Mukanda muibidi wa Samuele 1:1-27
1 Panyima pa lufu lua Shaula, pavua Davidi mupingane ufuma ku ditshimuna* bena Amaleka, Davidi wakashala mu Sikelaga+ matuku abidi.
2 Dituku disatu, muntu mukuabu wakalua umbukila mu tshitudilu tshia Shaula mudipande bilamba, muikale ne buloba mu mutu. Pakasemenaye kudi Davidi, wakadiela panshi, kutuaye mpala panshi.
3 Davidi wakamuebeja ne: “Udi ufumina penyi?” Yeye kuandamuna ne: “Ndi munyeme mu tshitudilu tshia Isalele.”
4 Davidi wakamuebeja ne: “Malu mmapite mushindu kayi? Ngambila koku.” Yeye kuamba ne: “Bantu mbanyeme ku mvita ne ba bungi mbakuluke bafue. Nansha Shaula ne muanende Yonatana mbafue pabu.”+
5 Ke Davidi kuebeja nsongalume uvua mulue ne lumu au ne: “Mmunyi muudi mumanye ne: Shaula ne muanende Yonatana mbafue?”
6 Nsongalume wakandamuna ne: “Mvua mpitshila pa mukuna wa Gileboa+ ku mpukapuka, meme kumona Shaula mudishindamene pa difuma diende, matempu ne bendeshi ba tubalu bikale pabuipi nende.+
7 Pavuaye mukudimuke mummone, wakambikila, meme kuamba ne: ‘Mmeme eu!’
8 Yeye kunkonka ne: ‘Wewe udi nganyi?’ Meme kuandamuna ne: ‘Ndi muena Amaleka.’+
9 Ke yeye kuamba ne: ‘Luaku koku unshipe, bualu ndi nkengakana bikole, kadi ntshidi ne muoyo.’*
10 Nunku meme kuya kudiye, kumushipa,+ bualu mvua mumanye ne: kavua mua kushala ne muoyo yeye mumane kukuluka mutapike mushindu au to. Ke meme kuangata tshifulu tshia bukalenge* tshivua ku mutu kuende ne tshikanu tshivua ku diboko diende; ndi mulue nabi muaba eu kudi mukalenge wanyi.”
11 Pakumvua Davidi nanku wakadikuata mu bilamba, yeye kubipanda, ne bantu bonso bavuaye nabu bakenza bia muomumue.
12 Bakadila bela mbila, bobu kujila biakudia+ too ne ku dilolo bua Shaula, bua muanende Yonatana, bua bantu ba Yehowa, ne bua nzubu wa Isalele,+ bualu bavua bakuluke ku muele wa mvita.
13 Davidi wakebeja nsongalume uvua mumutuadile lumu au ne: “Udi wa penyi?” Yeye kuamba ne: “Ndi muana wa muntu udi musombe buenyi, muena Amaleka.”
14 Ke Davidi kumuebeja ne: “Bua tshinyi kuvua mutshine bua kujula tshianza tshiebe bua kushipa muela manyi wa Yehowa?”+
15 Nunku Davidi wakabikila umue wa ku bantu bavuaye nabu, kuamba ne: “Semena umushipe.” Nunku wakamukuma, yeye kufua.+
16 Davidi wakamuambila ne: “Mashi ebe adi pa mutu pebe nkayebe, bualu mukana muebe nkayebe muvua mukufunde pauvua muambe ne: ‘Meme ke uvua mushipe muela manyi wa Yehowa.’”+
17 Pashishe Davidi wakelela Shaula ne muanende Yonatana kasala ka muadi,*+
18 kuambaye bua balongeshe bantu ba mu Yuda kasala ka muadi ka “Buta” kadi kafunda mu mukanda wa Yashâ aka:+
19 “Wewe Isalele, bantu ba butumbi mbalale bashipa pa miaba yebe mitumbuke.+
Mona mudi bantu ba bukole bakuluke!
20 Kanuambi bualu ebu mu Gata to;+Kanubumanyishi mu misesu ya mu Ashekelona,Tshianana bana ba bakaji ba bena Peleshete nebasanke,Tshianana bana ba bakaji ba bantu badi kabayi batengula nebatumpike ne disanka.
21 Nuenu mikuna ya Gileboa,+Lumuma ne mvula kabinumatshidi,Kanuikadi nansha ne madimi adi apatula mapa a tshijila,+Bualu ngabu wa bantu ba bukole uvua munyanguke kuntu aku,Ngabu wa Shaula katshiena kabidi muedibue manyi to.
22 Ku mashi a bantu bashipa, ku mafuta a bantu ba bukole,Buta bua mikete bua Yonatana kabuvua buele nyima,+Ne muele wa mvita wa Shaula kawuvua upingana kawuyi mutshimune.+
23 Shaula ne Yonatana,+ bantu banangibue ne banyishibue bikole* pavuabu ne muoyo,Nansha mu lufu kabavua babatapulule.+
Bavua bapite nyunyi ya mikanku ku lubilu,+Bapite nyama ya ntambue ku bukole.+
24 Nuenu bana ba bakaji ba mu Isalele, dilayi ShaulaUvua munuvuadike bilamba bikunze kunzuu ne bilengeja bimpe,Uvua muase bilengejilu bia or ku bilamba bienu.
25 Mona mudi bantu ba bukole bakuluke mu mvita!
Yonatana mmulale mushipa pa miaba yebe mitumbuke!+
26 Ndi ne kanyinganyinga kakole buebe wewe muanetu Yonatana;Uvua ne mushinga wa bungi ku mêsu kuanyi.+
Dinanga diuvua munnange nadi divua dimpe ditambe kupita dinanga dia bakaji.+
27 Mona mudi bantu ba bukole bakulukeNe bia mvita bijimine!”
Note
^ Anyi “dishipa.”
^ Anyi “bualu anyima wanyi yonso utshidi munda muanyi.”
^ Anyi “tshikata tshia lumu.”
^ Anyi “musambu wa madilu.”
^ Anyi “basankisha.”
