Panopano ponka Bulopwe bwa Leza butengēlwe kitatyi kilampe—umbikalo wa ntanda yonso ushimikilwe na Leza—busa kuleta ndoe ne bumo pano pa ntanda ponso. “Ndoe ikavula,” monka mulaile’kyo Ñimbo ya Mitōto 72:7. Ino le Bulopwe bwa Leza bukashilula kuludika kitatyi’ka? Le bukashilula kuludika namani? Ne ukamwena namani mu buludiki bwabo?

Bible i mulaye binkumenkume bikatampe bivule bilombola’mba Bulopwe bwa Leza kebusa kwiya panopano ponka. Bino binkumenkume byonso i “kiyukeno,” mwine mubadilwa mavita a mu matanda onso, bipupo bya nzala, misongo, kutenkana kuvule kwa ntanda, ne kujilula kwa bijila.—Mateo 24:3, 7, 12; Luka 21:11; Kusokwelwa 6:2-8.

Bupolofeto bukwabo bunena’mba: “Mu mafuku a mfulo kukekalanga bitatyi bya makambakano bikomo ne mwa kulongela. Mwanda bantu bakekala ba kwisanswa abo bene, ba kusanswa lupeto, . . . bampikwa kukōkela bambutwile, bampikwa kufwija’ko, ba kubulwa lulamato, bampikwa kisanso kya bumuntu, bapela kumvwañana ko-konso, bavubavuba, ba kubulwa kwīfula, ba bukalabale bwa malwa, bampikwa kusanswa buyampe, . . . bayule mitatulo, basenswe kwisangaja kupita’ko kusanswa Leza.” (2 Temote 3:1-4) Ngikadila pamo bwa ino yadi imweka mu bantu bamobamo mafuku kunyuma. Ino pano kemisambakane konso.

Buno bupolofeto bwashilwile kufikidila mu 1914. Na bubine, balembi ba mānga, baludiki, ne basoneki, besambīle pa muswelo washintyile ntanda pa kupwa kwa uno mwaka. Kimfwa, Peter Munch, mulembi wa mānga mwine Danemarke walembele amba: “Divita dyashilwile mu 1914 dyashintyile bintu bininge mu mānga ya muzo wa muntu. Kutamba mu kitatyi kisangaja kya kwendelela, . . . twatwela mu myaka ya bimpengele, nzuba, mushikwa, ne kubulwa mutyima-ntenke konsokonso.”

Shi tunene biyampe, bino binkumenkume bidi pamo bwa kupukuma kwa kimpumpu kupwa kwatalala nyā. Bilombola’mba Bulopwe busa kuludika ntanda yonso, bubafwena pabwipi. Bine, Yesu wātelele ne kino kintu kiyampe mu kiyukeno kya kuyukila’po mfulo amba: “Ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya.”—Mateo 24:14.

Ino myanda miyampe ye mutwe wa mwanda mwine wa musapu usapula Batumoni ba Yehova. O mwanda, dipepala dyabo dinedine didi na mutwe wa mwanda unena’mba, Kiteba kya Mulami Kisapula Bulopwe bwa Yehova. Kīsambilanga kitatyi ne kitatyi pa bintu bya kutendelwa byobasa kulongela bantu ne ntanda kupityila ku Bulopwe bwa Leza.

Malondololo adi mu ino myanda iná ya mvubu:

1. Bulopwe bwa Leza kebukaludikwapo nansha kutangidilwa na bendeji ba kipolitike ba ino ntanda.

2. Bendeji ba kipolitike ba ino ntanda pa kufwila kulamata ku lupusa lwabo, bakakimba kulwa bya bulubi na Bulopwe bwa Leza. —Ñimbo ya Mitōto 2:2-9.

3. Bulopwe bwa Leza bukonakanya malopwe a kipolitike asaka kwendelela na kubikala bantu. (Danyele 2:44; Kusokwelwa 19:17-21) Dino divita dya mfulo dya ntanda yonso ditwanga bu Amakedona.—Kusokwelwa 16:14, 16.

4. Bonso bakōkele ku Bulopwe bwa Leza bakapanda pa Amakedona ne kutwela mu ntanda impya ya ndoe. Bakabunda kyokya kitela Bible bu “kibumbo kikatampe” kya midiyo ne midiyo ya bantu.—Kusokwelwa 7:9, 10, 13, 14.

Kintu kibajinji kya kulonga pa kwikala mubikalwa wa Bulopwe bwa Leza i kufundijibwa. Bine, Yesu wālombele kudi Leza amba: “Buno’bu bo būmi bwa nyeke, bendelele kukuyuka abe, Leza umo kete wa bine, ne yewa owatumine, Yesu Kidishitu.”—Yoano 17:3.

Shi bantu abayuka’mba Yehova Leza i Muntu udi’ko binebine, bamwenanga’mo mu miswelo mivule. Tubandaulei’ko bidi ibidi: Mubajinji, bekalanga na lwitabijo lukomo mwadi. Kadi luno lwitabijo lwimanine pa bukamoni, lwibakulupijanga’mba Bulopwe bwa Leza budi’ko binebine ne amba kebusa kuludika. (Bahebelu 11:1) Wa bubidi, buswe bobaswele Leza ne bakwabo buvulanga. Buswe bobaswele Leza bwibatononanga bamukōkele na mutyima tō. Buswe bobaswele bakwabo bwibatononanga bengidije binenwa bya Yesu bitwa bu Kijila Kitabukile Kunengela. Akyo kine kinena’mba: “Monka momusakila bantu bemulongele, mwibalongelei muswelo umo onka.”—Luka 6:31.

Pamo bwa shabana wa buswe, Mupangi wetu witusakilanga biyampe. Witusakilanga twikale na būmi butela Bible bu “būmi bwinebwine.” (1 Temote 6:19) Dyalelo būmi ke ‘būmipo bwinebwine.’ Mwanda būmi bwa midiyo ne midiyo ya bantu i bukomo bininge kadi bekondanga mwa kwikadila. Pa kukutompeja mukekadila “būmi bwinebwine,” langulukila pa bintu bityetye bya kutendelwa byobakalongela bantu kudi Bulopwe bwa Leza.