Ngumu ya Bukalenge No. 35

Bantu bonso nebananganganaku anyi?

 Dinanga dia muntu neyu ndikepele

MILIYO ya bantu badi badiumvua bapange dikuatshisha ne bende diakabi, kabayi ne kua kutuma mutu. Mukaji kampanda ngenda-mushinga muena mpasiyo wakamba ne: ‘Dimue dilolo mukaji mukamba kampanda udi musombele pabuipi nanyi kuulu kua nzubu wa bisasa wakakokola ku tshiibi tshianyi e kuamba ne: bivua bimutonde bua kusomba nkayende. Ngakamuambila patoke ne kanemu kuonso se: mvua ne mudimu. Wakalomba luse bua dinsuya diende e kuyaye.’

Bia dibungama, buine butuku abu, mukamba eu wakadishipa. Pashishe, ngenda-mushinga mukaji eu wakamba ne: uvua mupete “dilongesha dia mushinga mukole.”

Dibula dinanga dia muntu netu ditu misangu mivule ne njiwu. Mu ndululu ya bisa mu Bosnie ne mu Herzegovine, misoko ivua kumpala tshitupa tshia ditunga dia Yougoslavie, bantu bapite pa muliyo mujima bavua benzeja ku bukole bua kushiya nzubu yabu ne bakashipa bantu makumi a binunu. Kudi banganyi? “Bena mutumba netu,” ke muakasambena nsongakaji kampanda uvuabu bipate mu musoko wabu. “Tuvua babamanye.”

Mu Rwanda bakashipa bantu nkama ya binunu, misangu mivule kudi bena mutumba nabu. Tshikandakanda tshia The New York Times tshiakamba ne: “Ba-Hutu ne ba-Tutsi [bavua basombe] pamue, baselangana, kabayi bakeba bua kusungulujangana anyi kabayi mene bamanye ne: uvua Hutu nganyi ne uvua Tutsi nganyi.” “Pashishe malu e kushintuluka mu mupodi wa dîsu,” ne “dishipangana kutuadijadi.”

Bia muomumue, bena Yuda ne ba-Arabe mbasombe pamue mu Izalele, kadi bavule mbakinangane. Nsombelu udi wa muomumue ne bua bena Katolike bavule ne bena Mishonyi mu ditunga dia Irlande ne bua bisumbu bikuabu bia bungi bia bantu bidi bienda bivulangana mu matunga makuabu. Katshia mu miyuki ya kale bukua-bantu kabutu buanji kubula dinanga mushindu’eu.

Bua tshinyi dinanga dia muntu netu ndikepele?

Mufuki wetu udi ufila diandamuna. Bible, Dîyi diende, didi dibikila tshikondo tshitudi ne: “matuku a ku nshikidilu.” Etshi ntshikondo tshidi milayi ya mu Bible yamba ne: bantu bavua kuikala “kabayi ne disuangana dia ku tshifukilu.” Pa bidi bitangila “bikondo bikole mua kupita nabi” ebi, bidi Mifundu ibikila kabidi ne: “nkomenu wa ndongoluelu eu wa malu,” Yezu Kristo wakadianjila kuamba ne: “dinanga dia ba bungi nedikepele.” (Disendamija miaku ndietu.)​—2 Timote 3:1-5, NW; Matewuse 24:3, 12, Mukanda wa Mvidi Mukulu.

Nenku, dibula dinanga didiku lelu’eu ntshitupa tshia bijadiki bia se: tudi mu matuku a ku nshikidilu wa bulongolodi ebu. Diakalenga, bidi biumvuija kabidi ne: bulongolodi ebu bua bantu badi kabayi ne ditshina dia Nzambi nebabupingane mu katupa kîpi emu kudi bulongolodi bupiabupia bua buakane bulombola kudi dinanga.​—Matayo 24:3-14; 2 Petelo 2:5; 3:7, 13.

Kadi tudiku bulelela ne kabingila ka kuitaba ne: dishintuluka dia mushindu’eu nedienzeke​—ne se: bantu bonso badi mua kulonga mua kunangangana ne kusomba pamue mu ditalala umue ne mukuabu anyi?

 Dinanga dia Muntu netu​—Mbualu Bulelela

“Muntu nanyi menemene nganyi?” ke muakebejabu Yezu kudi mushikuluji wa Mikenji kampanda wa mu siekele wa kumpala. Kakuyi mpata uvua mutekemene bua Yezu kuambaye ne: ‘Mbena Yuda nebe.’ Kadi mu muyuki wa muena Samariya wa luse lua bu-wetu, Yezu wakaleja ne: bantu ba matunga makuabu badi pabu bantu netu.​—Luka 10:29-37; Yone 4:7-9.

Yezu wakazangika ne: kusakidila ku dinanga dia Nzambi, dinanga dia muntu netu didi ne bua kulombola mioyo yetu. (Matayo 22:34-40) Kadi kudiku tshisumbu kampanda tshia bantu tshikadiku tshileje bulelela dinanga dia bantu nabu anyi? Bena nkristo ba kumpala bakadileja! Bavua bamanyike bua dinanga divuabu nadi bua bakuabu.​—Yone 13:34, 35.

Netuambe tshinyi bua matuku etu aa? Kudiku muntu kampanda udi uleja dinanga difuanangane ne dia Kristo anyi? Mukanda kampanda udi wamba ne: “Mudimu wa Bantemu ba Yehowa udi dijululula ne diasulula dia Buena-nkristo bua ku ntuadijilu buenza kudi Yezu ne bayidi bende . . . Bonso mbana ba muntu.”​—Encyclopedia Canadiana.

Abi bidi biumvuija tshinyi? Bidi biumvuija ne: Bantemu ba Yehowa kabatu bitaba bua tshintu nansha tshimue​—bu mudi dikoba, ditunga, anyi tshisa—​tshibafikishe ku dikina bantu nabu. Kabena nansha mua kushipa muntu kampanda, bualu mu ngumvuilu wa mu tshimfuanyi bakadi bafule nkasu ya kudima nayi ku miele yabu ya mvita ne miele ya kukosa nayi matamba ku mafuma abu. (Yeshaya 2:4) Bushuwa, Bantemu mbamanyike bu bantu batu bela tshidia tshia kumpala bua kuambuluisha bantu nabu.​—Galatia 6:10.

Kabiena bikemesha pakamba tshiena-bualu kampanda mu tshikandakanda tshia Sacramento Union tshia mu ditunga dia Californie se: “Mbiakanyine bua kuamba ne: bu bantu bonso bikale ne nsombelu udi umvuangana ne mitabuja a Bantemu ba Yehowa dishipangana ne dikinangana bivua mua kujika, ne dinanga divua ne bua kukokesha.” Mufundi kampanda wakamba mu tshikandakanda tshia Ring tshia mu ditunga dia Hongrie ne: “Ndi mufike ku nkomenu wa se: bu Bantemu ba Yehowa bikale anu buobu nkayabu pa buloba, mvita ivua ne bua kujika, ne midimu ya bampulushi ivua ne bua kuikala anu ya dikontolola dibanda ne dipueka dia mashinyi ne difila mikanda ya njila.”

Kadi, tudi mua kuitaba ne: dishintuluka ditambe bunene dia buloba bujima nedikengedibue bikala bantu bonso ne bua kunangangana. Dishintuluka adi nedilue munyi? (Suaku utangile panyima pa dibeji edi.)

 PANANGANGANA BANTU BONSO

Disambila diakalongesha Yezu Kristo didi dileja ne: dishintuluka didi dikemesha dikadi pabuipi. Mu Muyuki wende muende lumu wa pa Mukuna, Yezu wakatulongesha bua kusambila ne: ‘Bukalenge buebe bulue. Benze pa buloba muudi musue bu mudibu benza mu diulu.’​—Matayo 6:10.

Bukalenge bua Nzambi ntshinyi? Mmbulamatadi mulelela, eu udi ukokeshila mu diulu. Ke bua tshinyi badi bamubikila ne: ‘bukalenge bua mu diulu.’ Yezu, ‘Mukalenge wa ditalala,’ mmutekibue kudi Tatuende bua kuikala mukokeshi wabu.​—Matayo 10:7; Yeshaya 9:6, 7; Musambu 72:1-8.

Ntshinyi tshiafikila bulongolodi ebu bûle ne lukuna palua Bukalenge bua Nzambi? ‘Bukalenge nebutshibule ne nebubutule’ mbulamatadi yonso minyanguke ya mu bulongolodi ebu. (Danyele 2:44) Bible udi umvuija ne: “Bulongolodi ebu budi bupita . . . , kadi eu udi wenza disua dia Nzambi udi ushala kashidi.”​—1 Yone 2:17, NW.

Bible udi wamba pa bidi bitangila bulongolodi bupiabupia bua Nzambi ne: “Bantu bakane nkayabu nebapete buloba, ne nebasombepu kashidi.” (Musambu 37:9-11, 29, NW; Nsumuinu 2:21, 22) Ntshikondo kayipu tshia butumbi tshikalaku! “Lufu kaluakuikalaku kabidi, nansha madilu nansha miadi nansha bisama kabiakuikalaku kabidi.” (Buakabuluibua 21:4, NW) Nansha bafue nebapete muoyo tshiakabidi, ne nebakudimune buloba bujima mu mparadizu muena dîna.​—Yeshaya 11:6-9; 35:1, 2; Luka 23:43; Bienzedi 24:15.

Bua kuikala ne muoyo mu bulongolodi bupiabupia bua Nzambi, tudi ne bua kunangangana, anu bu mudi mene Nzambi utulongesha mua kuenza. (1 Tesalonike 4:9) Mulongi wa Bible kampanda wa mu Orient wakamba ne: “Ndi mutekemene dîba dikala bantu bonso balonge mua kunangangana, bu mudi Bible ulaya.” Ne tudi mua kuikala batuishibue ne: Nzambi neakumbaje malaya ende! ‘Ngakamba dîyi,’ ke mudiye wamba, ‘Nendienze.’​—Yeshaya 46:11.

Kadi bua kubabidila mabenesha mu Bukalenge bua Nzambi, udi ne bua kupeta dimanya dia mu Bible, bu mudi miliyo ya bantu bena mutshima mululame benza pa buloba bujima. (Yone 17:3) Broshire wa mabeji 32 wa Ntshinyi tshidi Nzambi utulomba? neakuambuluishe. Udi mua kupeta kopi wa broshire eu pa kuuja kabeji kalongolola mu dibeji diwashiyi panyima ne kukatuma mu adrese wa pabuipi ne muaba uudi musombele.

□ Ndi musue bua kupeta broshire wa Ntshinyi tshidi Nzambi utulomba?

□ Bu nuenu mua kusua, tudi mua kumonangana bua dilonga dia Bible dia ku nzubu kabiyi kufuta mfranga.

[Mêyi a dianyisha bua tshimfuanyi mu dibeji 2]

Muedianganyi wa bingoma ne dijikangana mu Bosnie: Reuters/​Corbis-Bettmann