1. En wach mane ma nonyiswa e romo mar higa ka higa ma 2023?

 E ROMO mar higa ka higa ma 2023, a nolernwa weche moko e wi yiewa kendo nolandnwa weche moko mabeyo motudore gi tij lendo. Kuom ranyisi, ne wapuonjore ni nitie joma biro yudo thuolo mar riwore gi jotich Jehova kata mana bang’ koseketh Babulon Maduong’. Bende, nonyiswa ni chakre Novemba higa 2023, jolendo ne dhi mana nyiso ka be ne gilendo kendo wacho kwan mag jopuonjre mag Muma ma gitayo sama gigolo ripot. Be lokruok ma kamano nyiso ni koro ok wakawo tij lendo gi pek? Ooyo!

2. Ang’o momiyo dwarore ni wa tij lendo ma piyo kaka odiechieng giko medo sudo machiegni? (Mariko 13:10)

² Kaka odiechienge medo kadho, e kaka tij lendo onego otim mapiyo ahinya. Nikech ang’o? En nikech kinde modong’ nok. Ne ane gima otudore gi tijwa mar lendo ma Yesu nowacho ni ne dhi timore e ndalo mag giko. (Som Mariko 13:10.) Ka luwore gi weche moko ma yudore e bug Mathayo, Yesu nowacho ni wach maber nidhi yal e piny mangima, e ka “giko” nobi. (Mat. 24:14) Giko miwuoyoe en giko mar piny marach ma Satan lochoeni. Jehova  oseketo ‘odiechieng’ kod sa’ mobiro keloe gikono. (Mat. 24:36; 25:13; Tich 1:7) Kaka kinde medo kadho, e kaka wamedo sudo machiegni gi odiechieng’no. (Rumi 13:11) Ka gikono pok ochopo, nyaka wadhi nyime lando wach maber.

3. Ang’o ma chwalowaga mondo walendi?

³ Ka waparo matut e wi tijwa mar lendo, nitie penjo moro maber monego wapenjre: Ang’o mimiyo walando wach maber? Kokete e yo machuok, hera e ma chwalowaga mondo walendi. Sama walendo, wanyiso ni wahero wach maber, wahero ji, to maduong’ie moloyo, wanyiso ni wahero Jehova kod nyinge. We wanon ane wechego moro bang’ machielo.

WALENDO NIKECH WAHERO WACH MABER

4. Wawinjoga nade sama onyiswa wach moro maber?

⁴ Be inyalo paro kaka niwinjo e chunyi ka nonyisi wach moro maber? Samoro watni moro nonyuolo nyathi, kata samoro niyudo tich moro ma nisebedo kimanyo gi kinda. Nyaka bed ni nimor ahinya michako nyiso joodu kod osiepeni wachno. Be gima kamano e ma notimoreni ka nihango winjo wach maber mar Pinyruodh Nyasaye? Wach maber mar Pinyruodh Nyasaye ok nyal pim gi wach moro amora maber?

5. Ere kaka niwinjo ka nihango puonjori adiera manie Wach Nyasaye? (Ne pichni bende.)

⁵ Tem ane paro kaka niwinjo ka nihango puonjori adiera moko manie Muma. Nipuonjori ni Wuonu manie polo oheri, odwaro ni ibed achiel kuom joma lame, osingoni ni obiro tieko lit kod chandruok, kendo ni ibiro neno joherani ma nosetho kichierogi e piny manyien, kod singo mamoko mathoth. (Mar. 10:29, 30; Joh. 5:28, 29; Rumi 8:38, 39; Fwe. 21:3, 4) Adiera ma nipuonjorigo nomori ahinya. (Luka 24:32) Nihero adiera mabeyogo kendo ne ok inyal  ling’ kodgi, kar mano, ninyisogi jomamoko.—Pim gi Jeremia 20:9.

6. Ranyisi mar Ernest gi Rose puonjowa ang’o?

⁶ Ne ane ranyisini. Owadwa moro miluongo ni Ernest, b wuon-gi notho ka en jahigni apar. Ernest wacho kama: “Mano nomiyo apenjora kama: ‘Di bed ni odhi e polo? Be nachak anene kendo?’ Nawinjoga marach sama aneno nyithindo ma nigi wuonegi.” Ernest ne dhiga e liend wuon-gi, ogo chonge piny, kae to olemo kama: “Nyasaye, akwayi, adwaro ng’eyo kama wuonwa nitie.” Bang’ ka higni ma dirom 17 nokalo nyaka wuon-gi ne tho, Ernest nochako puonjore Muma. Nomor ahinya ka nopuonjore ni jomotho ok ong’eyo gimoro amora, chal ka gima gin e nindo matut, kendo ni Muma singo ni ibiro chiergi e kinde mabiro. (Ekl. 9:5, 10; Tich 24:15) Gikone, noyudo dwoko mag penjo ma nosebedo ka chande kuom higni mang’eny! Ernest ne mor ahinya gi adiera ma nopuonjore e Muma. Jaode miluongo ni Rose bende nochako puonjore kanyachiel kode, kendo en bende nomor gi adiera mag Muma. E higa mar 1978, nobatisgi. Ne gimor ahinya nyiso wedegi, osiepegi, kod jomamoko adiera mabeyo ma ne gisepuonjore. Timo mano nomiyo Ernest gi Rose okonyo ji mohingo 70 motimo dongruok kendo ochopo e batiso.

7. En ang’o ma timorega sama hera ma waherogo adiera mag Muma ogurore e chunywa? (Luka 6:45)

⁷ Ka wahero adiera mag Muma ma gigurore e chunywa, ok wanyal ling’ kodgi. (Som Luka 6:45.) Wawinjoga mana kaka jopuonjre Yesu machon nowinjo ka ne giwacho kama: “Ok wanyal weyo wuoyo e wi gik ma waseneno kendo ma wasewinjo.” (Tich 4:20) Wahero adiera ahinya, to mano miyo wagombo nyisogi ji mathoth kaka nyalore.

WALENDO NIKECH WAHERO JI

8. En ang’o ma chwalowaga mondo wanyis ji wach maber? (Ne sanduk ma wiye wacho ni, “ Her Ji—Konygi Gibed Jopuonjre.”) (Ne picha bende.)

⁸ Wahero ji mana kaka Jehova gi Wuode bende. (Nge. 8:31; Joh. 3:16) Wabedoga mang’won gi joma ok ong’eyo Nyasaye kendo ma ‘onge geno.’ (Efe. 2:12) Joma kamago nimoga e chandruoge mag ngima, kata kamano, wan gi gima wanyalo resogigo e lwetwa ma en wach maber mar Pinyruodh Nyasaye. Nikech waherogi  kendo wang’won kodgi, mano chwalowa timo duto ma wanyalo mondo wachopnegi gi wach maber. Ote ma walandonegi nyalo miyo gibed gi geno, gibed gi ngima maber sani, kendo miyogi geno mar yudo “ngima madier,” ma en ngima mochwere e piny manyien mar Nyasaye.—1 Tim. 6:19.

9. En siem mane ma walando e wi kinde mabiro, to nikech ang’o? (Ezekiel 33:7, 8)

⁹ Hera ma waherogo ji bende chwalowa mondo wanyisgi ni giko mar piny marachni okayo machiegni. (Som Ezekiel 33:7, 8.) Wawinjoga lit ne ji duto moriwo nyaka jirendewa kod wedewa ma ok gin Joneno. Ng’enygi odak e ngima ma pile kendo ok ging’eyo “masira maduong’” ma biro, ma en masira “ma pok ne otimore a chakruok piny nyaka sani, bende ok nochak otimre kendo.” (Mat. 24:21) Wadwaro ni ging’e gik ma biro timore e kinde mar ng’ado bura; ibiro kwong tiek dinde mag miriambo, kae to iketho piny marachni. (Fwe. 16:14, 16; 17:16, 17; 19:11, 19, 20) Walamo ni ji mang’eny kaka nyalore owinj siem ma wamiyogi kendo giriwre kodwa e lamo Jehova. To nade joma ok winj siem ma wamiyogi e kindegi, moriwo joodwa ma wahero?

10. Ang’o momiyo en gima dwarore ahinya mondo wadhi nyime chiwo siem?

¹⁰ Mana kaka nolernwa e sula mokalo, samoro Jehova biro reso jogo moloko chunygi kendo chako lame bang’ neno kethruok mar Babulon Maduong’. Ka en kamano, kare dwarore ahinya ni wadhi nyime chiwonegi siem. Par wachni: Samoro e kinde mabiro gibiro paro gik ma wanyisogi sani. (Pim gi Ezekiel 33:33.) Samoro gibiro paro siem ma ne wamiyogi, to mano nyalo miyo gikaw okang’ mar riwore kodwa e lamo maler ka giko pok ochopo. Mana kaka mabus ma nodak Filipi noloko chunye mana bang’ “yiengni maduong’ mar piny,” samoro joma ok winjwa e kindegi biro loko chunygi e kinde mibiro keth Babulon Maduong’.—Tich 16:25-34.

WALENDO NIKECH WAHERO JEHOVA KOD NYINGE

11. Ere kaka wamiyo Jehova duong’, luor, kod teko? (Fweny 4:11) (Ne pichni bende.)

¹¹ Gima duong’ momiyo walando wach maber en nikech wahero Jehova Nyasaye kod nyinge maler. Waneno tijwa mar lendo kaka yo ma wapakogo Nyasachwa ma wahero. (Som Fweny 4:11.) Wayie gi chunywa duto gi weche ma malaika manie  polo nowacho ni Jehova Nyasaye owinjore oyud duong’, luor, kod teko kowuok kuom joma lame gadier. Wamiyo Jehova luor gi duong’ sama wanyiso jomamoko ni en e ma “[nochueyo] gik moko duto” kendo ni wangima nikech en. Wamiyo Jehova teko ma wan-go sama watiyo gi thuolowa, tekowa, kod mwanduwa e tij lendo ka luwore gi nyalowa. (Mat. 6:33; Luka 13:24; Kol. 3:23) Kuom adier, wawuoyoga e wi Jehova Nyasaye nikech wahere. Bende, wawinjoga ka wagombo nyiso jomamoko nyinge kod tiend nyingno. Nikech ang’o?

12. Ere kaka wamiyo nying Jehova bedo maler e tijwa mar lendo?

¹² Hera ma waherogo Jehova chwalowa mondo wami nyinge obed maler. (Mat. 6:9) Wadwaro ni waket nying Jehova obed maler sama wakwedo miriambo ma Satan wacho kuome. (Cha. 3:1-5; Ayub 2:4; Joh. 8:44) Sama walendo, gombowa maduong’ en riwo Jehova lwedo kendo nyiso joma oyie winjowa adiera e wiye. Wadwaro ni ji duto ong’e ni kite maduong’ en hera kendo ni ong’adoga bura kare. Wagombo bende ni ging’e ni machiegnini, Pinyruodhe biro tieko chandruoge duto mag dhano kendo kelo kuwe kod mor. (Zab. 37:10, 11, 29; 1 Joh. 4:8) Sama wanyiso jomamoko adiera e wi Jehova, wamiyo nyinge bedo maler. Bende, wabedo gadier ni wadak ka luwore gi nyingwa. E yo mane?

13. Ang’o momiyo en gueth bedo achiel kuom Joneno mag Jehova? (Isaya 43:10-12)

¹³ Jehova oseyierowa mondo wabed ‘jonenone.’ (Som Isaya 43:10-12.) Higni moko mokalo, barua moro mowuok kuom Bura Matayo nowacho kama: “Gueth maduong’  moloyo ma wan-go en ni iluongowa ni Joneno mag Jehova.” c Ang’o momiyo wawacho kamano? Ne ane ranyisini. Kidwaro ni ng’ato obedni janeno e kes ma in-go e kot, ibiro yiero ng’at ming’eyo maber kendo migeno ni biro wacho adiera e wiyi. Kuom yierowa mondo wabed Jonenone, Jehova nyiso ni ong’ewa maber kendo ogeno ni wabiro nyiso jomamoko ni en e Nyasaye madier. Wamor ahinya sama iluongowa ni Joneno mag Jehova, kendo mano miyo watiyo gi thuolo moro amora ma wayudo mondo wanyis jomamoko nying Jehova kendo kwedo miriambo duto mosebed kiwacho kuome. Sama watimo kamano, wanyiso ni wadak ka luwore gi nyingwano!—Zab. 83:18; Rumi 10:13-15.

WABIRO DHI NYIME LENDO NYAKA GIKO

14. Gin gik mage mabeyo ma warito neno e kinde mabiro?

¹⁴ Nitie gik mabeyo miwuoro moritowa e kinde mabiro! Nikech Jehova biro guedho kindawa, wageno neno ji mang’eny ka rwako adiera ka pok masira maduong’ ochakore. Bende, en gima morowa ahinya ni e kinde masira maduong’ ma biro bedo e kinde matekie moloyo, wabiro neno ka ji mang’eny kwedo Satan kendo riwore kodwa e pako Jehova.​—Tich 13:48

15-16. En ang’o ma wabiro dhi nyime timo, to wabiro time nyaka karang’o?

¹⁵ Wan gi tich monego watim ka kindego pok ochopo, tich ma ok wanachak watim kendo, tiende ni lando wach maber e wi Pinyruodh Nyasaye e piny duto. Kata kamano, onego wadhi nyime miyo ji siem e wi gik ma biro timore e kinde mabiro. Ji onego ong’e ni giko piny marachni medo kayo machiegni. Kae to ka kinde mag ng’ado bura ochopo, gibiro ng’eyo ni wach ma ne walando nowuok kuom Jehova Nyasaye.—Eze. 38:23.

¹⁶ Koro, en ang’o ma wang’ado ni wabiro timo? Nikech wahero wach maber, wahero jowetewa, to moloyo, nikech wahero Jehova kod nyinge, wabiro dhi nyime lendo gi kinda nyaka chop chieng’ ma Jehova nowacho ni, “Oromo!”