Bible unena mu Ngalwilo shapita 22, amba Leza wānenene Abalahama ende kuntu kulampe na kwandi kukalambula kitapwa. Bible amba: “Abalahama wayata nkuni ya kyakwela kisōkwe kamutwika Isake mwana wandi; aye wasela mudilo ku kuboko ne lupete lwine, ke benda pamo.”—Ngalwilo 22:6.

Bible kalombwelepo muswelo wādi ubanza bantu mudilo pa kala. Lelo ba Abalahama ne Izake bālamine lubimbi lwa mudilo kubula mpika pobādi benda mwishinda? Mushintuludi umo wa Bible unena’mba padi byādi bikomo “kulama lubimbi mu lwendo lulampe.” Ino, Abalahama ne wandi mwana ye bano bāselele kintu kyonso kyobasakilwa pa kubanza mudilo.

Inoko, bakwabo banena’mba kebyādipo bipēla kwakija mudilo mu kitatyi kya kala. Pobikokejika, bantu bādi babanza mudilo na kusela makala a mudilo mubanze kala, kimfwa na kukeopola ku balondakani. Befundi bavule balanga’mba Abalahama wāopwele makala a mudilo kumeso kwa kutaluka. Wādi ubwanya kwiusela mu kintu, kimfwa kiboyo kikutyile ku monji, ne kusela kintu’kya pobenda mwishinda. (Isaya 30:14) Nanshi, ye bano bādi basela makala a mudilo ne nyala mwa kubanzila’o ponso pobasaka.