Joshua 7:1-26
7 Kata kamano, Jo-Israel noketho chik ma ne omigi kuom gik ma ne owinjore gikethi, nimar Akan+ wuod Karmi, ma wuod Zabdi, ma wuod Zera, ma ja dhood Juda, nokawo moko kuom gik ma ne onego okethi.+ To mano ne omiyo i Jehova owang’ gi Jo-Israel ahinya.+
2 Joshua ne ooro jomoko ka gin Jeriko mondo gidhi Ai+ man yo wuok chieng’ mar Bethel+ kendo man machiegni gi Beth-aven, konyisogi niya: “Dhiuru mondo unon pinyno.” Omiyo, jogo nowuok ma gidhi nono piny Ai.
3 Ka ne giduogo, ne ginyiso Joshua niya: “Onge tiende jolweny duto odhi e pinyno. Jolweny 2,000 kata 3,000 oromo loyo Jo-Ai. Kik ichand jolweny duto gi dhi kuno, nimar jopinyno gin mana jo manok.”
4 Omiyo, jolweny ma dirom 3,000 kama e ma nodhi. Kata kamano, Jo-Ai ne oloyogi ma giringo.+
5 Jo-Ai nonego jolwenj Jo-Israel 36. Ne ginegogi chakre dho rangagi ka giridore kodgi nyaka Shebarim. Omiyo, chir ma jolwenj Israel ne nigo nolal nono.
6 Ka Joshua nowinjo mano, noyiecho lepe mopodho piny auma e nyim Sandug Singruok mar Jehova nyaka odhiambo ka en gi jodong Israel, kendo ne gikiro buru e wigi.
7 Joshua ne okwayo Nyasaye niya: “A Jehova, Wuon Loch Duto, ang’o momiyo nigolo ogandani loka Aora Jordan mana mondo iketgi e lwet Jo-Amor mondo otiekgi? Mad ne wadong’ adong’a loka Aora Jordan!
8 A, Jehova, ng’wonna ang’wona. Ang’o ma koro dawachi ka Jo-Israel oseringo wasikgi kama?
9 Ka Jo-Kanaan kod ji duto modak e pinyni owinjo wachni, donge gibiro dinonwa ma gitiekwa kendo nyingwa biro lal nono? Initim nang’o gi nyingi maduong’ ka mano otimore?”+
10 Jehova nodwoko Joshua niya: “Ang’o momiyo ipodho piny auma kama? Chung’ malo!
11 Jo-Israel osetimo richo. Giseketho singruok+ ma ne achikogi ni giriti. Gisekwalo+ moko kuom gik ma ne owinjore okethi+ ma gipandogi ling’ ling’ e gikgi.+
12 Kuom mano, Jo-Israel ok bi loyo wasikgi. Gibiro loko ng’egi ne wasikgi ma giringi, nimar gisebedo kaka gima oket tenge mondo okethi. Abiro mana bedo kodu ka usegolo gima owinjore okethi manie kinduno.+
13 Koro, chung’ mondo idhi ipwodh oganda!+ Nyisgi ni, ‘Kiny upwodhru, nimar ma e gima Jehova Nyasach Israel owacho: “Yaye! Jo-Israel, gima owinjore okethi nie kindu. Ubiro mana loyo wasiku ka usegolo gima owinjore okethi manie kinduno.
14 Ubiro chokoru gokinyi dhoot ka dhoot, to dhoot ma Jehova oyiero+ e ma nosud machiegni. Kae to anyuola ma Jehova oyiero e dhoodno, nosud machiegni; to kuom anyuolano, joot ma Jehova noyier e ma nosud machiegni achiel-achiel.
15 To ng’at ma oyud gi gima owinjore okethi nowang’ e mach.+ Ee, nowang’e kaachiel gi gimoro amora moluongo nyinge, nimar oseketho singruok+ ma ne Jehova otimo kodgi, kendo osetimo gima kelo wich-kuot e piny Israel.”’”
16 Kuom mano, Joshua nomondo chiewo gokinyi mochoko dhoudi duto mag Israel, kae to dhood Juda e ma ne oyier.
17 Noluongo anyuola mag dhood Juda mondo osud ire, to anyuola mar Jo-Zera+ e ma ne oyier. Eka noluongo wiye udi mag Jo-Zera mondo odhi nyime achiel-achiel, mi noyier Zabdi.
18 Gikone, noluongo wiye udi mag joka Zabdi, to Akan ma wuod Karmi, ma wuod Zabdi, ma wuod Zera, ma ja-dhood Juda, e ma noyier.+
19 Eka Joshua nowacho ne Akan niya: “Wuoda, akwayi, mi Jehova Nyasach Israel duong’, kendo hulne richo ma isetimo. Asayi, wachna ane gima itimo. Kik ipanda.”
20 Akan nodwoko Joshua niya: “Kuom adier, an e ma atimo richo ne Jehova Nyasach Israel, kendo ma e gima asetimo.
21 Ka ne aneno law moro maber molos Shinar,+ gi shekel 200 mag fedha, kod dhahabu ma pekne romo shekel 50 kuom mwandu mag Jeriko, ne agombogi mi akawogi. Ne akunyo bur e hemana ma apandogie, to pesa naketo e bwogi.”
22 Kanyo gi kanyo, Joshua nooro joote modhi ng’wech e hema, kendo ne giyudo ka opand law e hemano to pesa oket e bwoye.
23 Omiyo, ne gikawo gigo ma giterogi ne Joshua gi Jo-Israel duto, kendo ne giketogi e nyim Jehova.
24 Kae to Joshua kaachiel gi Jo-Israel duto ne okawo Akan+ wuod Zera, gi fedha, gi law maberno, gi dhahabu,+ kod yawuote gi nyige, kaachiel gi dhoge, pundege, gi rombene, gi hemane, kod gimoro amora ma ne oluongo nyinge ma giterogi nyaka e Paw Akor.+
25 Joshua nopenje niya: “Ang’o momiyo ikelonwa masira malich kama?+ Kawuono Jehova biro miyo iyud masira.” Bang’ mano, Jo-Israel duto nogoye gi kite motho,+ kae to ne giwang’e e mach.+ Ne gichiele gi kite kaachiel gi joode duto.
26 Ne gidhuro kuome kite mang’eny, kendo pith mar kitego pod nitie nyaka kawuono. Bang’ timo kamano, mirimb Jehova norumo.+ Mano e momiyo iluongo kanyo ni Paw Akor nyaka kawuononi.
