Musapudi 2:1-26
2 Penepo nanena mu mutyima wami amba: “Iya, ndeke bidi ntompe nsangaji* ntale biyampe bīya’ko.” Ino tala! kino nakyo kyadi kya bitupu.
2 Nanena pa mwanda wa tusepo amba, “I bulubi!”
Kadi pa mwanda wa nsangaji* amba, “Le idi na kamweno’ka?”
3 Namwene na mutyima wami kwipāna mu kutoma vinyu,+ koku ndamine tunangu twami; nepēne bya bulembakane enka ne mu kusokola kintu kyadi kilumbuluke ku bantu kya kulonga mu mafuku matyetye a būmi bwabo muno munshi mwa madiulu.
4 Nashilula kwingila mingilo mikatampe.+ Neubakila mobo;+ nedimina madimi a mañanza.+
5 Nedimina madimi ne madimi a mityi, kadi nakuna’mo mityi ya miswelo yonso ipa bipa.
6 Nelongela bijiba bya mema, a kusangila mató a mityi mivwambile.
7 Naikala na bengidi bana-balume ne bana-bakaji,+ kadi nadi na bengidi babutwilwe mu njibo* yami. Ebiya naikala ne na bimunanwa bivule—bañombe ne mikōko+—kupita muntu ense wambadikidile mu Yelusalema.
8 Neungwijija ndalama ne olo,*+ byabulēme* bya balopwe ne bya mabikavu.+ Nekongakenya batuimba bana-balume ne bana-bakaji, ne kyokya kisangaja bininge bana ba bantu bana-balume—mwana-mukaji, bine, bana-bakaji bavule.*
9 Penepo naikala mukatampe bininge kupita muntu yense wambadikidile mu Yelusalema.+ Kadi tunangu twami twadi’nka nami.
10 Nkyepelejepo kintu kyonso kyonadi nsaka.*+ Kadi nkyasuminwepo mutyima wami nsangaji* yo-yonso, mwanda mutyima wami wadi musangale pa mwanda wa mingilo yami yonso mikomo, kadi ino yadi mpalo yami* ku mingilo yami yonso mikomo.+
11 Ino ponalangulukīle pa mingilo yonso yalongele maboko ami ne pa mingilo mikomo yonaputumīne’mo,+ namwene amba kintu kyonso kyadi kya bitupu, i kupanga luvula;+ kekwadipo kintu nansha kimo kya mvubu* muno munshi mwa dyuba.+
12 Penepo kadi nata mutyima wami ku tunangu ne bulubi ne buvila.+ (Mwanda le muntu ukāya’ko kupwa kwa mulopwe ubwanya kulonga kika? I enka kyokya ke kilongwe kala.)
13 Kadi namona’mba tunangu tudi na kamweno kupita buvila,+ monka mwikadile kitōkeji na kamweno kupita mfindi.
14 Yewa wa tunangu udi na meso mu mutwe wandi;*+ ino kivila akyo kinangilanga mu mfindi.+ Kadi najingulula’mba abo bonso bafikilwanga na mfulo imo.+
15 Penepo nanena mu mutyima wami amba: “Kyokya kifikilanga kivila kikamfikilanga ne ami mwine.”+ Le penepa kyonamwenine mu kwikala na tunangu tupitepite i kika? Ebiya nanena mu mutyima wami amba: “Ne kino kine i kya bitupu.”
16 Mwanda kekudipo kavulukilo ka myaka na myaka kudi wa tunangu nansha ke kudi kivila kwine.+ Mu mafuku akāya’ko, abo bonso bakebelwa. Le wa tunangu ukafwa namani? I pamo’nka na kivila.+
17 Ebiya nashikwa būmi,+ mwanda kintu kyonso kyadi kilongwa muno munshi mwa dyuba kyadi kimweka bu kinjingijanga mutyima, mwanda kintu kyonso kyadi kya bitupu,+ i kupanga luvula.+
18 Nashikwa byonso byonaingidile bininge muno munshi mwa dyuba,+ mwanda mfwaninwe kushila’byo muntu wa kunonda’ko.+
19 Le i ani uyukile shi ukekala wa tunangu nansha mulembakane?+ Ino aye ukendeja bintu byonso byonajimijije bukomo bukatampe ne tunangu pa kwikala nabyo muno munshi mwa dyuba. Kino nakyo i kya bitupu.
20 Penepo nashilula kutyumukwa mutyima pa mingilo yonso mikomo yonaputumīne’mo muno munshi mwa dyuba.
21 Mwanda muntu ubwanya kwingila bininge, uludikwa na tunangu ne buyuki ne bwino, ino ukapāna kipindi kyandi* kudi muntu kaingidile’kyopo.+ Kino nakyo i kya bitupu kadi i ngikadilo mikatampe ya bulanda.*
22 Le bine muntu umwenanga bika mu mwingilo wandi onso mukomo ne ku kwabila kumutonona* engile bininge muno munshi mwa dyuba?+
23 Mwanda mafuku andi onso, mingilo yandi imuletelanga masusu ne njia, kadi mutyima wandi keukōkolokwangapo ne bufuku bwine.+ Kino nakyo i kya bitupu.+
24 I kutupu kintu kipityile buya ku muntu kutabuka kudya ne kutoma ne kuloelelwa* mingilo yandi mikomo.+ Najingulwile amba, kino nakyo kitambanga ku kuboko kwa Leza wa bine,+
25 mwanda le i ani udya ne kutoma kumpita ami?+
26 Aye upanga muntu umusangaja tunangu ne buyuki ne nsangaji,+ ino upanga kipya-mambo mwingilo wa kukongakanya ne kubunga’tu bya kupa yewa usangaja Leza wa bine.+ Kino nakyo i kya bitupu, i kupanga luvula.
Kunshi kwa Dyani
^ Nansha’mba “kusepelela.”
^ Nansha’mba “kusepelela.”
^ Kishima pa kishima i, “bana ba njibo.”
^ Nansha’mba “lolo, bine, balolo.”
^ Nansha’mba “bintu.”
^ Nansha’mba “nsahabu.”
^ Kishima pa kishima i, “kyadi kilomba meso ami.”
^ Nansha’mba “kusepelela.”
^ Nansha’mba “kipindi kyami.”
^ Nansha’mba “kya kamweno.”
^ Nansha’mba “udi na meso andi mapūtuke.”
^ Nansha’mba “kyamalwa.”
^ Nansha’mba “ukapāna bintu byonso.”
^ Kishima pa kishima i, “ne kukimba kwa mutyima wandi.”
^ Nansha’mba “kumweja muya wandi biyampe na.”
