Mokwongo ne Jo-Korintho 14:1-40
14 Lawuru hera, kendo dwaruru matek mich mag roho, to moloyo, mondo ukor wach.+
2 Nimar ng’at ma dhum gi dhok mopogore opogore wuoyo gi Nyasaye to ok dhano, nikech onge ng’at ma winje,+ to owacho weche maler moum+ kokalo kuom roho.
3 Kata kamano, ng’at ma koro wach gero ji, kendo ojiwo ji, kendo ohoyo ji gi wechene.
4 Ng’at ma nigi mich mar dhum gerore owuon, to ng’at ma koro wach gero kanyakla.
5 Koro daher ni uduto ubed gi mich mar dhum gi dhok mopogore opogore,+ kata kamano daher moloyo ni mondo ukor wach.+ Kuom adier, ng’at ma koro wach duong’ moloyo ng’at ma dhum, mak mana ka oloko wechego mondo ogergo kanyakla.
6 To owetena, ka abiro iru ka adhum gi dhok mopogore opogore, en ber mane ma datimnu ka ok awuoyo kodu gi fweny,+ kata gi ng’eyo,+ kata gi koro wach, kata gi puonj moro?
7 Mano bende e kaka gik ma golo dwol to gionge gi ngima chalo, obed asili kata nyatiti. Ka ok opog dwond moro ka moro kuomgi, ere kaka inyalo fweny dwol mar asili kata mar nyatiti?
8 Nimar ka turmbeta chiwo dwol ma tiende ok ong’ere malong’o, en ng’a ma biro ikore ne lweny?
9 Kamano bende, ka ok uwuo gi dhok ma ji winjo tiende mayot, ere kaka ng’ato biro ng’eyo gima uwacho? Mano biro chalo ka gima uwuoyo gi yamo.
10 Nyalo bedo ni nitie dhok mang’eny e piny, kata kamano, onge dhok moro amora ma onge gi tiende.
11 Nikech ka ok awinj tiend wach miwacho, abiro chalo wendo ne ng’at ma wuoyo, kendo ng’at ma wuoyono biro bedona ka wendo.
12 Kamano bende, nikech ugombo ahinya bedo gi mich mag roho, dwaruru matek mich mogundho ma biro gero kanyakla.+
13 Kuom mano, ng’at ma dhum gi dhok mopogore opogore, olem mondo obed gi nyalo mar lokogi.+
14 Nikech sa ma alemo ka adhum gi dhok mopogore opogore, mich mara mar roho e ma lemo, to pacha ok tim gimoro.
15 Kare ang’o monego otimre? Abiro lemo ka atiyo gi mich mar roho, to abiro lemo gi pacha bende. Abiro wero wende pak ka atiyo gi mich mar roho, to abiro wero wende pak gi pacha bende.
16 Nikech ka ichiwo pak kitiyo gi mich moro mar roho, ere kaka ng’at manie dieru ma ok ong’eyo tiend gima uwacho biro goyo, “Amin” ne erokamano mugoyo?
17 Adier, isegoyo erokamano e yo maber, to ok iger ng’at machielo.
18 Agoyo ne Nyasaye erokamano ni adhum gi dhok mang’eny moloyo kaka uduto utimo.
19 Kata kamano, ka an e kanyakla, dibed maber moloyo ka awacho weche abich gi pacha mondo apuonjgo jomamoko ka ahulonegi gi dhoga, kar tiyo gi weche aluf apar ka adhum gi dhok mopogore opogore.+
20 Owetena, kik ubed nyithindo e pachu,+ to beduru nyithindo kuom wach richo;+ kendo ubed jo ma dongo e pachu.+
21 Ondik e Chik niya: “Jehova* owacho kama, ‘Anawuo gi jogi ka atiyo gi dhok ma wendo, kod dho jo ma kia, to e ma pod gibiro tamore winja.’”+
22 Kuom mano, dhum gi dhok mopogore opogore ok en ranyisi ne jo ma ni e yie,+ to en ranyisi ne jo ma ok ni e yie, to koro wach ok en mar jo ma ok ni e yie, to en mar jo ma ni e yie.
23 Omiyo, ka kanyakla mangima ochokore kamoro achiel kendo uduto udhum gi dhok mopogore opogore, kae to ji ajia kata jo ma ok ni e yie odonjo kanyo, donge gibiro wacho ni neko omakou?
24 To ka uduto ukoro wach kendo ng’at ma ok ni e yie kata ng’ato ang’ata odonjo kanyo, obiro fwenyo ni irieye kendo inone adimba gi ji duto.
25 Eka weche mopondo e chunye biro fwenyore, kendo obiro podho piny auma kae to olamo Nyasaye kohulo ayanga niya: “Adier, Nyasaye ni e kindu.”+
26 Owetena, kare en ang’o monego otimre? Sa muchokoru kanyachiel, ng’at moro nigi zaburi, machielo nigi puonj moro, machielo nigi fweny moro, machielo nigi mich mar dhum gi dhok mopogore opogore, to machielo nigi mich mar loko tiend dhok.+ Gik moko duto mondo otimre e yo ma gero kanyakla.
27 To ka nitie ng’at ma dhum, ji ariyo kata adek e ma mondo owuo ka giwilore, to ng’ato nyaka lok dhokgo.+
28 To ka onge jaloko, jalo nyaka ling’ thi e kanyakla kendo owuo gi chunye owuon kod Nyasaye.
29 Jonabi ariyo kata adek+ mondo okor wach, kae to jomamokogo ofweny tiend wechego.
30 To ka ng’at machielo oyudo fweny moro sa ma obet kanyo, ng’at ma fwenyno onwang’o ka wuoyo mondo oling’.
31 Nimar uduto unyalo koro wach ka utimo kamano ng’ato bang’ nyawadgi, mondo ji duto opuonjre kendo giduto giyud jip.+
32 Kendo mich mag roho ma jonabi tiyogo, onego giti kodgi e yor ritruok.
33 Nimar Nyasaye ok tim gik moko e yo ma ok ochanore, to en Nyasach kuwe.+
Mana kaka timore e kanyakla duto mag jo maler,
34 mon mondo oling’ ei kanyakla, nimar ok oyienegi wuoyo.+ Kar mano, gibolre e bwo chwo+ mana kaka Chik bende wacho.
35 Ka po ni gidwaro puonjore wach moro, onego gipenj chwogi ka gin pacho, nimar en gima kelo wich-kuot ka dhako wuoyo e kanyakla.
36 Be un e ma wach Nyasaye noa kuomu, koso uparo ni wachno nochoponu kendu?
37 Ka nitie ng’at ma paro ni en janabi kata ni en gi mich mag roho, nyaka oyie ni weche ma andikonugi gin chik Ruoth.
38 To ka nitie ng’at ma ochayo wechego, ibiro chaye.*
39 Omiyo, owetena, dwaruru matek mich mar koro wach,+ to kik utam ng’at ma dhum gi dhok mopogore opogore.+
40 To weuru mondo gik moko duto otimre e yo mobidhore kendo mochanore maber.+
Weche Moler Piny
^ Som Apendiks A5.
^ Kata nyalo bedo, “Ka ng’ato ok ong’eyo wachni, enosik ka ok ong’eyo.”
