Misambu 69:1-36
Kudi muludiki; bilondeshile “Bilongo bia kapapankole.” Wa Davidi.
69 Nzambi wanyi, mpandisha, bualu mâyi adi aluisha muoyo wanyi.*+
2 Ndi mudine mu lunteke lule mudi kamuyi buloba bukole.+
Ndi mubuele mu mâyi male,Ne musulu wa muenji mukole mmumpuekeshe.+
3 Ndi mupungile ne diela mbila;+Muminu wanyi mmuume.
Mêsu anyi mmatshioke pandi muindile Nzambi wanyi.+
4 Badi bankine kakuyi bualu+Badi bungi tshianana kupita nsuki ya ku mutu kuanyi.
Bavua mua kunshipa,Bena lukuna banyi bena tshitungu,* mbalue ba bungi.
Mvua muenzejibue bua kufila bintu bimvua tshiyi muibe.
5 Nzambi wanyi, wewe udi mumanye butshimbakane buanyi bimpe,Ne dipila dianyi ki ndisokoka kumpala kuebe.
6 Badi bakutekemena kabafuishibu bundu bua bualu buanyi,Wewe Mukalenge Mutambe Bunene, Yehowa wa biluilu.
Badi bakukeba kabapuekeshibu milongo bua bualu buanyi,Wewe Nzambi wa Isalele.
7 Ndi ntata ne bipendu bua bualu buebe;+Dipuekeshibua milongo ndibuikile mpala wanyi.+
8 Ndi mulue muenyi kudi bana betu,Muntu wa ku babende kudi bana ba mamuanyi.+
9 Tshisumi bua nzubu webe ntshindie,+Ne bipendu bia badi bakupenda mbimmatshile pambidi.+
10 Pamvua* mudipuekeshe ne dijila dia biakudia,*Bakampenda bua bualu abu.
11 Pamvua muvuije bilamba bikayabale bilamba bianyi,Ngakalua tshintu tshia kupetula* kudibu.
12 Ndi mulue muyuki wa badi basombe ku tshiibi tshia musoko,Ne bakuatshiki ba maluvu mbamvuije wa kuimba mu misambu yabu.
13 Kadi disambila dianyi difike kuudi,Yehowa wanyi, mu tshikondo tshiakane.+
Mu dinanga diebe dia lulamatu divule, Nzambi wanyi,Ungandamune ne bienzedi biebe bia lupandu bia bushuwa.+
14 Unsungile ku lunteke;Kundekedi ndina muinshi.
Unsungile kudi badi bankineNe ku mâyi male.+
15 Kulekedi mâyi a bungi adi mapasalale a muenji mukole ampuekesha,+Anyi kandondo kammina,Anyi tshina* tshikanga mukana muatshi pa mutu panyi to.+
16 Ngandamuna, Yehowa wanyi, bualu dinanga diebe dia lulamatu ndimpe.+
Bilondeshile luse luebe lua bungi, kudimukaku kundi,+
17 Ne kusokoki muena mudimu webe mpala webe.+
Ungadamune ne lukasa, bualu ndi mu dikenga.+
18 Luaku pabuipi nanyi, unsungile;*Umpikule bua bualu bua bena lukuna banyi.
19 Wewe udi mumanye kupendibua kuanyi ne kufuishibua kuanyi kua bundu ne kupuekeshibua kuanyi kua milongo.+
Wewe udi mumone baluishi banyi bonso.
20 Bipendu mbisunsule muoyo wanyi, ne mputa kena mua kuma.*
Mvua mutekemene luse, kadi kaluvuaku nansha;+Mvua mutekemene bansambi, kadi tshiakapeta nansha umue.+
21 Kadi pamutu pa biakudia, bakampesha mulungu;*+Bua nyota yanyi, bakampesha mvinyo wa buanji bua meme kunua.+
22 Mêsa abu alue bukondo bubelela,Ne bubanji buabu bulue buteyi.+
23 Mêsu abu alue mîdima bua kabamonyi,Ne uzakeje bimono biabu misangu yonso.
24 Ubupumuine difiika diebe dia munda,*Ne tshiji tshiebe tshikole tshibakuate.+
25 Tshitudilu* tshiabu tshishale munda mutupu;Muntu nansha umue kasombedi mu ntenta yabu.+
26 Bualu badi balondakaja muntu uuvua mutute,Ne badi batungunuka ne kulondelangana makenga a bauvua mutape mputa.
27 Ukumbajije dipila dikuabu ku dipila diabu,Ne kabikadi ne muaba mu buakane buebe.
28 Babakupule mu mukanda wa badi ne muoyo,*+Ne kabafundibu munkatshi mua bantu bakane to.+
29 Kadi ndi mu dikenga ne mu kusama.+
Nzambi wanyi, bukole buebe budi bupandisha bunkube.
30 Nengimbe misambu ya kutumbisha nayi dîna dia Nzambi,Ne nemmutumbishe ne kusakidila.
31 Bualu ebu nebusankishe Yehowa kupita ngombe mulume,Kupita muana mulume wa ngombe udi ne nsengu ne bikono.+
32 Bena bupuekele nebamone bualu ebu ne nebasanke.
Nuenu badi bakeba Nzambi, mioyo yenu ifululuke.
33 Bualu Yehowa udi uteleja bapele,+Ne kakupetula bantu bende badi bakuatshibue to.+
34 Diulu ne buloba bimutumbishe,+Mbuu ne tshintu tshionso tshidi tshiendamu.
35 Bualu Nzambi neapandishe Siona+Ne neibakulule bimenga bia Yuda,Nebasombamu ne neikale wabu.*
36 Ndelanganyi ya bena mudimu bende neyimupiane,+Ne badi banange dîna diende+ nebasombelamu.
Note
^ Anyi “mmafike too ne ku anyima wanyi.”
^ Anyi “Badi banduisha kakuyi bualu.”
^ Anyi “Pavua anyima wanyi.”
^ Anyi pamuapa: “Pangakadila ne kujila biakudia.”
^ Ku mua.: “lusumuinu.”
^ Anyi “dijimba.”
^ Anyi “Luaku pabuipi ne anyima wanyi, umunane.”
^ Anyi “ne ndi mufike too ne ku dishikila.”
^ Anyi “tshisonsa tshidi tshilewulangana.”
^ Anyi “tshiji tshikole.”
^ Anyi “tshitudilu tshinyunguluka kudi bimanu.”
^ Anyi “mukanda wa muoyo.”
^ Mmumue ne: buloba buabu.
