JAOTE Paulo nondiko kido ochiko ma roho maler nyalo miyo ng’ato obedgo. (Gal. 5:22, 23) Nowacho ni kidogo duto gin “olembe ma roho nyago.” * Olembego e ma miyo ng’ato “rwako kit dhano manyien.” (Kol. 3:10) Mana kaka yien nyago olemo ka orite maber, mano bende e kaka ng’at ma nigi roho mar Nyasaye biro bedo gi kido mabeyo mag roho maler.—Zab. 1:1-3.

Kido maber ma Paulo nokwongo wuoye en hera. Ang’o momiyo en kido maber? Paulo nowacho ni ka oonge gi hera, to en ng’at ‘manono.’ (1 Kor. 13:2) Kata kamano, hera en ang’o? Ere kaka wanyalo bedo gi hera kendo nyiso kidono pile ka pile?

Kata bed ni ok yot ahinya lero kido mar hera, Muma to lero kaka wanyalo nyiso kidono. Kuom ranyisi, Muma wacho ni hera “hore mos kendo ong’won.” E wi mano, hera ‘mor gi adiera,’ kendo “odhil e weche duto, oyie weche duto, obedo gi geno kuom weche duto, onano e weche duto.” Hera miyo ng’ato dewo jowetene, oikore konyogi, kendo ok ojwang’gi. Komachielo, joma onge hera bedo gi kido maricho kaka nyiego, ng’ayi, wich teko, wuoro, kod mako sadha. Mopogore gi kido ma richogo, hera monego wabedgo ‘ok many mana gik ma kelone ber owuon.’—1 Kor. 13:4-8.

“Nyasaye en hera.” Hera e kido maduong’ ahinya ma Jehova nigo. (1 Joh. 4:8) Gik moko duto ma ne ochueyo nyiso ni en jahera. Yo maduong’ ma Nyasaye nonyisogo ni ohero dhano en ka nooro Yesu mondo obi e piny ka mondo osandre kendo otho ne dhano. Jaote Johana nowacho kama: “Kuom wachni, hera ma Nyasaye oherowago ne onenore ayanga, ni Nyasaye nooro Wuode ma miderma e piny mondo wayud ngima kokalo kuome. Herano en kama: ok ni wan e ma wasehero Nyasaye, to Nyasaye e ma noherowa mi nooro Wuode mondo obednwa misango mar loso kuwe nikech richowa.” (1 Joh. 4:9, 10) Nikech Nyasaye oherowa, onyalo weyonwa richowa, kendo omiyowa geno, kod ngima.

Yesu bende nonyiso ni ohero dhano ka noyie timo dwach Nyasaye. Paulo nondiko niya: “[Yesu] nowacho kama: ‘Ne! eri asebiro mondo atim dwachi.’ . . . Kokalo kuom ‘dwacheno,’ koro osepwodhwa mi wabedo maler kuom ringre Yesu Kristo ma ne ochiw dichiel ma ok bi nwo kendo, mondo obed misango mar pwodho ji.” (Hib. 10:9, 10) Onge dhano moro amora ma ne nyalo nyiso hera ma kamano. Yesu nowacho niya: “Onge ng’at ma nigi hera maduong’ ma loyo ma: ni ng’ato chiwo ngimane nikech osiepene.” (Joh. 15:13) Be en gima nyalore mondo wanyis hera kaka Jehova gi Yesu kata obedo ni wan  dhano morem? Ee, nyalore! We wane ane kaka wanyalo timo kamano.

Paulo jiwowa niya: “Beduru kutimo kaka Nyasaye timo, kendo udhi nyime wuotho e hera, mana kaka Kristo bende noherowa mi nochiwore owuon nikech wan.” (Efe. 5:1, 2) ‘Wadhi nyime wuotho e hera’ sama wanyiso kidono e ngimawa ma pile ka pile. Wanyiso hera kuom timbewa to ok mana weche kende. Johana nondiko niya: “Un nyithindo matindo, ok onego wanyis hera mana gi wach kata gi lep kende, to bende gi tim kendo gi adiera.” (1 Joh. 3:18) Kuom ranyisi, ka wahero Nyasaye kod jowetewa, mano biro miyo walandnegi ‘wach maber mar Pinyruoth.’ (Mat. 24:14; Luka 10:27) Bende, wadhi nyime wuotho e hera sama wahore, wabedo mang’won, kendo ng’wonone jomoko. Mano e momiyo Muma wachonwa kama: “Mana kaka Jehova bende ne ni thuolo weyonu richou, un bende nyaka utim kamano.”—Kol. 3:13.

Kata kamano, hera ma iwuoye kae en hera madier to ok en hera ma idheyogo ng’ato. Kuom ranyisi, nyathi modhe en nyathi ma janyuol miyo gimoro amora ma odwaro. Janyuol ma ohero nyathine gadier biro rieye ka timo kamano dwarore. En adier ni Nyasaye en hera. Kata kamano, “ng’at ma Jehova ohero e mokumo mondo orieye.” (Hib. 12:6) Sama wadhi nyime wuotho e hera, wan bende warieyo jomoko ka mano dwarore. (Nge. 3:11, 12) En mana ni sama watimo kamano nyaka wapar ni wan bende wan dhano morem kendo wanyalo timo gik ma chwanyo jomoko. Kuom mano, waduto wan gi kuonde monego watimie lokruok mondo wamed nyiso ni wahero jomoko. Wanyalo timo kamano nade? We wane ane yore moko adek.

Mokwongo, kwa Nyasaye rohone maler nikech rohono e ma konyo ng’ato bedo gi hera. Yesu nowacho ni Jehova “chiwo roho maler e okang’ malach moloyo ne joma kwaye.” (Luka 11:13) Ka wakwayo Nyasaye rohone maler, kendo temo matek ‘dhi nyime wuotho ka roho chikowa,’ wabiro medo bedo johera. (Gal. 5:16) Kuom ranyisi, ka in jaduong’-kanyakla, inyalo kwayo Jehova roho maler mondo okonyi ichiw siem e yor hera. Ka in janyuol, inyalo kwayo Nyasaye roho maler mondo okonyi rieyo nyithindi e yor hera to ok gi mirima.

Mar ariyo, par ane kaka Yesu nonyiso hera kata ka ne ijare. (1 Pet. 2:21, 23) Paro ranyisi mar Kristo dwarore ahinya sama jomoko ochwanyowa kata sama otimnwa gima ok ni kare. E kinde kaka mago, penjo ma onego wapenjre en ni, ‘Yesu dine otimo nang’o e wachni? ’ Nyaminwa moro miluongo ni Leigh noneno kaka paro matut kuom penjono ka pok okawo okang’ nokonye. Owacho kama: “Chieng’ moro jatich wadwa moro nooro ne jotich wetena e-mail moro marach moting’o weche ma ketho nyinga. Wachno nowang’o iya matek. Kata kamano, ne apenjora niya, ‘Ere kaka anyalo luwo ranyisi mar Yesu kaluwore gi gima ng’atni otimona? ’ Bang’ paro matut kaka Yesu dotimo, ne ang’ado mar weyo wachno. Bang’e ne afwenyo ni kare ne onyagre gi tuo moro ma ne miyo obedo gi parruok mang’eny. Omiyo ne awacho e chunya ni samoro weche ma ne ondikogo ne ok ondiko kohero. Paro kaka Yesu nonyiso hera kata sama ne ijare nokonya mondo an bende atim kamano sama ne ochwanya.” Ka waluwo ranyisi mar Yesu kinde duto, wabiro timo gik moko e yor hera.

Mar adek, bed gi hera ma nyalo miyo ichiwri ne Jokristo weteni, ma en hera ma ifwenyogo Jokristo madier. (Joh. 13:34, 35) Kaluwore gi wachno, Muma jiwowa ni wabed gi paro machal gi ma Yesu ne nigo. Ka nowuok e polo, “noweyo duto ma ne en-go” nikech dhano kendo noyie timo kamano “nyaka e  tho.” (Fil. 2:5-8) Ka waluwo ranyisi mar Kristo, mano biro miyo wane jomoko kaka Yesu nonenogi kendo wabiro keto dwachgi obed motelo ne magwa. Gin ber mage mamoko ma wayudo ka wabedo gi hera?

Hero jomoko miyo wayudo gueth mang’eny. Ne ane ranyisi ariyo ma luwogi:

• RIWRUOK MAR OWETE E PINY NGIMA: Nikech waherore, wang’eyo ni owete gi nyimine biro rwakowa maber e kanyakla moro amora ma wadhiye e piny ma ngima. To mano kaka wamor bedo e ‘riwruok mar owete e piny ngima’ kama ji oheroree! (1 Pet. 5:9) Hera ma kamano yudore mana e riwruok mar oganda Jehova kende.

• KUWE: Hera miyo wanano gi jowetewa kendo mano miyo wabedo gi “kuwe ma tueyowa kanyachiel.” (Efe. 4:2, 3) Wayudo kuwe ma kamano sama wan e chokruoge mag kanyakla, mag alwora, kod madongo. Donge en adier ni bedo gi kuwe ma kamano en gima kende ahinya e piny ma ji onge gi kuweni? (Zab. 119:165; Isa. 54:13) Sama watemo matek mondo wabed gi kuwe gi jomoko mano nyiso ni waherogi, to mano en gima moro Wuonwa manie polo.—Zab. 133:1-3; Mat. 5:9.

Paulo nondiko niya: ‘Hera gero ji.’ (1 Kor. 8:1) Ere kaka hero timo mano? E Jo-Korintho mokwongo sula mar 13, ma jomoko luongo ni “Zaburi mar Hera,” jaote Paulo nolero kaka hera gero ji. Herano miyo watimo gik ma konyo jomoko. (1 Kor. 10:24; 13:5) E wi mano, nikech hera dewo jomoko, ohore mos, kendo ong’won, omiyo joot bedo joma oherore, kendo omiyo kanyakla bedo gi kuwe kod winjruok maber.—Kol. 3:14.

Hera ma waherogo Nyasaye e ma gerowa waduto. Hera ma kamano miyo joma owuok e ogendni kod pinje mopogore opogore bedo mamor tiyo ne Jehova gi “chuny achiel.” (Zef. 3:9) Wang’aduru mar dhi nyime nyiso kido maberni ma roho maler konyowa mondo wabedgo pile ka pile.