Misambu 35:1-28
Wa Davidi.
35 Yehowa wanyi, ngakuila mu tshilumbu tshianyi ne baluishi banyi;+Uluishe badi banduisha.+
2 Ambula ngabu webe mukese* ne ngabu webe munene,+Ne juka bua kunduila mvita.+
3 Ujudile badi bandondakaja difuma ne kasuyi ka mvita.*+
Ungambile* ne: “Meme ndi lupandu luebe.”+
4 Badi benda bipata muoyo wanyi* bafuishibue bundu ne bapuekeshibue milongo.+
Badi bela tshifufu bua kumbutula balukile tshianyima ne bundu.
5 Balue bu bisote mu lupepele;Muanjelu wa Yehowa abipate.+
6 Njila wabu ikale ne mîdima ne busenuPadi muanjelu wa Yehowa wenda ubalondakaja.
7 Bualu mbasokoke bukondo bua kunkuata kakuyi bualu;Mbangumbuile* dijimba kakuyi bualu.
8 Tshipupu tshimukuate mu tshimpitshimpi;Bukondo budiye musokoke bumukuate;Akulukamu, abutudibue.+
9 Kadi meme* nensankile mu Yehowa;Nengikale ne disanka bua bienzedi biende bia lupandu.
10 Mifuba yanyi yonso neyambe ne:
“Yehowa wanyi, nnganyi udi bu wewe?
Wewe udi usungila badi kabayi mua kudisungila kudi badi babatambe bukole,+Udi usungila badi kabayi mua kudisungila ne bapele kudi badi babapawula.”+
11 Bantemu ba muoyo mubi badi balua,+Bangebeja malu andi tshiyi mumanye bualu buawu nansha bumue.
12 Badi bampingajila bubi ku buimpe,+Banshiya* mu tshinyongopelu.
13 Kadi pavuabu basama, ngakavuala bilamba bikayabale;Ngakadikengesha* ne kujila kua biakudia,Ne pavua masambila anyi apingana kaayi mandamuna,*
14 Mvua mutue eku ne eku ndila bu udi udila mulunda anyi umue wa ku bana betu;Ngakinama ne kanyinganyinga bu muntu udi udila mamuende.
15 Kadi pangakatetuka, bakasanka ne kudisangabu pamue;Bakadisanga pamue bangalamine bua kungenzela bibi;Bakansunsula tupese tupese, ne kabakashala bapuwe to.
16 Bantu badi kabayi batumikila Nzambi badi banseka ne dipetu,*Badi bandiila mênu.+
17 Yehowa wanyi, neushale anu mutangile too ne dîba kayi?+
Unsungile* ku mvita idibu bangela,+Usungile muoyo wanyi wa mushinga mukole* kudi bana ba ntambue.*+
18 Nunku, nenkuele tuasakidila mu tshisumbu tshinene tshia bantu;+Nenkutumbishe munkatshi mua misumba ya bantu.
19 Kulekedi badi bena lukuna banyi kakuyi bualu basanka bua dikenga dianyi;Kulekedi badi bankine kakuyi bualu+ bavinya mêsu abu ne muoyo mubi.+
20 Bualu kabena bamba mêyi a ditalala to,Kadi badi belela bena ditalala ba mu buloba meji mabi ne dishima dionso.+
21 Badi babalula mukana muabu bikole bua kumbanda,Bamba ne: “Woloo! Woloo! Mêsu etu mmamone bualu ebu.”
22 Yehowa wanyi, wewe udi mumone bualu ebu. Kushadi mupuwe to.+
Yehowa wanyi, kushadi kule nanyi to.+
23 Tabala, juka bua kungakuila,Nzambi wanyi, Yehowa, ngakuila mu tshilumbu tshianyi.
24 Undumbuluishe bilondeshile buakane buebe,+ Yehowa Nzambi wanyi;Kubalekedi basanka bua dikenga dianyi to.
25 Kabadiambidi ne: “Woloo! Tuvua bapete tshituvua tukeba”* nansha.
Kabadiambidi ne: “Tudi bamumine” nansha.+
26 Buonso buabu bafuishibue bundu, bapuekeshibue milongoBobu badi basanka bua dikenga dianyi.
Badi baditumbisha kumpala kuanyi baluatshishibue bundu ne bapuekeshibue milongo.
27 Kadi badi basanka bua buakane buanyi bele mbila ne disanka;Bambe misangu yonso ne:
“Yehowa atumbishibue, yeye udi usanka bua ditalala dia muena mudimu wende.”+
28 Nunku, ludimi luanyi nelulondele bantu* buakane buebe+Ne nelukutumbishe dituku dijima.+
Note
^ Ngabu mukese uvuabu batamba kuambula kudi bedi ba mikete.
^ Anyi “kasuyi ka mitu ibidi.”
^ Anyi “Wambile anyima wanyi.”
^ Anyi “anyima wanyi.”
^ Anyi “Mbumbuile anyima wanyi.”
^ Anyi “anyima wanyi.”
^ Anyi “Bashiya anyima wanyi.”
^ Anyi “Ngakakengesha anyima wanyi.”
^ Anyi “apingana mu tshiadi tshianyi.”
^ Anyi pamuapa: “badi kabayi batumikila Nzambi badi baseka bua kupeta mukata.”
^ Anyi “Usungile anyima wanyi.”
^ Ku mua.: “Wanyi umuepele,” wakula bua anyima wende anyi muoyo wende.
^ Anyi “bana ba ntambue ba misalala.”
^ Anyi “Woloo! Anyima wetu.”
^ Anyi “luelangane meji a.”
