Malu mabi neajike

NZAMBI mmutupeshe Dîyi diende didi diumvuija bua tshinyi bantu badi benza malu mabi. Mmutupeshe kabidi budikadidi bua kudisunguila malu ne bukokeshi bua kudikanda, bidi bituambuluisha bua kusungula bua kubenga kuenza malu mabi. (Dutelonome 30:15, 16, 19) Bintu ebi bidi mua kutuambuluisha bua kumanya meji mabi onso atudi mua kuikala nawu ne kudienzeja bua kualekela. Bu mutudi tudienzeja bua kubenga kuenza malu mabi, netupeta masanka ne bantu badi batunyunguluke nebasanke pabu.​—Musambu 1:1.

Nansha mutudi tuditatshisha bua kubenga kuenza malu mabi, buloba budi anu buenda bunyanguka ne malu mabi adi bantu  benza. Bible udi utudimuija ne: ‘Umanye bualu ebu ne: palua matuku a kunshikidilu, malu makole nealue.’ Bua kuleja tshidi tshikebesha malu makole, Bible udi utungunuka wamba ne: ‘Bantu nebikale badisui, banangi ba biuma, baditumbishi, badileji, bapendi ba Nzambi, kabayi batumikila mêyi a baledi babu, kabayi ne kusakidila, kabayi ne tshijila, kabayi banangi ba bana babu, bashipi ba bipungidi, bena bunsonge, kabayi mua kudikanda, bena luonji, kabayi basue malu mimpe, nebikale batungidianganyi, bena lukuluku, buujibue ne diambu, banangi ba masanka, kabayi banangi ba Nzambi; nebikale ne tshimuenekelu tshia buimpe bua Nzambi, kadi bamane kudiula bukole buabu; umuke biebe kudi bantu aba kabidi.’​—2 Timote 3:1-5.

Mu mulayi eu, tshiambilu tshia: “matuku a ku nshikidilu” tshidi mua kuikala tshikoke ntema yebe. Tshidi tshiumvuija tshinyi buebe wewe? Bua bantu ba bungi “matuku a ku nshikidilu” adi umvuija ne: bualu kampanda bukadi pa kutua ku ndekelu. Mbualu kayi abu? Tangila tshidi Nzambi mulaye mu Dîyi diende.

Bantu babi nebabutudibue bua kashidi.

‘Tshitupa tshipi katshiyi tshianji kulepa, muntu mubi kena wikalaku kabidi; e, neukebe kumona muaba wende ne disuminyina, kena wikalaku. Kadi badi ne mitshima mipuekele nebapiane buloba, mioyo yabu neyisanke mu ditalala dikumbane.’​—MUSAMBU 37:10, 11.

“Yehowa udi ulama bonso badi bamunanga, kadi neabutule bantu babi bonso.”​—MUSAMBU 145:20.

Bantu kabakuikala bakengeshangana kabidi.

‘Bualu bua neapandishe mukengedi wa bintu padilaye kudiye, neapandishe muntu mupele udi kayi ne mukuatshishi. Neapikule mioyo yabu ku tshinyangu ne malu makole.’​—MUSAMBU 72:12, 14.

‘Bifukibua mene nebipikudibue kabidi ku bupika bua dibola diabi, nebibuejibue mu budishikaminyi bua butumbi bua bana ba Nzambi.’​—LOMO 8:21.

Bantu nebapete bintu bidibu nabi dijinga.

‘Kadi nebashikame, muntu ne muntu, muinshi mua muonji wende wa tumuma tua mvinyo ne muinshi mua mutshi wende wa mfigi; kakuena muntu wabakuatshisha buôwa.’​—MIKA 4:4.

‘Nebase nzubu, nebashikamamu; nebatentule mionji ya tumuma tua mvinyo mu madimi, nebadie tumuma tuayi. Kabena basa nzubu bua mukuabu abuelamu; kabena bakuna bintu bua mukuabu abidie; bualu bua bu mudi matuku a muoyo wa mutshi mbu mudi matuku a bantu banyi, ne bantu bangakusungula nebasanke musangu mule mu mudimu wa bianza biabu.’​—YESHAYA 65:21, 22.

Buakane nebuikalaku.

‘Nzambi mene kena usombuela bakusungulaye, batu badila kudiye butuku ne munya anyi? Ndi nnuambila ne: Neabasombuela lubilu.’​—LUKA 18:7, 8.

‘Yehowa udi unanga kulumbulula kuakane, kena ulekela bansantu bende. Bantu bakane nebalamibue tshiendelele.’​—MUSAMBU 37:28.

Buakane nebupingane pa muaba wa budinangi.

‘Badi bashikame pa buloba badi bayila buakane.’​—YESHAYA 26:9.

‘Kadi bu mudi mulayi wende tudi tutekemena diulu dipiadipia ne buloba bupiabupia mudi buakane buikalamu.’​—2 PETELO 3:13.

 Bantu badi bashintuluka nansha mpindieu

Kakuyi mpata, tuetu buonso tudi ne disanka bua malu adi Nzambi mulaye aa. Kadi tshinyi tshidi tshitujadikila ne: neakumbane? Lelu eu, kudi bualu budi buleja ne: neakumbane. Mbualu kayi abu? Bantu ba bungi pa buloba bujima, bakadi balekele budinangi, bikadilu bibi anyi tshikisu ne mbalue bantu bimpe ba ditalala badi bamba anu bulelela. Bantemu ba Yehowa bapite pa miliyo 7 pa buloba bujima badi benza dîku dinene mudibu kabayi basunguluja bantu bilondeshile dikoba diabu, tshisamba tshiabu, ditunga diabu anyi makuta adibu nawu, bualu malu aa ke adi makebeshe lukuna, tshikisu, ne dishibeyangana mu bantu. * Tudi bashindike ne: malu adi Nzambi mulaye neakumbane pa buloba bujima, bualu tudi tumona mudi bantu bashintuluka lelu.

Kadi ntshinyi tshidi tshiambuluisha bantu bua kushintuluka? Tudi tupeta diandamuna mu mulayi mukuabu wa mu Bible uvua muprofete Yeshaya mufunde. Wakafunda ne:

‘Tshimungu netshilale mu nzubu umue ne muana wa mukoko, ne nkashama nealale popamue ne muana wa mbuji. Muana wa ngombe ne nyama wa ntambue ne nyama udi ne manyi neyidie mashinde mu muaba umue, ne muana mutekete neayilombole. Nyama wa ntambue neadie mashinde bu mudi ngombe wenza. Muana utshidi wamua mabele neanayile pa mutu pa buina bua nyoka wa dikala, muana mumane kujila mabele neateke tshianza tshiende pa buina bua nyoka wa ntoka. Kabiena bienzela bikuabu bintu bibi, kabiena bishipa bikuabu mu mukuna wanyi wa tshijila wonso; bualu bua buloba nebuikale buule tente ne kumanya kua Yehowa, bu mudi mâyi a mu mâyi manene abuikila miaba yawu yonso.’​—Yeshaya 11:6-9.

Mulayi eu udiku wakula anu bua tshikondo tshikala nyama mua kusomba mu  buobumue ne bantu anyi? Tòo. Tshitupa tshia ndekelu tshia mulayi eu tshidi tshileja tshidi tshienza bua bantu bashintuluke tshiamba ne: “Buloba nebuikale buule tente ne kumanya kua Yehowa.” Dimanya dia Yehowa didiku mua kushintulula bikadilu bia nyama anyi? Nansha kakese. Kadi didi mua kushintulula bantu. Mulayi eu udi uleja ne: bantu badi ne ngikidilu bu ya nyama badi bakudimuka ne bapeta ngikadilu ya buena ya Kristo padibu balonga Bible ne batumikila malu adimu.

Tuangate tshilejilu tshia Pedro. * Pavuaye mubuele mu kampanza ka bena tshinyangu, uvua wela meji ne: uvua mua kulongolola malu. Bobu bamane kumulongesha mudimu eu, bakamuambila bua kuya kuosha nzubu ya bampulushi. Patshivuaye udilongolola bua kuya, bakamukuata. Wakenza ngondo 18 mu buloko muvuaye utungunuka ne mudimu wende wa tshinyangu au. Pavuaye mu buloko, mukajende wakatuadija kulonga Bible ne Bantemu ba Yehowa. Pakapatukaye wakatuadija pende kulonga Bible, ne malu a Nzambi akalongaye akashintulula lungenyi luende ne mushindu uvuaye umona muoyo. Udi wamba ne: “Ndi ngela Yehowa tuasakidila bua mumvua tshiyi mushipe muntu nansha umue mu bidimu bimvua mu dingumba dia bena tshinyangu. Mpindieu ndi ngenza mudimu ne muela wa nyuma udi Dîyi dia Nzambi bua kuyisha bantu lumu luimpe lua ditalala ne buakane lua Bukalenge  bua Nzambi.” Pedro wakaya too ne ku nzubu ya bampulushi ivuaye ukeba kuosha bua kubambila malu ikala mu bulongolodi bua Nzambi muikala ditalala ne kamuyi tshikisu.

Mushindu udi Dîyi dia Nzambi dishintulula bantu udi ukolesha ditabuja dietu mu malu adi Nzambi mulaye bua kujikija bubi. Tumanye ne: bantu kabakutununguka anu ne kuenza malu mabi bua kashidi to, kadi nebalue bantu bimpe. Mu katupa kîpi emu Yehowa neabutule Satana Diabolo mukebeshi wa malu mabi ne udi usaka bantu bua kuenza. Bible udi wamba ne: “Buloba bujima budi mu bukokeshi bua Mubi.” (1 Yone 5:19, Muanda Mulenga Lelu) Kadi mu katupa kîpi emu nebamubutule. Nebabutule kabidi bantu badi batungunuka anu ne kuenza malu mabi ku bukole. Netuikale ne disanka dia bungi bua kuikala ne muoyo mu tshikondo atshi.

Ntshinyi tshitudi ne bua kuenza bua kuikala ne muoyo tshikondo atshi? Vuluka ne: “kumanya kua Yehowa” ke kudi kushintulula bantu lelu, ne ke kuashintulula bantu ba pa buloba bujima mu matuku atshilualua. Paudi upeta dimanya dilelela dia malu a mu Bible ne uatumikila anu muvua Pedro muenze, udi pebe mua kutekemena bua kuikala ne muoyo mu buloba ‘muikala buakane.’ (2 Petelo 3:13) Ke bualu kayi, tudi tukusengelela ne muoyo mujima bua kudikebela dîba patshidi mushindu koku bua kulonga bua kumanya Nzambi ne Yezu Kristo bua wewe kupeta muoyo wa tshiendelele.​—Yone 17:3.

[Mêyi adi kuinshi]

[Lungenyi lunene lua mu dibeji 9]

Udi pebe mua kutekemena bua kuikala ne muoyo mu buloba ‘muikala buakane.’​—2 PETELO 3:13