Misambu 81:1-16
Kudi muludiki; wa Gitita.* Wa Asafa.+
81 Elelayi Nzambi udi bukole buetu mbila ne disanka.+
Elelayi Nzambi wa Yakoba mbila ya ditshimuna.
2 Tuadijayi kuimba mijiki ne ambulayi ngoma wa ku bianza,Ne lunzenze lua mijiki mimpe pamue ne tshiombelu tshia nshinga.
3 Nuele mpungi padi ngondo ubala,+Padi ngondo tshitonga, bua dituku dia tshibilu tshietu.+
4 Bualu edi ndîyi dielela Isalele,Mmukenji wa Nzambi wa Yakoba.+
5 Wakawujadika bu divuluija kudi Jozefe+Pavuaye muye bua kuluisha buloba bua Ejipitu.+
Ngakumvua dîyi* dimvua tshiyi mujingulule ne:
6 “Mvua mumbushe bujitu pa dikaya diende;+Bianza biende biakumbushibua ku tshibondo, kushalabi bidilekelele.
7 Pauvua mu dikenga wakabikila, meme kukusungila;+Ngakakuandamuina mu ditutu dia makubakuba.*+
Ngakakuteta ku mâyi a Meliba.*+ (Sela)
8 Telejayi, nuenu bantu banyi, nengambe malu a kunutuisha nawu.
Wewe Isalele, bu wewe nansha unteleja.+
9 Munkatshi muebe kamuakuikala nzambi muenyi to,Ne kuakuinamina nzambi wa ku babende nansha.+
10 Meme Yehowa ndi Nzambi webe,Yeye uvua mukupatule mu buloba bua Ejipitu.+
Bulula mukana muebe, meme nemmuwuje.+
11 Kadi bantu banyi kabakateleja dîyi dianyi;Isalele kakankokela.+
12 Nunku ngakabalekela balonda mioyo yabu ya tshitshiu;Bakenza tshivuabu bamone ne: ntshiakane.*+
13 Bu bantu banyi nansha banteleja,+Bu Isalele nansha wendela mu njila yanyi!+
14 Mvua mua kukokesha bena lukuna babu ne lukasa;Mvua mua kukudimuna tshianza tshianyi bua kuluisha baluishi babu.+
15 Badi bakine Yehowa nebadibombe kumpala kuende,Ne tshiabafikila* netshikalaku kashidi.
16 Kadi yeye neakudiishe wewe* ne blé mutambe buimpe,*+Neakukutshishe ne buitshi bua mu dibue.”+
Note
^ Anyi “muakulu.”
^ Diumvuija: “Ditandangana.”
^ Ku mua.: “mu muaba musokome wa dikubakuba.”
^ Ku mua.: “Bakenda mu ngenyi yabu.”
^ Ku mua.: “tshikondo tshiabu.”
^ Ku mua.: “yeye,” mmumue ne: bantu ba Nzambi.
^ Ku mua.: “mafuta a blé.”