Nako ye ñwi mwa bupilo bwa mina mwendi mu kile mwa ipuza kuli: ‘Ki kabakalañi manyando ha atile cwana?’ Ka lilimo na lilimo batu ba nyandisizwe hahulu ki lindwa, bunjebwe, likozi, bukebenga, ketululo, matuku, ni mafu. Mwa lilimo ze mwanda ze felile ku bile ni manyando a mañata hahulu ku fita nako ifi kamba ifi. Kana manyando ao kamukana a ka fela muta o muñwi?

Kwa omba-omba luli ku ziba kuli a ka fela, mi ki cwanoñu fa! Bibele, lona Linzwi la Mulimu, i bulela kuli: “Ya maswe h’a sa na ku ba teñi. . . . Kono ba ba ishuwa ba ka luwa naha, ba ka ikola kozo ye tuna.” Ka nako ye kuma kai? “Ba ba na ni niti ba ka yola sanda sa naha, ni ku yaha mwateñi ku ya ku ile.”—Samu 37:10, 11, 29.

Mulimu ha s’a zwisize bumaswe ni manyando, lifasi-mubu li ka fetulwa paradaisi. Mi f’o batu ba ka kona ku pila ku ya ku ile ba nze ba na ni mibili ye petehile hape inze ba tabile. Linzwi la Mulimu li sinula kuli: “[Mulimu] u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku.”—Sinulo 21:4.

Mwa lifasi le linca leo, nihaiba ba ba shwile ba ka zusiwa kuli ni bona ba t’o ikola kwa limbuyoti zeo: “Ku zuha kwa bafu ku ka ba teñi, kwa ba ba lukile ni ba ba si ka luka.” (Likezo 24:15) Kona libaka Jesu Kreste ha n’a bulelezi muezalibi ya n’a bakile ili ya n’a bonisize tumelo ku yena, kuli: “U ka ba ni na mwa [Paradaisi].”—Luka 23:43.

Ki Kabakalañi Manyando Ha N’a Kalile?

Bakeñisa kuli Mulimu n’a lelile kuli batu ba pile bupilo bo bunde cwalo kwapili, ki kabakalañi ha n’a tuhelezi manyando ku kalisa? Mi ki kabakalañi h’a tuhelezi ka nako ye telele cwana?

Mulimu ha n’a bupile bo Adama ni Eva, mibili ni minahano ya bona ne li petahalile. N’a ba beile mwa simu ye li paradaisi mi n’a ba file musebezi o tabisa. Bibele i bulela kuli: “Mulimu a bona kaufela z’a ezize kuli li lukile hahulu.” (Genese 1:31) Kambe ne ba utwile Mulimu, ne ba kabe ba pepile bana ba ba petahalile, mi lifasi-mubu kamukana ne li ka ba paradaisi, mo ne ba ka pila batu ku ya ku ile inze ba li mwa kozo ni tabo.

Mulimu n’a file bo Adama ni Eva mpo ye nde ya ku ba ni tukuluho ya ku iketela ze ba lata ku likana ni butu bwa bona. N’a si ka ba bupa sina bipupe bye bi sa koni ku inahanela. Kono kuli ba zwelepili ku ba ni tabo ne ba na ni ku itusisa hande tukuluho ya bona yeo ya ku iketela lika—ka ku mamela milao ya Mulimu. Mulimu u li: “Na [Muñ’a] Bupilo Mulimu wa hao, ni ku luta se si ku swanela, ni ku zamaisa ka nzila y’o lukela ku zamaya ku yona.” (Isaya 48:17) Ku itusisa maswe tukuluho ya bona ya ku iketela lika ne ku ka ba ziyeza, kakuli batu ne ba si ka bupiwa kuli ba ipilele ku si na ketelelo ya Mulimu. Bibele i bulela kuli: “Nzila ya mutu ha i yo mwa mata a hae; mi mutu nih’a zamaya, h’a koni ku izamaisa ili yena.”—Jeremia 10:23.

Ka bumai, bashemi ba luna ba pili ne ba ikutwile kuli b’a kona ku itukulula ku Mulimu ni ku zwelapili ku kondisa nzila ya bona. Kono ha ne ba hanile puso ya hae, Mulimu n’a tuhezi ku ba tusa mi ku petahala kwa bona kwa fela. Kacwalo ba kalisa ku pongana ku fitela mane ba supala ni ku shwa. Bakeñisa kuli lu simuluha ku bona, lu hozize ku sa petahala ni lifu sina bana mo ba hozezanga bashemi ba bona.—Maroma 5:12.

Taba Ye Tuna Ki ya Bubusi

Ki kabakalañi Mulimu ha n’a si ka bulaya bo Adama ni Eva ni ku kalisa sinca ka ku bupa batu ba sili? Ki kabakala kuli swanelo ya Mulimu ya ku busa pupo kaufela ne i beilwe mwa puzo. Puzo yeo ne li ye: Ki mañi ya na ni swanelo ya ku busa, mi ki mañi ya ziba ku busa hande? Ka manzwi a mañwi kona kuli: Kana batu b’a kona ku ipilela hande ba sa busiwi ki Mulimu? Ka ku ba fa nako ye likani ya kuli ba iponele isali bona mo bu inezi bupilo ha ba ipusa, Mulimu n’a ka fa kalabo ye kwanile kwa puzo ya za haiba batu ba pila hande mwa puso ya hae kamba ha ba ipusa i li bona. Nako ya n’a ba file Mulimu ne i na ni ku ba ye likani kuli batu ba kone ku lika mifuta kaufela ya lipolitiki, mupilelo, sifumu, ni bulapeli inze ba iposhozi mwa lizoho la Mulimu.

Ki nto mañi ye se lemuhilwe? Lilimo-limo ze ba pilile batu li bonisa kuli ku bile ni manyando a mañata luli. Mwa lilimo ze felile ze mwanda, batu ba kopani ni manyando a matuna ku feleleza. Bolule-lule ba batu ne ba bulailwe mwa Ndwa ya Lifasi ya Bubeli. Batu ba ba fitelela 100 milioni se ba bulailwe mwa lindwa. Bukebenga ni bubangoki li atile. Milyani ye kola se i ipa m’ata. Matuku a sihule ni ona a zwelapili ku yamba. Ka mwaha ni mwaha ku shwa batu ba ba likana limilioni ze mashumi-shumi kabakala tala ni matuku. Bupilo bwa lubasi bu shandaukile mi likuka za bupilo ni zona li mbonjani kai ni kai. Ha ku na mubuso wa batu o kona ku feza matata ao. Kwa mibuso kaufela ya batu ha ku na mubuso ni o mukana o konile ku felisa busupali, makulanu, ni lifu.

Mupilelo wa batu kacenu u swana fela sina mo ne i polofitezi Bibele ka za nako ya luna. Linzwi la Mulimu li biza nako ye lu pila ku yona kuli ki “mazazi a maungulelo” a muinelo wa linto muta ne “ku ka taha linako ze tata.” Mi sina fela mo ne i bulelezi Bibele, ‘batu ba ba lunya, ba ba puma, ba zwezipili mwa bumaswe.’—2 Timotea 3:1-5, 13.

Manyando A Fakaufi ni ku Fela

Bupaki kaufela bu bonisa kuli tukuluho ye tiselize batu manyando ya ku itukulula ku Mulimu i fakaufi ni ku fela. Ku bonahezi hande fo ku sweu kuli batu ha ba koni ku ipusa hande ku si na ketelelo ya Mulimu. Ki puso ya Mulimu fela ye kona ku tisa kozo, tabo, buikangulo sakata, ni bupilo bo bu sa feli. Kacwalo nako ya Jehova ya ku tuhelela bumaswe ni manyando i fakaufi ni ku fela. Cwanoñu fa Mulimu u tuha a kena mwa litaba za batu ka ku sinya muinelo wa linto wo kamukana o palezwi ku kondisa lika.

Bupolofita bwa Bibele bu li: “Mwa mazazi a malena ao [mibuso ya batu ye li teñi cwale], Mulimu wa mwa lihalimu u ka tahisa mubuso [kwa lihalimu] o si na ku sinyeha ku ya ku ile; . . . u ka ketula ni ku feza mibuso kaufela [mibuso ya cwale]; kono ona u ka ba teñi kamita ni ku ya ku ile.” (Daniele 2:44) Taba ye tuna ye lutiwa mwa Bibele ki ya ku bubaniswa kwa swanelo ya Jehova ya ku busa, ka Mubuso wa hae wa kwa lihalimu. Jesu ha n’a bulelela cimo za kalulo ya butokwa ya sisupo sa “mazazi a maungulelo,” n’a ize kuli: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.”—Mateu 24:14.

Mafelelezo h’a ka taha, ki bomañi ba ba ka punyuha? Bibele i alaba kuli: “Ba ba eza niti ba ka yaha mwa naha, ba ba sa nyazahali ba ine ku yona. Kono ba ba maswe ba ka kauhelwa mwa lifasi.” (Liproverbia 2:21, 22) Ba ba eza niti bao ki batu ba ba ituta tato ya Jehova ni ku i eza. Jesu Kreste n’a ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Ki niti, “lifasi la fela, . . . kono ya eza tato ya Mulimu u ina ku ya ku ile.”—1 Joani 2:17.

Mañolo kaufela a zwa mwa Bibele ye Kenile ya Silozi, hatiso ya 1951.