Misambu 67:1-7
Kudi muludiki; wa kuimba tshiapamue ne biombelu bia nshinga. Mujiki. Musambu.
67 Nzambi neatuleje luse ne neatubeneshe;Yeye neatukenkeshile mpala wende+ (Sela)
2 Bua njila webe amanyike pa buloba bujima,+Ne bienzedi biebe bia lupandu munkatshi mua bisamba bionso.+
3 Bukua bantu bukutumbishe, Nzambi wetu;Bukua bantu buonso bukutumbishe.
4 Bisamba bisanke ne biele mbila ne disanka,+Bualu neulumbuluishe bukua bantu biakane.+
Neulombole bisamba bia pa buloba. (Sela)
5 Bukua bantu bukutumbishe, Nzambi wetu;Bukua bantu buonso bukutumbishe.
6 Buloba nebupatule bintu biabu;+Nzambi, Nzambi wetu, neatubeneshe.+
7 Nzambi neatubeneshe,Ne ntengu yonso ya buloba neyimutshine.*+
Note
^ Anyi “neyimupe bunême.”