Kupituluka mu Bijila 31:1-30
31 Penepo Mosesa watamba kukesamba bino binenwa na Isalela ense,
2 webanena’mba: “Kendi na myaka 120 dyalelo dino’di.+ Nkibwanyapo kadi monka kwimutangidila,* mwanda Yehova waunenene amba, ‘Kukabukapo uno Yodano.’+
3 Yehova Leza wenu ye ukabuka ku meso enu, kadi aye mwine ukatukija fututu ino mizo ku meso enu, nenu mukeipanga.+ Yoshua ye ukemutangidila pa kwabuka,+ monka mwesambile’kyo Yehova.
4 Yehova ukebalonga monka mwaalongele Shihone+ ne Oka+ balopwe ba bene Amole, ne ntanda yabo paebatukije fututu.+
5 Yehova ukemunekenenya’bo, nenu mukebalonga mwendele mbila yonso yonemupēle.+
6 Kankamanai kadi mwikomejei.+ Kemwakikwatwai moyo nansha kwibazakala,+ mwanda Yehova Leza wenu ye wenda nenu. Kakemulekapo nansha kwimwela kwine mpika.”+
7 Penepo Mosesa waita Yoshua kamunena ku meso a Isalela ense amba: “Kankamana kadi wikomeje,+ mwanda abe ye ukatweja bano bantu mu ntanda yatyipile Yehova kudi bakulutuba babo kwibapa’yo, kadi abe ukebapa’yo bu bupyani.+
8 Yehova ye wenda ku meso obe, kadi ukekala nobe nyeke.+ Kakakulekapo nansha kukwela kwine mpika. Kokikwatwa moyo nansha kutuyuka.”+
9 Penepo Mosesa walemba bino Bijila+ wapa’byo babitobo, bene Levi, baselanga sanduku wa kipwano kya Yehova, ne bakulumpe bonso ba Isalela.
10 Mosesa webasoñanya’mba: “Ku mfulo kwa myaka isamba-ibidi yonso, pa kitatyi kitungwe mu mwaka wa kulekela mapu,+ mu Masobo a Bitanda,*+
11 shi Isalela ense wamweka ku meso a Yehova+ Leza wenu mu kifuko kyatonga, mukatangila Isalela ense bino Bijila’mba bebivwane.+
12 Kongakanya bantu pamo,+ bana-balume, bana-bakaji, bana,* ne mweni obe wa kibundi udi mu bibundi* byobe, amba bevwane ne kwifunda ne kutyina Yehova Leza wenu kadi bate mutyima, balonde binenwa bya bino Bijila.
13 Penepo babo bana kebadipo bayukile bino Bijila bakevwana+ ne kwifunda kutyina Yehova Leza wenu mafuku onso omukekala mu ntanda yomwabukila Yodano kukeiyata ke yenu.”+
14 Ebiya Yehova wanena Mosesa amba: “Tala! Kitatyi kyobe kya kufwa+ kibafwena pabwipi. Ita Yoshua, mukemane* ku pema wa kubungakena’ko, amba mutūle bu mutangidiji.”+ Penepa ba Mosesa ne Yoshua baenda kukemana ku pema wa kubungakena’ko.
15 Penepo Yehova wamweka ku pema mu dilenga dya dikumbi, kadi dilenga dya dikumbi dyaimana dya pa kibelo kya pema.+
16 Ebiya Yehova wanena Mosesa amba: “Tala! Abe kosa kufwa,* kadi bano bantu bakanza kulonga busekese bwa ku mushipiditu na baleza ba kungi bebajokolokele mu ntanda yobenda’mo.+ Bakangela+ ne kutyumuna kipwano kyami kyonasambile nabo.+
17 Mu kine kitatyi’kya bulobo bwami bukebadyendyemukila,+ kadi nkebela+ ne kwibafya mpala yami+ kufika ne byobasasamunwa. Ebiya byamalwa ne tusua tuvule pa kwibafikila,+ bakanena’mba, ‘Le ke pa mwandapo wa Leza wetu kadipo mu bukata mwetu petufikila bino byamalwa?’+
18 Ino nkafya mpala yami mu dine difuku’dya mwanda wa bibi byonso byobalongele pa kwalamukila kudi baleza bakwabo.+
19 “Shi ke pano lembai luno lwimbo+ mufundije’lo bene Isalela.+ Mwibafundijei’lo* amba luno lwimbo lwikale bu kamoni kami pa bantu ba Isalela.+
20 Shi nebaselela ku ntanda yonatyipīle bakulutuba babo+—ntanda ikuka mabele ne būki+—badye bekute kadi bekale biyampe,*+ bakalamukila kudi baleza bakwabo ne kwibengidila, kadi bakampunika ne kutyumuna kipwano kyami.+
21 Shi byamalwa bivule ne tusua bibebafikila,+ luno lwimbo lukekala bu kamoni kobadi (mwanda lutundu lwabo kelufwaninwepo kwilwilwa), ke-pantu ndyukile kala milangwe yobaikele nayo+ kumeso kwa kwibatweja ne mu ntanda yonatyipile.”
22 Penepo Mosesa walemba luno lwimbo mu dine difuku’dya, kafundija’lo bene Isalela.
23 Ebiya nandi* watūla Yoshua+ mwanā Nuna bu mutangidiji kanena’mba: “Kankamana kadi wikomeje,+ mwanda abe ye ukatweja bene Isalela mu ntanda yonebatyipīle,+ nami nkekala nobe nyeke.”
24 Aye’tu Mosesa upwa kulemba binenwa byonso bya bino Bijila mu mukanda,+
25 Mosesa wasoñanya bene Levi baselanga sanduku wa kipwano kya Yehova amba:
26 “Yatai uno mukanda wa Bijila+ mwiutūle ku lubavu lwa sanduku+ wa kipwano kya Yehova Leza wenu, ukekala’ko bu kamoni pomudi.
27 Mwanda ami ndyukile biyampe butomboki bwenu+ ne mitwe yenu myūmu.*+ Shi mutombokela Yehova nankyo pano ponakidi nenu mūmi, shi nafu ke pepi!
28 Kongakenyai kondi bakulumpe bonso ba bisaka byenu ne bemaniji benu, nesambe bino binenwa mu matwi abo, kadi ngate madiulu ne ntanda bu batumoni pobadi.+
29 Mwanda ndyukile biyampe amba shi nafu, bine musa kulonga bibi+ ne kusāsuka mu dishinda dyonemusoñenye. Na bubine kyamalwa kikemuponena+ ku mafuku a mfulo, mwanda mukalonga bibi ku meso a Yehova kadi mukamusanshija na mingilo ya makasa enu.”
30 Penepo Mosesa wapituluka mu matwi a kipwilo kyonso kya Isalela binenwa bya luno lwimbo, tamba ku ngalwilo kutūla ne ku mfulo amba:+
Kunshi kwa Dyani
^ Kishima pa kishima i, “kutamba ne kutwela.”
^ Nansha’mba “Mwa Kufyama Kyaba Kityetye.”
^ Kishima pa kishima i, “bana batyetye.”
^ Kishima pa kishima i, “bibelo.”
^ Nansha’mba “mukemane pa bifuko byenu.”
^ Kishima pa kishima i, “kulāla na bashobe.”
^ Kishima pa kishima i, “Mwilutūle mu byakanwa byabo.”
^ Kishima pa kishima i, “banune.”
^ Mobimwekela i Leza.
^ Kishima pa kishima i, “nshingo myūmu.”
