Jeremia 44:1-30
44 Ma e wach ma nobiro ne Jeremia ma nonego onyis Jo-Yahudi duto ma nodak e mier mag Migdol,+ Tapanhes,+ Nof,*+ kod Pathros+ e piny Misri:+
2 “Jehova Nyasach oganda lweny, Nyasach Israel owacho ni, ‘Useneno masiche duto ma nakelo ne Jerusalem+ kod mier duto mag Juda, kata mana sani pod gikethore kendo onge ng’at modak e igi.+
3 Ne atimo kamano nikech jo ma nodak kuondego notimo gik maricho mondo giwang’go iya. Ne gichiwo misengni,+ kendo tiyo ne nyiseche mamoko ma gin, kata un, kata kwereu ok nong’eyo.+
4 Ne aoronu jotichna ma jonabi nyadinwoya, mondo gikweru niya: “Weuru timo timbe makwero kendo mosina.”+
5 To ne gidagi winja kata chiko itgi, ne gidhi nyime timo richo ka gichiwo misengni ne nyiseche mamoko.+
6 Mano e momiyo ne aolo mirimba mager e mier mag Juda kod e nderni mag Jerusalem. Ne awang’ogi gi mach mi gidong’ ka gikethore nyaka kawuononi.’+
7 “Koro ma e gima Jehova Nyasach oganda lweny, Nyasach Israel penjou, ‘Ang’o momiyo ukelo masira maduong’ni kuomu uwegi? Ok ung’eyo ni masirani nyalo nego chwou, mondeu, nyithindu madongo kod mayom e Juda, mi urum chuth?
8 Ang’o momiyo uwang’o iya gi gik ma lweteu timo kuchiwo misengni ne nyiseche mamoko e piny Misri ma sani udakie? Ubiro lal nono, kendo ji biro jarou kendo nenou kaka oganda mokuong’ e piny mangima.+
9 Dibed ni wiu osewil gi gik maricho ma un gi mondeu,+ kendo ma kwereu, kaachiel gi ruodhi mag Juda+ gi mondegi+ notimo e piny Juda, kod e nderni mag Jerusalem?
10 To nyaka kawuononi pok uboloru kata luora.+ Kendo pod utamoru luwo chikena kod buchena ma ne amiyo kwereu.’+
11 “Omiyo, ma e gima Jehova Nyasach oganda lweny, Nyasach Israel owacho, ‘Aseng’ado ni abiro kelonu masira, mondo atiek Juda duto.
12 Abiro tieko bende Jo-Juda modong’ moseramo ni nyaka gidhi gidag Misri, gibiro tho e piny Misri.+ Ligangla kod kech e ma biro tiekogi; ligangla kod kech biro nego ji duto, chakre ng’at matinie mogik nyaka ng’at maduong’ mogik. Gibiro lokore gima bwogo ji, kendo ji biro jarogi, yanyogi, kendo nenogi kaka oganda mokuong’.+
13 Abiro kumo jo ma odak Misri gi ligangla, kech, kod tuo malich,+ mana kaka ne akumo Jo-Jerusalem.
14 Onge kata ng’ato achiel kuom jo ma odhi Misri, ma biro tony ma dog e piny Juda. Gibiro gombo dok Juda mondo gidag kuno, to ok ginidogi. Jo manok ma biro tony kende e ma biro dok.’”
15 Eka chwo duto ma nong’eyo ni mondegi ne chiwoga misengni ne nyiseche mamoko, gi mon ma noyudo ochung’ kanyo, ma noloso oganda maduong’, kaachiel gi ji duto ma nodak Pathros+ e piny Misri,+ ne odwoko Jeremia niya:
16 “Wadagi winjo gimoro amora ma inyisowa e nying Jehova Nyasaye.
17 Kar mano, wabiro timo gik moko duto ma wasesingore gi dhowa ni wabiro timo. Wabiro chiwo misengni ne Ruoth ma Dhako mar Polo,* kendo wanaolne chiwo miolo,+ mana kaka kwerewa, ruodhiwa, kod jotendwa ne jotimo e mier mag Juda kod e nderni mag Jerusalem. E ndalogo ne wan gi chiemo mogundho, kendo ne waonge gi chandruok moro amora.
18 To nyaka ne wawe chiwo misengni ne Ruoth ma Dhako mar Polo,* kaachiel gi chiwo miolo, wasedoko modhier kendo ligangla gi kech osenegowa.”
19 Mon-go nomedo wacho niya: “Donge chwowa ne oyienwa chiwo misengni ne Ruoth ma Dhako mar Polo,* kendo chiwone kek molos e kite owuon, kaachiel gi chiwo miolo?”
20 To Jeremia ne owacho ne ji duto ma chwo gi ma mon ma ne osedwoke kamano niya:
21 “Uparo ni Nyasaye ne ok ong’eyo wach misengni ma un, kwereu, ruodhiu, jotendu, kaachiel gi jopinyu duto ne uchiwo e miech Juda kod e nderni mag Jerusalem?+ Wi Jehova ne ok owil, noparogi!
22 Ne ochopo ka ma Jehova ne ok nyal ling’ nikech richou kod gik modwanyore ma ne utimo. Pinyu osedong’ gunda malich ma bwogo ji, kendo ma ji yanyo ka kuong’o, onge ng’at modak e iye mana kaka uneno kawuononi.+
23 Masirano oseyudou kaka uneno kawuononi, nikech ne uchiwo misengni ne nyiseche mamoko, mi utimo richo e nyim Jehova. Ne ok uwinjo dwond Jehova kata luwo chikene, buchene, kaachiel gi weche ma noparonu.”+
24 Jeremia nomedo wacho ne ji duto kaachiel gi mon-go niya: “Winjuru wach Jehova un Jo-Juda duto modak e piny Misri.
25 Ma e gima Jehova Nyasach oganda lweny, Nyasach Israel owacho, ‘Gima un kaachiel gi mondeu usewacho, usetimo gi lweteu, nimar ne uwacho niya: “Wabiro chopo singruok ma ne watimo mar chiwo misengni ne Ruoth ma Dhako mar Polo,* kendo wanachiwne chiwo miolo piny.”+ Un mon, chopuru achopa singruok maru, kendo timuru kaka usesingoru.’
26 “To koro un Jo-Juda duto modak e piny Misri, winjuru gima Jehova wacho: ‘“Akuong’ora e nyinga ma nigi duong’,” Jehova owacho, “ni ok nachak ayie ne Ja-Juda moro amora+ modak Misri okuong’re gi nyinga ni, ‘Mana kaka Jehova Wuon Loch Duto en Nyasaye mangima!’+
27 Abiro neno ni giyudo masira to ok gima ber.+ Jo-Juda duto modak e piny Misri biro tho gi ligangla, gi kech, kendo ginirum chuth.+
28 To ji manok kende e ma biro tony ne ligangla mi ginidog Juda ka gia Misri.+ Eka Jo-Juda modong’ ma nodhi dak e piny Misri nong’e ka an e ma ne awacho adier koso gin.”’”
29 “‘Kendo ma e ranyisi ma amiyou,’ Jehova owacho, ‘abiro kumou e pinyni, eka unung’e ni masira ma ne asingo ni abiro kelonu nobi adier.
30 Jehova owacho kama: “Abiro chiwo Farao Hofra ruodh Misri e lwet wasike, kendo e lwet jo ma dwaro nege, mana kaka ne achiwo Zedekia ruoth Juda e lwet Nebukadnezar* ruoth Babulon, ma ne en jasike kendo ma ne dwaro nege.”’”+
Weche Moler Piny
^ Kata, “Memfis.”
^ Nying ma nomi nyasaye ma dhako ma Jo-Israel ma nong’anyo ne lamo; onyalo bedo nyasaye ma ne konyo e weche nyuol.
^ Nying ma nomi nyasaye ma dhako ma Jo-Israel ma nong’anyo ne lamo; onyalo bedo nyasaye ma ne konyo e weche nyuol.
^ Nying ma nomi nyasaye ma dhako ma Jo-Israel ma nong’anyo ne lamo; onyalo bedo nyasaye ma ne konyo e weche nyuol.
^ Nying ma nomi nyasaye ma dhako ma Jo-Israel ma nong’anyo ne lamo; onyalo bedo nyasaye ma ne konyo e weche nyuol.
^ Iluonge bende ni Nebukadereza.
