Yelemiya 50:1-46
50 Dîyi divua Yehowa muambe ku diambuluisha dia muprofete Yelemiya bua bualu bua Babilona,+ bua bualu bua buloba bua bena Kasada, didi ne:
2 “Nudiambe munkatshi mua bisamba ne nudimanyishe.
Imanyikayi tshimanyinu* ne manyishayi dîyi edi.
Kanusokoki bualu nansha bumue!
Ambayi ne: ‘Babilona mmukuatshibue.+
Bele mmufuishibue bundu.+
Melodaka mmumvue buôwa bukole.
Bimfuanyi biende mbifuishibue bundu.
Mpingu yende ya muendi* mmiumvue buôwa bukole.’
3 Bualu tshisamba ntshilue bua kumuluisha tshifumina ku nord.+
Tshidi tshivuija buloba buende tshintu tshidi tshikuatshisha buôwa;Muntu nansha umue ki mmusombelamu.
Muntu ne nyama bionso mbinyeme;Mbiye lubilu.”
4 “Mu matuku au ne mu tshikondo atshi,” ke mudi Yehowa wamba, “bantu ba mu Isalele ne bantu ba mu Yuda nebalue pamue.+ Nebaye benda badila,+ nebakebe Yehowa Nzambi wabu pamue.+
5 Nebakonke njila udi muye ku Siona, ne mpala yabu mitangija luseke alu,+ bamba ne: ‘Luayi tudisangishe ne Yehowa mu tshipungidi tshia tshiendelele tshikala katshiyi mua kupuibua muoyo.’+
6 Bantu banyi mbalue tshisumbu tshia mikoko mijimine.+ Balami babu bine bavua babapambuishe.+ Bavua baye nabu ku mikuna, batambakana bumbuka ku mukuna munene baya ku mukuna mukese. Mbapue miaba yabu ya kuikishila muoyo.
7 Mbabadie+ kudi bonso bavua babasangana, ne bena lukuna babu mbambe ne: ‘Katuena bapile to, bualu mbenzele Yehowa mpekatu, mbenzele Yehowa udi muaba wabu wa kusombela wa buakane ne ditekemena dia bankambua babu mpekatu.’”
8 “Patukayi lubilu munkatshi mua Babilona,Patukayi mu buloba bua bena Kasada,+Ne ikalayi bu nyama idi ku mutu idi kumpala kua tshisumbu tshia nyama.
9 Bualu monayi ndi njudila Babilona ne mmutuminaTshisumbu tshia bisamba binene tshifumina mu buloba bua ku nord.+
Nebilue kumuluisha bidilonge bua mvita;Neakuatshibue kuoku aku.
Mikete yabi idi bu ya muena mvitaIdi ijimijilangana bana;+Kabiena bipingana kakuyi bipeta.
10 Kasada nealue tshintu tshinyenga.+
Bonso badi bamunyenga bintu nebukute bikole,”+ ke mudi Yehowa wamba.
11 “Bualu nuvua nusanka,+ nuvua nusanka bikolePanuvua nupawula bumpianyi buanyi meme.+
Bualu nuvua batungunuke ne kutumpika bu lukungulu lua ngombe mu bisonsa,Ne nuvua nudila bu tubalu.
12 Mamuebe mmufuishibue bundu.+
Yeye wakakulela mmuedibue mâyi ku makasa.
Tangila! Yeye mmutambe bukese wa ku bisamba bionso,Muaba mume udi kawuyi mâyi ne muikale tshipela.+
13 Bua tshiji tshia Yehowa, muntu kakusombelamu to;+Nealue anu tshipela menemene.+
Muntu yonso udi upitshila pabuipi ne Babilona neashale mutangile umvua buôwaNe neele muonzo bua bualu bua bipupu biende bionso.+
14 Luayi nuluishe Babilona badilonge bua mvita ku nseke yonso,Nuenu bonso badi banana* buta bua mikete.
Muasayi, kanulaminyinyi mukete nansha umue,+Bualu Yehowa ke udiye muenzele mpekatu.+
15 Muelelayi lubila lua mvita ku nseke yonso.
Yeye mmudilambule.*
Makunji ende mmakuluke, bimanu biende mbiupula,+Bualu ndisombuela dia Yehowa.+
Disombuelayi kudiye.
Muenzelayi anu bu mudiye muenze.+
16 Umbushayi mukunyi mu BabilonaNe muntu udi ukuata mudimu ne muele wa kunowa nawu mu tshikondo tshia dinowa.+
Bua bualu bua muele wa mvita wa tshikisu, muntu ne muntu neapingane kudi tshisamba tshiabu,Muntu ne muntu neanyemene mu buloba buabu.+
17 “Bantu ba mu Isalele mmikoko mitangalake.+ Ntambue mmibatangalaje.+ Kumpala mukalenge wa Ashû wakabadia;+ pashishe Nebukadenesâ* mukalenge wa Babilona wakakunya mifuba yabu.+
18 Nunku mona tshidi Yehowa wa biluilu, Nzambi wa Isalele, wamba: ‘Mona nengenzele mukalenge wa Babilona ne buloba buende malu mushindu wa muomumue ne umvua muenzele mukalenge wa Ashû.+
19 Nempingaje Isalele mu mpata wende wa kudiila,+ neadie bisonsa pa mukuna wa Kâmele ne wa Bashana,+ ne yeye* neukute pa mikuna ya Efelayima+ ne ya Gilada.’”+
20 “Mu matuku au ne mu tshikondo atshi,” ke mudi Yehowa wamba,“Nebakebe tshilema tshia Isalele bikole,Kadi katshiakuikalaku nansha tshimue,Ne kabakupeta mpekatu ya Yuda,Bualu nemfuile bandi mushiye luse.”+
21 “Banda uluishe buloba bua Melatayima ne bantu badi basombele mu Pekoda.+
Bashipibue ne babutudibue butubutu,”* ke mudi Yehowa wamba.
“Enza bionso bindi mukutumine dîyi bua kuenza.
22 Tshiona tshia mvita tshidi mu buloba,Kabutu kanene.
23 Ke mudibu bakose ne batshibule nyindu wa bujitu wa buloba bujima nunku!+
Ke mudi Babilona mulue tshintu tshidi tshikuatshisha buôwa munkatshi mua bisamba nunku!+
24 Ndi mukutekele buteyi, ne udi mukuatshibue, wewe Babilona,Ne kuvua mumanye bualu ebu to.
Bakakupeta, kukukuatabu,+Bualu Yehowa ke uuvua muluishe.
25 Yehowa mmukangule nzubu wende wa dilamina bintu,Ne udi upatula bia mvita bia tshiji tshiende.+
Bualu Mukalenge Mutambe Bunene, Yehowa wa biluilu, udi ne mudimu wa kuenzaMu buloba bua bena Kasada.
26 Luayi numuluishe nufumina miaba ya kule.+
Kangulayi mayeba ende.+
Munguijayi bu mishiki ya ntete.
Mubutulayi butubutu.*+
Kashadi ne muntu nansha umue to.
27 Shipayi bana bende bonso ba ngombe;+Bapueke ku tshishipelu.
Diakabi diabu, bualu dituku diabu ndilue,Tshikondo tshiabu tshia dilumbuluisha!
28 Kudi mutoyi wa badi banyema,Badi bapanduka mu buloba bua Babilona,Bua kumanyisha mu Siona disombuela dia Yehowa Nzambi wetu,Disombuela bua ntempelo wende.+
29 Bikidilayi Babilona bedi ba mikete,Bonso badi banana* buta bua mikete.+
Asayi bitudilu nseke yende yonso; muntu nansha umue kanyemi to.
Mufutayi bilondeshile bienzedi biende.+
Muenzelayi anu bu mudiye muenze.+
Bualu mmuenze malu ne diambu kumpala kua Yehowa,Kumpala kua Wa Tshijila wa Isalele.+
30 Nunku bansongalume bende nebakuluke mu miaba yende ya tshinsangansanga,+Ne basalayi bende bonso nebafue* dituku adi,” ke mudi Yehowa wamba.
31 “Tangila! Ndi nebe tshilumbu,+ wewe muena dikamakama,”+ ke mudi Mukalenge Mutambe Bunene, Yehowa wa biluilu, wamba,“Bualu dituku diebe didi ne bua kulua, tshikondo tshingakulumbuluisha.
32 Wewe muena dikamakama, neutetuke ne neukuluke,+Kakuyi muntu wa kukujula.
Ne nentue bimenga biebe kapia,Ne koku nekoshe bintu bionso bidi bikunyunguluke.”
33 Mona tshidi Yehowa wa biluilu wamba:
“Bantu ba mu Isalele ne ba mu Yuda mbakengeshibue,Ne bonso badi babakuata mbabakuate bikole.+
Mbabenge bua kubalekelela.+
34 Kadi Mupikudi wabu udi ne bukole.+
Yehowa wa biluilu ke dîna diende.+
Bushuwa yeye neabalumbuluile tshilumbu tshiabu,+Bua kupesha buloba ebu dikisha+Ne bua kutumina bantu badi basombele mu Babilona lutatu.”+
35 “Muele wa mvita udiku bua kuluisha bena Kasada,” ke mudi Yehowa wamba,“Bua kuluisha badi basombele mu Babilona, bakokeshi bende, ne bena meji bende.+
36 Muele wa mvita udiku bua kuluisha bena biakulakula bia patupu,* ne nebenze malu bu bapale.
Muele wa mvita udiku bua kuluisha bilobo biende bia mvita, ne nebikuatshike buôwa.+
37 Muele wa mvita udiku bua kuluisha tubalu tuabu ne matempu abu a mvita,Ne bua kuluisha bantu bonso basambakane badi munkatshi muende,Ne nebalue bu bantu bakaji.+
Muele wa mvita udiku bua kuluisha bubanji buende, ne nebabupawule.+
38 Kabutu kadi pa mâyi ende, ne neakame.+
Bualu mbuloba bua mpingu misonga,+Ne bua bikena kumona biabu bidi bikuatshisha buôwa, badi anu benza malu bu bapale.
39 Nunku bifukibue bia mu tshipela nebisombe ne nyama idi ikungula,Ne nyunyi ya mfiondo neyisombele munda muende.+
Muntu kakusombelamu kabidi nansha,Yeye kakuikala nansha muaba wa kusombela mu bipungu bionso bia bantu.”+
40 “Anu bu muvua Nzambi mukulule Sodoma ne Amola+ ne bimenga bivua bidie nabu mutumba,”+ ke mudi Yehowa wamba, “muntu nansha umue kakusombelamu, ne muntu nansha umue kakutudilamu to.+
41 Tangilayi! Tshisamba tshidi tshifumina ku nord;Nebajule tshisamba tshinene ne bakalenge banene+Bafumina ku bitupa bia buloba bia kule menemene.+
42 Badi bambula buta bua mikete ne difuma dikese.+
Mbena tshikisu ne kabakuleja luse to.+
Tshiona tshiabu tshidi bu mukungulu wa mâyi a mbuu,+Padibu babande pa tubalu tuabu.
Bu muntu umue, badi badilonga mu mulongo wa mvita bua kukuluisha, wewe muana wa bakaji wa Babilona.+
43 Mukalenge wa Babilona mmumvue lumu lua bualu buabu,+Ne bianza biende bidi bipueka panshi.+
Kanyinganyinga kadi kamukuata,Didinyenga bu dia mukaji udi pa lulelu.
44 “Monayi! Muntu neabande bua kuluisha mpata ya kudishila nyama idi mu bukubi bu ntambue udi ufumina mu bipuka bishitakane kumpenga kua Yadene, kadi mu katupa kakese nembipate kudiye. Nemmutekele muntu musungula ku mutu kuende.+ Bualu nnganyi udi bu meme, ne nnganyi wantua tshiadi? Mmulami kayi wa mikoko udi mua kuimana kumpala kuanyi?+
45 Nunku umvuayi, nuenu bantu, dipangadika* didi Yehowa muangate bua Babilona+ ne meji adiye muele bua buloba bua bena Kasada.
Bushuwa nebakoke bana ba mikoko kule.
Yeye neavuije muaba wabu wa kusombela muaba udi mutupu bua bualu buabu.+
46 Bua mutoyi wa dikuatshibua dia Babilona, buloba nebukanke,Ne diyoyo nediumvuike munkatshi mua bisamba.”+
Note
^ Anyi “mutshi wa tshimanyinu.”
^ Tshiambilu tshia mu tshiena Ebelu etshi tshidi mua kuikala tshipetangana ne muaku “tumvi tua nyama” ne mbenze natshi mudimu bua kuleja kapeja.
^ Ku mua.: “badiata.”
^ Ku mua.: “mmufile tshianza tshiende.”
^ Ku mua.: “Nebukadelesâ,” mfundilu mukuabu wa dîna edi.
^ Anyi “anyima wende.”
^ Anyi “ne ubafile ku kabutu.”
^ Anyi “Mufilayi ku kabutu.”
^ Ku mua.: “badiata.”
^ Ku mua.: “nebapuwishibue.”
^ Anyi “baprofete ba dishima.”
^ Anyi “lungenyi.”
