Nehemia 8:1-18
8 Penepo bantu bonso bebunga mwa kimo pa kīkwe kampalampala na Kibelo kya Mema,+ balombola Ezela+ mutentudi* asele mukanda wa Bijila bya Mosesa,+ byobasoñenye Isalela kudi Yehova.+
2 Ebiya kitobo Ezela waselela Bijila ku meso a kipwilo+ kya bana-balume, ne bana-bakaji, ne bonso badi babwanya kwivwanija senene, mu difuku dibajinji dya kweji wa busamba-bubidi.+
3 Watanga’o na diwi ditunduke+ ku meso a kīkwe kampalampala na Kibelo kya Mema, tamba pa kutamba kwa dyuba kutūla ne dyuba mu mitwe, watangila’o bana-balume, ne bana-bakaji ne bonso badi babwanya kwivwanija; kadi bantu nabo badi bateja na katentekeji+ mukanda wa Bijila.
4 Ezela mutentudi* wadi wimene pa lukala lwa mbao lobalongele mwanda wa kino kinkumenkume; ku mutamba wandi wa lundyo kwadi kwimene ba Matitia, Shēma, Anaya, Udia, Hilekia, ne Maaseya; kadi ku mutamba wandi wa lunkuso kwadi Pedaya, Mishaele, Malekiya,+ Hashuma, Hashe-Badana, Zekadia, ne Meshulama.
5 Ezela wapūtula mukanda ku meso a bantu bonso, mwanda wadi wimene peulu pa bantu bonso. Aye pa kupūtula’o, bantu bonso baimana.
6 Penepo Ezela watendela Yehova Leza wa bine, Mwine mukatampe, ponkapo bantu bonso balondolola’mba, “Amena!*+ Amena!” batulula ne makasa abo mūlu. Ebiya bafukata kebevukwila kudi Yehova mapala abo pa nshi.
7 Kadi Yeshua, Bani, Shelebia,+ Yamine, Akuba, Shebetai, Hodia, Maaseya, Kedita, Azadia, Yozabada,+ Hanana, ne Pelaya, bene Levi, badi bashintulwila bantu Bijila,+ koku bantu kashā bemana.
8 Kadi baendelela kutanga mukanda na diwi ditunduke, Bijila bya Leza wa bine, bashintulula’o biyampe ne kulombola buluji bwao; penepo bakwasha bantu bevwanije byadi bitangwa.*+
9 Nehemia, mbikavu* mu kine kitatyi’kya, ne Ezela+ kitobo kadi mutentudi,* ne bene Levi, bene badi bafundija bantu banena bantu bonso amba: “Dino i difuku dijila kudi Yehova Leza wetu.+ Kemwakidilai nansha kuyoyokota.” Mwanda bantu bonso badi badila pobaivwene binenwa bya mu Bijila.
10 Webanena’mba: “Endai mukadye bintu bilumbuluke* ne kutoma bitobala, kadi tumai byakudya+ kudi boba kebateakenyepo kintu; mwanda dino i difuku dijila kudi Mfumwetu, kemwakakwatwai bulanda, mwanda nsangaji ya Yehova i kifuko kyenu kikomejibwe.”*
11 Kadi bene Levi badi bobija bantu bonso amba: “Talalai! mwanda dino i difuku dijila, kemwakakwatwai bulanda.”
12 Penepo bantu bonso baenda kukadya ne kutoma ne kutuma byakudya ne kusangala bininge,+ mwanda baivwanije binenwa byobebalombwele.+
13 Difuku dya bubidi, mitwe ya mobo a bashandya bantu bonso, ne babitobo, ne bene Levi bajokoloka Ezela mutentudi* mwanda wa kujingulula senene binenwa bya mu Bijila.
14 Penepo batana mu Bijila byasoñenye Yehova kupityila kudi Mosesa mulembe amba bene Isalela bafwaninwe kushikata mu bitanda* kitatyi kya masobo mu kweji wa busamba-bubidi,+
15 ne amba bafwaninwe kwela lubila+ ne kusapula mu bibundi byabo byonso ne mu Yelusalema monso, amba: “Endai mu ntanda ya ngulu, mukasele bimuna ku impafu, mityi ya pine, mityi ya milete ne tunkindu, ne bimuna bya mityi mikwabo mwanda wa kushimika bitanda, mungya bilembelwe.”
16 Penepo bantu baenda, bakebisela mwanda wa kwishimikila bitanda, ense pa musaka wandi, ne mu bipango byabo, ne mu bipango bya njibo ya Leza wa bine,+ ne mu kīkwe kya Kibelo kya Mema,+ ne mu kīkwe kya Kibelo kya Efelaimi.+
17 Enka nenki boba bonso ba mu kipwilo kya Isalela bajokele ku bu misungi bashimika bitanda, kebashikete mu bitanda, mwanda bene Isalela badi kebasobele ano masobo uno muswelo tamba mu mafuku a Yoshua+ mwanā Nuna kutūla ne mu dyodya difuku, ebiya kwaikala nsangaji mikatampe.+
18 Kadi difuku ne difuku kwadi kutangwa mukanda wa Bijila wa Leza wa bine,+ tamba difuku dibajinji kutūla ne ku difuku dya mfulo. Basobele masobo mafuku asamba-abidi, kadi kwadi kitango kikola mu difuku dya mwānda, monka mokyadi kitungilwe.+
Kunshi kwa Dyani
^ Nansha’mba “musonekeji.”
^ Nansha’mba “musonekeji.”
^ Nansha’mba “Mo monka!”
^ Nansha’mba “bebevwanija butangi.”
^ Nansha’mba “musonekeji.”
^ Nansha’mba “Tidishata,” kitenta kya mbikavu wa ntanda ya bubikavu ku bene Peleshia.
^ Kishima pa kishima i, “bintu bya māni.”
^ Nansha’mba “bukomo.”
^ Nansha’mba “musonekeji.”
^ Nansha’mba “mwa kufyama kyaba kityetye.”
