Musapu wa Bulopwe No. 37

Musapu Usapulwa Ntanda Yonso

Mfulo ya Bipwilo bya Bubela Ibafwena!

▪ Lelo bipwilo bya bubela i bipwilo’ka?

▪ Lelo bikafula namani?

▪ Le nobe bikakupityila namani?

 Lelo bipwilo bya bubela i bipwilo’ka?

Lelo wivwananga mutyima kusansa pa kumona bupolapola bulongwa mu dijina dya kipwilo? Lelo mavita, butumbula, ne kutyiba milomo bilongwa na boba betela bu bene Leza bifityijanga mutyima obe uswele boloke? Mwanda waka bipwilo bimweka bu byo bileta makambakano mavule kutabuka?

Shabyo ke bipwilo byonsopo bitopekwa, ino i enka bipwilo bya bubela kete. Yesu Kidishitu, mutōtyi wa Leza mulēmekibwe pi na pi, wālombwele amba bipwilo bya bubela biloñanga bilongwa bibi, pamo’nka bwa mupelanga ‘mutyi mukobabakane bipa bikobakane.’ (Mateo 7:15-17) Lelo bipwilo bya bubela bipanga bipa’ka?

Bipwilo bya Bubela . . .

◼ BIKUJANGA MU MAVITA NE MU POLITIKE: Julunale umo (Asiaweek) unena’mba: “Mu Azia ne kukwabo, bendeji ba bipwilo bafwila bitenta basonshilanga na bunwa mutyima wa bwine Leza wa bantu mwanda wa kamweno ka abo bene.” Pa kino, uno julunale udyumuna’mba: “Pano ntanda yendanga yonekelelela.” Mwendeji umo wa kipwilo mutumbe wa mu États-Unis wanene amba: “Mubasake kwipaya batumbula mwanda wa kupwija butapani, i biyampe.” Kupwa waleta wandi mulangwe amba: “Nankyo mwibakubijei bonso mu dijina dya Mfumwetu.” Inoko Bible unena’mba: “Shi muntu unena’mba: Nswele Leza; ne kushikwa mwanabo, nankyo i wabubela.” (1 Yoano 4:20) Kadi Yesu wānenene ne kunena’mba: “Sanswai bakwimushikwa.” (Mateo 5:44) Ulanga i bipwilo binga bidi na bantu bekujanga mu mavita?

◼ BIFUNDIJANGA MFUNDIJO YA BUBELA: Bipwilo bivule bifundijanga’mba muya nansha mushipiditu i kipindi kyakubulwa kumweka kishalanga kyūmi shi umbidi wa muntu ubafu. Bipwilo bifundijanga luno lufundijo mwanda wa kupetela bakwabo pa mitwe, o mwanda bebalombanga lupeto amba i lwa kulombelela nalo myuya ya bafwile. Inoko Bible ufundijanga bufundiji bwishile na buno, amba: “Mūya uloñanga bubi, kufwa ukafwanga.” (Ezekyele 18:4) Ne kadi amba: “Bōmi bayukile’mba bakafwa; nanshi bafwe kebayukilepo nansha kimo kine.” (Musapudi 9:5) Yesu wāfundije amba bafu bakasangulwa. Kunena na bubine, shi byadi amba bantu badi na muya keufu, longa ne lusangukilo lwine keludipo na mvubu. (Yoano 11:11-25) Lelo kipwilo kyenu nakyo kifundijanga amba muya keufwangapo?

◼ BITALANGA BUSEKESE KILOMO-NYEKA: Mu matanda amo, bitango bya bipwilo bipanga bantu besonga bana-balume na bana-balume ne bana-bakaji na bana-bakaji bitenta mu kipwilo ne kunena Leta etabije masongi abo. Nansha ke bipwilo bine bipelejanga busekese nabyo bitalanga kilomo-nyeka bendeji babo ba kipwilo bona twana tutyetye na buenda. Ino le Bible unena’po namani? Unena patōkelela’mba: “Kemukiidimbai. Mwanda babusekese, nansha batota bankishi, nansha bamakoji, nansha bana-balume ne bana-balume beloñanga bya bumvu, . . . kebakekalapo mu Bulopwe bwa Leza nansha dimo.” (1 Kodinda 6:9, 10, Myanda Miyampe ku bonso) Lelo uyukile’ko bipwilo bimo bitalanga busekese kilomo-nyeka?

 I kika kikafikila bipwilo bilupula bipa bibole? Yesu wādyumwine amba: “Mityi yonso yampikwa kupa bipa biyampe īkatemibwa panshi, yaelwa umudilo.” (Mateo 7:19) Bine, bipwilo bya bubela bikatemibwa panshi ne konakanibwa! Ino le bikonakanibwa namani ne kitatyi’ka? Kilondololwa kitanwa mu kimonwa kya bupolofeto kidi mu Bible mu mukanda wa Kusokwelwa shapita wa 17 ne wa 18.

Bipwilo bya bubela bikafula namani??

Langa’po bidi. Wabwitwa ushikete pa muongo wa kinyema kilenga moyo. Kine kinyema’kyo kidi na mitwe isamba-ibidi ne masengo dikumi. (Kusokwelwa 17:1-4) Lelo uno wabwitwa welekeja ani? Udi na lupusa pa “balopwe ba panopanshi.” Uvwele bityilakana, wishingile binunka biya, kadi i mpeta wa ntanda ne miseke. Ne kadi, ‘mizo yonsololo yongolwanga’ na bya majende byandi. (Kusokwelwa 17:18; 18:12, 13, 23) Bible witukwasha tujingulule amba uno wabwitwa i bipwilo bya bubela bidi pano pa ntanda ponso. Welekeja bipwilo byonso bilupula bipa bibole, ke kipwilo kimopo, mhm.

Kino kinyema patentamine wabwitwa kyelekeja malopwe a ino ntanda. * (Kusokwelwa 17:10-13) Bipwilo bya bubela nabyo bitentamine pa muongo wa kino kinyema kya politike, bitompa kuleta lupusa mu butyibi bwa kino kinyema ne kwikiludika.

Ino panopano ponka, kudi kinkumenkume kitulumukwa kisa kufika. “Masengo dikumi o wamwene’a, ne kinyema’kya, bano bo bakamushikwa wabwitwa ne kumusala ne kumuvula, kadi bakamudya mwita wandi, ne kumusokelela fututu mu mudilo.” (Kusokwelwa 17:16) Bine, malopwe a ino ntanda asa kufulamukila bipwilo bya bubela na mu kitulumukila ne kwibyonakanya fututu, bisansa mutyima! Le i ani ukalengeja buno bonakani? Kisonekwa kya Kusokwelwa kilondolola’mba: “Leza webatunwine kumityima kwabo kulongela monka muswidile mutyima wandi.” (Kusokwelwa 17:17) Bine, Leza ukatyibila bipwilo bya bubela mambo pa mwanda wa bilongwa bya munyanji byobilonga mu dijina dyandi. Leza ukalonda boloke bwandi bubwaninine na kwingidija enka bano bapwani nandi ba politike bu ba konakanya uno wabwitwa.

I kika kyofwaninwe kulonga shi nobe kusakilepo konakanibwa pamo na bipwilo bya bubela? Mukendi wa Leza witudyumuna’mba: “Banwe bantu bami, mulupukeimo.” (Kusokwelwa 18:4) Bine, kino kyo kitatyi kya kunyema mu bipwilo bya mabela! Ino i kwepi kokokeja kunyemena? Kokanyemena ku boba banena’mba Leza i kutupu’ye, mwanda nabo basa konakanibwa. (1 Tesalonika 1:6-9) Ino kwa kunyemena kumo kete i ku kipwilo kya bine. I muswelo’ka okokeja kuyuka kipwilo kya bine?

 Mwa kuyukila kipwilo kya bine

Kipwilo kya bine kifwaninwe kupa bipa’ka bilumbuluke?—Mateo 7:17.

Kipwilo kya Bine . . .

◼ KIKALANGA NA BUSWE: Batōtyi ba bine “kebadipo bwa bapano-pantanda,” mwanda kebesañunangapo mungya nkoba nansha tubila, ino i ‘besanswe abo bene na bene.’ (Yoano 13:35; 17:16; Bilongwa 10:34, 35) Kebetapangapo abo bene na bene, ino betabijanga kufwa pa mwanda wa bakwabo.—1 Yoano 3:16.

◼ KIKULUPILANGA MU KINENWA KYA LEZA: Kipwilo kya bine kekifundijangapo “bisela” ne “bijila bya bantu,” ino kifundijanga myanda idi mu Bible, Kinenwa kya Leza. (Mateo 15:6-9) Mwanda waka? Mwanda “Bisonekwa byonsololo bisonekeja Leza shi bika, shi bika, byo bimwenwamo pa kufundija, ne kukwasha, ne kudingila madingi, ne kulombola ñeni ya umboloke.”—2 Temote 3:16.

◼ KININGIJANGA BISAKA NE KULONDA MISOÑANYA YA PEULU YA MU MWIKADILO: Kipwilo kya bine kifundijanga balume “kusanswa bakaji babo abo bene pamo bwa ngitu ya abo bene,” kikwasha bakaji ‘balēmeke babo balume,’ kadi kifundijanga bana ‘bakōkele bakwibabutula.’ (Efisesa 5:28,33; 6:1) Kutentekela’po, boba bapelwe biselwa bafwaninwe kwikala bimfwa mu mwikadilo.—1 Temote 3:1-10.

Lelo kudi kipwilo kibwenye ino misoñanya? Dibuku Mapolitike a Mukubo (dya Angele), dyalupwilwe mu 2001, dinena’mba: “Shi bavule badi balonda mu būmi bwabo byobya bifundija Batumoni ba Yehova ne byobalonga, longa i kutupu mukubo wa bantu, kadi longa butapani bwa kipukwi kebukimweshangapo ntanda malwa.”

Na bubine, Batumoni ba Yehova mu matanda 235 kebafundijangapo’tu bitupu misoñanya ya mu mwikadilo idi mu Bible—ino beilondanga ne mu būmi bwabo. Tubakukankamika kwita Batumoni ba Yehova bāye bakukwashe wifunde kyokya kisaka Leza kodi umone mwa kumutōtela mwasakila. Kino kyo kitatyi kya kwibeta. Kokija. Mwanda mfulo ya bipwilo bya bubela ibafwena pabwipi!—Zefenia 2:2, 3.

Shi usaka kuyukila’ko myanda mikwabo itala pa musapu wa mu Bible usapulwa na Batumoni ba Yehova, kokekaka kwibatumina mukanda ku adelese idi kunshi’ku.

□ Nomba muntumine’ko ku buntu boloshile Endelelai na Kukesha!

□ Nsaka munfikile twifunde nenu Bible ku bitupu.

[Kunshi kwa dyani]

[Bushintuludi pa paje 3]

Bipwilo bya bubela bidi na lupusa pa “balopwe ba panopanshi”

[Bushintuludi pa paje 3]

“Banwe bantu bami, mulupukeimo”