Divilu 40:1-38
40 Penepo Yehova wanena Mosesa amba:
2 “Mu difuku dibajinji dya kweji umbajinji, ukashimika kipema, pema wa kubungakena’ko.+
3 Utūle’mo sanduku wa Bukamoni,+ ukinge Sanduku na mpashila.+
4 Ukatweja’mo meza+ ne kupanga’po bintu byao kadi ukatweja’mo kitūlwa-binanu+ ne kwakija binanu byakyo.+
5 Kupwa utūle kisōkelo kya ensense+ kya olo kumeso kwa sanduku wa Bukamoni kadi ukobeke kya kukinga* ku kibelo kya kipema pa kifuko kyakyo.+
6 “Ukatūla kisōkelo kya kyamulambu kisōkwe+ ku meso a kibelo kya kipema, pema wa kubungakena’ko,
7 utūle ne kyoilo pa bukata bwa pema wa kubungakena’ko ne kisōkelo, wele’mo ne mema.+
8 Ebiya ushimike kipango+ kufulakufula, utūle ne kya kukinga*+ ku kibelo kya kipango.
9 Kupwa ukayata māni a kushinga+ ushinge kipema ne byonso bidi’mo,+ kadi upandule’kyo ne bipungwa byakyo byonso, amba kikale kintu kijila.
10 Ukashinga kisōkelo kya kyamulambu kisōkwe māni ne bipungwa byakyo byonso kadi upandule kisōkelo, amba kikale kisōkelo kijila nakampata.+
11 Ushinge kyoilo māni ne kitako kyakyo wikipandule.
12 “Penepa ukaselela Alone ne bandi bana kubwipi na kibelo kya pema wa kubungakena’ko, wiboije mema.+
13 Kadi ukavwika Alone bivwalwa bijila+ umushinge māni+ ne kumupandula, nandi ukañingidilanga bu kitobo.
14 Kupwa ukaselela bandi bana kubwipi, wibavwike minkukumba.+
15 Ukebashinga māni monka mowashingila shabo,+ amba bañingidile bu babitobo, kadi kushingwa māni kwabo kukebekadilanga nyeke bu butobo bwa myaka na myaka mu nkongo yabo.”+
16 Mosesa walonga mwendele byonso byamusoñenye Yehova.+ Walonga enka nabya.
17 Mu kweji umbajinji, mu mwaka wa bubidi, mu difuku dibajinji dya kweji’wa, kipema kyashimikwa.+
18 Mosesa paashimikile kipema, watūdile bitako byakyo bya mapuki+ panshi, waimika makadelema,+ watweja’mo mikabo yakyo,+ washimika ne bikomo byakyo.
19 Wabāla pema+ pangala pa kipema watenteka’po kya kupūta+ pema, monka mobasoñaninye Mosesa kudi Yehova.
20 Kupwa wayata Bukamoni+ webutūla mu Sanduku,+ wakwika mitembo+ ku Sanduku, watenteka ne mpūto+ pa Sanduku.+
21 Watweja sanduku mu kipema, wakobeka ne mpashila+ ya kukinga’ko, wakinga sanduku wa Bukamoni,+ monka mobasoñaninye Mosesa kudi Yehova.
22 Penepo watūla meza+ mu pema wa kubungakena’ko ku mutamba wa kungala kwa kipema panja pa mpashila,
23 wapanga’po mulongo wa mikate+ ku meso a Yehova, monka mobasoñaninye Mosesa kudi Yehova.
24 Watūla kitūlwa-binanu+ mu pema wa kubungakena’ko kumeso kwa meza, mutamba wa kunshi kwa kipema.
25 Waakija binanu+ ku meso a Yehova, monka mobasoñaninye Mosesa kudi Yehova.
26 Kupwa watūla kisōkelo kya olo+ mu pema wa kubungakena’ko kumeso kwa mpashila,
27 mwa kusōkela’po+ ensense ya mananshi,+ monka mobasoñaninye Mosesa kudi Yehova.
28 Penepo wakobeka kya kukinga*+ ku kibelo kya kipema pa kifuko kyakyo.
29 Watūla kisōkelo kya kyamulambu kisōkwe+ pa kibelo kya kipema, pema wa kubungakena’ko, mwa kulambwila’po kyamulambu kisōkwe+ ne kyamulambu kya miseke, monka mobasoñaninye Mosesa kudi Yehova.
30 Ebiya watūla kyoilo pa bukata bwa pema wa kubungakena’ko ne kisōkelo, waela’mo ne mema a koya.+
31 Mosesa ne Alone ne bandi bana baoya’mo ku makasa ne ku maulu.
32 Kitatyi kyonso kyobadi batwela mu pema wa kubungakena’ko nansha kufwena ku kisōkelo, badi boya,+ monka mobasoñaninye Mosesa kudi Yehova.
33 Ku mfulo washimika kipango+ kufulakufula kwa kipema ne kisōkelo, wakobeka ne kya kukinga* ku kibelo kya kipango.+
Ebiya Mosesa wavuya mwingilo.
34 Dikumbi dyashilula kupūta pema wa kubungakena’ko, ntumbo ya Yehova nayo yayula mu kipema.+
35 Mosesa kabwenyepo kutwela mu pema wa kubungakena’ko mwanda dikumbi dyadi dikidi pangala pa pema, kadi ntumbo ya Yehova yayudile mu kipema.+
36 Kadi dikumbi podyadi ditaluka pa kipema, bene Isalela badi batalula nkambi mu lwendo lwabo lonso.+
37 Inoko, shi dikumbi keditalukilepo, nabo kebadipo batalula nkambi kufika ne difuku dyodikataluka.+
38 Mwanda dikumbi dya Yehova dyadi pangala pa kipema dyuba, kadi mudilo wadi’po bufuku ku meso a njibo yonso ya Isalela mu lwendo lwabo lonso.+
Kunshi kwa Dyani
^ Nansha’mba “mpashila.”
^ Nansha’mba “mpashila.”
^ Nansha’mba “mpashila.”
^ Nansha’mba “mpashila.”
