Ne Jo-Efeso 3:1-21
3 Mano e momiyo an Paulo jal manie jela+ nikech Kristo Yesu kendo nikech un jo ma oa e ogendni mamoko—
2 kuom adier usewinjo wach ting’ ma ne omiya mar bedo jarit+ mar ng’wono mogundho mar Nyasaye mondo uyud ber,
3 ni Nyasaye ne oelona wach maler moum, mana kaka ne andiko motelo e yo machuok.
4 Omiyo, sa ma usomo wechegi, unyalo fwenyo kaka ng’eyo ma an-go e wi wach maler moum+ mar Kristo chal.
5 E tienge mamoko, wach moumno ne ok ong’ere ne ji, to sani oseele ne jootene maler kod jonabi kokalo kuom roho maler,+
6 wach moumno en ni, jo ma oa e ogendni mamoko bende onego oyud pok kodwa, ka wabedo jokanyo mar ringruok achiel,+ kendo waduto wayud singo mar Nyasaye e winjruok achiel gi Kristo Yesu kendo kokalo kuom wach maber.
7 Ne abedo jatich ma konyou ng’eyo wachno nikech ng’wono mogundho mar Nyasaye ma en mich mochiwo nono, ma ne omiya kaka yo monyisogo tekone.+
8 An, ma ok arom kata gi ng’at matinie mogik kuom jo maler duto,+ Nyasaye ne onyisa ng’wono mogundhono+ ni mondo ayal ne ogendni mamoko wach maber e wi mwandu ma ok nyal pim mag Kristo
9 kendo mondo ami ji one kaka weche motudore gi wach maler moumno+ chopo, ma Nyasaye ma nochueyo gik moko duto osebedo koumo kuom higni mathoth ahinya.
10 Mano notimore eka mondo sani kokalo kuom kanyakla,+ sirkande kod loje manie polo ong’e kaka rieko mar Nyasaye opogore opogore e yore madongo.+
11 Mani en kaluwore gi dwarone mochwere ma noseyango kuom wach Kristo+ Yesu Ruodhwa,
12 ma kokalo kuome wanyalo chopo ir Nyasaye ka wan gi chir kod thuolo mar wuoyo,+ nikech yie ma wan-go kuom Kristo.
13 Omiyo, akwayou ni kik chunyu nyosre nikech masiche ma ayudo nikech un, nimar mago timore mondo uyud duong’.+
14 Mano e momiyo agoyo chonga piny ne Nyasaye Wuonwa
15 ma joot duto e polo gi piny yudo nying kuome.
16 Alamo ni mondo kokalo kuom duong’ne mogundho, omi ubed motegno e dhano ma un gi ka iye,+ komiyou teko kuom rohone,
17 kendo ni kokalo kuom yieu, Kristo odag ei chunyu kuom hera.+ Gurreuru motegno+ e mise,+
18 eka mondo kanyachiel gi jo maler duto, ubed gi nyalo chuth mar ng’eyo e yo malong’o lach gi bor ma ariwa gi bor modhi malo kod tut,
19 kendo ung’e hera mar Kristo+ modhiero ng’eyo, mondo opong’u chuth gi kido duto mag Nyasaye.
20 Koro kaluwore gi teko ma Nyasaye nyiso kokalo kuomwa,+ kuom adier onyalo timo weche duto mokadho ma wakwayo kata ma waparo.+
21 Mad obed gi duong’ kokalo kuom kanyakla kendo kuom Kristo Yesu e tienge duto nyaka chieng’. Amin.