Monka mokilombwedilwe mu kishinte kibadikile, būmi bwa Yesu bwādi bwimanine pa kusapula “ne kunena myanda miyampe ya Bulopwe bwa Leza.” (Luka 8:1) Wāputumīne mu mingilo, wenda makilometele tutwa na tutwa mu ntanda ya Isalela yonso mwanda wa kufundija bantu myanda ya Bulopwe bwa Leza. Mwingilo wa Yesu wāsonekelwe mu Maevanjile aná, mwine mwatelele Bulopwe misunsa 100 ne kupita. Ino misunsa yonso itanwa mu binenwa bya Yesu, kadi ilombola’tu kipindi kya binenwa byonso byaānene pa mwanda utala Bulopwe bwa Leza!—Yoano 21:25.

Mwanda waka Bulopwe bwādi bushintulula bivule kudi Yesu paādi pano pa ntanda? Kintu kimo bidi, Yesu wādi uyukile’mba Leza wāmutongele kwikala bu Mulopwe wabo. (Isaya 9:6; Luka 22:28-30) Inoko Yesu kādipo wimanine pa kukimba lupusa ne ntumbo ya aye mwine. (Mateo 11:29; Mako 10:17, 18) Kāendelejepo Bulopwe kumeso mwanda wa tumweno twandi. Dibajinji, Yesu wadi usangedile Bulopwe bwa Leza kadi wibusangedile * pa mwanda wa byobukalongela bantu basenswe—Shandi wa mūlu ne balondi bandi ba kikōkeji.

Yesu usenswe Shandi wa mūlu bininge. (Nkindi 8:30; Yoano 14:31) Usangelanga ngikadilo ya Shandi ikunka mutyima, kimfwa buswe Bwandi, lusa Lwandi, ne boloke Bwandi. (Kupituluka 32:4; Isaya 49:15; 1 Yoano 4:8) Na bubine, Yesu ushikilwe kwivwana bubela bubepelwa Shandi—bubela bwa amba Leza katelepo mutyima ku masusu a muntu ne bwa amba Leza usakanga tususuke. Buno i bubinga bumo bwādi busapwila Yesu “myanda miyampe ya Bulopwe”—wādi uyukile amba kyaba kimo Bulopwe bukalombola patōka ntumbo ya Shandi. (Mateo 4:23; 6:9, 10) Lelo bukalonga kino namani?

Yehova ukalonga kintu kiyampe pa mwanda wa kisaka kya muntu kupityila ku Bulopwe. “Ukapampulanga impolo yonso” mu meso a bantu ba kikōkeji. Yehova ukatalula’ko bintu bilengeja ino impolo, na kwitukulupija’mba, “lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.” (Kusokwelwa 21:3, 4) Leza ukatalula’ko masusu onso asusuka bantu kupityila ku Bulopwe. *

 Ke kya kutulumukapo shi Yesu wādi utele mutyima ku kusapwila bantu myanda ya Bulopwe! Wādi uyukile amba bukasokola muswelo wikele Shandi na bukomo ne lusa. (Yakoba 5:11) Kadi Yesu wādi uyukile amba bantu bakwabo basenswe bakamwena mu Bulopwe—ke bantu ba kikōkeji kadi.

Kitatyi kilampe kumeso kwa Yesu kwiya pano pa ntanda, wādi na Shandi momwa mūlu. Shandi wāingidije Mwana mwanda wa kupanga bintu byonso—madiulu atulumukwa pamo ne ñenyenye keibadika ne bisansa bya ñenyenye bidi mu umbuo wetu muyampe, ne banyema ba ntanda badi’po. (Kolose 1:15, 16) Ino kutentekela pa bino byonso, Yesu wāikele “kuloelelwa” muzo wa muntu.—Nkindi 8:31.

Mwingilo wa Yesu wādi wimanine pa buswe bwa kuswa bantu. Ku ngalwilo ngalwilō, wālombwele patōka’mba wāile pano pa ntanda mwanda wa ‘kusapula myanda miyampe’ ku bantu basakilwa’yo. (Luka 4:18) Inoko, Yesu wālongele bivule kupita’ko’tu kwisambila pa kukwasha bantu. Wālombwele kitatyi ne kitatyi buswe bwaādi uswele bantu. Kimfwa, kitatyi kyēbungile kibumbo kikatampe mwanda wa kumwivwana, Yesu “webakwatyilwa lusa, kabelula badi babela umbukata mwabo.” (Mateo 14:14) Kitatyi kyālombwele muntu wādi na misongo isansa lwitabijo amba Yesu ubwanya kumundapa shi uswile binebine, Yesu wātonwenwe na buswe. Wāundapile uno muntu, ne kumulombola na lusa amba: “Nsakile. Tōka tō.” (Luka 5:12, 13) Yesu paāmwene Madia mulunda nandi udila lufu lwa mwanabo Lazalasa, Yesu “wabinza munda mwandi,” “ñeni yamuvutakana,” kadi “wasūmija impolo.” (Yoano 11:32-36) Ebiya wālonga kintu kutulumukwa—Yesu wāsangula Lazalasa nansha byaāfwile ke padi ne mafuku aná!—Yoano 11:38-44.

Na bubine, Yesu wādi uyukile’mba buno bukwashi bwādi bwa mu kitatyi kityetye’tu. Wājingulwile’mba kitatyi kityetye pa kupita’po nansha mwenda mafuku, bonso baābelwile bakabela monka ne amba bonso baāsangwile bakafwa monka. Inoko, Yesu wādi kadi uyukile’mba Bulopwe bwa Leza bukapwa ano makambakano lonso. O mwanda Yesu kālongelepo’nka bingelengele, ino kadi wāsapwile na bupyasakane “myanda miyampe ya Bulopwe.” (Mateo 9:35) Bingelengele byaālongele byālombwele bityetye’tu bintu bisa kulonga Bulopwe pa ntanda yonso panopano ponka. Langulukila pa bino bintu bilaile Bible pa kine kitatyi’kya.

•  Misongo keikekala’kopo dikwabo.

  “Penepa kadi meso a bampofu akapūtulwa, ne matwi a babitwi akajikulwa. Ponkapo usunkuta ukatumbuka’nka bwa kasha kalume, ne ludimi lwa kamama lukembanga.” Kadi “mwikadi kakanenapo’mba: Nabela.”—Isaya 33:24; 35:5, 6.

• Lufu kelukekala’kopo dikwabo.

  “Boloke bakapyananga ntanda, ne kwikala monka nyeke.”—Ñimbo 37:29.

  “Wapu kumininina lufu nyeke ne nyeke; ino Mfumwetu Leza ukapampula mipolo ku mapala onso.”—Isaya 25:8.

• Boba bafwile bakasangulwa.

  “Bonso badi mu bibundu bakevwana diwi dyandi ne kutamba bakatamba’mo.” —Yoano 5:28, 29.

  “Kukekalanga lusangukilo.” —Bilongwa 24:15.

• Kutupu muntu ukabulwa njibo nansha kaji.

  “Bakōbaka mobo ne kwikala monka; kadi bakadima madimi a mañanza ne kudya bipa byayo. Kebakōbakapo amba ungi ekalemo, ehe; kadi kebakadimapo amba ungi adyeko, ehe; . . . batongwe bami bakalēpejeja biyampe mingilo ya makasa abo.”—Isaya 65:21, 22.

•  Divita kedikekala’kopo dikwabo.

  “Watukija mavita ne ku mfulo ya ntanda.”—Ñimbo 46:9.

  “Muzo keukatalulapo kipete pa muzo mukwabo, nansha kwilombolapo bulwi monka, ehe.”—Isaya 2:4.

• Kusakana kwa bidibwa kutupu’ko.

  “Ntanda ībapana bivule byayo; Leza, ke Leza wetu, bātwe bene kadi, uketweselanga dyese.”—Ñimbo 67:6.

  “Kukēkalanga bungibungi bwa mebele panopantanda peulu pa ngulu.”—Ñimbo 72:16.

• Bulanda kebukekala’kopo dikwabo.

  “Bafudilwe kebakavulaminibwapo.” —Ñimbo 9:18.

  “Aye ukanyongolola mupando pa kwita; ne balanda ba kubulwa wakwibakwasha. Ukebafwila lusa balanda ne badi makasa, kadi ne myuya ya badi makasa ukeīpandijanga.”—Ñimbo 72:12, 13.

Kitatyi kyolangulukila pa ino milao itala pa Bulopwe bwa Leza, ubulwe’po kumona mwanda waka Bulopwe bushintulula bivule kudi Yesu? Paādi pano pa ntanda, wādi utele mutyima ku kwisambila pa Bulopwe na muntu ye-yense umwivwana, mwanda wādi uyukile amba Bulopwe bukafudija makambakano onso otumona dyalelo.

Lelo milao ya mu Bible itala pa Bulopwe ibakusangaja? Shi i amo, le i muswelo’ka obwanya kwifunda bivule pa buno Bulopwe? Ne i bika byobwanya kulonga pa kuyuka shi ukamwena mu madyese akaleta buno Bulopwe? Kishinte kya mfulo mu bino bishinte kikaleta malondololo a bino bipangujo.