“Dîyi dionso didi mu Mifundu ndifundisha kudi Nzambi ku bukole bua nyuma wende.”​—2 Timote 3:16, Nkudimuinu wa bulongolodi bupiabupia.

Mandamuna mimpe a nkonko minene itu bantu badiela.​—Nsumuinu 2:1-5.

Mibelu mimpe mu malu ebe onso a ku dituku ne ku dituku.​—Misambu 119:105.

Ditekemena dilelela bua matuku adi kumpala eku.​—Lomo 15:4.

Eyowa, bua malu asatu aa:

• Diumvuangana dia malu didi dikemesha. Batu bafunde Bible kudi bantu batue ku 40, munkatshi mua bidimu bipite pa 1 600. Ba bungi ba kudibu kabavua bamanyangane to. Pabi, malu onso adi mu Bible adi umvuangana; mudi anu tshiena-bualu tshimue tshinene.

• Miyuki milelela. Bafundi ba malu a kale batu batamba kusokoka muvuabu batshimune bena ditunga diabu. Kadi bafundi ba Bible bobu mbaleje bilema biabu ne bia bena ditunga diabu.​—2 Kulondolola 36:15, 16; Musambu 51:1-4.

• Malu adi Bible ulaya atu anu akumbana. Tshilejilu, Bible uvua muakule bua dibutuka dia tshimenga tshia Babilona bidimu bitue ku 200 kumpala kua kubutulabu tshimenga atshi. (Yeshaya 13:17-22) Bible uvua muleje muvuabu mua kukuata Babilona, kuleja too ne dîna dia mfumu uvua ne tshia kulua kukuata Babilona!​—Yeshaya 45:1-3.

  Malu makuabu a bungi avuabu balaye mmakumbane too ne mu katoba. Ki mmudi Dîyi dia Nzambi ne bua kuikala anyi?​—2 Petelo 1:21.