“Liñolo kamukana liñozwi ka kususumezwa ki moya wa Mulimu.”—2 Timotea 3:16, Bibele ya Toloko ya Lifasi le Linca.

Mukafumana likalabo za lipuzo za butokwa zemunani zona mwa bupilo, mi likalabo zeo lika mitusa.—Liproverbia 2:1-5.

Mukafumana ketelelo yeka mitusa mwa bupilo bwamina bwa ka zazi ni zazi.—Samu 119:105.

Mukaba ni sepo yetiile ya bupilo bwa kwapili.—Maroma 15:4.

Eni, sihulu ka mabaka amalaalu:

• Kulumelelana kwa litaba zeñozwi mwateñi kwakomokisa. Bibele neiñozwi mwahalaa lilimo zefitelela 1,600, mi neiñozwi ki batu ba 40 babashutana-shutana. Buñata bwa bañoli ba Bibele bao nebasa zibani. Kono litaba zeñozwi mwa buka yeo kaufela zalumelelana mi libulela za taba iliñwi yetuna!

• Bañoli bayona nebañozi ka kusepahala litaba zeneezahezi kwamulaho. Hañata bañoli ba litaba za kwaikale, habañolangi mafosisa a batu ba sicaba sa habo bona. Kono bañoli ba Bibele bona nebañozi bufokoli bwabona ni bwa batu ba sicaba sahabo bona.—2 Makolonika 36:15, 16; Samu 51:1-4.

• Bupolofita bwa mwa Bibele kamita bwatalelezwanga. Bibele neipolofitile za kusinyiwa kwa muleneñi wakale wa Babilona lilimo ze 200 pili kusika ezahala kale cwalo. (Isaya 13:17-22) Neipatuluzi mone ukasinyezwa muleneñi wa Babilona ni kupatulula libizo la mulena yanaaka etelela mwa kutula muleneñi wo!—Isaya 45:1-3.

  Bupolofita bobuñata bwa mwa Bibele bobutalusa lika zeñwi butalelelizwe ka kutala. Kutalelezwa kwa bupolofita ko, kubonisa kuli Bibele ki Linzwi la Mulimu luli.—2 Pitrosi 1:21.