“Ense utala mwana-mukaji sō enka ne byamwivwanina kilokoloko wapu kala kulonga nandi makoji mu mutyima wandi.”—Mateo 5:28.

MWANDA WAKA I KYA MVUBU

Dyalelo porno italwanga na bavule bininge kadi ipēla kusokola kupita mobyādi bikadīle kala. Shi usaka kusangaja Leza, ne kwikala na būmi bwa nsangaji, ufwaninwe kuyuka mwiivwaninanga Leza pa bitala porno.

BINENA BIBLE

Kishima porno kekitelelwepo mu Bible katōkelela. Inoko, kutala porno kwilwanga patōkelela na misoñanya mivule ya mu Bible.

Kimfwa bidi, Bible udyumuna mwana-mulume musonge “utala mwana-mukaji [ungi] sō” ne kutamija kilokoloko kya busekese kya kulāla nandi amba kino kibwanya kumutwala ku kulonga makoji. Musoñanya udi mu kino kisonekwa kya mu Bible utala muntu e-ense, musonge nansha nkunga, “utala . . . sō” porno na mutyima wa kusaka kulonga busekese. Kino kilongwa kifītyijanga ne pa mfulo mutyima wa Leza.

“Nanshi, ipayai bipindi bya ku ngitu yenu . . . mu myanda ya busekese, disubi, bilokoloko bya busekese bya munyanji, kusakasaka kubi, ne makomwa-meso.”—Bene Kolose 3:5.

BINENA BANTU

Bakimbi bamo batatananga mulangwe wa amba porno ibwanya kutwala muntu ku kulonga bilongwa bibi bya busekese. Ino le, porno i enka mibi nansha shi keitwelepo muntu ku kulonga busekese?

BINENA BIBLE

Bible utela “mizaulo ya kiboja” bu keitabijibwepo. (Bene Efisesa 5:3, 4) Le porno ke pepi? Dyalelo, mu porno divule dine mubadilwa kutala bifwatulo bikwatwe bya bantu balonga patōkelela makoji, balāla na bantu ba ngitu imo ne busekese bwa miswelo mikwabo. Na bubine kusangela kutala bino bilongwa bya busekese i kulubila bininge Leza, kupita’ko kunena binenwa bya kiboja.

Bakimbi bakyendelelanga kwipatenya pa muntu utala porno shi ubwanya kulonga mungya byatala. Inoko Bible ukwatakanya patōkelela mulangwe wa amba, porno ibwanya kona kipwano kya muntu na Leza, kadi i bubi bukatampe ku meso a Leza. Bible udyumuna amba: “Nanshi, ipayai bipindi bya ku ngitu yenu . . . mu myanda ya busekese [ne] bilokoloko bya busekese bya munyanji.” (Bene Kolose 3:5) Bantu batala porno baloñanga bintu bishile na bino—pa kyaba kya kwipaya bino bilokoloko, abo bebitamijanga ne kwibisonshila.

“Kimbai kiyampe, ke kibipo, aa . . . Shikwai kibi, sanswai kiyampe.”—Amose 5:14, 15.

BINENA BIBLE

Bible wisambila pa bantu bādi bamunwe na busekese, bunkolwankolwa ne bwivi, ino bābwenye kuleka bilongwa byabo bibi. (1 Bene Kodinda 6:9-11) Namani? Na kwingidija tunangu tutanwa mu Kinenwa kya Leza, befundile kushikwa bibi.

Muntu ubwanya kushikwa porno shi alangulukile bininge pa bipa bibi bilupukanga’ko. Mungya bwifundi bwa panopano bwalupwilwe na Iniveleshite ya Utah bulombola amba, bantu bamo batalanga porno batanwanga na “kutyumukwa mutyima, kwitolwela, kadi bipwano byabo byonekanga,” ne kadi batanwanga ne na bipa bibi bikwabo. Ne kibi mpata kutabukidila, enka na motwanenenanga dibajinji, kutala porno i kulubila Leza, kintu kibi bininge kutabuka’tu kwisanshija. Porno itolwelanga bantu kulampe na Umpangi wabo.

Bible ubwanya kwitukwasha twifunde kusanswa biyampe. Shi twendelele kutanga Bible, buswe botusenswe misoñanya yandi ya mu mwikadilo bukenda butamina’ko. Buno buswe buketukwasha tusumininwe kuleka kutala porno ne kwiivwana na mwēivwanine kaimba wa mitōto wālembele amba: “Nkikatūlapo kintu kya bituputupu ku meso ami.”—Ñimbo ya Mitōto 101:3.