1-2. Ki kabakalañi halukona kuikutwa kuli Jehova haaalabi litapelo zaluna?

 “UTABE hahulu kabakala Jehova, mi uka kufa zeilakaza pilu yahao.” (Samu 37:4) Yeo ki sepiso yende luli! Kono kana lwaswanela kulibelela kuli Jehova uka lufa lika kaufela zelukupa, honafo feela? Ki kabakalañi halukona kubuza puzo yeo? Halunyakisiseñi mitala yelatelela. Kaizeli wa likwasha ulapela ka za kukena Sikolo sa Bakutazi ba Mubuso. Kono kufita lilimo zeñata kaizeli yo hasaamemiwi kwa sikolo seo. Muzwale wa mukulwani ulapela ku Jehova kuli amutuse kufola kwa butuku bobutuna bwakula, ilikuli apete zeñata mwa puteho. Kono haafoli. Bashemi babali Bakreste balapela kuli mwanaa bona azwelepili kuba mwa niti. Kono mwanaa bona uikatulela kutuhela kusebeleza Jehova.

² Mwendi ni mina mukupile Jehova nto yeñwi, kono tapelo yamina haisika alabiwa kale. Kabakaleo, mukana mwaikutwa kuli Jehova ualabanga litapelo za babañwi isiñi zamina. Kamba mukona kunahana kuli mwendi kunani nto yeñwi yemaswe yemuezize. Ki mona mwanaaikutwezi kaizeli yabizwa Janice. b Kaizeli yo ni muunaa hae nebalapezi ku Jehova kuli abatuse kuyo sebeleza fa Betele. Utalusa kuli: “Neninani buikolwiso bwa kuli nekusike kwafita nako yetelele mi neluka memiwa kuli luyo sebeleza fa Betele.” Kono nekufitile lilimo zeñata basamemiwi kuyo sebeleza fa Betele. Bo Janice batalusa kuli: “Neniikutwile hahulu bumaswe mi nenisa zibi za kueza. Neninahana kuli mwendi nenifoselize Jehova ka nzila  yeñwi. Nenilapezi hahulu ka za kuyo sebeleza fa Betele. Neniipuzize kuli, ki kabakalañi Mulimu haasika alaba tapelo yaka?”

3. Lukanyakisisañi mwa taba ye?

³ Fokuñwi lukona kunahana kuli mwendi Jehova hateelezangi kwa litapelo zaluna. Mane nihaiba baana babasepahala ba kwamulaho nebaikutwile cwalo. (Jobo 30:20; Samu 22:2; Hab. 1:2) Ki lika mañi zekona kumikolwisa kuli Jehova ukateeleza kwa litapelo zamina? (Samu 65:2) Kuli lualabe puzo yeo, halukaleñi ka kualaba lipuzo zelatelela: (1) Ki lika mañi zakaeza Jehova? (2) Ki lika mañi zabata Jehova kuli lueze? (3) Ki kabakalañi fokuñwi halutokwa kucinca zeñwi za likupo zaluna?

4. Ka kuya ka Jeremia 29:12, ki lika mañi zasepisa Jehova kuli ukaeza?

⁴ Jehova usepisa kuli ukateeleza kwa litapelo zaluna. (Mubale Jeremia 29:12.) Mulimu waluna walata batanga bahae babasepahala; kacwalo, ukaisa hahulu pilu kwa litapelo zabona. (Samu 10:17; 37:28) Nihakulicwalo, taba yeo haitalusi kuli uka lufa lika kaufela zelu mukupa. Lukatokwa kulibelela kufitela lukena mwa lifasi lelinca kuli lufiwe lika zeñwi zelukupa.

5. Ki lika mañi zanyakisisanga Jehova hateeleza kwa litapelo zaluna? Mutaluse.

⁵ Jehova unyakisisanga mo likupo zaluna liswalisanela ni mulelo wahae. (Isa. 55:8, 9) Kalulo yeñwi ya mulelo wo ki kutaza lifasi ka baana ni basali babanani tabo ni babaswalisani, ili bababusiwa ki yena. Kono Satani yena upihelela kuli batu bakakondisa haiba baipusa. (Gen. 3:1-5) Jehova utuhelezi batu kuli baipuse, ilikuli abonise kuli Diabulosi ki lihata. Niteñi, babusi ba batu ki bona babatahisize buñata bwa miinelo yetaata yelukopana ni yona kacenu. (Muek. 8:9) Lwaziba kuli Jehova haanakufelisa miinelo yetaata kaufela yeo ka nako ya cwale. Hanaaka eza cwalo, batu babañwi mwendi nebaka nahana kuli babusi ba batu bakondisa, ni kuli bakona kufelisa miinelo yetaata yebakopana ni yona batu.

6. Ki kabakalañi halutokwa kuba ni buikolwiso bwa kuli Jehova kamita ukaeza lika ka lilato ni ka kuluka?

⁶ Jehova ukona kualaba likupo zeswana ka linzila zeshutana. Ka mutala, Mulena Ezekiasi hanaakulile hahulu, naakupile Jehova kuli amufolise. Jehova naaalabile kupo yahae ka kumufolisa. (2 Mal. 20:1-6) Kono muapositola Paulusi hanaakupile Jehova kuli azwise “muutwa mwa mubili” wahae, mi kubonahala kuli muutwa wo neli makulanu, Jehova naasika felisa butata bo. (2 Makor. 12:7-9) Halunyakisiseñi hape mutala wa muapositola Jakobo ni muapositola Pitrosi. Kaufelaa bona nebabata kubulaiwa ki Mulena Heroda. Puteho neilapelezi Pitrosi, mi kubonahala kuli neilapelezi ni Jakobo. Nihakulicwalo, Jakobo naabulailwe, kono Pitrosi yena naapilisizwe ka makazo. (Lik. 12:1-11) Lukona kuipuza kuli: ‘Ki kabakalañi Jehova hanaapilisize Pitrosi ni kusiya Jakobo?’ Bibele haibuleli sesiñwi ka za taba yeo. c Kono lwaziba kuli Jehova ki Mulimu “yasaezi ka kusaluka.” (Deut. 32:4) Mi lwaziba kuli Pitrosi ni Jakobo nebatabisa Jehova. (Sin. 21:14) Ka linako zeñwi, Jehova ukona kualaba litapelo zaluna ka nzila yelusika libelela. Kono bakeñisa kuli lwaziba kuli Jehova kamita ualabanga litapelo zaluna ka nzila yelilato ni yelukile, halubilaelangi haalualaba ka nzila yeñwi.—Jobo 33:13.

7. Ki lika mañi zelulikanga kuambuka, mi ki kabakalañi?

⁷ Lulikanga kusabapanya muinelo oluli ku  ona kwa muinelo obali ku ona babañwi. Ka mutala, lwakona kukupa Jehova ka kunonga kuli alutuse, kono kupo yaluna haialabiwi. Kono hamulaho wa nako, luutwa kuli mutu yomuñwi naakupile nto yeswana, mi Jehova naamualabile. Zeo ki zona zeneezahezi ku kaizeli yabizwa Anna. Naalapezi ku Mulimu kuli atuse muunaa hae yabizwa Matthew kufola kwa butuku bwa kansa. Ka nako yeswana, nekunani likaizeli bababeli ba basupali bane bakula butuku bwa kansa. Kaizeli Anna naalapezi ka taata kuli bo Matthew ni likaizeli bao bafole. Likaizeli bao nebafolile, kono bo Matthew bona batimela. Kwa makalelo, bo Anna nebaipuzize ka za haiba Jehova ki yena yanaatusize likaizeli bao kuli bafole. Haiba ki cwalo, ki kabakalañi Jehova hanaasika alaba tapelo ya kaizeli yo ya kuli afolise muunaa hae? Niti kikuli, haluzibi zenetahisize kuli likaizeli bao bafole. Seluziba feela kikuli Jehova ukafelisa manyando kaufela elukopana ni ona, ni kuli unyolelwa kuzusa balikani bahae babashwile.—Jobo 14:15.

8. (a) Ka kuya ka Isaya 43:2, Jehova ulutusanga cwañi? (b) Tapelo ikona kulutusa cwañi halukopana ni miinelo yetaata? (Mubone vidio yeli, Tapelo Ilutusa Kuitiisa.)

⁸ Jehova uka lutusa kamita. Ka kuba Ndataa luna ya lilato, Jehova uikutwanga hahulu bumaswe haalubona inze lunyanda. (Isa. 63:9) Niteñi, haalutibelangi kwa miliko kaufela yekona kubapiswa kwa linuka kamba kwa malimi a mulilo. (Mubale Isaya 43:2.) Nihakulicwalo, usepisa kuli uka lutusa ‘kufita’ mwateñi. Mi haana kulumeleza miliko yelukopana ni yona kulupaleliswa kumusebeleza. Jehova hape ulufanga moya wahae okenile omaata hahulu kuli ulutuse kuitiisa. (Luka 11:13; Mafil. 4:13) Kabakaleo, lwakona kuba ni buikolwiso bwa kuli kamita lukabanga ni lika zelutokwa kuli luitiise ni kuzwelapili kusepahala ku yena. d

9. Ka kuya ka Jakobo 1:6, 7, ki kabakalañi haluswanela kusepa kuli Jehova uka lutusa?

⁹ Jehova ubata kuli lumusepe. (Maheb. 11:6) Ka linako zeñwi, lukona kuikutwa kuli halukoni feela kuitiyela miinelo yetaata yelukopana ni yona. Mane mwendi lukona kuikutwa kuli Jehova haana kulutusa. Kono Bibele ilutaluseza kuli ka maata a Mulimu lwakona “kupahama limota.” (Samu 18:29) Kacwalo, lusike lwakakanya, kono lulapele ku Jehova inze lunani tumelo yetiile ni kusepa kuli ukaalaba litapelo zaluna.—Mubale Jakobo 1:6, 7.

10. Mufe mutala obonisa molukona kuezeza lika ka kulumelelana ni litapelo zaluna.

¹⁰ Jehova ubata kuli lueza lika ka kulumelelana ni litapelo zaluna. Ka mutala, muzwale ukona kukupa Jehova kuli amutuse kufiwa sibaka kwa musebezi ilikuli ayo fumaneha kwa mukopano omutuna. Jehova ukona kualaba cwañi tapelo yeo? Ukona kufa muzwale yo bundume kuli ayo ikambota ni mubelekisi wahae. Kono muzwale yo ukatokwa kuunga muhato wa kuyo ikambota ni mubelekisi wahae. Mwendi ukatokwa kuambola ni mubelekisi wahae ka kukuta-kutela. Mwendi mane wakona kulukisa kuli acincane mazazi kamba nako ya kubeleka, ni mutu yomuñwi yabeleka ni yena. Mi haiba kwa tokwahala, wakona kukupa kuli afiwe mazazi a kupumula ni kuzwisezwa kwa masheleñi.

11. Ki kabakalañi haluswanela kukuta-kutela kulapela ka za lika zelubilaeza?

¹¹ Jehova ubata kuli lumutaluseze ka  kukuta-kutela ka za lika zelubilaeza. (1 Mates. 5:17) Jesu naabonisize kuli zeñwi za lika zelukupa haluna kulifiwa honafo feela. (Luka 11:9) Kacwalo, musike mwazwafa! Mulapele ka taata ni ka kukuta-kutela. (Luka 18:1-7) Haiba luzwelapili kulapela ka za nto yeñwi, lubonisa Jehova kuli nto yeo lwaitokwa luli. Hape lubonisa kuli lunani tumelo ya kuli wakona kulutusa.

12. (a) Ki ifi puzo yeluswanela kuipuza ka za likupo zaluna, mi ki kabakalañi? (b) Ki lika mañi zeluswanela kueza kuli litapelo zaluna libonise kuli lwakuteka Jehova? (Mubone mbokisi yeli, “ Kana Likupo Zaka Libonisa Kuli Nakuteka Jehova?”)

¹² Haiba lusafiwi lika zelukupile mwa tapelo, lwakona kuipuza lipuzo zetaalu. Yapili, ‘Kana nto yenikupa yaswanela?’ Hañata luikutwanga kuli lwaziba luli zelutokwa. Kono lika zelukupa mwendi halina kulutusa hamulaho wa nako. Haiba lulapela ka za butata bobuñwi, mwendi kunani tatululo yende ya butata bo, kufita yelukupa. Mi lika zeñwi zelukupanga mwendi halilumelelani ni tato ya Jehova. (1 Joa. 5:14) Ka mutala, halunyakisiseñi mutala wa bashemi bababulezwi kwamulaho. Nebakupile Jehova kuli atuse mwanaa bona kuzwelapili kuba mwa niti. Kupo yeo ikona kubonahala kuli yaswanela luli. Niteñi, Jehova haana kuhapeleza mutu ufi kamba ufi kuli amusebeleze. Ubata kuli kaufelaa luna, hamoho cwalo ni bana baluna lukete kumulapela. (Deut. 10:12, 13; 30:19, 20) Kacwalo, bashemi baswanela feela kukupa Jehova kuli abatuse kufita mwanaa bona kwa pilu ilikuli alate Jehova ni kuba mulikanaa hae.—Liprov. 22:6; Maef. 6:4.

13. Ka kuya ka Maheberu 4:16, ki lili faka lutuseza Jehova? Mutaluse.

¹³ Puzo yabubeli yelukona kuipuza ki ye,  ‘Kana ye ki yona nako yaswanela kualaba kupo yaka Jehova?’ Lukona kuikutwa kuli litapelo zaluna liswanela kualabiwa honafo feela. Kono niti kikuli, Jehova waziba hande nako yaswanela kulutusa. (Mubale Maheberu 4:16.) Haiba lusafiwi zelukupa honafo feela, lukona kunahana kuli mwendi Jehova uhanile kulualaba. Kono mwendi Jehova ubona kuli nako ya kulualaba haisika fita kale. Ka mutala, muhupule muzwale wa mukulwani yani yanaalapezi kuli afoliswe. Jehova hanaaka mufolisa ka makazo, Satani naakapihelela kuli muzwale yo uzwelapili kusebeleza Jehova ka libaka feela la kuli umufolisize. (Jobo 1:9-11; 2:4) Kutuha fo, Jehova utomile kale nako fakafoliseza matuku kaufela. (Isa. 33:24; Sin. 21:3, 4) Kufitela nako yeo ifita, haluswaneli kulibelela kufoliswa ka makazo. Kacwalo, muzwale yo ukona kukupa Jehova kuli amufe maata ni kozo ya mwa munahano, ilikuli atiyele makulanu ahae ni kuli azwelepili kusebeleza Mulimu ka busepahali.—Samu 29:11.

14. Muitutañi ku zeneezahezi ku bo Janice?

¹⁴ Muhupule mutala wa Kaizeli Janice yanaalapezi kuli naabata kusebeleza fa Betele. Hamulaho wa lilimo zeketalizoho, kaizeli yo naalemuhile kuli Jehova naaalabile tapelo yahae ka nzila yanaasika libelela. Utalusa kuli: “Jehova naaitusisize nako yeo kuniluta ni kunitusa kuba Mukreste yomunde. Nenitokwa kumusepa hahulu. Nenitokwa kuziba mwakuitutela Bibele ka tokomelo. Mi nenitokwa kuziba kuli nakona kuba ni tabo kusina taba ni sibaka konisebeleza Jehova.” Hasamulaho, bo Janice ni bakubona nebafilwe musebezi wa kupotelanga liputeho. Kaizeli Janice ahupula zeneezahezi kwamulaho, utalusa kuli: “Jehova naaalabile litapelo zaka nihaike kuli naasika eza cwalo ka mone nilibelelela.  Neku niingezi nako kuli nilemuhe nzila yende yeo Jehova naaalabile ka yona litapelo zaka, kono naitumela luli kakuli niiponezi lilato ni sishemo sahae.”

15. Ki kabakalañi ka linako zeñwi halusa swaneli kulapela ka kunonga luli? (Mubone ni maswaniso.)

¹⁵ Puzo yabulaalu yelukona kuipuza ki ye, ‘Kana nitokwa kulapelela nto isili?’ Nihaike kuli luswanela kukupanga ka kunonga, mwa miinelo yemiñwi luswanela kutalusezanga Jehova zelubata kono lusa mukupi ka kunonga luli, ilikuli lulemuhe tato yahae. Halunyakisiseñi mutala wa kaizeli wa likwasha yani, yanaalapelanga kuli akene Sikolo sa Bakutazi ba Mubuso. Ubata kukena sikolo seo kuli ayo sebeleza kokutokwahala hahulu bakutazi. Hanzaa zwelapili kulapela kuli amemiwe kwa sikolo seo, hape wakona kukupa Jehova kuli amutuse kulemuha linzila zekona kumutusa kupeta zeñata mwa bukombwa. (Lik. 16:9, 10) Mi wakona kueza ka kulumelelana ni tapelo yahae ka kubuza muokameli wa mupotoloho haiba kunani puteho yeli bukaufi mokutokwahala hahulu mapaina. Kamba wakona kuñolela kwa ofisi ya mutai kukupa kuli bamutaluseze libaka kokutokwahala hahulu bakutazi ba Mubuso. e

16. Ki buikolwiso mañi bolukona kuba ni bona?

¹⁶ Sina moluitutezi, lwakona kuba ni buikolwiso bwa kuli Jehova ukaalaba litapelo zaluna ka nzila yelilato ni yelukile. (Samu 4:3; Isa. 30:18) Ka linako zeñwi mwendi likupo zaluna halina kualabiwa ka molulibelelela. Kono Jehova ukaalaba litapelo zaluna luli. Ululata hahulu. Haana kulufulalela nikamuta. (Samu 9:10) Muzwelepili ‘kumusepa ka nako kaufela,’ mi mumutaluseze ze mwa pilu yamina kaufela ka tapelo.—Samu 62:8.