Kupituluka mu Bijila 34:1-12
34 Penepo Mosesa watamba mu malungu a Moabu mudi zolē wakanda ku Lūlu lwa Nebo,+ pa mutwe wa Pisika,+ lwitadidile na Yediko.+ Ebiya Yehova wamulombola ntanda yonso, tamba ku Ngileade kutūla ne ku Dani,+
2 ne Nafatale ense ne ntanda ya Efelaimi ne Manase, ne ntanda yonso ya Yuda kufika ne ku dijiba* dya kushika,+
3 ne Nengeba+ ne Kipindi kya Ntanda,+ dilungu dya musanza wa Yediko, kibundi kya tunkindu, kufika ne ku Zoale.+
4 Penepo Yehova wamunena’mba: “Ino’i yo ntanda yonatyipīle Abalahama, Izake, ne Yakoba, amba, ‘Nkapānanga’yo ku lutundu* lobe.’+ Nakumwesha’yo na obe meso, inoko abe kukabukila’mopo.”+
5 Kupwa papo Mosesa mwingidi wa Yehova wafwa kwine’kwa mu ntanda ya Moabu monka mwanenene Yehova.+
6 Wamujīka mu musanza wa ntanda ya Moabu, kampalampala na Bete-Peole, kadi i kutupu muntu uyukile padi kibundu kyandi kufika ne dyalelo.+
7 Mosesa wadi na myaka 120 paafwile.+ Meso andi adi keaikele na kafi, ne bukomo bwandi nabo bwadi kebwamupwile.
8 Bantu ba Isalela badila Mosesa mu malungu a Moabu mudi zolē mafuku 30.+ Ebiya mafuku a kudila madilo a Mosesa apwa.
9 Yoshua mwanā Nuna wadi muyulwe mushipiditu wa tunangu, mwanda Mosesa wamutentekele dikasa dyandi;+ bene Isalela bashilula kumwivwana, kadi balongele monka mobasoñaninye Mosesa kudi Yehova.+
10 Ino kekwaikelepo monka mupolofeto mukwabo pamo bwa Mosesa,+ obadi bayukile kudi Yehova mpala na mpala.+
11 Walongele biyukeno ne bingelengele byonso byamutumine Yehova kulonga mu ntanda ya Edipito kudi Felo ne bengidi bandi bonso ne ntanda yandi yonso,+
12 pamo ne kuboko kwa bukomo ne bukomo bulenga nzuba bwalombwele Mosesa ku meso a Isalela ense.+
