Yelemiya 9:1-26
9 Bu mutu wanyi muikale nansha mâyi,Mêsu anyi nansha mushimi wa binsonji!+
Nunku mvua mua kudila munya ne butukuBua bashipibue ba bantu banyi.
2 Bu meme muikale nansha ne muaba wa muena ngendu kutudila mu tshipela!
Nunku mvua mua kushiya bantu banyi, kuya kule nabu,Bualu buonso buabu mbena masandi,+Dingumba dia bena tshitungu.
3 Badi banana ludimi luabu bu buta bua mikete;Dishima ke didi diuwule mu buloba, ki ndulamatu to.+
“Badi bumbuka ku bualu bubi baya ku bukuabu,Ne kabena bateya ntema kundi,”+ ke mudi Yehowa wamba.
4 “Wewe muntu yonso, udimukile muinebe,Ne kueyemenyi nansha muanenu to.
Bualu, muanenu yonso mmutungidianganyi,+Ne muinebe yonso mmushiminyinyanganyi wa malu.+
5 Muntu ne muntu udi udinga muinende,Ne kakuena muntu udi wamba bulelela.
Mbalongeshe ludimi luabu bua kuamba malu a dishima.+
Badi badizengeja ne dienza malu mabi.
6 Wewe udi musombele munkatshi mua dishima.
Mu dishima diabu bakabenga kummanya,” ke mudi Yehowa wamba.
7 Nunku, mona tshidi Yehowa wa biluilu wamba:
“Nembengulule ne nembatete,+Bualu, ntshinyi tshikuabu tshindi mua kuenzela muana wa bakaji wa bantu banyi?
8 Ludimi luabu ludi mukete wa lufu udi wamba malu a dishima.
Muntu udi wakula ne muinende bua ditalala ne mukana muende,Kadi munda munda udi umualamina bua kumukuata.”
9 “Tshiena mua kubalumbuluisha bua malu aa anyi?” ke mudi Yehowa ukonka.
“Tshiena* mua kudisombuela kudi tshisamba tshia nunku anyi?+
10 Nengase muadi ne nendile bua mikunaNe nengele kasala ka muadi* bua mpata ya mu tshipela ya kudishila nyama,Bualu mbayoshe, nunku muntu nansha umue kena upitshilamu,Ne muadi wa bimuna kawena umvuika.
Nyunyi ya muulu ne nyama mminyeme; mmiye.+
11 Nemvuije Yelushalema mishiki ya mabue,+ muaba wa kusombela wa mibuabua,+Ne nenshiye bimenga bia Yuda munda mutupu, kakuyi muntu musombelamu.+
12 Nnganyi udi ne meji makumbane bua kujingulula bualu ebu?
Nnganyi uvua mukana mua Yehowa muambile bualu ebu, bua yeye kubuamba?
Bua tshinyi buloba mbubutuke?
Bua tshinyi mbuoshike anu bu tshipela,Muntu kayi mua kupitshilamu?”
13 Yehowa wakandamuna ne: “Mbua dibenga diabu dia mukenji wanyi* umvua muteke kumpala kuabu, ne bualu ki mbawulonde ne batumikile dîyi dianyi.
14 Kadi, bakalonda mioyo yabu ne tshitshiu,+ ne bakalonda mpingu ya Bâla, bu muvua batatuabu babalongeshe bua kuenza.+
15 Nunku, mona tshidi Yehowa wa biluilu, Nzambi wa Isalele, wamba: ‘Mona ndi ndisha bantu aba mutshi wa bululu, ne nembanuishe mâyi malunga.+
16 Nembatangalaje munkatshi mua bisamba bidibu bobu ne batatuabu kabayi bamanye,+ ne nentume muele wa mvita panyima pabu too ne pandi mbabutula.’+
17 Mona tshidi Yehowa wa biluilu wamba:
‘Enzayi malu ne lungenyi.
Bikidishayi bakaji badi bela tusala tua muadi,*+Ne bikidishayi bakaji bapiluke bua balue,
18 Bua balue lukasa ne batuashile muadi,Bua mêsu etu apuekeshe binsonjiNe bilafinyi bietu bimatshishe mâyi.+
19 Bualu dîyi dia muadi didi diumvuika difumina mu Siona+ ne:
“Ke mutudi babutuke nunku!
Ke mudi bundu buetu bupite bungi nunku!
Bualu tudi bashiye buloba, ne mbupule nzubu yetu.”+
20 Nuenu bakaji, telejayi dîyi dia Yehowa.
Ditshi dienu ditabe dîyi dia mukana muende.
Longeshayi bana benu ba bakaji muadi eu,Ne longeshanganayi kasala ka muadi aka.*+
21 Bualu lufu ndubande, lubuelele pa madidishi etu;Ndubuele mu bibumba bietu bikoleshaBua kuangata bana betu mu misesuNe bansongalume mu miaba ya tshinsangansanga.’+
22 Amba ne: ‘Mona tshidi Yehowa wamba:
“Bitalu bia bantu nebikuluke bu tumvi panshi mu mpata,Bu mulongo wa ntete yitshidibu bakoselaku panyima pa munowi,Kakuyi muntu wa kubisangisha.”’”+
23 Mona tshidi Yehowa wamba:
“Muena meji kaditumbishi bua meji ende;+Tshilobo katshiditumbishi bua bukole buatshi;Ne mubanji kaditumbishi bua bubanji buende to.”+
24 “Kadi muntu udi uditumbisha aditumbishe bua bualu ebu ne:
Udi ne busunguluji ne mmummanye,+Ne: meme ndi Yehowa, Yeye udi uleja dinanga dia lulamatu, kulumbuluisha kuakane, ne buakane pa buloba,+Bualu ndi nsanka bua malu aa,”+ ke mudi Yehowa wamba.
25 “Monayi! Matuku adi alua,” ke mudi Yehowa wamba, “ne nennyoke muntu mutengula yonso, kadi udi kayi muanji kutengudibua+
26 ne Ejipitu+ ne Yuda+ ne Edome+ ne bena Amona+ ne Moaba+ ne bantu bonso batu ne nsuki miela biketu mu nseke ya mutu badi basombele mu tshipela;+ bualu bisamba bionso ki mbitengula, ne ba mu nzubu wa Isalele bonso ki mbatengula mu muoyo+ to.”
Note
^ Anyi “Anyima wanyi kena.”
^ Anyi “musambu wa madilu.”
^ Anyi “dilongesha dianyi.”
^ Anyi “misambu ya madilu.”
^ Anyi “musambu wa madilu eu.”
