Bansonga, ntshinyi tshinuenza ne muoyo wenu?

NSONGA mukuabu wakamba ne: “Ndi nkeba bua kuikala ne nsombelu muimpe menemene.” Wewe pebe udi musue kuikala ne nsombelu wa buena eu, ki mmomu anyi? Kadi mmunyi muudi mua kupeta nsombelu “muimpe menemene” wa nunku? Udi mua kubala mu bikandakanda, kumvuila ku tudiomba ne kudi binebe, pamu’apa nansha kudi balongeshi benu ne: bua kupeta nsombelu eu, mbimpe kuikala ne makuta a bungi ne mudimu muimpe, bua bakubale pebe bu kampanda.

Kadi Bible udi udimuija bansonga ne: kukeba biuma ‘nkuipata kua lupepele.’ (Muambi 4:4) Tshia kumanya ntshia se: bansonga batu bapeta biuma ne lumu kabatu nansha ba bungi to. Misangu mivule, aba batu babipeta batu balua kunyingalala bamba ne: bavua badishime bikole. Nsonga mukuabu wa mu ditunga dia Grande-Bretagne wakalonga tulasa tua bungi tua iniversite udi wamba ne: “Bubanji budi anu bu mushete wa munda mutupu. Paudi utangilamu, kamuena tshintu.” Bulelela, mudimu udi pamu’apa mua kupetesha muntu bubanji ne lumu. Kadi kawena mua kukujikijila “bupele [buebe] bua mu nyuma” to. (Matayo 5:3, NW) Kabidi, 1 Yone 2:17 udi wamba ne: “Buloba budi bujimina.” Nansha wewe mua kuikala ne nsombelu mulenga mu buloba butudi ebu, bionso abi nebikale anu bia tshitupa tshîpi.

Muambi 12:1 udi ubela bansonga ne: “Vuluka Mukufuki webe pautshidi nsonga.” (Mukanda wa Mvidi Mukulu [Katolike, MMM]) Bulelela, kuenzela Yehowa Nzambi mudimu ke tshintu tshimpe menemene tshia wewe kuenza ne muoyo webe. Kadi, mbimpe ukumbaje malu malomba bangabanga ne wewe kukumbana bua kuenza mudimu wa Nzambi. Mmunyi muudi mua kufika ku diakumbaja? Ne mmudimu wa mushindu kayi uudi mua kuenzela Nzambi?

Malu a kukumbaja bua kulua Ntemu wa Yehowa

Tshia kumpala, udi ne bua kupeta dijinga dikole dia kuenzela Nzambi mudimu, kadi dijinga edi kaditu didiluila nkayadi to, nansha baledi bebe buobu bikale bena Kristo. Udi ne bua kudia malanda ne Yehowa. Nsongakaji mukuabu udi wamba ne: “Kusambila kudi kuambuluisha muntu bua kuikalaye mu malanda mashême ne Yehowa.”​—Musambu 62:8; Yakobo 4:8.

Lomo 12:2 udi uleja bualu bukuabu buudi ne bua kuenza. Udi wamba ne: “Numanye mua kujingulula tshidi [Nzambi] musue, tshidi tshimpe, tshidi tshimusankisha ne tshidi tshiakane tshishiki.” (Muanda Mulenga Lelu)  Ukadiku muelakane dikuabu dituku bua kuitaba amue malu avuabu bakulongeshe anyi? Nunku londa mubelu wa mu Bible eu bua ‘umanye mua kudijinguluila’ ne: malu aa adi malelela! Ikala ukebulula malu. Ikala ubala Bible ne mikanda ya kumulonga nayi. Kadi kulonga malu a Nzambi kakuena anu bua kupeta dimanya to. Ikala welangana meji pa malu audi ubala bua kushindamawu kashidi mu mutshima webe. Bualu ebu nebuvudije dinanga diebe dia Nzambi.​—Musambu 1:2, 3.

Pashishe, enza bua kumanyisha bantu bakuabu (bu mudi balongi benu) malu audi ulonga aa. Udi kabidi ne bua kuyisha ku nzubu ne ku nzubu. Pamu’apa, udi mua kumvua bundu musangu wa kumpala paudi upetangana ne mulongi wenu mu mpukapuka paudi uyisha. Kadi Bible udi utubela bua kubenga ‘kufua bundu bua lumu luimpe.’ (Lomo 1:16) Mukenji uudi utuadila bantu ki mmukenji udi ubapandisha ne ubapetesha ditekemena anyi? Kadi tshiudi ufuila bundu ntshinganyi?

Bikala baledi bebe bena Kristo, se ukadi pamu’apa muye kubafila mu mudimu eu. Kadi pa kumusha dimana patupu kuyi wakula anyi diabanya bibejibeji ne trakte tshianana, kuenaku mua kuenza malu makuabu anyi? Udiku mua kuyisha ku nzubu kampanda nkayebe, ubadila muntu Bible bua kumuleja biudi umulongesha anyi? Biwikala kuyi wenza nunku, keba diambuluisha kudi baledi bebe anyi kudi muena Kristo kampanda mupie wa mu tshisumbu tshienu. Difundila tshipatshila tshia kukumbaja malu malomba bua kulua muambi wa lumu luimpe kumpala kua wewe kutambula.

Kunyima kua matuku, neumvue muoyo wa kudilambula kudi Nzambi, uditshipa kudiye ne: udi musue kubanga kumuenzela mudimu. (Lomo 12:1) Kadi didilambula kaditu anu dienzekela mu musokoko to. Nzambi udi ulomba bantu bonso bua ‘kujikula [patoke] ne mukana [tshidibu bitabuje] bua bapete lupandu.’ (Lomo 10:10) Dia batismo webe, tshia kumpala udi wanji kujikula ditabuja diebe ne mukana muebe. Pashishe badi bakutambuisha mu mâyi. (Matayo 28:19, 20) Bulelela, batismo ki mbualu bua bilele to. Kadi kupinganyi tshianyima ne buôwa bua se: udi mua kulua kuenza kabidi bubi to. Wewe mueyemene Nzambi, neakupe “bukole bupite,” neakupe bukole buakuambuluisha bua wewe kunanukila.​—2 Kolinto 4:7, MMM; 1 Petelo 5:10.

Paudi utambula, udi ulua Ntemu wa Yehowa. (Yeshaya 43:10) Bualu ebu budi ne bua kutamba kushintulula malu onso audi wenza ne muoyo webe. Kudilambula mbuena kuamba ne: ‘kudipidia.’ (Matayo 16:24) Udi mua kulekela amue malu ne bimue bipatshila biuvua mudifundile ne kutuadija ‘kukeba diambedi bukalenge bua Nzambi.’ (Matayo 6:33)  Didilambula ne batismo ke bidi bitunzuluila njila wa kuenzela Nzambi mudimu mu mishindu ya bungi. Tangilabi imue ya ku mishindu eyi.

Mishindu ya kuenzela Nzambi mudimu ku dîba ne ku dîba

• Bumpanda-njila ng’umue mushindu wa kuenzela Nzambi mudimu ku dîba ne ku dîba. Mpanda-njila mmuena Kristo wa tshitembu ukadi mutambule, udi mudilongolole bua kuikala kuenza mêba 70 anyi mapite apa ku ngondo yonso mu mudimu wa diyisha lumu luimpe. Dienza mêba a bungi mu mudimu wa diyisha nedikuambuluishe bua kulengeja nyishilu ne ndongeshilu webe. Bampanda-njila ba bungi mbapete disanka bualu mbambuluishe balongi babu ba Bible bua batambule bua kulua Bantemu. Amba tung, mmudimu kayi mukuabu udi mua kufila disanka dia buena edi?

Bua kudiambuluisha, bampanda-njila ba bungi batu benza midimu ya bianza ya mêba makese. Bua kutuadija kuenza bumpanda-njila, ba bungi batu badilongolola kumpala kua dîba, balongaku mudimu kampanda wa bianza mu kalasa anyi kudi baledi babu. Biwikala wewe ne baledi bebe bamone ne: mbimpe bua wewe kulongaku kabidi tulasa tukuabu paudi ujikija tulasa tua bikadilu, enza bua tshipatshila tshiebe katshikadi tshia kupeta makuta a bungi to, kadi tshikale tshia kudikuatshisha mu mudimu webe wa kuyisha ne pamu’apa tshia kuenza mudimu wa ku dîba ne ku dîba.

Tshidi mpanda-njila wipatshila menemene mu nsombelu wende ki mmudimu wende wa bianza to, kadi mmudimu udiye wenza bua kuambuluisha bakuabu bua bapete muoyo. Bua tshinyi kubenga kudifundila tshipatshila tshia kulua mpanda-njila? Mudimu wa bumpanda-njila utu misangu ya bungi ufikisha ku midimu mikuabu ya pa buayi. Tshilejilu, bamue bampanda-njila batu baya miaba idibu bajinga bikole bamanyishi ba Bukalenge bua Nzambi. Bakuabu batu buobu balonga muakulu mukuabu bua kuenza mudimu pamue ne bena mu tshisumbu tshia muakulu eu mu ditunga diabu anyi mu ditunga dikuabu. Bushuwa, bumpanda-njila mmudimu udi upetesha muntu diakalenga!

 • Kalasa ka bamanyishi ba Bukalenge kadi kakupesha mpunga mukuabu. Mbenze kalasa kadi kenza ngondo ibidi aka bua kulongesha bampanda-njila bapiluke badi badiakaje bua kumbuka muaba udibu basombele kuya kuambuluisha muaba wonso udibu nabu dijinga. Badi anu bu badi bamba ne: “Mmeme eu! Untume!” bua kuidikija Yezu Kristo, Mumanyishi wa katshia ne katshia wakenza mudimu wa diyisha pa buloba. (Yeshaya 6:8; Yone 7:29) Kumbuka muaba utudi basombele kuya kule kudi mua kutulomba bua tuibidilangane ne nsombelu mushadile ku utuvua nende. Bilele bia muaba au, miunya ne mashika, ne biakudia bidi mua kuikala bishilangane bikole ne biuvua muibidilangane nabi. Bidi pamuapa mene mua kukulomba bua ulonge muakulu mukuabu. Kalasa aka kadi kambuluisha balume, bakaji ne bena mabaka, ba bidimu kutuadijila ku 23 too ne ku 65 bua kupeta ngikadilu ya mu nyuma yabambuluisha mu mudimu wabu ne bua kupeta mamanya enza bua bulongolodi bua Yehowa buenze nabu mudimu bikole.

• Mudimu wa ku Betele mmudimu wa bena budisuile badi ku nzubu ya filiale anyi biro bia Bantemu ba Yehowa. Bamue bena mu dîku dia Betele batu benza midimu ya dipatula mikanda ya malu a mu Bible. Bakuabu pabu batu benza midimu mikuabu bua kukuatshisha midimu ya dipatula dia mikanda edi, bu mudi midimu ya dilongolola ne dilama nzubu ne biamu bia mudimu bimpe anyi ya dipesha bena dîku dia Betele bidibu bakengela bua kuikalabu ne bukole bua mubidi. Midimu yonso eyi nya tshijila kumpala kua Yehowa. Bena ku Betele mbamanye ne: bionso bidibu benza ebi bidi biambuluisha bana babu bapite bungi ba buloba bujima.

 Imue misangu batu babikila bana betu badi ne mamanya a pa buawu bua kuenza mudimu ku Betele. Kadi ba bungi batu baya kulongelaku mudimu udibu ne bua kuenza. Badi ku Betele kabatu benza mudimu bua kupeta biuma to, kadi badi ne disanka ne bintu bidibu babapesha: biakudia, muaba wa kulala, ne tukuta tukese tua kusumba tumue tu-bintu tudibu natu dijinga. Nsonga mukuabu wa mu dîku dia Betele udi umvuija mudimu wende nunku: “Mmudimu wa dikema! Ki mbipepele bua kuwenza dituku dionso to, kadi mmudimu udi mumpeteshe masanka a bungi.”

• Mudimu wa luibaku udi upesha muntu mushindu wa yeye kuambuluisha pende mu dibaka dia nzubu ya Betele ne Nzubu ya Bukalenge. Bana betu batubu babikila ne: bena mudimu wa luibaku ke batu bambuluisha mu mudimu eu. Eu mmunga mushindu wa mudimu wa tshijila, mufuanangane ne wa bantu bakibaka Ntempelo wa Solomo. (1 Bakelenge 8:13-18) Malu adibu balongolole bua kuambuluisha bena mu mudimu wa luibaku nga muomumue ne a bena mu dîku dia Betele. Ndiakalengapu kayi nunku didi nadi bana betu ba balume ne ba bakaji aba bua kuenza mudimu eu bua butumbi bua Yehowa!

Kuatshila Yehowa mudimu ne mutshima webe wonso

Kukuatshila Yehowa mudimu ke tshintu tshitambe buimpe menemene tshia kuenza ne muoyo webe. Bua tshinyi kubengaku kudifundila tshipatshila tshia kuenzela Nzambi mudimu ku dîba ne ku dîba? Yikila ne baledi bebe, ne bakulu ba mu tshisumbu tshienu ne mutangidi wa tshijengu tshienu bua mudimu wa ku dîba ne ku dîba. Wewe musue kuya ku Betele anyi kubuela mu Kalasa ka bamanyishi ba Bukalenge, buela mu bisangilu bitubu benza bikondo bia mpungilu ya rejon bua bantu badi basue kuya miaba eyi.

Bulelela, bantu bonso kabatu anu bakumbana bua kuenza mudimu wa ku dîba ne ku dîba to. Misangu mikuabu, masama, malu a makuta ne majitu a mu dîku bitu bipangisha muntu mua kuenza mudimu eu. Nansha nanku, bena Kristo badilambule bonso badi ne bua kutumikila mukenji wa mu Bible eu: ‘Sua Mukalenge Nzambi webe ne mutshima webe wonso ne muoyo webe wonso ne lungenyi luebe luonso.’ (Matayo 22:37) Yehowa udi ukulomba bua kuenza muebe muonso bilondeshile nsombelu webe. Nunku, nansha wewe muikale ne nsombelu wa mushindu kayi, enza bua dikuatshila Nzambi mudimu dikale bualu bua kumpala mu nsombelu webe. Difundila bipatshila biudi mua kukumbaja bimpe mu mudimu webe wa Nzambi. Eyowa, ‘vuluka Mukufuki webe pautshidi nsonga,’ nenku neupete masanka adi kaayi ajika.

Padiku kakuyi kamanyinu, mvese yonso mmiangata mu Mukanda wa Nzambi. NW udi uleja New world Translation of the Holy Scriptures.