Ne Jo-Hibrania 5:1-14
5 Nimar jadolo maduong’ moro amora iyiero e kind ji mondo otinegi kuom weche motudore gi Nyasaye,+ kendo ochiw mich gi misengni mag richo.+
2 Onyalo kecho* jo ma onge ng’eyo kod joketho,* nikech en bende onyagore gi nyawo ma mage owuon,
3 kendo nikech mano, nyaka ogol chiwo mar misango nikech richo ma mage owuon mana kaka otimo ne richo mag oganda.+
4 Ng’ato ok yud tich ma nigi duong’ kamano kuom dwache owuon, to oyude mana ka Nyasaye e ma oluonge mana kaka noluongo Harun.+
5 Kamano bende, Kristo ne ok omiyore duong’ owuon+ kuom bedo jadolo maduong’, to ng’at ma nomiye duong’ en Jal ma nowachone kama: “In wuoda; kawuono asebedo wuonu.”+
6 Nimar owacho bende kamoro machielo ni, “In jadolo nyaka chieng’ e kit dolo mar Melkizedek.”+
7 E ndalo ma Kristo nodak e piny, ne olamo kosayo kendo kokwayo Jal ma ne nigi nyalo mar rese kuom tho, koywak malit kendo ka pi wang’e chuer,+ mi ne owinj lamone nikech noluoro Nyasaye.
8 Kata obedo ni ne en wuod Jalo, ne opuonjore luwo kaka Nyasaye chiko kokalo kuom chandruoge ma noyudo.+
9 Kendo bang’ ka nosekete kare chuth,+ nobedo gi tich mar kelo warruok ma nyaka chieng’ ne ji duto ma luwo wachne,+
10 nimar Nyasaye osekete jadolo maduong’ e kit dolo mar Melkizedek.+
11 Wan gi weche mogundho ma wanyalo wacho kuom Kristo, kata kamano, leronu tiendgi tek nikech winjou nok.
12 Nimar kata obedo ni chop sani onego bed ni usebedo jopuonj, pod dwarore ni ng’ato ochak opuonju puonj mag mise mag weche maler moa kuom Nyasaye,+ kendo usedok chien mi ubedo jo ma dwaro mana chak, to ok chiemo motegno.
13 Nikech ng’at ma dhi nyime mana gi madho chak kende, ok obed gi lony e wi wach makare mar Nyasaye, nimar en nyathi matin.+
14 To chiemo motegno en mar jo mosetegno, jo mosetieg nyalogi mar ng’eyo tiend weche kokalo kuom tiyo gi nyalono, mondo gipog gik makare kod gik ma ok kare.
