Mukanda mutumina Filemona 1:1-25
1 Meme Paulo, muena buloko+ bua bualu bua Kristo Yezu ne muanetu Timote,+ kudi Filemona muenzejanganyi netu wa mudimu munangibue,
2 ne kudi muanetu wa bakaji Apia ne kudi Âkipo+ musalayi netu, ne kudi tshisumbu tshidi mu nzubu muebe:+
3 Ngasa ne ditalala bia kudi Nzambi Tatu wetu ne Mukalenge Yezu Kristo bikale nenu.
4 Ntu ngela Nzambi wanyi tuasakidila misangu yonso pandi nkutela mu masambila anyi,+
5 bu mundi ntungunuka ne kumvua bua bualu bua ditabuja diebe ne dinanga diudi nadi bua* Mukalenge Yezu ne bua* bansantu bonso.
6 Ndi nsambila bua ditabuja diudi wewe ne bakuabu bikale nadi dikusake bua kuitaba tshintu tshimpe tshionso tshitudi natshi ku butuangaji bua Kristo.
7 Bualu mvua mupete disanka dia bungi ne musambibue pamvua mumvue bualu bua dinanga diebe, bualu mioyo* ya bansantu mmikoleshibue ku butuangaji buebe wewe, muanetu.
8 Bua bualu buine ebu, nansha mundi ne dikima dikole dia kuakula mu diumvuangana ne Kristo bua kukutumina dîyi bua wenze tshidi tshikumbane,
9 ndi musue meme kukusengelela bua dinanga, bu mundi meme Paulo muntu mukulumpe, eyowa, mpindieu kabidi muena buloko bua bualu bua Kristo Yezu.
10 Ndi nkusengelela bua Onezimo,+ muananyi umvua meme mulue tatuende+ mu buloko.*
11 Kumpala kavua ne mushinga kuudi to, kadi mpindieu udi ne mushinga kuudi ne kundi meme.
12 Ndi mmupingaja kuudi, eyowa yeye, muoyo wanyi* menemene.
13 Mvua musue kumulama kuneku buanyi meme bua angate muaba webe mu dingambuluisha pandi mu buloko bua bualu bua lumu luimpe.+
14 Kadi tshiena musue kuenza bualu nansha bumue tshiyi ne dianyisha diebe, bua wenze bualu buimpe kabayi bakuenzeje, kadi ku disua diebe.+
15 Bushuwa, pamuapa ke bualu kayi uvua munyeme bua tshitupa tshîpi,* bua umupetulule bua kashidi,
16 kayi kabidi bu mupika,+ kadi mupite mupika, bu muanetu munanga,+ nangananga kundi, kadi mutambe kunangibua kuudi wewe, mu mubidi ne mu Mukalenge.
17 Nunku biwikala ungangata meme bu mulunda webe,* umuakidile bimpe anu bu muuvua mua kungakidila meme.
18 Bualu bukuabu, bikalaye mukuenzele bualu bubi anyi muikale ne dibanza diebe, udibale bu dianyi meme.
19 Meme Paulo ndi mfunda ne tshianza tshianyi nkayanyi ne: nendifute, tshiyi nkuvuluija muudi wewe ne dibanza dianyi, dia muoyo webe muine.
20 Eyowa, muanetu, ngambuluishaku mu bualu ebu mu diumvuangana ne Mukalenge; kolesha muoyo wanyi* mu diumvuangana ne Kristo.
21 Ndi mushindike ne: newenze tshindi mukulombe, ke bualu kayi ndi nkufundila mumanye ne: newenze kupitshisha ne tshindi muambe.
22 Bualu bukuabu, undongoluele kabidi muaba wa meme kusomba, bualu ndi mutekemene ne: ku diambuluisha dia masambila enu, nebampingaje kunudi.*+
23 Epafa, muena lukanu nanyi mu buobumue ne Kristo Yezu, udi ukuela muoyo,+
24 ne benzejanganyi nanyi ba mudimu aba: Mâko, Alistâko,+ Dema+ ne Luka.+
25 Ngasa wa Mukalenge Yezu Kristo ikale ne lungenyi lunudi nalu.
Note
^ Anyi “kudi.”
^ Anyi “kudi.”
^ Anyi “dinanga dikole.”
^ Ku mua.: “mu nkanu.”
^ Anyi “dinanga dianyi dikole.”
^ Ku mua.: “dîba dimue.”
^ Ku mua.: “muabanyanganyi nebe.”
^ Anyi “dinanga dianyi dikole.”
^ Anyi “nebandekele bua bualu buenu.”
