Ku Sebeleza Mulimu Ku Si Na Ku Inyaza

“Ni libala lika ze kwamulaho ni ku eza ka taata kuli ni fumane ze kwapili.”—MAFIL. 3:13.

MU NAHANISISE LIPUZO ZA BUTOKWA ZE:

Ki lika mañi ze ne tusize muapositola Paulusi kuli a tuhele ku nahana mafosisa a naa ezize kwamulaho?

Bibele i lu bulelela kuli lu swanela ku ezañi kuli lu be ni kozo?

Lu swanela ku ezañi kuli lu si ke lwa inyazanga ha lu nze lu sebeleza Mulimu?

1-3. (a) Batu ba bañwi ba ikutwanga cwañi ka za lika ze ne ba ezize kamba ze ne ba si ka eza, mi mafosisa e lu kile lwa eza a kona ku lu ama cwañi? (b) Lu kona ku itutañi ku Paulusi?

MUÑOLI wa litoko ya bizwa J. G. Whittier naa ñozi kuli manzwi a buinyazo a tumile hahulu ili a bulelwanga kamba ku ñolwa ki a kuli: ‘Kambe ne ni si ka eza cwalo!’ Batu ba bulelanga manzwi ao ha ba hupula mo ne bu ka kona ku bela bupilo kambe ne ba ezize lika ka nzila i sili. Kaufelaa luna lu kile lwa eza lika ze ñwi ze lu hupula kuli kambe ne lu si ka li eza. Kono batu ba bañwi ba zwelangapili ku inyaza kamba ku ikutwa bumaswe bakeñisa lika ze ne ba ezize kamba ze ne ba si ka eza. Kana ni mina mu ikutwa cwalo ka za nto ye ñwi ye mu kile mwa eza?

² Batu ba bañwi ba kile ba eza mafosisa a matuna kamba lika ze maswe hahulu. Ba bañwi bona ha ba zibi hande haiba likatulo ze ne ba ezize mwa bupilo ne li lukile luli. Ku bunolo hahulu ku ba bañwi ku tuhela ku nahana za lika ze ba kile ba eza kwamulaho. Kono ba bañwi ba zwelangapili ku ikutwa bumaswe ka za likatulo ze ne ba ezize mi ba nahananga kuli, ‘Kambe ne ni si ka eza cwalo!’ (Samu 51:3) Mina mu wela kai? Kana mwa tabela ku sebeleza Mulimu mo mu konela kaufela mu sa bilaeli za mafosisa e mu kile mwa eza? Kana ku na ni mutala wa mwa Bibele wa mutu ya naa sebelelize Mulimu ka mwa naa konela kaufela a sa nahani mafosisa a kile a eza kwamulaho? Eni ku na ni, ki muapositola Paulusi.

³ Paulusi naa ezize mafosisa a matuna, mi hape naa ezize liketo ze nde. Paulusi naa inyazize hahulu bakeñisa mafosisa a naa ezize, kono hape naa lemuhile kuli naa swanela ku isa hahulu pilu kwa ku sebeleza Mulimu. Ha lu boneñi ze lu kona ku ituta ku Paulusi.

BUPILO BWA PAULUSI BWA KWAMULAHO

4. Ki lika mañi za naa ikupuzi muapositola Paulusi?

⁴ Paulusi ha naa li mutangana wa Mufalisi ili ka nako  ya naa bizwa Saule, naa ezize lika za naa tilo ikupula hasamulaho. Ka mutala, naa nyandisize hahulu balutiwa ba Kreste. Bibele i bulela kuli hamulaho feela wa ku bulaiwa kwa Setefani, “Saule a kala ku nyandisa hahulu puteho. Naa taseza ndu ye ñwi ni ye ñwi, a hohela baana ni basali fande, ni ku ba kenyisa mwa tolongo.” (Lik. 8:3) Caziba wa Bibele ya bizwa Albert Barnes naa bulezi kuli pulelo ya kuli “ku nyandisa hahulu” i bonisa kuli Saule naa lwanisize hahulu puteho ya Sikreste sina feela sibatana mo si kona ku lwaniseza mutu. Saule nee li Mujuda ya naa tukufalezwi ili ya naa lumela luli kuli Mulimu naa mu bata kuli a sinye puteho ya Sikreste. Kamukwaocwalo, naa nyandisize Bakreste ni ku bemba kuli naa ka bulaya “baana hamoho ni basali.”—Lik. 9:1, 2; 22:4. *

5. Ki nto mañi ye ne tahisize kuli Saule a tuhele ku nyandisa balutiwa ba Jesu ni ku kalisa ku kutaza ka za Kreste?

⁵ Hasamulaho, Saule naa bata ku ya kwa Damaseka kuli a yo lwanisa Bakreste mwa mandu a bona ni ku ba isa kwa Jerusalema kuli ba yo fiwa koto ki kuta ye tuna ya Sijuda. Kono Jesu, yena Toho ya puteho ya Sikreste, a mu tibela ku eza cwalo. (Maef. 5:23) Saule ha naa nze a liba kwa Damaseka, Jesu a iponahaza ku yena mi Saule a ba sibofu kabakala liseli le ne li zwa kwa lihalimu. Jesu a bulelela Saule kuli a ye kwa Damaseka kuli a yo libelela ku fiwa litaelo ze ñwi. Lwa ziba ze ne ezahezi ku zwa fo.—Lik. 9:3-22.

6, 7. Ki nto mañi ye bonisa kuli Paulusi naa lemuhile kuli naa ezize mafosisa a matuna?

⁶ Hamulaho feela wa ku lemuha kuli za naa eza nee li ze maswe, Paulusi a tuhela ku nyandisa Bakreste mi a kalisa ku kutaza ka tukufalelo ka za Kreste. Nihakulicwalo, Paulusi naa si ka libala lika za naa ezize kwamulaho. Naa ñozi ka za hae kuli: “Ki niti, ne mu utwile za muzamao wa ka wa pili mwa tuto ya Sijuda, kuli ne ni swalelezi ku nyandisa maswe puteho ya Mulimu ni ku lika ku i yundisa.” (Magal. 1:13) Paulusi hape naa bulezi ka za bupilo bwa hae bwa kwamulaho ha naa ñolezi Bakreste ba kwa Korinte, ni ba kwa Filipi, ni ha naa ñolezi Timotea. (Mu bale 1 Makorinte 15:9; Mafil. 3:6; 1 Tim. 1:13) Paulusi naa ikutwile bumaswe bakeñisa za naa ezize, mi naa si ka li libala. Naa lemuhile kuli naa ezize bumaswe bo butuna.—Lik. 26:9-11.

⁷ Caziba wa Bibele ya bizwa Frederic W. Farrar naa ñozi kuli ha lu nahanisisa mo Paulusi naa nyandiselize Bakreste, lwa kona ku utwisisa libaka ha naa utwile hahulu bumaswe ni ha ne ba mu nyazize hahulu ba bañwi. Paulusi ha naa potezi liputeho ze shutana-shutana, mwendi mizwale be ne ba kopani ni yena lwa pili ne ba bulezi kuli: ‘Ki wena Paulusi. Ki wena ya naa lu nyandisa!’—Lik. 9:21.

8. Paulusi naa ikutwile cwañi ka za sishemo ni lilato za naa bonisizwe ki Jehova ni Jesu, mi lu itutañi ku Paulusi?

⁸ Paulusi naa lemuhile kuli naa sebeza sina muapositola ka libaka feela la kuli Mulimu naa mu bonisize hahulu sishemo. Ka ku shutana ni bañoli ba bañwi ba Bibele, Paulusi u bulela za kalemeno ka sishemo seo sa Mulimu ha 90 mwa mañolo a hae a 14. (Mu bale 1 Makorinte 15:10.) Paulusi naa itebuhile hahulu ku Mulimu bakeñisa sishemo sa naa mu bonisize, mi naa bata ku bonisa buitebuho bwa hae. Kamukwaocwalo, Paulusi a sebeleza Mulimu mwa naa konela kaufela ku fita baapositola ba bañwi kaufela. Lu itutañi ku Paulusi? Haiba lu bonisa tumelo mwa sitabelo sa Jesu, ku ipulela libi za luna, ni ku tuhela ku eza ze maswe,  Jehova u ka tabela ku lu swalela nihaiba libi ze tuna hahulu. Haiba mu nga kuli libi ze ne mu ezize ki ze tuna hahulu kuli mane ha li koni ku swalelwa ka tiululo ya sitabelo sa Kreste, mu hupule mutala wa Paulusi. (Mu bale 1 Timotea 1:15, 16.) Nihaike kuli naa nyandisize Jesu, Paulusi naa ñozi kuli Jesu naa mu latile mi naa mu shwezi. (Magal. 2:20; Lik. 9:5) Paulusi naa lemuhile kuli naa swanela ku sebeleza Mulimu mwa naa konela kaufela ku si na taba ni za naa ezize kwamulaho ilikuli kwapili a si ke a yo inyaza. Mina bo, kana mu tusizwe ki mutala wa Paulusi?

KANA MWA INYAZANGA?

9, 10. (a) Ki kabakalañi ha lu inyazanga fokuñwi? (b) Ki kabakalañi ha ku si ko kunde ku bilaelanga za mafosisa e lu kile lwa eza kwamulaho?

⁹ Kana mu kile mwa eza nto ye ñwi ye tahisa kuli mu inyaze ka nako ya cwale? Kana mu ikutwanga kuli kambe ne mu itusisize nako ni maata a mina kwa ku eza lika ze ñwi za butokwa? Kana ne mu ezize nto ye ñwi ye ne utwisize ba bañwi butuku? Kamba mwendi ku na ni nto ye ñwi ye nee mu ezize ye mu hupula kuli kambe ne mu si ka i eza? Mu kona ku ezañi haiba mu ikutwa cwalo?

¹⁰ Batu ba bañwi ba bilaelanga ka nako kaufela! Ba ikutwanga ku swaba ni ku bilaela ka ku kuta-kutela ha ba nahana mafosisa e ba kile ba eza. Kana ku bilaela ku ka mi tusa se siñwi? Kutokwa! Ku bilaela ku ka mi sinyeza feela nako ni maata a mina. Ku fita ku bilaela, mu swanela ku nga mihato ye ka mi tusa. Mu kupe swalelo ku mutu ye ne mu foselize ilikuli mu pilisane ka kozo ni mutu yo. Mu nahane libaka le ne li tahisize kuli mu foseze mutu yo ilikuli mu si ke mwa kutela ku eza nto ye swana hape. Nihakulicwalo, fokuñwi mu ka tokwa ku tiyela miinelo ye taata ye tahisizwe ki mafosisa e mu kile mwa eza. Kono ku bilaela za mafosisa e mu kile mwa eza kwamulaho ha ku na ku mi tusa. Mane ku eza cwalo ku ka tahisa kuli ku be taata kuli mu sebeleze Mulimu mo mu konela kaufela.

11. (a) Lu swanela ku ezañi haiba lu bata kuli Jehova a lu shemube ni ku lu bonisa lilato? (b) Ku likana ni mo i boniseza Bibele, lu swanela ku ezañi kuli lu tuhele ku ikutwa mulatu bakeñisa bufosi bo ne lu ezize kwamulaho?

 ¹¹ Batu ba bañwi ba ikutwanga kuli mafosisa e ne ba ezize ki a matuna hahulu kuli mane Mulimu ha koni ku ba shemuba. Ba ikutwanga kuli mafosisa ao nee li a matuna hahulu ni kuli ne ba kuta-kutezi ku a eza. Kono niti kikuli ku si na taba ni ze ne ba ezize kwamulaho, ba kona ku ipulela mafosisa a bona, ku eza licinceho, ni ku kupa Mulimu kuli a ba swalele. (Lik. 3:19) Jehova wa kona ku ba shemuba ni ku ba bonisa lilato sina feela mwa ezelize kwa batu ba bañata. Jehova u ka swalela mutu kaufela ya ikokobeza, ya sepahala, ni ya inyaza bakeñisa libi za hae. Ka mutala, Mulimu naa swalezi Jobo, ya naa inyazize hahulu bakeñisa mafosisa a naa ezize. (Jobo 42:6) Bibele i lu bulelela ze lu swanela ku eza luli kuli lu tuhele ku ikutwa mulatu bakeñisa mafosisa a luna, mi hape i lu bulelela mo lu kona ku bela ni kozo. I bulela cwana: “Ya pata milatu ya hae ha na ku bona mbuyoti; kono ya i bulela, mi a i bakela, u ka shemubiwa.” (Liprov. 28:13; Jak. 5:14-16) Lu swanela ku ipulela milatu ya luna ku Mulimu, ku kupa Mulimu kuli a lu swalele, ni ku eza mo lu konela kaufela kuli lu bonise kuli lwa inyaza bakeñisa ze ne lu ezize. (2 Makor. 7:10, 11) Ha lu ka eza cwalo, Jehova ya sa “katali ku swalela,” u ka lu shemuba.—Isa. 55:7.

12. (a) Lu kona ku likanyisa cwañi mutala o munde wa Davida ha lu sisitwa ki lizwalo? (b) Ki kabakalañi Bibele ha i bulela kuli Jehova naa ikutwile ku swaba, mi kalabo ya puzo yeo i lu susueza cwañi? (Mu bone kambokisi)

¹² Mulimu u kona ku lu tusa hahulu haiba lu lapela ku yena. Mwa Samu ye ñwi, Davida naa bonisize tumelo ya kuli Jehova naa alabile litapelo za hae. (Mu bale Samu 32:1-5.) Pili Davida a si ka bulela kale sibi sa hae ku Mulimu, lizwalo la hae ne li mu sisita hahulu. Naa bilaezi, ku kula, ni ku lembwala. Davida naa swalezwi mi naa ikutwile mwangalwa hamulaho wa ku ipulela libi za hae ku Mulimu. Jehova naa alabile litapelo za Davida. Naa tusize Davida kuli a ikutwe hande ni ku zwelapili ku eza ze lukile. Kamukwaoswana, haiba mu bilaela za mafosisa e mu kile mwa eza, mu lapele ku Jehova ka ku zwelela kwa pilu kuli a mi swalele mi mu eze mo mu konela kaufela kuli mu eze licinceho ze tokwahala. Mi mu kolwe kuli Jehova u utwile tapelo ya mina mi u mi swalezi!—Samu 86:5.

MU NAHANE ZE MU KONA KU EZA KU ZWA CWALE

13, 14. (a) Lu swanela ku isa pilu kwa nto mañi ka nako ya cwale? (b) Ki lipuzo mañi ze kona ku lu tusa ku nahanisisa ka za lika ze lu eza cwale?

¹³ Ki niti kuli lwa kona ku ituta kwa bupilo bwa luna bwa kwamulaho, kono ha lu swaneli ku bilaezwanga ki ze ne lu ezize kwamulaho. Mu nahane ze mu kona ku  eza cwale ni ze mu kona ku eza kwapili. Mu ipuze lipuzo ze cwale ka ze: ‘Hamulaho wa lilimo ku zwa fa, kana ni ka ikupula bakeñisa liketo ze ni eza cwale? Kana kwapili ni ka bulela kuli kambe ne ni ezize lika ka nzila i sili? Kana ni sebeleza Mulimu ka busepahali ilikuli kwapili ni si ke na yo inyaza?

¹⁴ Ñalelwa ye tuna i fakaufi hahulu. Ne ku ka ba hande ha ne mu ka ipuza lipuzo ze cwale ka ze: ‘Kana na kona ku eza ze ñata ha ni nze ni sebeleza Mulimu? Kana na kona ku eza bupaina? Kiñi ze ni palelwisa ku ba sikombwa sa puteho? Kana ni eza mo ni konela kaufela kuli ni apale butu bo bunca? Kana ni yo muñwi wa batu ba ka tokwa Jehova kuli ba pile mwa lifasi la hae le linca?’ Mwa sibaka sa ku bilaela za lika ze mu si ka eza, mu ise pilu ku ze mu eza cwale, mi mu bone teñi kuli mwa eza ze ñata ha mu nze mu sebeleza Jehova. Ka nako ya cwale, mu eze liketo ze ka tahisa kuli mu si ke mwa yo inyaza kwapili.—2 Tim. 2:15.

MU SI KE MWA INYAZA BAKEÑISA KU SEBELEZA MULIMU

15, 16. (a) Ba bañata ba ezize buitomboli mañi kuli ba sebeleze Jehova mo ba konela kaufela? (b) Ki kabakalañi ha lu sa swaneli ku inyaza bakeñisa buitomboli bo lu ezize kuli lu sebeleze Mulimu?

¹⁵ Kana mu ezize buitomboli ilikuli mu sebeleze Jehova ka nako kaufela? Mwendi ne mu tuhezi musebezi o munde o ne mu eza kamba pisinisi ilikuli mu sebeleze Jehova ka mo mu konela kaufela. Kamba mwendi ne mu iketezi ku sa kena mwa linyalo kamba ku sa ba ni bana ilikuli mu yo sebeleza fa Betele, ku eza musebezi wa buyahi mwa linaha ze shutana-shutana, kamba kuli mu be mwa musebezi wa maeto kamba ku ba mulumiwa. Kana mwa swanela ku inyaza ka za likatulo ze ne mu ezize bakeñisa kuli se mu supala? Kana mu swanela ku ikutwa kuli buitomboli bo ne mu ezize ne bu sa tokwahali kamba kuli ne mu ezize buitomboli bo ka nako ye ne sa swaneli? Ha mu swaneli ku ikutwa cwalo!

¹⁶ Ne mu ezize likatulo zeo bakeñisa kuli mu lata hahulu Jehova mi ne mu bata ku tusa ba bañwi kuli ba mu sebeleze. Mu si ke mwa nahana kuli bupilo bwa mina ne bu ka ba bo bunde kambe ne mu ezize lika ka nzila isili. Mwa kona ku ba ni tabo ye tuna bakeñisa likatulo ze ne mu ezize. Ne mu ezize keto ye nde ya ku sebeleza Jehova mwa miinelo ya mina. Jehova ha na ku libala buitomboli kaufela bo ne mu ezize kuli mu mu sebeleze. Ka nako ye mu ka pila “bupilo sakata” ili ku talusa bupilo bo bu petehile bwa ku ya ku ile, Mulimu u ka mi kapweka limbuyoti ze ñata!—Samu 145:16; 1 Tim. 6:19.

MO MU KONA KU SEBELEZA MULIMU MU SA INYAZI

17, 18. (a) Paulusi naa ezizeñi kuli a si ke a inyaza? (b) Mu ka latelela cwañi mutala wa Paulusi?

¹⁷ Ki lika mañi za naa ezize Paulusi kuli a si ke a yo inyaza kwapili? Paulusi naa bulezi kuli naa tuhezi ku bilaelanga za naa ezize kwamulaho mi naa sebelize ka taata kuli a fiwe mupuzo. (Mu bale Mafilipi 3:13, 14.) Paulusi naa sa nahanangi za lika ze maswe za naa ezize ha naa li mwa bulapeli bwa Sijuda. Kono naa itusisize maata a hae kaufela kuli a zwelepili ku sepahala mwa bupilo bwa hae kaufela ilikuli a fiwe mupuzo wa bupilo bo bu sa feli.

¹⁸ Lu kona ku itutañi ku za naa bulezi Paulusi? Ku fita ku bilaezwa ki lika za kwamulaho ze lu sa koni ku cinca, lu swanela ku isa pilu kwa lika ze lu kona ku eza cwale ilikuli lu to amuhela limbuyoti kwapili. Mwendi ha lu koni ku libalelela mafosisa a luna, kono ha lu swaneli ku ikutwanga mulatu bakeñisa mafosisa ao. Lwa kona ku tuhela ku nahananga za kwamulaho, mi lwa kona ku sebeleza Mulimu mo lu konela kaufela ka nako ya cwale, ni ku nahana bupilo bo bunde bo lu ka ikola kwapili!

[Litaluso za kwatasi]

[Lipuzo za Tuto]

[Mbokisi fa likepe 25]

KI KABAKALAÑI BIBELE HA I BULELA KULI JEHOVA NAA IKUTWILE KU “SWABA”?

Bibele ka ku kuta-kutela i bulela kuli Jehova naa ikutwile ku “swaba.” (Jona. 3:10; Gen. 6:6, 7; Baat. 2:18; 1 Sam. 15:11) Bibele ha i talusi kuli Jehova naa ezize mafosisa. Lika kaufela za eza Mulimu li petehile. (Num. 23:19; Deut. 32:4) Kono Bibele i talusa kuli Jehova ka linako ze ñwi wa cincanga muhupulo wa hae bakeñisa miinelo ye cincanga. Ka mutala, mwa linako za kwamulaho, Jehova naa atuzi batu bakeñisa bumaswe bo ne ba ezize. Kono hamulaho Mulimu naa ba shemubile ni ku ba swalela bakeñisa kuli ne ba ezize licinceho ka ku eza ze lukile.—Jer. 18:7-10.

[Siswaniso se si fa likepe 24]

Paulusi naa itutile ku sebeleza hande Mulimu a sa inyazi