Eyowa, pa buloba bujima bantu bakaji ba mu Bantemu ba Yehowa miliyo ya bungi batu bayisha. Badi tshisumbu tshinene tshia bamanyishi ba lumu luimpe lua Bukalenge bua Nzambi. Misambu 68:11 udi uleja mu mêyi a buprofete bua bamanyishi aba ne: “Yehowa udi utuma dîyi; bakaji badi bamanyisha lumu luimpe badi musumba munene.”

Nansha nanku, kufuanyikiji mudimu udi bantu bakaji ba mu Bantemu ba Yehowa benza ne udi bakaji ba mu bitendelelu bikuabu benza to. Kudi dishilangana mu malu a bungi. Ndishilangana kayi adi?

Bantu badibu bayisha mbashilangane. Bakaji badi balombola mu bitendelelu, nangananga ba mu bia bukua buena Kristo batu ne midimu mu bitendelelu biabu, ne bantu badibu bayisha bobu mbena kuitabuja ba mu bitendelelu biabu abi. Kadi bantu bakaji ba mu Bantemu ba Yehowa bobu, mudimu wabu munene ngua kuyisha pambelu pa tshisumbu, mmumue ne: kuyisha bantu bonso badibu batuilangana nabu miaba mishilashilangane anyi ku nzubu ne ku nzubu.

Dishilangana dikuabu didi pankatshi pa bantu bakaji ba mu Bantemu ba Yehowa ne ba mu bitendelelu bikuabu ndia mudimu udibu nawu munda mua tshisumbu. Bakaji badi bamfumu mu bitendelelu bia mu bukua buena Kristo ne ba mu bitendelelu bikuabu, batu balombola ne balongesha bena kuitabuja babu bilele bia tshitendelelu tshiabu. Kadi bantu bakaji ba mu Bantemu ba Yehowa bobu kabatu balongesha mu tshisumbu padi bantu balume bakadi babatijibue bikalapu to. Anu bantu balume badibu basungule bu balongeshi ke batu balongesha.​—1 Timote 3:2; Yakobo 3:1.

Bible udi uleja ne: anu bantu balume ke badibu bapeshe mudimu wa kutangila tshisumbu. Mona tshivua mupostolo Paulo muleje pavuaye mufundile muenzejanganyi nende wa mudimu Tito: “Mvua mukushiye mu Kulete bua . . . kuteka bakulu mu tshimenga ne mu tshimenga.” Paulo wakaleja kabidi ne: muntu mulume yonso udibu bateke nanku udi ne bua kuikala “kayi ne bualu budibu bamubanda nabu, muikale ne mukaji umue.” (Tito 1:5, 6) Paulo wakambila Timote mêyi amue amue aa mu mukanda uvuaye mumufundile bua mushindu wa kulombola tshisumbu, wamba ne: “Muntu mulume yeye wipatshila bua kuikala mutangidi, udi ujinga mudimu muimpe. Nunku mutangidi udi ne bua kuikala kayi ne bualu budibu bamubanda nabu, ikale ne mukaji umue, . . . mukumbane bua kulongesha.”​—1 Timote 3:1, 2.

Bua tshinyi mudimu wa kulombola tshisumbu udi anu kudi bantu balume? Paulo udi wamba ne: “Tshiena nganyishila mukaji bua kulongesha anyi bua kuikala ne bukokeshi ku mutu kua mulume, kadi udi ne bua kushala mupuwe. Bualu Adama ke uvua mufukibue kumpala, pashishe Eva.” (1 Timote 2:12, 13) Nunku, dilondangana dia bifukibua didi dileja tshivua Nzambi mulongolole bua pa bidi bitangila mudimu wa kulongesha mu tshisumbu ne ku tshilombola.

Bentemu ba Yehowa badi bidikija tshilejilu tshia Yezu Kristo, Mulombodi wabu. Muyidi Luka wakafunda bua mudimu wa Yezu wamba ne: “Wakaya mu tshimenga ne mu tshimenga, mu musoko ne mu musoko, uyisha ne wamba lumu luimpe lua Bukalenge bua Nzambi.” Pashishe, Yezu wakatuma bayidi bende bua benze bia momumue: “Bakasa luendu, kupitshilabu mu tshitupa atshi, ku musoko ne ku musoko benda bamba lumu luimpe.”​—Luka 8:1; 9:2-6.

Lelu eu, Bantemu ba Yehowa bonso, balume ne bakaji badi badifila bikole bua kukumbaja mêyi avua Yezu muambe a ne: “Nebayishe lumu luimpe elu lua Bukalenge pa buloba bujima budi bantu basombele bua luikale bujadiki kudi bisamba bionso, ne pashishe, nshikidilu nealue.”​—Matayi 24:14.