Mukanda wa Kumpala wa Kulondolola 23:1-32
23 Pakavua Davidi mukulakaje ne muikale ku ndekelu kua muoyo wende,* wakateka muanende Solomo mukalenge wa Isalele.+
2 Pashishe wakasangisha bakokeshi bonso ba mu Isalele, ne bakuidi,+ ne bena Lewi.+
3 Bakabala bena Lewi bavua ne bidimu 30 kubanda;+ bungi buabu, mitu yabu mibala muntu ku muntu, buvua binunu 38.
4 Mu bobu aba kuvua bantu binunu 24 bavua balombola mudimu wa nzubu wa Yehowa, ne kuvua batangidi 6 000 ne balumbuluishi,+
5 ne kuvua balami ba ku biibi 4 000,+ ne bantu 4 000 bavua batumbisha+ Yehowa ne biombelu bivua Davidi muambe bua bualu buabi ne: “Mvua mubienze bua kutumbisha nabi Nzambi.”
6 Pashishe Davidi wakabalongolola* mu bisumbu mu bisumbu+ bilondeshile bana ba Lewi: Gêshona, Kohata, ne Melali.+
7 Mu bena Gêshona kuvua Ladana ne Shimei.
8 Bana ba balume ba Ladana bavua: Yehiele mfumu, Zetama, ne Yoele,+ basatu.
9 Bana ba balume ba Shimei bavua: Shelomota, Haziele, ne Halana, basatu. Aba bavua bamfumu ba nzubu ya batatu bua Ladana.
10 Bana ba balume ba Shimei bavua: Yahata, Zina, Yeusha, ne Belia. Banayi aba bavua bana ba Shimei.
11 Yahata uvua ku mutu ne Zizaha uvua umulondela. Kadi bu muvua Yeusha ne Belia kabayi ne bana ba balume ba bungi, bakababala bu nzubu umue wa batatu bikale ne bujitu bua kuenza mudimu muaba umue.
12 Bana ba balume ba Kohata bavua: Amalama, Yisehâ,+ Hebelone, ne Uziele,+ banayi.
13 Bana ba balume ba Amalama bavua Alona+ ne Mose.+ Kadi bavua bateke Alona ku luseke bua kashidi,+ yeye ne bana bende ba balume, bua kujidila Muaba Mutambe Tshijila, bua kufila milambu kumpala kua Yehowa, bua kumuenzela mudimu, ne bua kubenesha bantu mu dîna diende misangu yonso.+
14 Kadi bua bana ba Mose muntu wa Nzambi mulelela, bavua bababale bobu mu tshisa tshia bena Lewi.
15 Bana ba balume ba Mose bavua Gêshoma+ ne Eliezê.+
16 Mu bana ba balume ba Gêshoma, Shebuele+ uvua mfumu.
17 Mu ndelanganyi ya* Eliezê, Lehabeya+ uvua mfumu; Eliezê kavua ne bana ba balume bakuabu to, kadi bana ba balume ba Lehabeya bavua ba bungi menemene.
18 Mu bana ba balume ba Yisehâ,+ Shelomita+ uvua mfumu.
19 Bana ba balume ba Hebelone bavua: Yeliya mfumu, muibidi Amalia, muisatu Yahaziele, ne muinayi Yekamama.+
20 Bana ba balume ba Uziele+ bavua Mika mfumu, bamulondela kudi Yishaya.
21 Bana ba balume ba Melali bavua Mali ne Mushi.+ Bana ba balume ba Mali bavua Eleazâ ne Kishi.
22 Eleazâ wakafua, kadi kavua ne bana ba balume to, anu ba bakaji. Nunku balela babu,* bana ba balume ba Kishi, bakabasela.
23 Bana ba balume ba Mushi bavua: Mali, Edê, ne Yelemota, basatu.
24 Aba bavua bana ba balume ba Lewi bilondeshile nzubu ya batatuabu, bilondeshile bamfumu ba nzubu ya batatu. Bakabafunda mêna, kubabala ne kubafunda bilondeshile mêna abu, ne bavua benza mudimu wa nzubu wa Yehowa, kubangila ku bantu ba bidimu 20 kubanda.
25 Bualu Davidi uvua muambe ne: “Yehowa Nzambi wa Isalele mmupeshe tshisamba tshiende dikisha,+ ne yeye neasombe mu Yelushalema bua kashidi.+
26 Bena Lewi kabakuambula kabidi ntenta wa tshitendelelu anyi bintu biende bua mudimu wa ntenta to.”+
27 Bualu bilondeshile malu a ndekelu avua Davidi muleje, bakabala bena Lewi bavua ne bidimu 20 kubanda.
28 Mudimu wabu uvua wa kuambuluisha bana ba balume ba Alona+ bua mudimu wa nzubu wa Yehowa, bua kutangila mbanza,+ nzubu ya kudiila, dikezula dia tshintu tshionso tshia tshijila, ne mudimu wonso uvua ukengela bua mudimu wa nzubu wa Nzambi mulelela.
29 Bavua bambuluisha bua milongo ya mampa,*+ bukula bunefuke bua mulambu wa ntete, mikata ya bibetubetu kayiyi miela luevene,+ mikata mioshela mu malata, bukula busopa busambakaja,+ ne bipiminu bionso bia kupima nabi bungi ne bunene.
30 Bavua ne bua kuimana dinda dionso+ bua kuela Yehowa tuasakidila ne kumutumbisha, ne bavua ne bua kuenza kabidi nanku dilolo.+
31 Bavua bambuluisha dîba dionso divuabu balambula Yehowa milambu ya kuosha dia Nsabatu,+ pavua ngondo ubala,+ ne mu bibilu bia ku tshidimu,+ bilondeshile bungi bulomba bilondeshile mikenji ivuaku, benza nunku kumpala kua Yehowa pa tshibidilu.
32 Bavua bakumbaja kabidi midimu yabu ivua itangila ntenta wa kusambakena, itangila muaba wa tshijila, ne itangila bana babu, bana ba balume ba Alona, bua mudimu wa nzubu wa Yehowa.
Note
^ Ku mua.: “mukulakaje ne muwule tente ne matuku.”
^ Anyi “wakabatapulula.”
^ Ku mua.: “bana ba balume ba.”
^ Ku mua.: “bana babu ba balume.”
^ Mmumue ne: mampa a dileja.
