Misambu 45:1-17
Kudi muludiki; bilondeshile “Bilongo bia kapapankole.” Wa bana ba Kola.+ Masikile.* Musambu wa dinanga.
45 Muoyo wanyi mmusonsola kudi tshintu tshimpe.
Ndi ngamba ne: “Musambu wanyi ngua* bualu bua mukalenge.”+
Ludimi luanyi luikale mutshi wa mukanda+ wa* mutentudi wa mikanda* mupiluke.+
2 Wewe udi mutambe bulengele wa mu bana ba bantu.
Mêyi malengele adi apatuka ku mishiku yebe.+
Ke bualu kayi Nzambi mmukubeneshe bua kashidi.+
3 Suika muele webe wa mvita+ ku lubese luebe, wewe muntu wa bukole,+Mu bunême buebe ne butumbi buebe.+
4 Mu butumbi buebe ndakumutangile ku ditshimuna;*+Banda pa kabalu kebe bua bualu bua bulelela ne budipuekeshi ne buakane,+Tshianza tshiebe tshia balume netshienze* malu a kukema.
5 Mikete yebe mmitue, ikulula bukua bantu kumpala kuebe;+Idi itubula mioyo ya bena lukuna ba mukalenge.+
6 Nzambi ke nkuasa webe wa bukalenge kashidi ne tshiendelele;+Dikombo dia bukalenge buebe ndikombo dia bululame.*+
7 Wewe uvua munange buakane+ ne uvua mukine bubi.+
Ke bualu kayi Nzambi, Nzambi webe, mmukuele manyi+ ne manyi a disanka dikole+ kupita bena diebe.
8 Bilamba biebe bionso bidi ne dipembu dia mire, dia mutshi wa alowe, ne dia wa kasia;Muadi wa biombelu bia nshinga udi ufumina mu dibalasa dinene dia mibanga udi ukusankisha.
9 Bana ba bakaji ba bakalenge badi munkatshi mua bainabanza bebe ba lumu.
Mukaji wa mukalenge* mmuimane ku tshianza tshiebe tshia balume mudilengeje ne or wa ku Ofî.+
10 Teleja, wewe muananyi wa bakaji, teya ntema ne inyika ditshi diebe;Puaku bantu ba kuenu ne nzubu wa tatuebe muoyo.
11 Mukalenge neajinge bulengele buebe ne muoyo mujima,Bualu yeye udi mukalenge webe,Nunku umuinamine.
12 Muana wa bakaji wa Tulo nealue ne dipa;Balume badi ne bubanji bupite bua bakuabu bonso nebakebe bua kukulengelela.*
13 Munda mua dibalasa,* muana wa bakaji wa mukalenge udi ne bulengele buonso bukumbane;Bilamba biende mbilengeja ne* or.
14 Nebalue nende kudi mukalenge, muvuale bilamba bitela ne bilengejilu bimpe bitambe.*
Bena diende batshidi tumama badi benda bamulonda badi babuela nabu kumpala kuebe.
15 Nebalue nabu ne kusangala ne disanka;Nebabuele mu dibalasa dia mukalenge.
16 Bana bebe ba balume nebangate muaba wa bankambua bebe.
Neubateke bu bakokeshi pa buloba bujima.+
17 Nemmanyishe dîna diebe mu bipungu bionso bia bantu bitshilualua.+
Ke bualu kayi bukua bantu nebukutumbishe kashidi ne tshiendelele.
Note
^ Anyi “kasala ka.”
^ Anyi “mufundi.”
^ Ku mua.: “Midimu yanyi nya.”
^ Ku mua.: “netshikulongeshe.”
^ Anyi “dilubuluka.”
^ Anyi “kulumbuluisha kuakane.”
^ Anyi “Mukalenge mukaji.”
^ Anyi “kutekesha mpala webe.”
^ Ku mua.: “Munda.”
^ Ku mua.: “mbioya ne.”
^ Anyi pamuapa: “nkanzu milengeja ne malenda.”
